اخونا طارق الامين رجل خلاق جدا.. ومن زمان نفسي افتح ليهو بوست شكرة في هذا المكان..كونه المكان الوحيد الذي استطيع ان اعبر فيه لاكبر كمية من خلق الله.. وفي حالة هذا الشكر احتاج الى اعلانه كون صاحب الشكرة مستحقُ لها وزيادة.. اها طارق الامين ده تعجبني جدا اعماله الفنية في قنوات التلفزيون.. الاعمال من حيث الكلمات والالحان والتوزيع والاخراج واختيار الافراد.. طارق الامين بمرق الحان مبالغة .. غير مطروقة ولايمكن لغير طارق ان يمرقا.. لدرجة اني بس بقيت اسمع المزيكة واعرف انو ده شغل طارق حتى بدون ما يتم ذكر الملحن والمخرج.. وماحصل لقيت ليهو شغل بايخ اتعرض .. كلها مجودة وفيها مافيها من تعابير مختلفُ ُ الوانها.. ونفسي اعرف شكل الغنا غير الكوميدي حيكون كيف لو طارق بدا يلحن لي فنانين كبار.. على اي حال ظني انو طارق يجتهد في ظل ظروف صعيبة مقدرة..ومع ذلك يجتهد فيصيب.. ياطارق والله انتا لو في بلد غير كان عملت العجب.. شاكر جدا تمتعي بما تخرج وتلحن وتصيغ.. وددت فقط ان اعبر لك عن اعجابي بكلمات منقوصة..
الشاكر دكين
Post: #2 Title: Re: طــارق الامين..الرجل الخــلاق Author: فيصل نوبي Date: 05-31-2008, 08:38 AM Parent: #1
ياخ والله فتحت بوست لي زول مميز زيه زيٌ واحد . انا حقيقة شاكر ليك جدا يا ديكو الفرصة الجميلة دي انه الواحد يرمي طعمية لغير مستخدمي ( البانتين) كونه انه الواحد حيدخل البوست دا ويبدأ في الشكر وهو علي اهداب اعصابه خوف ما قد يجره الكسير من شبهات اضحي يعج بها هذا البورد . اكب وفي ذهني خلفيات كبري وحبر اريق وصراعات حدثت من اجل اظهار المشاعر الانسانية النبيلية , فاخوتنا السودانين اضحوا لا يحتملون الحب مثلما يتحملون الكره ويلهجون به . فالحب لديهم موجب لعواقب وخيمة قد تفتح ( سست ) وتجر ( لا مواخذات) . في ذهني كل هذا الرعب والذي فاض علي حروفي عاليه اكتب شاكرا ومقدا لهذا الفز الذي ولد بصلعته ليهبنا الحانا وكلمات طروبة وفاكهية . اعجبت بهذا الشيئ المسمى طارق منذ زمانا كنا فيه طلابا نسعى بين الغيد والحسان لا يشغل ذهننا سواهن الا انه فعلها ونال رضانا واعجابنا واطلاقه للبسمات التي عاثت فينا صخب وضجيج وبهجة . هو من القلائل الذي خلقوا في هذا الوطن الفقير ليبدعوا ويعم ابداعهم الافاق . انا شخصيا اعتبر طارق من العلامات الفارقة في تاريخ تدرج الفن السوداني حيث انه اضاف اليه نوعا جديدا كان غائبا فليس من اليسير ابتداع الاضافة خاصة في وطن كالسودان شعبه صعب الارضاء لا لذوقهم العالي بقدر ما هو لرؤائهم التي ليس لها اساس سوى النقد الغير بناء . طارق هو احد ملوك الكوميديا المتوجين علي شفاه بسماتنا , ما ان افتر ثقرنا الا وتداعي الي ذاكرتنا طارق ومجموعته , ما ان وجد ضربا غير مطروق من الالحان الا وكان الفذ طارق علي دفته يديره بمهارة وذوق رفيع . حق له ان يحمد الله علي تلكا لموهبة التي صقلها بمثابرته ونالت منا ما نالت . طارق الامين , نحن نحبك ـــــــ
لابد من التونيه ان هذا بوست احرار
Post: #5 Title: Re: طــارق الامين..الرجل الخــلاق Author: walid taha Date: 05-31-2008, 10:39 AM Parent: #1
طارق الأمين من القلائل الذين تحدوا شح الإمكانيات فى تأسيس دراما وكوميديا فى ظل غياب اى دعم او تشجيع من الجهات المعنية التى تعلم تماما ان هذه الفئة تكابد وتعاني لتخرج لنا بهذه الأعمال.
الفنان الكوميدي (محمد شيلا) سبق له اقسم بالله العظيم فى منتدى الخرطوم جنوب - وكنت حضوراً- بأن طارق الأمين قد باع بيتين ليؤسس للدراما..بيتين
Quote: هو من القلائل الذي خلقوا في هذا الوطن الفقير ليبدعوا ويعم ابداعهم الافاق . انا شخصيا اعتبر طارق من العلامات الفارقة في تاريخ تدرج الفن السوداني حيث انه اضاف اليه نوعا جديدا كان غائبا فليس من اليسير ابتداع الاضافة خاصة في وطن كالسودان شعبه صعب الارضاء لا لذوقهم العالي بقدر ما هو لرؤائهم التي ليس لها اساس سوى النقد الغير بناء
شكرا يا اسئس على الكلام المحق في حق الرجل الخلاق.. طارق الامين عندو عمل عرض مؤخرا فيهو شغل اخراج محترف ولايشبه المتواتر من الاعمال.. وفيهو الحان وتوزيع موسيقي مميزة وعليها بصمة طارق.. .. نسيت اذكر انو كلمات(بلدا هيلي انا) بتاعة طارق الامين كانت سامبل لما ستكون عليه نماذج الكلمات المغناة لو طارق دخل هذا المجال بقوة..
Quote: فالحب لديهم موجب لعواقب وخيمة قد تفتح ( سست ) وتجر ( لا مواخذات)
اساسي باستثناء آمنة مختار وفيصل نوبي فالحب قيمة ُمتفق ومتعارف على دلالاتها.. يعني عادي ممكن تقول لي زول انا بحبك ويفهم الطرف المخاطب انو انتا بتقصد قيمة المحبة المعروفة بدون ما يجري في ذهنو ان الامر متعلق بالمؤخرات ..
Post: #9 Title: Re: طــارق الامين..الرجل الخــلاق Author: فيصل نوبي Date: 05-31-2008, 11:08 AM Parent: #7
يا وغد
Quote: باستثناء آمنة مختار وفيصل نوبي
ياها دي المحرية فيكـ ..
_ في زول/ة أخوي/تي قبل يومين قال لي دكين ده راجل ( بس ما تسلمو رقبتكـ )
معك نعرب للفنان المبدع أبوصلعة (دي ماإساءة) عن إعجابنا وتفاعلنا بكل الأعمال الجميلة التي ظل ينتجها على الدوام , وعبرها يدخل متلقيها في جوء مفعم بالنشوة والسرور.
آبدول ياخ الزول/ة دي منو القال ليكـ انا ما قاعد احبه/ها و قد أعلنت له/ها علي الملاء كما أعلنته قبلاً للكثيرين/ات اما قصة آخرو/ها دي تؤكد إنك وقت كتابتكـ للمداخلة أعلاه كنت تفكر فقط بالمؤخرات
يا ديكو ياخ الحب إن أصبح حب مؤخرات لا يسمي حباً بل (نزوة) لانه هالكـ بقضاء الحاجة ..
_ عندكـ محطتين حُب علني واحدة لياسر طيفور (حبيبنا) مع إني ما شفتو قبل كده عشان أشوف مؤخرتو .. وواحده لصديقنا عصام و ده ما عندو مؤخرة يتحب منها ..
و محطة طويلة جدا للفنان الاستاذ حبيب الملايين طارق الامين (أب صلعة) .. المحطات دي كلها حُب في الله و بعيدة كل البُعد عن حبٌ توهّمته آمنة مُختار يوماً ما ..
_ ما خسارة فيكـ بعد لسانكـ الطويل ده (حُب في الله ) تعلمه يا وغد إن كان لكـ مؤخرة
كلنا بنحب دفعتنا طارق الامين 000ما في ذلك شك وبنحب الهيلا هوب 00000ما في ذلك شك وطارق الامين مبدع ما في ذلك شك
لكن الشك في دكين 000الاول مرة يحب ليهو ولد في الله انا شامي ريحة عجاج وكده ولو داير فاطمه 000قابل محمد في السوق!!!!!
Post: #24 Title: Re: طــارق الامين..الرجل الخــلاق Author: فيصل نوبي Date: 06-01-2008, 07:19 AM Parent: #23
Quote: لكن الشك في دكين 000الاول مرة يحب ليهو ولد في الله انا شامي ريحة عجاج وكده
قلنا كده يا طارق ؛ جا الوغد شبكنا ليكـ مؤخرات و مقدمات و شبهنا بمن هُييء لهم من أمرهم سجما.
_ طارق ياخ الناس دي ما بتعرف عزو ده ؛ فاكرين فيو باقي رقشه لسه
Post: #25 Title: Re: طــارق الامين..الرجل الخــلاق Author: saif addawla Date: 06-01-2008, 08:01 AM Parent: #24
سلام لصاحب الدار وضيوفك الكرام
اعتقد ان الفضل يعود لطارق الامين باحداثه نقلة هائلة في مستوى الكوميديا بالسودان ، وقد شغلته مهمة الاخراج عن الظهور كممثل في معظم اعماله ، واعتقد انه قد حان الوقت لطارق لتقديم عمل مسرحي متكامل عوضا عن الاسكتشات الخفيفة .
وتمشيا مع عنوان البوست ، لابد ان اشير الى الجانب الذي لا يدركه الا من عرف طارق عن قرب ، فطارق رجل متواضع شهم وفائق الكرم ، واكثر ما يميزه اخلاصه في علاقته باصدقائه وزملائه ، اطال الله عمره
صديقنا الكوميديان البارع طارق الامين «ابو صلعة» رئيس مجموعة الهيلاهوب الكوميدية ومؤسس جمعية «الهيلاهيلب» لمساعدة مرضى الفشل الكلوي والاسم بالانجليزية جميل جداً لانه يحتوي على كلمة «بجذ»، قام بحركة درامية حلوة جداً عندما اعلن وفي قاعة الشارقة وامام السيمناريين وهذه على وزن المؤتمرين حول ذات الموضوع موضوع الفشل الكلوي انه قرر التبرع بكليتيه بعد ان تصعد روحه الى بارئها لتحفظ في بنك الكلى وتمنح لاحد المصابين بالفشل الكلوي، لقد اراد طارق بذلك ان يشير الى ان الموتى يمكن ان يحلوا الكثير من ندرة الكلى للمعطوبين كلوياً، ولكن المشكلة في السودان هي ان اهل الميت يصرون على ان يدفنوا موتاهم بكامل «عفشتهم» من كرشة وكبدة وفشفاش ناهيك عن بيت الكلاوي والكلاوي.
تبقى المشكلة في تبرع طارق هي اذا نظر الناس اليه كفنان كوميدي فدون شك سوف يفتكرون «الحكاية هزار» فقد تكون كلية طارق «مضروبة» هي الاخرى لانه بشرب من نفس الماء الملوث الذي يشرب منه اصحاب الكلى المضروبة، وقد يكون طارق من اسرة معمرة فحسب علمى ان احد جدوده عاش مائة وعشرين سنة فماذا يفعل الناس بكلية انهكها الزمن؟ او قد يموت طارق بعيداً عن اي مستشفى فالمعلوم ان كلية الميت ينبغي ان تنقل في زمن اقصاه 24 ساعة بعد موته، او قد يموت طارق بحادث حركة يهرد الكلاوي مع الكبد مع ام فتفت فلا تنفع كليته ببصلة وقد علق احدهم قائلا: لو كان طارق قلبو على مرضى الفشل الكلوي بالجد كان يتبرع الآن باحدى كليتيه مش يتبرع بالاثنتين بعد وفاته.. وعلق آخر بالقول ان طارق عارف ان اولاده وزوجته سوف يقفون الفاً احمر على جثته فالاحسن لطارق ان يبل وصيته منذ الآن ويشرب مويتها.
ولكن الذين يعرفون طارق معرفة شخصية ولصيقة مثلي متأكدون من صدقه فطارق يتدفق انسانية ورقة وهذا الوجه الضاحك المهزار يخفي خلفه انساناً رقيقاً محباً لكل الناس يمكن ان يضحي بكل حياته من اجل بسمة طفل، ويكفي طارق انه الآن سخر موهبته المتقدة ونجاحه الكوميدي من اجل انقاذ مرضى الكلى هذا الوباء المستشري الذي يفتك بالناس اكثر مما فتكت بهم حروب الجنوب الاهلية وحرب دارفور الدائرة الآن.
اراد طارق ان يلفت نظر الناس لهذا الداء الفتاك واسبابه ولعل اولها الماء الذي يشربه سكان العاصمة الآن فقد قــيل انه مخلوط، في مصر تستعمل مياه الصرف الصحي في انتاج البرتقال «ابو صرة» الذي يأكله كل الوطن العربي، اما في السودان فالناس «يتكرعونه » صفواً ويظنون ان الآخرين يتكرعون كدراً وطيناً، ولكن الواقع يقول ان الذين يتجرعون الكدر والطين احسن حالاً من ناس الخرطوم الذين يتجرعون سماً هارياً يفتك بالكلى وابو الدمام وحاجات تانية حامياني، فيا طارق سلامة كلوتك وان شاء الله تسافر بعد خرف ونحن وراك في مشروعك الانساني، اما العنوان فهو متداول بين الذين يقومون بغسل كلاهم.
Post: #29 Title: Re: طــارق الامين..الرجل الخــلاق Author: هاشم أحمد خلف الله Date: 06-01-2008, 09:51 AM Parent: #27
والصحفي الفنان الصادق فيصل محمد صالح يحي عبقريه ود الامين
حيث يقول بالحرف ( لولاعبقريه الفنان طارق الامين لما كلفنا نفسنا عناء مشاهده التلفزيون في رمضان)
Post: #49 Title: Re: طــارق الامين..الرجل الخــلاق Author: Ahmed Osman Date: 06-02-2008, 01:41 AM Parent: #48
الاخ المحترم دكين المبدعين كتار انت مبدع لانك تفى الرجال حقها وبكرى مبدع يدينا فرصة مباشرة نوصل بيها صيحة اعجاب تصل مباشرة لمبدع بيننا- لهذا الرجل السودانى الخلاق الشاب طارق المين فلك ولكم التحية
رغم قلة ما شاهدته له من اعمال فقط المتاح فى الانترنت ولكن والله شميت فى اعمالهم ريحة من تراب الوطن والحارة
سلامات وعوافي شكرا لي استاذ طارق الامين "الخلاق" مؤسس مشروع "الهيلاهيلب" .. شكرا له كونه سودانيا خالصا.. ولي قدام يا "اب صلعة" .. دكين .. ياخي والله انت ذاتك بي كراهتك وسناحتك دي "خلاق" ..والله خلاق خلوقية مبالغة ..
Quote: يعني عادي ممكن تقول لي زول انا بحبك ويفهم الطرف المخاطب انو انتا بتقصد قيمة المحبة المعروفة بدون ما يجري في ذهنو ان الامر متعلق بالمؤخرات ..
يوجد عمل يعرض حاليا على قناة هارموني للاستاذ طارق ما بمرق إلى من زول موهوب ..وذو خيال .. اللحن بتاع العمل والاخراج يخليك تسال طوالي عن صاحب هذا العمل.. اضافة الى الفرقة نفسها افرادها موهوبين وبارعين في الاداء..
ياخي في واحدة بي فلجة لامن تقول ليك: يازول طلقانة طلقانة.. وتجي في فاصل تاني تقول الاولاد؟؟ الاولاد مالك بيهم؟؟ مغتيهم ..ترالا لا لا مكسيهم ..ترا لا لا.. الاولاد مالك بيهم.. البت دي لامن تقول الحتت دي اخوك بكون وصل قمة الانبساط الممكن ينتج عن عمل كوميدي سمين..
ولامن يجي اخونا النوبي داك ويقول: يا مرة مالك شيالة هال الراجل ما قال ليك شغال ويبيووووووووووووووووووووووووو انا بفطس من الضحك.. شفتا الزول ده وظف المفردة المخصوصة دي كيف في عمل درامي ..والله انا بقيت اقول ويبيوو دي في اللازم والمالازم..
طارق الأمين أعمال فنية راقية ودخول من كل أبواب الفنون وأنسان عبره عرف المجتمع الدراما وهو بجد لايعلق أعماله في شماعة الإمكانات وتجده مسرح متنقل ويطرق كل الدروب جربتها بدايات مشوار نرجوا له الإسراع بالخطوات للقادمات من الأعمال وهو مزيج سوداني كبير يسع عبقريته الصلع ومابداخلها حتي الآن لم ينفد بعد ولك وله دكين تحية عبر هذة المداخله.
،،،،أبوقصى،،،،
Post: #55 Title: Re: طــارق الامين..الرجل الخــلاق Author: هاشم أحمد خلف الله Date: 06-02-2008, 11:11 AM Parent: #54
Quote: هاشم
بلاي انتا خال بكري؟؟ ياخي عايز الاقيك ..ضروري..
صليب ده خال ذاتو..
ايوه يا عبد العزيز انا خال بكري ليك حق تستغرب انت عارف انا بقول ليهو يا خال الصلعة دي مشكلتا مشكلة .
هاك ارقام تلفوناتي
عمل :- وزارة الخارجية السعودية ( 4055000 تحويلة 5657 او 5658 ) جوال:- 0564155973
ّإذا إتصلت الان علي تلفون العمل انا موجود جوالي مغلق لدواعي العمل يمكن الإتصال علي جوالي بعد الساعة الرابعة والنصف عصرا وما فوق .
وبعدين ود اختي ده زول شاطر ووجيه برغم الصلعة ولا انتا شايف كيف
Post: #56 Title: Re: طــارق الامين..الرجل الخــلاق Author: فيصل نوبي Date: 06-04-2008, 08:48 AM Parent: #1
ديكو ..الامانة وصلت
Post: #57 Title: Re: طــارق الامين..الرجل الخــلاق Author: محمد صباحى Date: 06-04-2008, 09:22 AM Parent: #56
دكين طارق الامين الانسان والفنان ذلك الرجل الذي يحمل كل الخير الانسانية أجمع الذي أبداع في الحياة الفنية والادبياية اعترف كل من عرفه حق المعرفة بعلو نفسه وصفاء طبعه وطهارة قلبه ونبل خلقه ورجاحة عقله وتفوق ذكائه وحضور بديهته وثبات عزيمته.
شكراااا دكين علي المساحة الجميلة
Post: #58 Title: Re: طــارق الامين..الرجل الخــلاق Author: عمر الفاروق Date: 06-04-2008, 09:31 AM Parent: #1
Quote: يوجد عمل يعرض حاليا على قناة هارموني للاستاذ طارق ما بمرق إلى من زول موهوب ..وذو خيال .. اللحن بتاع العمل والاخراج يخليك تسال طوالي عن صاحب هذا العمل.. اضافة الى الفرقة نفسها افرادها موهوبين وبارعين في الاداء..
واحدة من أجمل الأعمال اللي قدمها طارق الأمين ..ما قاعد أملّها أصلو وبحضرا من رمضان لحدي اسة وبإستمرار .. كان عاجبني سواق الحافلة شديد لأنو بالجد تحس بيهو سواق حافلة وماسك خط ليهو سنين وما اظن الزول ده كان قاعد يمثل.. تخريمة : كلامي ده بدون لخبطة كيمان ..طارق المطرطش داك براهو انا هنا بتكلم عن طارق الامين بتاع الهيلاهوب ..
Post: #59 Title: Re: طــارق الامين..الرجل الخــلاق Author: فيصل نوبي Date: 06-05-2008, 11:10 AM Parent: #58
طارق الامين زول هاديء جداً .. غتيت جداً .. بيعرف يوظف وقته كويس ( برضو جداً ) .. لايوق شديد و الدليل إنه قطعها لعمر الفاروق في راسه لمن بقا يفرز الكيمان بالمناسبة عندو حبوبة لذيذة جداً ( ما شاء الله ربنا يحفظها يا طارق ).
_ الفاروق برضو شيل صندوق و اتخارج و ما تقول لي (جداً)
Post: #60 Title: Re: طــارق الامين..الرجل الخــلاق Author: محمد الأمين موسى Date: 06-05-2008, 11:17 AM Parent: #59
التحية والتجلة لطارق الأمين المبدع المعطاء، والتحية عبره لنجوم فرقة الهيلاهوب وهم ينثرون الفرح ويجمعون (يلقطون) القيم من بين ثنايا ثقافتنا الجوانية... والشكر لأخينا دكين..
Post: #61 Title: Re: طــارق الامين..الرجل الخــلاق Author: عمر الفاروق Date: 06-05-2008, 11:21 AM Parent: #1
Quote: لايوق شديد و الدليل إنه قطعها لعمر الفاروق في راسه لمن بقا يفرز الكيمان
تعرف يا نوبي لو قلت انا قلت كلام غير كده أكون كضاب ومنافق وكلام الليل يمحوهو النهار .. لو راجعت كلامي في الارشيف عن طارق الأمين وقبل أحداث مايو الكاسيتية بتلقاني قاعد اقول الكلام ده عن طارق .. يبقا يا حبة ما عشان قمنا إتجادعنا هنا وإحتمال كبير نتفالق اقوم طوااالي اجي زي الشُفّع وانط من كلامي واغير رأيي في الارجل .. انا من لحددي بكرة عند رأيي بخصوص شريط رفقة ولسة عندي كلام دراب حا اكتبو ..وصدقني ما جعولية لكن لا طارق الامين ولا غيرو ممكن يقطعا لي في راسي خصوصا في الموضوع ده .. وانا ثابت عند موقفي خصوصاً وإنو كل يوم بيزيد قوة والمؤيدين شغالين تلفونات ساااااااااي
نوبي : شيل ليك كيس شعيرية ..
Post: #62 Title: Re: طــارق الامين..الرجل الخــلاق Author: فيصل نوبي Date: 06-05-2008, 11:32 AM Parent: #61
عمر ده أنسب مكان الواحد ممكن يقول ليكـ فيو ( برّيدكـ لله في لله ) عشان التوضيحات الفوق الكتيرة دي ..
Quote: واغير رأيي في الارجل ..
غايتو دي ما عرفتها الراجل و لا الأرجّل و لا غلط مطبعي ( ده حياد )
Quote: انا من لحددي بكرة عند رأيي بخصوص شريط رفقة ولسة عندي كلام دراب حا اكتبو ..
كده وصلنا مرحلة حياد حقيقية بأتفق معاكـ في شيء واحد ما دام وصلنا المرحلة دي .. في أغاني في الشريط غنتها نانسي .. ما أدتها رونق خاص ( حلوة رونق دي طلعت من وين ما عارفها ) يعني يا عمر بصراحة شديدة جداً أغنية قالو قالو علي شقي و مجنون بتنطبق عليها تماماً ( فعللو فعللو فلي فلي و فلفول ) بتاعة صاحبي طارق الامين يعني الاغنية دي ما عندها نكهة خاصة بصوت نانسي و الالحان اللي فيها .. نتفق علي دي و بمشي معاكـ لي قدام ..
كدي ياعمر ورينا رايك في رفقة.. مرات مرات بتمرق منك إتحافات فنية كده.. انا شخصياً كلمات طارق في بلدا هيلي انا شايف انها بسيطة وموغلة في التعبير.. يعني دخل مجال الاشعار المغناة غير الكومدية بنجاح مذهل..
شفتي العمل الاخير لم يكن إلا القشة التي قصمت صمتى تجاه الكتابة عن طارق..
الاعمال التي ساقها الينا كلها دون استثناء فيها إدهاش واشعار جميلة واداء موسيقي جاذب.. العمل الاخير ده اكثر ما اثار اعجابي فيهو صوت الجيتار في الفواصل الكلامية.. والجميلة القالا الراجل النوبي من جوه الحافلة بصراحة دي امتع لحظة في المشاهد كلها لامن يطلع بره الشباك تلاتة متر كعادة اهلنا في البساطة ويقول: يامرة مالك شيالة هـال الراجل ما قال ليك شغال ويبيووووووووووووووووووو اها شفتي (ويبيوووووو) دي ما يقولا إلا مبدع ده اول استخدام لي رمز لغوي نوبي في الدراما السودانية .. ويبيووووووووو دي حاكورة نوبية مافي زول قالا إلا طارق ده.. ودي ما تمرق إلا من نفس مبدعة او زول ساطل ..وانا ما عارف طارق ده بسطل ولا لا .. بس البضمنو انو زول مبدع ..
من النادر جدا فى ايامنا تلك ظهور شخصيه مجدده فى مجال الفن والفنون فى السودان ( فى الواقع فى كل المجالات ) فاصبح (الجداد) يجترون القديم ويعيدوه ويكرروه ويبشتنوه لامن طلعو زيتنا و وطلعو زيتنا معاهو اما الكوميديا فبعد الفاضل سعيد صارت الكوميديا عباطه وعواره وتهريج والواحد بقى يضحك فى روحو وهو بيشوف العواره القدامو تميز طارق الامين جاء لانو اخرج الكوميديا من الاطار بتاع العباطه لى اطار كوميدى حقيقى ينزع الابتسامه من وسط ناس ادمنو البكاء .. ليس هذا فحسب بل امتزجت الكوميديا بى مناقشه هادءه لمشاكل اجتماعيه جعلت الناس يعيدو النظر فى مشاكلهم وايجاد حلول لها بطريقه سلسله وهادئه .. لذا اصبح طارق الامين رقم جديد فى الفن والكوميديا السودانيه .. وله محاولات ( ناجحه ومقدره ) فى التجديد والتحديدث وخلق الجديد... ولعل الناس لا تختلف فى انتاجه الكوميدى فالناس دائما فى تلهف للجديد منه فى هذا المجال .. ولكن البعض ( وانا منهم ) قد يضعو تساءلات فى تجربته مع الفنانه نانسى .. وتلك التساؤلات ليست فى المنتج فى حد زاته ( كلمات ولحن ) ولكن فى الاداء .. واحد الاخوه فى مداخله سابقه ذكر بان روح الغنيه بكون مفقود برغم من الكلمات واللحن الرائعين ولكن الاداء هو من يقتل روح الغنيه .. اعترف بان التعميم هنا غير صحيح ويبقى ان فى اختلاف الناس رحمه ( فى الدين والفن فقط ) اخيرا نرجو من الاجاويد التدخل لحل خلافه مع المبدع صالحين .. فالرجل شكل ثنائ لا يشق له غبار مع طارق .. وحقيقه كان غيابه عن الاعمال الجديده مؤثر بصوره واضحه والخلاف حول بضع دريهمات لا تسمن ولا تغنى نتمنى لطارق وفرقته المزيد من التقدم ودوام التوفيق