الحقيقة بكل اسف انا ما جبت معاى العدة بتاعتى عشان كدة ما قادر افهم الشغلانة
بس انشاء الله البطرشق فيها الكمبرسون دى تكون الشخصية الفى بالى
Post: #3 Title: Re: يطرشِق فيك كمبرسون يخليك إنت بس ساردين Author: علاء الدين يوسف علي محمد Date: 06-06-2008, 01:47 PM Parent: #2
الجهبذ جامِع الكلِم
الحبيب ود النقر أسعد دوماً بقراءة ما يخُطه يراعك و أتابع بِشغف كل عملياتك الجراحية التجمِيلية لإزالة القُبح العالِق بكتابات البعض و السخف المُستوطِن في عقولهمو و إنشاء الله دايماً عِدة عملياتك حاضرة.
الليلة عايز أخاطبهم بما يسمونه اللغة الرمزية الكمبرسون المُتفجِّر له أكثر مِن وجهة تبلغها شظاياه ليس (الحرامي) من يسرِق الملاءة فقط بل من يسرِق أوجاع الآخرين ليتاجر بها ، و من يسرِق بسمة البعض هُنا بتدخُّلٍ سافر يُنغِّص عليه المضجع ، و من يحشِر أنفه فيما لا يعنيه سارقاً مساحات للبوح الآخر محاولاً التغلغل السرطاني الخبيث ، و القائمة تطول إن واصلنا تعريف الحرامي.
Post: #7 Title: Re: يطرشِق فيك كمبرسون يخليك إنت بس ساردين Author: علاء الدين يوسف علي محمد Date: 06-06-2008, 05:03 PM
يعيقك الله يا مُجرِم و كيف أسّع تصدِّقني و تسِرقك بطنك إنشاء الله و تخليك ديمة متألِّم حِضيري إنشاء الله يبراك و فلساً للجيوب يخدِم و العطش اليحرق الجوف يخلِّي الفقرا قايمة و قاعدة ليك تعزِم تعيقني أنا؟ يعيقك الله يا مُجرِم بي مدفع كلاشنكوف يواليك في المسيميع عاد يخليك لا سمع لا شوف و يجيك عميل من السوفيت مرسِّلو ليك غورباتشوف و شايل حٌنة حارقة معاهو يحرِق ليك قلبك و كبدك و حتي المعِدة و الشارشوف تعيقني أنا؟ نان بالله لو سألوك نان عميان من الأسواق تسوق أروتِّي في ساقية تورة يقطِّع الخناق تسوقلك داف تدُقشو تِرلة في عقبة يخليك لا ضهر لا ساق نان بالله لو سألوك ماك عارف القروش بي وين ناس بانين عمارات كيف و ناس راحات و ناس تخزين حكمتة تجيني أنا المسكين البلقِّط بي قِرِش و قِرشين تقُرشك عقرباً تلقاك فوق الريق يكون جِسمك مرطِّب تب تقُرشك سموم الصيف تخلِّلي وشيك قايم حب و قِرشاً يبلعك يزرع يلف بي جدة و الصومال يجيبك لينا تاني هِنا يرميك في الرصيف بي جاي يسلِب لحمك الفوقك يخليك بس عُضام و عصب تعيقني أنا؟ تطرشِق لي برنامج أخطط فيهو لي سنين يطرشِق فيك كمبرسون يخليك إنت بس ساردين و يطرشِق فيك بوتوجازاً يكون جنبك صفيح بنزين و ترقد ما نشوفلنا زول يقولناماشي في تحسين تعيقني أنا؟ كمان تسرِق ملاياتي؟ المِن كيسة ما انفكت ولا عارِف نقوشن كيف يفكك مننا الله اليوم قبُل باكر يخيليك لافي صيف و خريف يفِك ضُلعك تفارِق عقلك تزُك الماشي فوق عدلك زي جملاً عشاهو الزيف نفسك فاااااااااااتحة ترقد فوق ملاياتي؟ ترقد يابا في عنبر نصيحو يشابي كايس إيـدو ترقد يابا في قبراً أعـوذ ربي من هولـو وعذاب سيدو ترقد يابا في غرفة تكون مفروشة بالصُرفة ونمِلة يخُمًّو بالقُفّة
ولاتشوف جنـِّة بي عينك ولا في العتبة تتعتب عشان عملك تملِّي كعب .تسِرق الجيب تسوِّي العيب انت حرامـــــي ود الكلب انت حرامـــــي ود الكلب
Post: #8 Title: Re: يطرشِق فيك كمبرسون يخليك إنت بس ساردين Author: علاء الدين يوسف علي محمد Date: 06-06-2008, 05:12 PM Parent: #7
أخي عثمان رغيم:
حِضيري:
وهو الفلس بما يعنيه به أهل دويم ود حاج خاصةً و من بعدهم بقية مناطِق الشايقِية عامةً.
أروتِّي:
وهو العامل البسوق الساقية ليل نهار زي النبطشي.
الصُرفة:
دودة ليها صوف تسكن شجر السُنُط لو مررت قرها تنطلِق فيك آكولة في جِلدك.
Post: #9 Title: Re: يطرشِق فيك كمبرسون يخليك إنت بس ساردين Author: علاء الدين يوسف علي محمد Date: 06-07-2008, 06:06 AM Parent: #8
