ناهد علي تقدل في مدني .. رحلة صيفيه

سلامات واشواق للجميع

وبعد ابتعاد طال غصبن عني ارجع لاحكي عنها

مرة اخري التي احببتها بحرا

اندهش زوجي وفغر فاه وهو يسمعني اخبره ضاحكة

اني أول مرة أشوفها

ذلك حين زارتني بفندق القصر ومعها

البوردابي الظريف حميم

استغرب قائلا داوشني صاحبتي صاحبتي

قلت تقول قرت معاك الروضة

وها هي تنور مدني وتزورنا

وكرر مقولته والله انتو مجانين

وهمست ضاحكة : رب اخ لك لم تراه عينك

والله بيتنا نور

والحنينة السكرة احتفلت بك

بيوم ربيعي رائع

و

بحبك بحر

سلام سودانية خليها تغشانا شويه مدني تسع الجميع
سلام لناهد ولك ولزوجك

سودانية (2) ألف

سلام يا دوك
التحية وموصولة الاخ الكريم عثمان

وسلام لي ناهد
إجازة صيفية طيبة
وربنا يديم المحبة بيناتكم


مرفق
مودتي

إسماعيل حميم



.

ياسلام ياسلام ياصبري
بالجد مدني تسع الجميع حنينة وحضنها دافي بتشعر كانك في حضنك امك
تعرف ياصبري راسي المطرطش دة وزاحي من مكانة ماظبطوالا الشاي من يدين والدتكم والعجب القهوة
ياخي سكان مدني ديل في نعيم دائما.
ياسلام علي الوالدة اتحفتني بالحكاوي عنك وشقاوتك ايام زمان .
وعشان مااقوم ساي عصرت ليها تحت المخدة نكتة خليتالمن طلعتا منهاعليك الله ماتنقطعي مننا يابتي .
وحياتك ياوالدة بجي صادة واسكن حداكم
***************
طمني علي وصول المرسال
محبتي

سودانية ياحبيبة
تصدقي ماشفت البوست دة الا ادوني لقزة
بالجد اختك محتاجة لسيف وضروري
ومحتاجة تتربط جنب سريرك حسب الاتفاق (ضحكتي صاح)
ومحتاجة تسكن الحنينة
ومحتاجة جدا جدا لغرفة الخواجة(اوعك تضحكي ذي نكتت اهل العوض وكل جية ونكته جديدة وتظل عالقة بالدواخل)
كانت لحظات لاتنسة ضحكت واستمتعت جدارغم قصر المدة
يازوله والله دي احسن من ذهابنا لي .... خليها في سرك
شكر عثمان لكرم الضيافة والاستقبال
اتذكري بس النكتة افتح الشباك دة ياخي (اهل العوض بشبعك منهم )
وحقيقي الحنينة يامدني
وكان الله مدة في العمر ياني الساكنة حداكم بس ماتتوصي .
وبرضك بحر عندي
محبتي

هنيئا لودمدنى ، وهنيئا لكم
تواجد الهميمه بت الكرام (( ناهد على ))
ويا بختكم بيها ، تحياتى سودانيه
ومثلها للأخت / ناهد

الاخ/بشير أبوجومانا
مهما حكيت ورويت ليك عن جمال مدني بشوف نفسي قصرته
علة تشوف بي نفسك وقالو من سمع ليس كمن راء ...
تحياتي وشوقي للاسرة
مودتي

الاخ/ حميم
سلامات
نصيحة اخوية من القلب زور مدني واستمتع بجمال الطبيعة
عثمان سالني منك وقال لي حميم ماجاء معاك علي وزن مشيتنا ليهم سواء فندق القصر قلت لية لسه ماعقدنا وخليتة يضحك
اوعه هظاري دة يجيب مشاكل (عقدنا دي)
مودتي

ناهد على

الزوله الرائعه
الزوله التى لن تمل الحديث معها
ناهد على الفتاة التى قلبها يسع الجميع
تمتاز ناهد بصفات قل ان توجد لدى انثى فى هذه الدنيا الفانيه
ناهد تدخل القلوب من اوسع باب

ادام الله بسمتك واطال الله فى عمرك

بس عليك الله تمشو لحدى مدنى وما تجينا........
ما كان مره واحده تمشى تشوفى خزان
سنار ومنها بهناك تمشى تسلمى الدمازين على سنويتى

لك الود ناهد
قناطير مقنطره



سامى
ـــــــــــــــــــــــــــــــــــــــــــ
ياطير ياماشى لاهلنا بسراع وصل رسائلنا
ـــــــــــــــــــــــــــــــــــــــــــ
-------------------------------------------

سامي ياعتباني
ياحبيب ماما
شكر لك اخي لكل الوصف الفيني بس انا عاملة بوصيت امي لي وليك الله يرحمها كانت بتقول النية لازمت سيدها عشان كدة مبيضنها وماشين عليها
انا امشي باي وش لي سنوية بعد اللفحي داك يازول والله كان ماجات سناء مافي اي طريقة اقدل عليها.
وبعدين ياخوي انت المشي ليكم قشوة مابتجي انتويقطعو ليكم تذكرة عديل و بمشو ليكم .... اها الباصات دي ماواقفة للسيرة امرق جاي خلينا نجيك سايرين .
والله ياسامي من بداية الرحلة وانا مبتسمة الباص ذاتو يكيفك والعجب الزول الكان قاعد جنبي قاطع التذكرة غلط ولما وصلنا مدني السواق قال حمد الله علي السلامة قام زولك نطة دة وين قالو دي مدني الكلام دة كيف انا تذكرتي سنجة خلة الباص كلة يضحك ...وبدينا الابتسامات والفرفشة وابتسم فانت في مدني
مع ابتساماتي لك ابتسامه شكر وولاء .

وانا اقول ناهد مختفية وين ليها يومين كده ؟؟
مدني والله بالجد راقية وجميلة وناسها حلوين وحنان
ولا انسى ابدا جلسة في نادي الجزيرة

تحياتي لكم جميعا

العزيزه ناهد




اتزكرى

انك تكونى مبتسمه
عشان انتى فى ود مدنى عاصمة


الجمال ...... والفن ..... والادب

الاخت سودانية في البدء مبروك الزواج وبيت مال وعيال
وعبرك التحية موصولة للاخت ناهد علي وعقبال ما نشوفا
هي كمان عروسة , مدني جميلة يا ناهد لكن الباعوضة
اخبارا كيف معاك ؟؟؟
مدني ارض الفن والإبداع وناس مدني ناس حلوين جداً
واهدي تحياتي عبرك ايضاً لكل اهل مدني دون فرز .

ياسلام علي طلتك الشاعر المرهف هاشم أحمد
حمد الله علي السلامة والله فرحت جدا وزتني انبساطة علي العلي
ياخي باعوضة شنو الباعوض كان بعزف انغام شجية وعذبة لقدومي ... وبيني وبينك
الدخان الطالع من شقة سودانية كان كفيل بان يقتل باعوض مدني وماجاورها
يازول والله سودانية قالت الخواجة الساكن الشقة الجنبهم من يوم ماعرست اتعلم الشحدة (ادينا عود وادينا بخور).
وعشان كدة حكيت ليها نكتة اها عشان طلتك دي بحكيها ليك في الماسنجر النكتة.
تحياتك وصلت لكل اهل مدني الحنان

الطاهر عثمان
اريته اختفاي اختفاك السمح وعديل
والله مدني تبسط المابنبسط
ياخي والله قطعنا فيك قطيعة اخير اكلمك بيها مايجيبوها ليك قواله
قطيعتنا كانت عن دار الامل واطفال المايقوما والايتام وكل الناس العائز تزرع ابتسامة وتمسح دمعه وتواعدنا بالاستمرار مهما كانت ظروفنا ...اها عليك الله شفت ليك قطيعة سمحة ذي دي .
تحياتنا لك

بقدر ما فرحت بكلامك عن مدني
بقدر ما زعلت عشان ما قمنا بالواجب وعزمناك عندنا في البيت

مرحب بيك ناهد في رحاب مدني الظليله
وشكراَ سودانيه
وتشرفت بمعرفه ناس عزاز عزة مدني

اخوكم
ممدوح أبارو
حي الواحة - مظلة خالده شرق الكهربا

الاخ/ممدوح أبارو
والله هسع انا زعلت زعل مافاتتني عيزومة والمزعلني أكثر انو دي المحطة النزلت فيهاثالث شارع منها منزل خالنا علي ابنعوف وحتي قصه المظلة عندي خبرها اصلي سالت صاحب العربية قلت لية المظلة مشهورة لي من السوق الناس بتعرفها فحكي لي ،بالجد مدني تشرح القلب ماتتخيل انا استمتعت قدر شنو رغم انو كانت مامورية الا اني لفيتها شبر شبر (حي الاندلس،المطار،شندي فوق،محطة البلال دي بيت ناس صبري التلفزيون القناه-المستشفي) وكان المدير قال لي اكتبي تقرير عن المامورية الا اكتب لية شقة سودانية وبيت ناس صبري ).خالي قال لي يابت والله من سكنا هنا لينا 12 سنة المظلة دي ماقلناها في خشمنا قدر ماوصفتي بيها انتي .اي زول جايك مظلة خالدة ومسكل لي بجيك مارقة .عملتي لينا دوشة راس مافي شي يريحنا الا ترجعي خرطومك ديك.هسع كان كنت عارفاك جنب المظلة ماكان ريحت خالي من دوشة الراس ديك.
لكين المرة الجاية .عديل لي بتاع التاكسي اناماشة ، حي الواحة - مظلة خالده شرق الكهربا.
جاياكم والله بجي
مدني الجمال بجيها تب
محبتي

يا ناهد على ،،، إنت المزعلك شنو ،،،
والله أنا زعلان جنس زعل ،،، وداير أطرشق عديل كده ،،،
معقول الحاجات الحلوه دى تفوتنا فى مدني ،،،
بعدين مأمورتك دى ما كان ممكن تأخريها أسبوع بس ،،،

على العموم مدني دى جاييها جاييها ،،، قولى يا رب ،،،

سودانية 2000 شكرا لك على هذا الألق وتحياتي لزوجك الكريم ،،،
عقبال ما اشوفكم قريب فى مدني ،،،
على فكره مدني فى شهر 6 جوها كيف صيفى ولا خريف ،،،
منتظر جوابكم عشان أحزم أمري ،،،

مع محبتي وتقديري .

السلام عليكم

وتجمع في الحرم المكي انشاء الله

يا ناهد والحضور الكريم

خالص الشكر ع زيارة الكريمة ناهد وزيارتنا وتجشم الصعاب

ودا دليل ع اصلك الكريم واهتمامك الكبير بمن يحبوك

لله وفي الله يا بيضاء القلب

ربنا يحقق امانيك يا حبيبة.

الاخوة الكرام هنا

لكم التحايا والاشواق

ودمدني رونق وهدؤ وجمال

واتمني ان نلتقي بكم جميعا هنا

وبيتنا نور يا حبيبة بيك



خربشة: يا ناهد نحن اصحاب وحبايب بس لو تخلي الغزل في حبي وبعلولي بث

الاخ/محمد خليل ساني
اذيك ياخي والله انا زعلي بس عشان مالاقيت ممدوح إبارو
لكين غير كدة انا مبسوطة ومبسوطة مونه عام كامل لي قدام
لكين فاتتك والله القدله في مدني وله بلاش ن ونصيحتي ليك ولو مافيها مشاكل مع أم وضاح اخير تدقش البلد ديك بتجي مجيه منها تب .
انت عارف الرجعة لابد منها وحاتك من جيت ماقادرة اكتب تقرير عن المامورية ولي الان المدير ادخل منة بي حمد واطلع بي خوجلي .
والله شقة سودانية تشيلنا ليك براحة وكمان بيت ناس ممدوح .اها كدي اتجهينا تب .
يازول دي قالوا كل شهور ربيع بس ماتتاخر راجنك والله نمشي سواء وبطل زعل .
راجاك ماتتاخر.
مودتي

العزيزه ناهد على ،،،

موافق يا زوله ومنتظرك نمشي مع بعض لود مدني ،،،

بس عليك الله ابعدي سيف ده مننا ،،، برااااي بجي عليك ،،،

إتفقنا ولا عايزه تدخلي فى دوامه ضحك تانيه مع شقيقة روحك سودانيه ،،،

على العموم بورتسودان منتظراك ،،، لو عندك فيها مأموريه حـ تلقيني بى هناك ،،،

ومنها نتحرك طوالى لودمدني ،،، والجو فيها أكييييد إبداااااع ،،،

تحياتي لك يا صاحبة المكان ،،، سودانيه 2000 ،،،

مع عظيم تقديري وإمتناني .

الاخ/محمد خليل
يازول انت خسرت ترتيبات المشي معاك ساي بي نضميك دة
اها سيف دة اهم شخصية لبداية الرحلة ومال اية كدي اسال سودانية وشوفها كان قالت نجي من غيرة وفي امكانية نسوي نضما...لكين والله هم حاجتين في مدني المهمين عندي سيف، واتربط في كراع السرير .
والله 31/5/مفروض امشي بورتسودان طلع قرار نهاية اليوم بسفري، وتصدق التقرير ماكتبتة، لكين ياربي بكون عندكم سيف بشبة سيف مدني اصلوا سيف مهم عندي شديد .
بس مدني جواي جواي وكمان سودانية .
نلقاك بمدني انا وسودانية وسيف
تقديري لك

اقدلي يا ناهد
وانسطي فمدني الجمال والحنان
ومدني رائعة روعة مواطنيها واهلها
وشكرا سودانيه 2000


وسلامي للجميع

الاخ العزيز / العوض
كيفنك
والله مدني بالجد انت بالذات محتاج تمشي عليها من زحمة شغلك العيني شافتو داك
يومين ثلاثة مابطالين عشانك في ناس كتار جهزو شنطهم لي المشي وعشان نشجعك بحكي ليك قصة أهل العوض الحكيتها لسودانية في فندق القصر اها قصرت معاك.



اها اصبرو ياناس الخرطوم مابتكلمونا بالاجتماع مالكم نسمع بيةسمع من بلد طير عجمي .
غايتو الفيكم اتعرفت علة نشوي مدني دي خلتنا نسامح ونغفر .
لما تكون ماشي كلمني عشان اوصف ليك بيت ناس أبارو وسودانية وتدق الباب وتقوليهم نحنا اهل العوض رسلتنا ناهد الجاتكم في مامورية .

سلام ناهد

Quote: ناهد الجاتكم في ماموريه

يعني ماموريه
ما فسحه وراحه

Quote: وعشان نشجعك بحكي ليك قصة أهل العوض الحكيتها لسودانية في فندق القصر اها قصرت معاك.

كمان شغالين قطيعه وقصص فينا
عافيين ليكم وقوا البريحكم

**