جنسي شايقي و دمي شايقي و جدي شايق

بالله إنت شايقي!!؟

سؤال يا بت غريب

أنا أيِّ شايقي

و بالتحديد بقولك بلدي أرقي

و كان دار تعرفي اصلي

في النيل و الجروف الخدرا في نوح السواقي

في نِغيم طمبور يبكي الليل و في لبس العراريق و الطواقي

و كان فتشتي في قلب الحسان من جُوة تلقي

أنا أيِّ شايقي

و جنسي شايقي و دمي شايقي

و جدي شايق

و كان دار تعرفِ اصلي أصبري لي دقايق

و خليني اللّدوِّر عجلة التاريخ و أسرد للحقايق

دنقل عيال منصور جعل و رباط و شايق

لا نهاية الدنيا أولاد عم شقايق

أنا أيِّ شايقي و كمان قاري العلم و عارف الكِتابي

كلامي سمح و أكلي قمح و من النيل شرابي

و بملا العين و أزيد شبرين و أهز عضلات شبابي

و أشق أعداي عديل و كتين أشم ريحة ترابي

أنا أيِّ شايقي و الشايقية مازجي دماي في ذاتي و عروقي

كان مكضبة أقيفي أفصل ليكي إيدي و هاكي ضوقي

أنا أمي مهيرة بت عبود و شيخي الميرغني الختمي الطريقة

و جدي شايق سيد الشايقية جدد ليها شوقي

أنا أيِّ شايقي و شايقي أيِّ

بسوم الروح و أقدِّمة لي حياة العز ضحية

و ما بهاب الموت مادام عيني حية

في وقت السِلِم بزرع و ألِم فوق كتفي طورية

و ساعة الحارة في وسط الصفوف تلقيني شايل البندقية

أنا أيِّ شايقي و شايقي أيِّ

و دة ياهو كلامي مهما قريت و اتعلمت و أصبح شاني سامي

و دة ياهو كلامي حتى ان كان بقيت سفير

و لّا كمان بقيت لجلاج أناطق الطير محامي

دة ياهو كلامي حتى ان كان بقيت عميد و قايد جيش نظامي

و دة ياهو كلامي حتى ان كان بقيت ريِّس و أصارع الموج ورا مِي

و دة ياهو كلامي حتى ان كان بقيت غوّاي و زي قيس في غرامي

دة ياهو كلامي أنا اصلي شايقي و ما بغير من كلامي

لما أقول أنا شايقي ما بقصد تِكِبِّر و إني أعلى من الثُريّا

لما أقول أنا شايقي ما بقصد أقسِّم و طني و أدعو العنصرية

لما أقول أنا شايقي بقصد إني سوداني و بسوق ستين سرية

و لما أقول إني شايقي بقصد إني بحمي حماي و احتضن الحرية

أنا أيِّ شايقي و شايقي أيِّ

و السودان عموم يا بت وطنّا ان كان نضمنا عديل

ولّا ان كان كسرنا الكِلمة حتى ان كان رطنّا

جُوارنا أمان و قلوبنا حُنان و أبيض من قطنا

و نحن المن زمان معروف نكِرم الضيف ولو نربط بطُنّا

أنا أيِّ شايقي و شققت العُقاب جيت من كريمة

زادي كسرة متمرة و حبّات جِريمة

لبسي جبة مبرقعة و غبشة و قديمة

و للبنادر جيت و كان أكبر جريمة أنا قلبي ما بدلتو بس بدّل هدومي

و ماني صايع ساكت آآآآ بت لا تلومي أنا أصلي أفندي في طرف الحكومة

عاد وحات اسم الله في شايقيتي فد يوم ما بزيِّف

و حبي للشايقية من ما قُمتة درفوناً خِفيِّف

و لما أبقى شايقي و بين ضلوعي دوام يفر قلبي الرِهِّيف

و لهجة الشايقية حلوة و في لساني يمين تكيِّف




قمت بنشرها هنا لأول مرة علي سودانيز أونلاين "نص فقط" فتناقلتها المواقع السودانية

و الآن نص ورقِص و تعال و بُص

ليهم القومة ياعلاء

وتحية لكل قبائلنا

التحية ليهم و ليك و لينا و نحن:

شايقية و عبابيس
فينا مِن نايب و مِن رئيس
و فينا مَن واقِفلُو بوليس

قالو العِز أهل برضو مُش؟

Quote: و بملا العين و أزيد شبرين و أهز عضلات شبابي وأشق أعداي عديل و كتين أشم ريحة ترابي

الله يديهو الصحة والعافية
اليمنى ده قدم كتير للفن ده

كلمات منو ياعلاء ..؟

أستاذنا الطاهِر ساتي

الكلمات و على ما أعتقِد للحردلّو

هسي بيجو الجهابِذة و يصححوني إذا غلطان

اليمني تغنّي بالكثير المثير و من أحد أغنياته كان اسم الشركة التي أعمل بها و هي (قارسيقا) و الكلِمة نوبية الأصل و تعني أخضر ورقة في نبتة القمح و قال فيها:

النايرة قارسيقا
الصغيرة ضميرة مِتيقة

Quote: وأشق أعداي عديل و كتين أشم ريحة ترابي

اوع يكون الترابي زولنا داك

إنت قايلني عدل و مساواة ولّا شِنو يا زول؟

كل المتعة هِنا

نــــــــــادي الطمبــــــــور

حنبحت مِنها و نخت هِنا
















.

الطمبور صديقنا و عزنا و ملجانا

وكتين السنين تفتح بوابة أحزانة

مما قمنا نسمع فيهو لا ملينا لا ملانة

زي إبل الرحيل شايلي السٌقا و عطشانة



أوتارو الحنيني تملِّي عايشي معانا

في الريف و الحضر و محل ما تمشي بطانة

الله لو بشيشي تداعبو إيد فنانة

تتراقص جميع الدنيا بي أركانة



لو قلبك حجر و غنانا شايفو رطانة

أول ما يرن تلقاك غرقتة معانا

إحساسك يذوب قامتك تميل طربانة

زي مرّ النسيم وكتين يداعب البانة



الطمبور سماحتو القمرة مالي سمانا

الليل و السكون و الرملة كالمرجانة

نتلملم نكون في شلة سامية مكانة

نضحك ننبسط لما الصباح يلقانا

عشان كل الناس تسمع ...

و السِمِع يكلِّم الما سِمِع