Post: #1
Title: مالو الدوام؟!
Author: ايهاب
Date: 05-28-2008, 07:41 AM
جاتني في ايميل ما عارف نزلت هنا قبل كدا ولالا
مالو الدوام؟!
مالو الدوام مالو الـدوام؟!
ما حاجة تبدا من الصبح
لامن يحل شبح الضـلام!
ما حبسة في مكتب أنيق
لا ضحكة فيهو ولا كلام!
مالو الدوام مالو الدوام؟!
***
ما جية في نفـس الوقت
ما مرقة في نفس الزمان!
ما شوفة لي نفس الوجوه
ما شغلة في نفس المكان!
اليوم وباكـر زي امـس
حاجات مكررة والـسلام!
مالو الدوام مالو الدوام؟!
***
مالـو الـدوام بفـتيك أنا
يوم الـسبت يـوم الهـنا
الساعـة فيهو قدر سـنة!
يوم الأحـد يـوم السـعد
الحبسـة فيـهو إلى الأبد!
يوم الهناي يـوم البـتاع
وجع الضهر وجع الكراع!
أما الخميس ما يوم تعيس
لا صفقة فيهو ولا رقيص!
والجمعة حيا على الفلاح
وفجأة السبت تلقاهو لاح!
***
مالو الدوام ما قلـنا شي
مالو الـدوام عيـبوه لي؟!
ماهيتو من عرق الجـبين
معجونة بالـرزق الحلال
ما منو مرسـال للأهـل
ما منو لعـبات للـعـيال
مامـنو بامـبرز للجـنا
وحاجات مهـببة للمدام!
مالو الدوام مالو الدوام؟!
***
مالو الـدوام مالو الدوام
دوامـة مـن أيـام كـدر
جارية في بحر الشـهور!
طاحـونة تطحن في بشر
شان يعيش عيشة السرور!
ويبـنى في آخـر العمـر
عشـو في بيت الحـمام!
مالو الدوام مالو الـدوام؟!
***
فيصل على سليمان الدابي/المحامي/الدوحة/قطر
|
Post: #2
Title: Re: مالو الدوام؟!
Author: BAKTASH
Date: 06-12-2008, 03:45 PM
Parent: #1
مشتاقووووووووووووووون يا فردة
|
|