الفــاو(FAO)

Food and Agriculture Organization

مغرود لي في زول شغال في هذه المنظمة..او زول عندو زول وجيع في الفاو او زول عارف نفسو انو ممكن يكون زول ذو تاثير لي زول في الفاو..

ناسف لهذا الاعلان الركيك ..
بس عندي اغراض شريفة واشياء اخرى تتعلق بالامن الغذائي ومحتاج زول من الفاو..

رجاءا لغير المنبريين تكرما الاتصال بالايميل [email protected]

جادي جدا ياكرام وياكريمات..
فالرجاء التعامل مع هذا النداء بصورة عاجلة
لا امانع ان يكون هذا (العارف)زولة

متشكرين سعيكم..

سيتم رفع هذا البوست بصورة دورية متواصلة لحين ان يستوفي اغراضه

البوست ده اعتقد انو حقق حتى الان نجاحين
احدهما لايزال قيد التحقق ونسال الله ان يتمم الاشياء على نحوٍ جميل..
النجاح الاخر انني سعدتُ ايما سعد ..
وزي ما قال الكابلي في احتفائيته بحسن عطية(ولازلت اسعدُ)..
برسالة وردت الى الايميل المذكور اعلاه..
وهو والحق يُقال ليس لي ولكنه لزولة عزيزة افضلها على الجميع هنابلا خجلة ولا فضل..
لانو موضوع الفاو ده بخصها هي ..المهم عملت فورورد لي الرسايل التي تظن انها ذات طابع خاص معنون لخاصتي..
ومن ضمنها رسالة من واحد اسمو ياسر سيد ميرغني
تفيض مودة ومحبة صادقة..
اقول صادقة وتفيض مودة ليس لعاطفة تكتنفني تجاه الرسائل الوليفة وانما لانو هذا الياسر ذكر فيما ذكر انو ما بعرفني وانو كان بفتش لي في ايميل من زمان..
اها ياسر ده انا بعرفو معرفة سمحة وجميلة ..
سمحة لدرجةانو انا فرزتا هذا الصدق قبل 17سنة سلفت..
وربما انا ما كنت معجب بي شخص في طوال فترة الثانوي كما بهذا الياسر..
كان دنقلاوياً وسيماً
وسيما جدا..
وانيقا جدا..
وسمحاً اذا تكلم وسمحاً اذا غضب وسمحاً اذا مشى وسمحاً اذا تفاهم مع الخلايق وسمحاً اذا استنكح الخلق..
وبضميرٍ ككتاب الله طاهر..بالجملة كده كان النوع البقولو عنو(الزول ده انا ردتو لله في لله)
وكان ميالا لكل جميل وتعذبه كثيرا صور الحسناوات في الاميرية المتوسطة ومحمد على مكي الثانوية..
مؤدباً قليل الادب..
تراه فتسعد في بقية يومك..
ترافقنا مرات عديدات نستملح الناس سيارتهم وفضل ظهرهم..
تعلمتُ منه الكثير الذي نسيته في تواتر ازمان الخراب وبؤس المعيشة والعوز..
كان ذلك في بدايةالتسعيات في المقرن الثانوية ..
وكانت الثانويات في الخرطوم معدودة..
المقرن الثانوية والخرطوم الجديدة والقديمة وحسونة وتاني إلا طيبة الحسناب وجبل اولياء..
لاقيتو في المقرن سنيرا له ضل...وكاكي..وبوت لامع
اعجبني فيه انو الكاكي حق الكديت كان في المقرن كلها كوم وفي ياسر سيد ده كوم تاني..
اللبس العسكري كان خايل فيهو بي طريقة تغريك تخش الكليةالحربية..
كان منضبطاً وذو شخصية ..ووسيماً صارم القسمات..وشرساً في عروض الكديت ..كان الصرصار ده ببلعو ليك عااادي..صرصار جايبنو من الحمامات ياسر ده كان كرشك كرشك بختو تحت ضرسو..
ما تعرفو دنقلاوي ولا قارض صحراوي..
ياسر سيد ده في اناقته العسكريةتلك كان اليق مايكون باركان حرب رئيس..
ولو البلد ديك كان فيها زوق- ولو ما الجبهة خشت عضمةالدبابة جوه - ياسر ده كان بقى اركان حرب لي واحد من مدبري الانقلابات..
الكاكي كان بتزين بي ياسر سيد ميرغني ..
والاصحاب كانو بتزينو بي ياسر سيد مرغني..
والمقرن كلها كانت بتتزين بي ياسر سيد ميرغني..
ياسر ده كان مشروع شهيد ..
شهيد تقدر تقول فيهو مرثيات عظيمات بي صدق صارم ومقنع..




ولانو الزمن ما بخلي ليك الحاجات السمحةاتخارج للدراسة في الهند.
من 15 سنة خلت وانا الزول ده ما سمعتا عنو ..
وهانذا استقبل منه رسالة في ايميل زولة عزيزة..
القولد دي انا مديون ليها باصدقاء كما النجوم..

ياسر بركة السمعتا منك وعساك طيب ..

Quote: اقول صادقة

كتابتك جميلة. بس راجع الاخطاء الاملائية

سلام

الاخ M A Muhagir

Quote: ومن ضمنها رسالة من واحد اسمو ياسر سيد ميرغني تفيض مودة ومحبة صادقة.. اقول صادقة وتفيض مودة

التاء المربوطة في صادقة ما راجعة لي انا وانما للرسالة ..
يعني قصدت ابرر لي صدق الرسالة فقلت
(اقول صادقة وتفيض مودة لانها كذا وكذا ولانه كان ذا وذا )

وعلى اي حال معظم كتاباتي مليئة باخطاء املائية ونحوية ومانحو ذلك..
وشكرا للتنبيه
اللغة العربية ليست (المظر تونك) زي ما بقولو
وانا اتعلمتها وانا سني سبعة سنوات..فاعذرنا لهذه الركاكة وهذه الاخطاء..
المهم الفهم يا حبيب..
وشكرا مرة تانية ودمتا رايق

Quote: اللغة العربية ليست (المظر تونك) زي ما بقولو وانا اتعلمتها وانا سني سبعة سنوات..فاعذرنا لهذه الركاكة وهذه الاخطاء..

يا دكين دي حالتها بدون وضوء يعني ، ودي نظام تعويض رباني (وشك شين لكن كتابتك سمحة)
الحمد لله الجابوك عجمي كان جهجهتنا بالكتابة السمحة

لو عندك حاجة في الفاو أنا كنت شغال في الشواك

Quote: سيتم رفع هذا البوست بصورة دورية متواصلة لحين ان يستوفي اغراضه

حيدر قريبي..
انتا ياخي البت بتاعة المنظمة ديك ما عندها علاقة بالفاو؟؟


كدي اسالا لينا اكيد عنده دريبات
موش بت؟؟
البنات ديل اسلني منهم انا دريباتم زي سرهم ..غميسة وغتيتة..

ود رحمة اخوي

وان في العمرة قبل اقل من سنة لاقاني ليك اظنو من جنوب النيل الازرق
وتوووش خشا فيني احضان وسلامات لامن مرتو استغربت
قتا ليهو : منو في الاخوان ما عرفتك؟؟
قال لي : شنو ياخي انتا موش من الشواك..


اها انا من اليوم ديك وعايز اعرف الشواك دي وين..
تاريها مكتب في منظمة الاغذية والزراعة الدولية..

دكو يا اعلانات..

انا غايتو بعرف لي زول قريب سلوي صاحبتي الروح بالروح..

لا اقول ليك راجل خالتها لا اقول ليك راجل عمتها..

لكن البعرفوانو مان كبيييييير في المنظمة..

ورينا الشغلة لو ضرورية..عشان الزول يتصل بي سلولو

في عمان ويشيل منها الرقم..

رشا
سلامات يادكترة

كدي خلينا من الفاو سلوى صحبتك دي متزوجة؟؟

Quote: رشا سلامات يادكترة كدي خلينا من الفاو سلوى صحبتك دي متزوجة؟؟

ما جادي كلو كلو

عزيزي صاحب البوست
تحية وإحترام ،،
نفيدكم بأن الساعة الثانية عشر من ظهر هذا اليوم
كانت (التايم ليمت) لحجز بإسمكم في فندق الإنتركونتنتنال
بالرياض لقضاء الأسبوع الأول من شهر العسل الخاص بكم،،
ونسبة لعدم تأكيدكم ذلك الحجز في الوقت المناسب فإنه
يؤسفنا إبلاغكم بإلغاء الحجز مع أمنياتنا لكم بالتوفيق
في قادم المحاولات،،
شئون (العملاء)،،

دكين الما (متين) ..
غرضكـ عندي .. (فاو الرياض) ...!!!
بدءاً من الخبير (الأجنبي) مروراً بالخبير ( الوطني )
مروراً بدكتور من سلالة السلطان على دينار ..
بس دق وريني السالفة (عشان ما توكرنا ساي )

Quote: غرضكـ عندي .. (فاو الرياض) ...!!! بدءاً من الخبير (الأجنبي) مروراً بالخبير ( الوطني )

ابو حمودي
يا المحبوب ..انا جيتك جاري..

Quote: عزيزي صاحب البوست تحية وإحترام ،، نفيدكم بأن الساعة الثانية عشر من ظهر هذا اليوم كانت (التايم ليمت) لحجز بإسمكم في فندق الإنتركونتنتنال بالرياض لقضاء الأسبوع الأول من شهر العسل الخاص بكم،، ونسبة لعدم تأكيدكم ذلك الحجز في الوقت المناسب فإنه يؤسفنا إبلاغكم بإلغاء الحجز مع أمنياتنا لكم بالتوفيق في قادم المحاولات،، شئون (العملاء)،،

اب عاج
لووووووووووووولوز..
ياخ خليها تجي المرة وانا حرم بعزمك انتا والمدام تمشو معانا شهر العسل في قبرص
شوف لي زول في الفاو يا عبدو
البشوف قشرتك وكرفتاتك دي يقول بتعرف (ساورين جيرارد) ذاتو..

دكين

سلام مدكون ( يعني دفين )

Quote: اللبس العسكري كان خايل فيهو بي طريقة تغريك تخش الكليةالحربية..

سبحان الله ... نفس مواصفات اللواء الدكتور عثمان جعفر ( الذي حاول معي كثيرا لأدخل معه كلية السجون و لكنني فارقته بعد إمتحان الشهادة لألتقيه بنفس مواصفات ياسر ميرغني) ...
مش كدة يا عماد عبد الله ؟

برضو عثمان دة من ( عندينا ) ... قال فيه أحد الأقرباء بأنه يشبه ( كريم الدين ) ذلك الضابط السوداني الذي عندما رآه الإمبراطور هيلاسلاسي في طابور العرض عند إستقباله بمطار الخرطوم .. وقف متسمراً .. فقد كان يشبه إبنه الذي مات في ريعان شبابه ... فدعاه لزيارته بالبلاط الملكي ..

أما بعد :

أرجو أن يكون البوست قد حقق ال TARGET

دمتم

العزيز ابو جهينة
ادام الله روقتك وجوك السمح..
الدناقلة في البزة العسكرية اقيف ما يكونون..
ياخي البوست القتو لي بتاع القلقات..مالقيتو..رجاءا مدي بي لنك او تلفون او ماتيسر..


بخصوص التارقت حق البوست
لايزال قيد التحقق..
لله الحمد على ماكان وما لم يكن..

Quote: اب عاج لووووووووووووولوز.. ياخ خليها تجي المرة وانا حرم بعزمك انتا والمدام تمشو معانا شهر العسل في قبرص شوف لي زول في الفاو يا عبدو البشوف قشرتك وكرفتاتك دي يقول بتعرف (ساورين جيرارد) ذاتو..

بالله تاريك مسميني أب عاج عن حب؟؟؟ آه ياسادن!!
طيب الفرق شنو بين مايو ويونيو (مع فارق <اللّّّّّّّخ> في كلٍ)؟؟

الفاو دي لو لسه مقرها في روما : أنا ماشي عديل بعد أسبوع،،
كون صريح ووضح طلباتك وخلينا من أمورك دي!! داير شنو من الفاو؟؟

Quote: ساورين جيرارد

كفارة والله

اب عاج اخوي..
ربنا يكتب سلامتك...انشالله تلقى القيصر في الفشفاش..
بعدين الفاو مقرها في روما ولا في الشواك؟؟
حيرتونا عديل..

دمتا رايق وطيب

ريهان الريح

Quote: Quote: ساورين جيرارد كفارة والله

دمتي رايقة..وعاش ابو هاشم

سماح عملت مس كول هسي..
برغم اشتياقي بس ماعندي رصيد اضرب ليها..


جميل خالص انو انا كنتا على بالا في تمام السادسة من مساء الاتنين 2 يونيو 2008م

Quote: كدي خلينا من الفاو سلوى صحبتك دي متزوجة؟؟

اطلب يا حبيب

بيكاب

ياخي مافي زول من الجماعة ديلاك شغال في الفاو

جولي مار..وجدان..مي..بت ابو عبيدة
مجاهد او اي واحد من شباب حي الرياض المرتاحين ديلاك؟؟

من شفتك بي الجلابية السوده
احسن اكتبها السوداء
عشان مافي زول انط لي في العربي بتاعهم
عرفتك مصيبة
لكن مصيبة في شنو ما عارف !
هسي عرفت
انك مصيبة كتابة
قسما تكتب عن الحجارة كتابتك بتكون جميلة
فيك شفتنة وقت ادب لايتمتع بها الا المؤدبين
ادب معلمين بتاعين كونغ فووو
شفت التلميذ او الحوار بقيف في افلام الكارتيه
قدام الماستر
بعدين بنحي لي تحت الرملة
وبعدين ارحع اوقف عدييل بي مسكنه
واقول حاضر معلمي
بس ياهو ده انت انا ناعارف ده نبذ ولا شكر
لكن انا قاصد اشكرك
اتمنى يكون وصل ليك الشكر
يا ماستر
والله تاريك ما هين انا محتاج ليك قريب
عشان حملة شعواء ضد القبح
ارجوك اتلافنا
محبتي ودام صفانا

محمد عبدالجليل ..
شــغال في ( الفاو ) وبلعب ( تايكندو ) ..
يعني يقضي ليك ( غرضك ) ويطقطق ليك ( ضهرك ) ..
قصرنا معاك .. !!

Quote: من شفتك بي الجلابية السوده احسن اكتبها السوداء عشان مافي زول انط لي في العربي بتاعهم عرفتك مصيبة لكن مصيبة في شنو ما عارف ! هسي عرفت انك مصيبة كتابة قسما تكتب عن الحجارة كتابتك بتكون جميلة فيك شفتنة وقت ادب لايتمتع بها الا المؤدبين ادب معلمين بتاعين كونغ فووو شفت التلميذ او الحوار بقيف في افلام الكارتيه قدام الماستر بعدين بنحي لي تحت الرملة وبعدين ارحع اوقف عدييل بي مسكنه واقول حاضر معلمي بس ياهو ده انت انا ناعارف ده نبذ ولا شكر لكن انا قاصد اشكرك اتمنى يكون وصل ليك الشكر يا ماستر والله تاريك ما هين انا محتاج ليك قريب عشان حملة شعواء ضد القبح ارجوك اتلافنا محبتي ودام صفانا

ود السني

شكرك وصل يا مدهش..
دي تاني انا حاستشهد بهذه العبارات العضود لي اي زول يفرفر قدامي
اقول ليهو ده حديث ود السني ..ولا يحدثك مثل خبير
وانها وربي الشهادة والعمل الصالح..




ومعاك يا مدهش لحدي اخر حدوت في حملتك ضد القباح