Post: #1
Title: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Shamael Elnoor
Date: 06-02-2008, 09:29 AM
Parent: #0
القصة ابطالها 3 "ود الجيران – بت الجيران الشفتة – انا (المستهدفة) "
عادة ياجماعة نجد في الحلة "بت شفتة وتفتيحة وشايلها مفاتيحها" وهى مازالت صغيرة على الحاجات دي ، هذه البنت غالبا ما تكون منحدرة من اسرة غير محافظة شيئا ما ، او ربما تكون منحدرة من اسرة محافظة لدرجة الكبت فتمردت على الاسرة "المعاناة تولد الابداع" وهذه البنت عادة تمثل حائط المبكى للفتيان والفتيان وهى حلقة الوصل بحكم وضعها المتحرر ومقدرتها على الاقناع ،، كنا حينها فى المرحلة المتوسطة، والدنيا عصر كدا جاتنا بت جيرانا الشفتة والتى حبوبتي تصفها بالعينها بيضا (جريئة) ودائما تحذرنا من مرافقتها باعتبارها تمثل خطر على شرف الاسرة ، نادت على ان اتنحى بعيدا من قعدة الاسرة وفعلت فعلا حيث عملت فيها انها عايزة كتاب، خير في شنو ، قالت لي : اسمعي انا مرسلني ليك .... طبعا تعودت من هذه الشفتة تبليغي رسائل الاعجاب الشفاهية فقط لكن هذه المرة غير ، انه جواب ياجماعة ، ما ان سمعت كلمة جواب حسيت انو عندي هبوط وتصببت عرقا وارتجفت ، طبعا دونما اشعر اصترعت داخلي جينات الاسرة المحافظة فهجت ومجت وانتفضت وصريت وشي وقلت لها : كيف يعنى يرسل لي جواب الود المتخلف دا ، المهم البت المفتحة دي اقنعتني اني آخد الجواب واقرأ الحاصل فيه شنو ، وما ان فتحت الورقة المطبقة وانا اتلفت خوفا من ناس البيت ، أول كلمة تقع في عيني هى تلك الكلمة التى اجتهد فيها حتى يبتدر الخطاب بمفردة توضح لى انه مكسر وميت وميتين اهلو طالع فى البت دي ، هكذا ابتدر الجواب: ملجأي الحنون "غايتو جنس كضب" ، مافعلته هو مزقت تلك الورقة التى حسستني باني قليلة ادب وانا اردد في سري (شاف على شنو عشان يرسل لى جواب)
هكذا تريبنا على ان الجواب هو قلة ادب وفيه خدش لشرف الاسرة ،، وهكذا تربينا على ان الرجل عدو استراتيجي للمرأة ،، وهنا قلت مقولتي الشهيرة "قاتل الله الاسر المحافظة عقدونا من الرجال ، الى الآن ماقادرين نستعدل"
|
Post: #2
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Shamael Elnoor
Date: 06-02-2008, 11:18 AM
Parent: #1
|
Post: #3
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: بدرالدين كاجوري
Date: 06-02-2008, 11:49 AM
Parent: #1
شمائل النور
سلامات زكرتيني بزمن جميل وزكريات حلوة
كان عندنا بنت مفتحة ذي صاحبتك دي وكنا في المتوسط وكانت في نفس عمرنا كانت تكتب لي رسائل غرامية ولانني كنت مغمض ولا اجيد التعبير بلغة حلوة كنت انقل نفس الجواب وارجعة لها وطبعا مع توقيع المتيم والعاشق المهم هي كانت كتابة جدا وتعبيراتها جميلة وفي مرة جاءني
صديق وطلب مني كتابة جواب غرامي ولما قلت لة انني لااعرف كيف اعبر اخرج لي احد خطاباتي التي كنت انقلها وارسلها للبنت وقال لي يعني
البنت كلامها صاح كاتل الجدادة وخامي بيضها .
داك كان زمن الحب الطاهر ولكن الان مع العولمة البرسل ليك رسالة بكون احترمك
لك الود
|
Post: #4
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: tmbis
Date: 06-02-2008, 12:09 PM
Parent: #1
| Quote: حبوبتي تصفها بالعينها بيضا (جريئة) |
.. ما كانت بقولو ليها في زمنـا .. العينة قوية ..
حسع بقت عينه بيضا ..؟
بيضا معناته ما فيها اسود .. معناته ما بتشوف ..
اهـا
زي دي يودوهـا وين واللا يحبوهـا كيف..؟ ود جيرانكم دا مصدرو دا يا اما عميان يا محوص ..
يعني رجفت يداك دي .. انا اشك فيها .. أول مرة اشوف لي زول بيرجف من زول عيونو بيضا ..
أو بالاصح ..
أول مرة اشوف لي زولة ..
| Quote: هكذا تريبنا على ان الجواب هو قلة ادب وفيه خدش لشرف الاسرة ،، وهكذا تربينا على ان الرجل عدو استراتيجي للمرأة ،، وهنا قلت مقولتي الشهيرة "قاتل الله الاسر المحافظة عقدونا من الرجال ، الى الآن ماقادرين نستعدل |
اهـا
كان رسل ليك ايميل مع الزولة دي الايميل دا بيدرج في ياتو خانة من تصنيفك دا ..
لا سيمـا
لو كان في الياهووو ميل ..؟
عايني ..
الملف التحتاني دا قفل البوست .. اتصرفي واحذفيهو .. لانو الواحد عندو مزاج (مساخة) في البوست دا وعايز لما اجي تاني عشان اتماسخ .. اللقاك مرتنبة الحتة دي ..
بالمناسبة
حسع صاحبتك العينا بيضا دي وين قاعدة ..؟
|
Post: #5
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: عمر الفاروق
Date: 06-02-2008, 03:33 PM
Parent: #1
شمايل:
أول ما قريت جملتك دي :
| Quote: وتفتيحة وشايلها مفاتيحها" |
قلت قطع شك شمايل قاصدة ترتيب الأبطال كده بس إستعجلت في الكتابة :
القصة ابطالها 3 "ود الجيران – انا الشفتة – بت الجيران(المستهدفة) "..
هي الشفتنا دي كيفنها قايلاها ؟؟ ما يهو جنس كلامك الفوق ده ..
تخريمة :
شمايل شمايل ..سيدتي كييييييييف
|
Post: #6
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Shamael Elnoor
Date: 06-03-2008, 06:59 AM
Parent: #5
الفاروق ايها العزابي المندس !!
والله صدقني كنت مستهدفة بواسطة بت الجيران وودالجيران واهو انا بقوليك "تصببت عرقا وارتجفت يداي" ، ثم انو نحن كنا فى المتوسطة ، يعنى عبارة (تفتيحة وشايلها مفاتيحها) زمان ماكنت ح اقولها
بمناسبة سيدتي ، لو لقيت صفحة الابراج اديها تمبس عليك الله وصية فى الذمة
وبيني وبينك كدا رسلت كم جواب في ايامك؟؟
تمبس كبير المبرراتية
معليييييش البوست دا ما بتاع مساخة وما اظنه مقاسك ماعارفة دخلت هنا كيف ، لكن لو حابي اتماسخ معاك واوريك عروض عمرك ماشفتها افتح ليك بوست بعنوان "هاتوا ماعندكم من مساخة"
بت الجيران بتسلم عليك وقالت ليك ماتتغدى فى الموردة ، سمك الموردة غالي
|
Post: #7
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: عمر الفاروق
Date: 06-03-2008, 07:39 AM
Parent: #1
شمايل:
| Quote: واوريك عروض عمرك ماشفتها |
الظاهر انا كمان إتلخبطت واستعجلت في الترتيب والصحيح هو :
انا البرسل الجواب– بت الجيران الشفتة – ود الجيران (المستهدف) "
والله يا شمايل النصييييحة كده انا بي نسبة 90% عندي إحساس إنتي الكنتي بترسلي الجواب لي ود الجيران المسكيييين ده ..
|
Post: #8
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: اساسي
Date: 06-03-2008, 07:47 AM
Parent: #7
Quote:
والله يا شمايل النصييييحة كده انا بي نسبة 90% عندي إحساس إنتي الكنتي بترسلي الجواب لي ود الجيران المسكيييين ده .. |
والـ 10% من عندي
|
Post: #9
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: عمر التاج
Date: 06-03-2008, 09:30 AM
Parent: #1
| Quote: وهنا قلت مقولتي الشهيرة "قاتل الله الاسر المحافظة عقدونا من الرجال ، الى الآن ماقادرين نستعدل |
الاسر المحافظة ما زالت أغلبية في المجتمع السوداني
ورجالها لسه بنقبوا عن البنات المحافظات عشان يتزوجوهن
وبالمناسبة ياشمايل :
البت المتعقدة من الرجال في بيت محافظ
أفضل بكتير من المنداحة في البيوت المتحررة
(الكلام ده واقع في نظر الكثير من المثقفين المحترمين)
|
Post: #10
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: abas
Date: 06-03-2008, 10:30 AM
Parent: #1
يا شمايل
عندي صاحبي كان بحب واحده
وكان كلو يوم يشبكني من الصباح للعصر كلام عنها
قلت ليه اكتب جواب ونوديه ليها
وبرضو شفنا البنت الماسكه مفاتيحها
وقلت ليها تديني انا الجواب
وكانت تشيل منو الجواب في بص المدرسه وتديني ليه وانا نازل ارد ليه واديه ليها الصباح تديه ليه
ولليوم مافي واحد عارف الموضوع ده منهم
شفتي المافتيح وين
احسن الاسر المكبوته دي من المنفتحه ولا متحرره
راي شخصي لا اكثر ولا اقل
|
Post: #12
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: عصام دهب
Date: 06-03-2008, 11:01 AM
Parent: #10
تحياتي يا شمائل ..
و الله يسامحك قلبتي علينا المواجع ..
و كل ما تجيئ سيرة بنات الجيران أو بنات الحلة عموم طوالي بتذكر قصتي دي ..
Quote: مراهقتنا كانت بريئة ولذيذة لكنها أيضاً كانت عويرة إلى الحد الذي لا يمكنك فيه إعلان عواطفك المكبوتة تجاه إحدى بنات الجيران و الحلة إلا سراً عبر خطاب تنتقي له الكلمات إنتقاء حبات المسبحة في تناسقها و ذلك كله ( عشان تقتنع ) .
لا أنكر أنني كنت من بين أولئك الذين أخذتهم الهاشمية على حين غره ( دي معناها شنو ؟؟ ) و حينما قررت أن أكتب خطاباً لبنت جيراننا أردته أن يكون أكثر إقناعاً لأني أعرف من أين يؤكل كتف حبها ، بعد جهد جهيد في إنتقاء عبارات مثل ( هانذا أقدم أوراق إعتمادي سفيراً فوق العادة ومفوضاً من مملكة الحب إلى قلبك ) كان أن كتبت خطاباً خترياً و أرفقت معه هدية حتماً سترضي غرور تلك البنت ،، هدية كانت علبة بسكويت ( كرم ) فقد كنت مييقناً أن فارسة أحلامي سوف تحبني كما هي تحب البسكويت بجنون .
في الطريق إلى بيت المحبوبة ـ لتسليم الرسالة الأولى ـ تختلج في رأسي الأفكار و أسرح بها إلى حيث عوالم الحب المدهش ،، أستيقظ على صورة أمها تلك الشايقية البيور بلكنتها المميزة و هي تفتح لي الباب و تكاد تزأر مثل لبوة في وجهي ، لكني تفتيحة و عامل حساب لهكذا موقف .. لذا أعلنت لها بلا تردد أن الغرض من زيارتي ( كنت عايز كتاب جغرافيا من هناي ) و ينجلي موقفي آماناً حينما تردني فقط بالقول ( إتا كتاب الجغلافيا الليلك وديتو وين ؟؟ )
حتى أعاود الكرة مرة ثانية بعزم المحب الولهان كان يتعين عليّ إستئجار أحد شفع الحلة و بعد أن برمجته وفق ما أبتغي أرسلته في إثر حبيبتي يحمل رسالتي و صندوق البسكويت الذي وددت لو أنني دغمست منه حبة واحدة .. ما ألذ بسكويت ذلك الزمان .. كان مرسالي يحمل بسكويتي في يديه ، و أنا أمطق وأحمل آمال مراهق ولهاً بين ضلوعي المكشوفة إلا من بعض جلد يغطيها .
بعد مدة تتجاوز الساعة و النصف ، و بعد بحث مضن وجدت مرسالي الذي تراءت لي في حواف فمه بقايا من بسكويت حبي .. لكنه تجاوز تحديقي في وجهه بأن أكد لي أن الرسالة قد تم إستلامها من حبيبتي شخصياً و أنها ( قالت ليك كان عندك جواب تاني برضو أديني ليهو أجيبو ليها !! ) يا لحبيبتي الولهى مثلي .
عندما عدت إلى بيتنا بعد مدة وجيزة تناهى إلى سمعي صوتاً أعرفه معرفة جوع بطني كانت تلك الشايقية جارتنا و صوتها يشق عنان حوش بيتنا ( نان الولد مرسللو جواب للبنيي مسويلها حبينى و أحبك عاز يبوظ لي بنيتي و تقوليلي معليش ) و صوت آخر يقاطع ( خلاص يا صفية خليهو يصبر لي و لما أبوه يجي أنا بكلمه ليهو ) كم هو حرج موقف أمي إذ تحاول جهدها أن تصلح ما أفسدته انا و هي تعتذر ( ما هم أولاد صغار و بكرة يكبروا يعقلوا ) و لكن صفية تتمسك بموقفها ( ما تقوليللي صغار و الله أن طقاها فرد طقة يحملا ) .. يا لهوي .. لماذا ذهبت أمهابعيداً هكذا ؟؟
تداركت أمي الأمر و إنتهى مشوار حبي الأول مع بنات الجيران بتوبيخ ـ أحسبه ـ جائر نالني ، لكن هذا التوبيخ لم يحرك فيني ساكناً و أنا أتميز من الغيظ حينما أتساءل :
أين ذهب البسكويت ؟؟
تأتيني الإجابة حينما يترائى لي طيف حبيبتي بت الجيران و هي من وراء أمها تقضم بسكويتي كفأر مذعور .. و أنا من مخبئي غير المنظور أغمغم ( إن شاء الله ما ينفعك ) !! |
و عن أولاد و بنات الجيران قصص تحكى تجدينها في هذا البوست الظريف ..
ود وبت الجيران..
و تحياتي لكل بنات الجيران ..
|
Post: #11
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Mohammed Ibrahim Othman
Date: 06-03-2008, 10:36 AM
Parent: #1
عمر الفاروق قال :
| Quote: والله يا شمايل النصييييحة كده انا بي نسبة 90% عندي إحساس إنتي الكنتي بترسلي الجواب لي ود الجيران المسكيييين ده .. |
ههههههههههههههههههههههههههههههههههههههههههههههههههههههههههههههههههههه
والله يا عمر الفاروق ...
بننتظر رأي ولد الجيران ...
كلم بكري يديهو باسوورد...
يمكن الراجل ما قادر يدحض افتراءات شمائل...
|
Post: #13
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Shamael Elnoor
Date: 06-03-2008, 02:00 PM
Parent: #11
المشككون في براءتي (الفاروق،اساسي،محمد ابراهيم)
سامحكم الله جميعا ، الله وحده وود الجيران يعلمون اني بريئة ،، ثم انو العروض الانت قاصدها دي لتمبس دي عروض مساخة ياخى
عصام دهب ، صاحب المشروع الذي لم يرى النور ،، معليش يا عصام لكن الله مرقك من الاسرة دي لانو نسيبتك شكاكة وخبيثة ، طوالى راحت لبرج الحمل ، انت كان تكتب فى نهاية الجواب "على سنة الله ورسوله" واستعوض الله في بسكويت كرم وانشاء الله ربنا يخلفو ليك بجلاكسي
عمر التاج
انت معاي انو الحتة دي "العلاقة بين البنت والولد" لا تخلو من اخفاقات تربية ، يعنى بدل مايفهمونا انو الرجل عدو استراتيجي ، كان ممكن يفهمونا انو الرجل دا شريك استراتيجي لكن توقعوا منه الخيانة ، صدقني كان الامور زبطت
مليون تحية للاسر المحافظة لكن ماشديد
|
Post: #14
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: tmbis
Date: 06-03-2008, 02:16 PM
Parent: #13
| Quote: ثم انو العروض الانت قاصدها دي لتمبس دي عروض مساخة ياخى |
1- كويس انك حذفتي الفيديو .. لانو قفل البوست .. ولو ما (بررت ) ليك ووضحت ليك الحاجة دي .. كان البوست بتاعك دا إلا تطبعيهو في ورق ( الف .. أربعة ) وتتصرفي معاهو..
2- عروضك دي ما بقبله ليك هنا دا .. تقدري ترسليها في جواب لي ود الجيران واللا كدا كويس ..؟
3- الشفوت الفوق ديل كلهم .. نقاشين .. وعرفوك إنت المرسلة الجواب .. حسع كان في داعي تفكيها فينا؟؟
|
Post: #15
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: فيصل نوبي
Date: 06-03-2008, 02:36 PM
Parent: #1
سوركتي نفر يا
|
Post: #16
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Shamael Elnoor
Date: 06-03-2008, 03:10 PM
Parent: #15
فيصل نوبي
يامحلي انت ، سوركتي ايه ، من انجلينا جولي ولفوق
|
Post: #17
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: العوض المسلمي
Date: 06-03-2008, 03:24 PM
Parent: #1
متابع وراجع
|
Post: #18
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: محمد عبد الماجد الصايم
Date: 06-03-2008, 03:27 PM
Parent: #1
| Quote: ورق ( الف .. أربعة ) |
تمبس
قوم لف ياخ
يا عمك أنا كل يوم بشوف الورق دا قدامي لكن أول مرة أشوف التسمية دي
قال ألف قال
ألف أحمر
نزلوني هنا يا عمك
________________
أقفل في ساعته وتاريخه
وشلنا مفاتيحو
|
Post: #24
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: tmbis
Date: 06-04-2008, 10:21 AM
Parent: #18
.. للتوثيق  .. | Quote: عمك أنا كل يوم بشوف الورق دا قدامي |
وتاني للتوثيق ..
إنتو ياجماعة الحاصل شنو الايامات دي في البورد دا .. الواحد بقى يجي متأخر يلقى الناس دي مرطبة كلها..
البجيب ليكم الحاجات دي منو يا عمك ..
..
| Quote: أقفل في ساعته وتاريخه |
ــــــــ
البينة لمن ادعى واليمين على من انكـر في هكذا مواضيع..
|
Post: #19
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: صديق الموج
Date: 06-03-2008, 04:06 PM
Parent: #1
شمايل الواحد يرسل ليك خطاب تشيلى حسو
ما قلنا ليك اسفين يا منقة
|
Post: #20
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Shamael Elnoor
Date: 06-03-2008, 04:14 PM
Parent: #19
الحمدلله الذي انزل براءتي
يا من يدعون انني تحرشت بود الجيران جوابياً
هذا هو صديق الموج يعترف بعملته
اها يا تمبس رايك شنو؟؟؟ مش قلتليكم انا بريئة
لكن يا صديق اتاريك تلعب بي مش رسلت برضو لـ (آمنة)
|
Post: #21
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: النورس الحزين
Date: 06-03-2008, 08:49 PM
Parent: #1
رفع البوست لجلسة اخري و يستدعي أبن الجيران أو من يمثله لسماع أقواله
|
Post: #22
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Rashid Elhag
Date: 06-03-2008, 09:32 PM
Parent: #21
| Quote: "قاتل الله الاسر المحافظة عقدونا من الرجال ، الى الآن ماقادرين نستعد |
لا حول الله يا شمائل.... معقولة?...... لي قدر ده?..... غايتو ضحكتيني جنس ضحك .....ولا يهمك.... إن شاء الله ربنا بيفرجها.... تحياتي...
راشد
|
Post: #23
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Shamael Elnoor
Date: 06-04-2008, 07:18 AM
Parent: #22
Quote: لا حول الله يا شمائل.... معقولة?...... لي قدر ده?..... غايتو ضحكتيني جنس ضحك .....ولا يهمك.... إن شاء الله ربنا بيفرجها.... تحياتي...
|
الحمدلله ، فرجت وكبرنا،، لكنهم كانوا يبالغون جدا ،
|
Post: #25
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: tmbis
Date: 06-04-2008, 10:34 AM
Parent: #23
| Quote: اها يا تمبس رايك شنو؟؟؟ مش قلتليكم انا بريئة |
...
لســة ..
إذا سمحتي ..
جيبي لينا صورة من الجواب دا .. واعمل ليهو اتاشمنت هنا دا .. نقارن (خــط) الجواب مع (خطــك العام) هنا دا .. تجيبي اتنين شهـود لا يهم انهم من نفس (الحقبة)  الزمنية نفسها الاتكتب فيها الجواب ,, لكن تقبل شهادات التسنين ..
بالعدم ..
جيبي لينا ود الجيران القلتي رسل ليك الجواب دا .. مش احتمال تكوني قاطعه القصة دي من راسك ..؟
اهــا
ننتظرك لحدي متين؟؟
|
Post: #26
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Sayed Bekab
Date: 06-04-2008, 02:48 PM
Parent: #1
وختم التمام و مطابقة الخطوط عندي يعني الجواب يمرني انا اول قبل ما يصل ناس تمبس ديل
شكلك مظلومة وود جيرانكم هو الشفت
|
Post: #27
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: عمر الفاروق
Date: 06-04-2008, 02:57 PM
Parent: #1
يا تمبس:
| Quote: جيبي لينا صورة من الجواب دا .. واعمل ليهو اتاشمنت هنا دا .. نقارن (خــط) الجواب |
تعرف يا صاحب شمايل دي بتكون من النوع الكانت بتكتب جواب غرامي من نوع :
يا حبيبي يبدو أنك تغيرت تغيراً كثيراً وهذا التغيير يتمثل في الأتي (نقطتين شرطة) :-
1-
2-
3-
4-
5-
الجواب يكون عامل زي خطوات تجربة توصيل دائرة كهربائية في كتاب العلوم ديك
|
Post: #28
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: Shamael Elnoor
Date: 06-04-2008, 03:38 PM
اللهم انزل براءتي
اللهم اكشف الحقائق
"اللهم اعنى عليهم بسبع كسبع يوسف"
انا ماعارفة الخلاكم تشككوا فى براءتي شنو ؟؟ مع انو صديق الموج اعترف بفعلته النكراء
|
Post: #29
Title: Re: عندما أرسل لي ود الجيران جواباً غرامياً ،، تصببت عرقاً وأرتجفت يداي!
Author: ترهاقا
Date: 06-04-2008, 04:04 PM
Parent: #28
Quote: عندما عدت إلى بيتنا بعد مدة وجيزة تناهى إلى سمعي صوتاً أعرفه معرفة جوع بطني كانت تلك الشايقية جارتنا و صوتها يشق عنان حوش بيتنا ( نان الولد مرسللو جواب للبنيي مسويلها حبينى و أحبك عاز يبوظ لي بنيتي و تقوليلي معليش ) و صوت آخر يقاطع ( خلاص يا صفية خليهو يصبر لي و لما أبوه يجي أنا بكلمه ليهو ) كم هو حرج موقف أمي إذ تحاول جهدها أن تصلح ما أفسدته انا و هي تعتذر ( ما هم أولاد صغار و بكرة يكبروا يعقلوا ) و لكن صفية تتمسك بموقفها ( ما تقوليللي صغار و الله أن طقاها فرد طقة يحملا ) .. يا لهوي .. لماذا ذهبت أمهابعيداً هكذا ؟؟
تداركت أمي الأمر و إنتهى مشوار حبي الأول مع بنات الجيران بتوبيخ ـ أحسبه ـ جائر نالني ، لكن هذا التوبيخ لم يحرك فيني ساكناً و أنا أتميز من الغيظ حينما أتساءل :
أين ذهب البسكويت ؟؟
تأتيني الإجابة حينما يترائى لي طيف حبيبتي بت الجيران و هي من وراء أمها تقضم بسكويتي كفأر مذعور .. و أنا من مخبئي غير المنظور أغمغم ( إن شاء الله ما ينفعك ) !! |
الله يجازى محنك يا عصام دهب والله قعدت اضحك زى المجنون فى المكتب ، قلت لى
البنت تقضم فى البسكويت زى الفار المزعور
مع التحايا لكل الاخوة المتداخلين وصاحبة الدار شمائل
|
|