احلام سيئة الإخراج

لا اذكر كثيرا الاحلام الجيدة التي رائيتها نائما ، و ربما يعود ذلك لطبيعة مرحلتي الطفولة و الشباب اللتين عشتهما . فتجد ان سيناريو حلم ما تدور احداثه في الشمالية و لكن في نفس الوقت نجد انه يتوجب عليك لانجاز مشوار ما في ذلك المنام القيادة في طريق الملك فهد !؟ ، و لا ادرى ما هو قصد المخرج تحديدا بالزج بطريق الملك فهد في وسط مدينة القولد ، بعد استفاقتي و مراجعة شريط الامس شيئا فشيئا اكتشف انني كنت قد شاهدت في تلك الليلة احد الافلام المصرية و خلدت بعدها للنوم مباشرة . امثلة هذه المنامات كثيرة فقد تجد نفسك مثلا متورطا في مطاردة مثيرة من قبل البوليس السعودي في احدى ازقة امبدة عقب زيارة شبابية لبيت احدى الخالات او نحو ذلك . فكان التفسير الوحيد لتلك الاحلام سيئة الاخراج هو واقع الغربة الذي اعيشه ممزوجا بالشوق العارم للبلد و السودان عموما .
اما احلام الطفولة الجميلة التي سمعت عنها لاحقا فهي بالتاكيد لم تزر بلدتنا مطلقا ، فلم اسمع قصة أي منام جميل في صغري من احد اقراني . و دارت معظم محاور منامات الطفولة وقتها حول الصراع التقليدي من اجل المراعي بين اولاد سواقينا و بعض اولاد السواقي المجاورة او بين اولاد الرعية عامة و اصحاب مزارع البرسيم القريبة ، و الذي اعتقد انه لا زال مستمرا هذا الصراع حتى اليوم ، ولا دليل ابلغ على ذلك من قسم الحكومة المكرر باغلظ الايمان ان الصراع الحالي في الغرب ما هو الا نتاج طبيعي للصراع التقليدي حول المراعي ، و الصراع بين الرعاة و المزارعين . و بما انني مارست مهنة الرعي و كنت طرفا في صراعاتها اكون بذلك من اوائل الذين اطلقوا شرارة الحرب الممتدة حتى الان ، فماذا نتوقع اذا ان يكون شكل احلام طفل ساهم في تاجيج صراع لم تسطيع اعتي الحكومات و الاتحادات الاقليمية و الدولية احتواءه الي الان ، غير ذلك فانا من الاطفال الذين دخلو سوق العمل دون سن السادسة ، و اكتشفت حاليا انه كان يمكنني مقاضاة والدي و الحصول على تعويض مناسب لزجه بي في سوق العمل في تلك السن المبكرة ، و لدي عدد غير محدود من الشهود فيكفي اشعال بعض الحقد الموغل في صدور اولاد ساقيتنا فقط تجاه آبائهم لتنقلب الطاولة عليهم و يعرفوا ان هذه المرحلة كانت مخصصة فقط للاستمتاع بالايسكريم و قراءة مجلات ميكي و الاحلام السعيدة ، و ليس للجلد و رعي البهائم و حش البراسيم . بناءا على ما ذكر اعلاه فقد تمركزت احلامي النومية وقتها في صراعات الرعية بالاضافة الي الكوابيس التي لازمتني كنتيجة طبيعية لقرب بيتنا من المقابر ، فقد تجد نفسك مزجوجا في منام تدور احداثه داخل قبر قديم تجاهد للخروج منه و ينهار تحت قدميك و ترى اقرانك و هم يهربون امامك و لا يجرؤ احدهم على العودة للاخذ بيدك .
صراحة لم استطيع التغلب نهائيا على هذه الكوابيس و التي خفت حدتها نوعا ما و اصبحت تزورني نادرا فيما بعد ، بعد ان كبرت شيئا وشاركت في حفر عدد من غير قليل من القبور ، الا بعد فتوى الترابي الاخيرة بانه لا يوجد عذاب قبر و لا يحزنون ، فتحول كرهي المقيت للدكتور قديما الي حب و امتنان لدرجة انني غفرت له تماما دوره في انقلاب يونيو ، فطفقت اشارك بقوة اكثر في حفر القبور خاصة في الليل ، بل تعدى الامر ذلك ان شاركت ذات مرة فى ادخال امراة عجوز داخل لحدها و كنت ممسكا بالجانب المقابل للراس و لم اكن ادري ان الذي يمسك هذه الناحية هو اخر من يتوجب عليه الخروج من القبر و عليه توسيد الراس جيدا و بصورة مستقيمة باستعدال الكتف الايمن و وضعه مستقيما باتجاه القبلة و من ثم سحب الثوب الذي يغطي الجسد من ناحية الارجل و اقفال القبر باحكام ، فتحولت تلك الكوابيس الى منامات عادية بل مسلية في بعض الاحيان .
لم تقتصر المنامات سيئة الاخراج على كوابيس الطفولة و احلام الغربة غير المنطقية فقط ، بل امتدت و شملت حتى المنامات ذات الطابع الجنسي ، فنشاهد احداث المنام و قد ابتدأت بمقابلة لطيفة لبنت جميلة تتبعها بعض الغمزات و المفاهمات ، و ما ان تبدأ احداث الحلم الحقيقية و تدخل في طور اللمسات و الاهات الدافئة حتى تتحول تلك الفتاة الجميلة الي امرأة قبيحة او عجوز مسنة مما يؤدي لانقطاع الحلم دون تعمل عملتك ، و العودة الي النوم غير المريح ، و احيانا الافاقة من النوم و لعن الحظ ، و العودة لاحد احلام الغربة ، فيقتصر التفريغ الطبيعي على بعض الليالي التى تكون فيها مرهقا و لا تدري بما حصل .
اخيرا و بعد ان فشلت تماما في اخراج حلم جميل لنفسي حتى و على مستوى احلام اليقظة قررت اسناد اخراج مناماتي الي واحدة من ابرع مخرجات افلام هوليود الرومانسية ، اذ ربما اصبحت احلامي بعدها سعيدة تعج بالرومانسية و الجمال .

Quote: حتى المنامات ذات الطابع الجنسي ، فنشاهد احداث المنام و قد ابتدأت بمقابلة لطيفة لبنت جميلة تتبعها بعض الغمزات و المفاهمات ، و ما ان تبدأ احداث الحلم الحقيقية و تدخل في طور اللمسات و الاهات الدافئة حتى تتحول تلك الفتاة الجميلة الي امرأة قبيحة او عجوز مسنة

قالوا شقي الحال يعتروا ليهو زي الشرا في القندول
الناس دي كلها تجيها بت ابليس
الا انت يا حمد تجيك حبوبة ابليس
غايتو احمد الله الما جاك ابليس زاتو

كعهدي بكم دائما او كما قال كبيركم مجموعة اوغاد ليس الا




شفتا الشتارة دي كيف ؟
عليك الله يا اساسي ما مرا بيك منام اهبل زي دا ؟

Quote: حتى المنامات ذات الطابع الجنسي ، فنشاهد احداث المنام و قد ابتدأت بمقابلة لطيفة لبنت جميلة تتبعها بعض الغمزات و المفاهمات ، و ما ان تبدأ احداث الحلم الحقيقية و تدخل في طور اللمسات و الاهات الدافئة حتى تتحول تلك الفتاة الجميلة الي امرأة قبيحة او عجوز مسنة

الكلام ده لو بعد العرس شي طبيعي لاغبار عليك
لكن لو قبل العرس امشي راجع نفسك عند التيجانى الماحى

مودتى

Quote: الكلام ده لو بعد العرس شي طبيعي لاغبار عليك لكن لو بعد العرس امشي راجع نفسك عند التيجانى الماحى

ودا عرس شنو الما عنده قبله يا بعيد

الاخ حمد انت ولدوك معرس ولا كيف؟

عدلتو ...

ابدا و الله امبانتود
المسالة دي كانت قبل العرس ، و على فترات متقطعة بعدو
اكون استاهل تجاني الماحي و لا كده خلاص



انتا عارف يا ابن عمي انا الحاجة دي عزيتا لانو المسالة زمان كانت اصعب من هسة شوية ، خاصة و انو نحنا كنا اولاد اقاليم و جينا الخرطوم اول مرة للجامعة، عشان كدا مسالة الحكايات النضيفة دي زي الواحد ما كان مصدق نفسو يلاقها بسهولة حتي لو في المنام . اها صدق مرات في بعض المنامات العملية تكون ماشية طبيعية جدا ، و ما يحصل اي انقلاب او شئ من هذا القبيل ، لكن يحصل مثلا يجي يقبضك زول ، او تصحي تدريجيا و تقول لي نفسك الحاجة دي جد جد و لا منام ساكت ، هبالات من النوع دا يعني .
بعدين الحتة دي مالكم حاكنها انتا و اساسي دا شديد كدا يعني ما في محاور تانية زي منامات الطفولة و الغربة ما ممكن تتناقش برضو ولا شنو ؟

حمد
أنت في السودان ولا في الخبر؟؟
عرسته ولا بطلته؟؟
وينك يا رجل
التحايا العاطرة والأشواق من هنا لي عندك أينما كنت

شنو يا نادر لا تلفون لا سلام
عرستا شنو انا بتي اسة قربت للعرس
محمود جاهز ولا عندو كلام








تحياتي لمريم و محمود

حمدسلامات
انا عارف ده من شنو!!!!
مرة كنت نايم في بيت العزابه
وقمت حلمت بي واحده نجاضه كده كانت معذباني
وبعد المغازلات والملاطفات ودخلنا في الجد
فأذا بي اتفاجأ بي حنك خشن تحت يدي
فنهرني ود عمي 000ياخي ذح يدك دي خلينا ننوم

عليك الله واحد يمسي بي معاوية جدو موش ليهو حق يجيه ابو الكباس
يعني اتخل اخر وش قابلك كان وش معاوية
نوع المنام بكون كيف

Quote: و بما انني مارست مهنة الرعي و كنت طرفا في صراعاتها اكون بذلك من اوائل الذين اطلقوا شرارة الحرب الممتدة حتى الان ، فماذا نتوقع اذا ان يكون شكل احلام طفل ساهم في تاجيج صراع لم تسطيع اعتي الحكومات و الاتحادات الاقليمية و الدولية احتواءه الي الان

كدى حدِّد جنجويد والّا جلّابى؟




كتابة ممتعة

تحياتى

الله يجبر بخاطرك يا وانجا
صدقي انتي اول زول يقول لي كلمة سمحة زي دي في البورد دا









حسب التصنيف البشاشي جلابي طبعا

حمد الحلوم..

يقول معلمو الاحلام ومفسريها في دوريات الاحلام ..
ان الحلم اذا تجاوز الستة ثوان فلا يستطيع صاحبة ان يمسك باطرافة جيدا وقد لا يتذكره اصلا..
الله خلقني احلام طويلة زي احلامك دي مالاقتني..
الواحد بشوف البيت في ثانية الثانية التانية بكون كمل مايلزم لجعلها كصخرة املود..
الثانية التالتة والرابعة والخامسة بكون ختم كل شي..في الساتة بكون شايل هم الملاية..
طول احلامك من طول ساعات طيرانك يا حبوب..
من الواضح انو الطيران بتاعك بقى درجة اولى مؤخرا..
كيفن تكون على متن بوينج وعايز تحلم بي حاجة واحدة في مكان واحد مع زول واحد ؟؟!!


انتا لو بتخت كورتك في الواضة احلامك ما بتجوط..
حمد امبس
يا تحلم باستقرار ياتطير..
حلم مستقر وطيران ما بتلمو..








منتظرك بكرة مع قرد درار..
حاول تعال تقبل بركتي وحمدل لي سلامتي..

دكين
شخصيا غايتو ناس معلمو الاحلام بتاعينك ديل ما جوني بي امتارم و قاسو لي مناماتي
بالمناسبة هواية الطيران سببا الاحلام و ليس العكس

Quote: منتظرك بكرة مع قرد درار..

الجية هينة انتا صلحتا مكيفك داك و لا لسة واطي زيك









اخر مرة يوم ودعناك مكيفك ابدا ما كان قدر المسؤلية
ارجو انك قد اصلحت من شانه
اصلح الله شانك

دكين الوغد
حمدلله علي السلامه
وشكلك جاي بدون خبر
كده ما عملت حاجه




يعني راحع ولسه 000 بكر!!!!!

حمد ...
تحية لك و لأحلامك كيفما كانت ( بإستثناء الكوابيس )
بالمناسبة أنا بعرف ترزي شاطر ممكن تلم أحلامك المقطعة و توديها ليهو بيفصل ليك منها حلم من نوعية ( تموت تخلي ) أصلو ما بيتقطع ...

ياخي أسلوبك جميل و كتابة من النوع اللي الواحد ما بيصحى منها إلا لما ( تتقطع )

أنا لما كان تقفل معاي كنت بلجأ لأحلام اليقظة ... يعني حاجات كدا في ( توم أند جيري ما بتشوفها )

مودتي ...

حمد يا اخوي .. انت غيرت بتاع ( المحلبية ) ولا شنو ..!!

حمد ازيك
غايتو حكاية الشكاوي القضائية دي لو بدأت ما بتقيف.
انت يا خوي نسيت الاساتذة ولا شنو؟
ناس محمد موسى وحسن دياب ؟؟

خالد عويس كيفك
تعرف استاذ محمد موسي دا تحديدا مفروض كان نشتكيهو في لاهاي
تصدق يا خالد يوم العقد بتاعي جاني اصلا ما تغير

خالد دي مداخلة من عبد الناصر اتامة بالايميل بسلم عليك فيها

Quote: حمد ود أحتي سرن بيكومندو الله يجازي محنك دايما أشتر حتى في مناماتك انت عارف بقليل من التركيز قبل النوم يمكن أن تجعل مناماتك كلها مرتبة ومخرجة حسب ما تريد ان سلاسة وترتيب الرؤيا تسنتند ( وذلك حسب قوانين فيثاغورث ـ على آخر الوجوه التى فارقتها قبل الخلود الي النوم ـ وطريقة النوم ايضا / غالبا ما بتكون نايم بطريقة بشعة وانت عامل كرعينك المكجلوين ديك ت ولا تكون متعشي فول قلابة مع جدو تلول ولا قشر درار وبعد داك عايز تحلم باحلام وردية ومرتبة . ناس خالد عويس ودكين ما رعو البهائم عشان يعرفوا يرتبو ليك احلام الرعية شوف قشر تلول ولا ود درار ـ انحنا احلامنا من هول ما مرتبة بعد ما نصحا وننوم ناني بنواصل ما انقطع منها . وليس ببعيد ذلك الحلم مع الممثلة المشهورة ـ الحلم داك لو عاوني أحلموا ليك الليلة ما عندي مانع المحلات البتمشي فيها ونوع الناس المعاك هو البحدد نوعية الحلم ( مثل صيني .. التحية لديكن وخالد عويس خالكم جمال عبد الناصر

حميدة كيفك
اخر اخبار السمايات شنو ؟
ما طولنا شوية








بالمناسبة عوض عكاشة جابو ليه ولد تاني ما تقوم تجي

Quote: بالمناسبة عوض عكاشة جابو ليه ولد تاني ما تقوم تجي

الزول دا شغال في ( دواجن فقيه ) ولا شنو ..!!

العزيز اشرف
تحياتي
اقول ليك مخرجة هوليودية شرط تقول لي ترزي تموت و تخلي
بمناسبة الترزي دي نحنا في البلد كان عندنا ترزي فقر جدا و هو يمكن يكون واحد من اسباب الكوابيس
كيف
تديه جلابيتك قبل رمضان بي اسبوع
يقعد يماطل فيك و يمطوحك و يعلقك و يعيشك كل يوم في كابوس انك ممكن تعيد بجلابيتك القديمة

Quote: ،بل تعدى الامر ذلك ان شاركت ذات مرة فى ادخال امراة عجوز داخل لحدها و كنت ممسكا بالجانب المقابل للراس و لم اكن ادري ان الذي يمسك هذه الناحية هو اخر من يتوجب عليه الخروج من القبر و عليه توسيد الراس جيدا و بصورة مستقيمة باستعدال الكتف الايمن و وضعه مستقيما باتجاه القبلة و من ثم سحب الثوب الذي يغطي الجسد من ناحية الارجل و اقفال القبر باحكام ، فتحولت تلك الكوابيس الى منامات عادية بل مسلية في بعض الاحيان ..

Quote: ،.، فنشاهد احداث المنام و قد ابتدأت بمقابلة لطيفة لبنت جميلة تتبعها بعض الغمزات و المفاهمات ، و ما ان تبدأ احداث الحلم الحقيقية و تدخل في طور اللمسات و الاهات الدافئة حتى تتحول تلك الفتاة الجميلة الي امرأة قبيحة او عجوز مسنة مما يؤدي لانقطاع الحلم دون تعمل عملتك ، .

انت با حمد متوقع احلام كيف يعني مادام ده عماركـ بالنهار؟





__
ده جزات اللي يباري حسن الترابي

والله يا خدر فتوى الترابي دي ريحتني راحة
ياخ مسالة العذاب الفي القبر دي كانت مسؤلة عن تخريب جزء كبير من حياتنا
شجاع اقرع و مكر و مكير و جلد و كبع دا كلو قال ليك مافي
يدخلوك جوة ترقد تنوم لغاية الساعة تجي و يجي يشفع ليك الرسول
و يدخلوك الجنة

حمد ياعمك...

Quote: مما يؤدي لانقطاع الحلم دون تعمل عملتك

الله يخيبك فشلتنا
ما سمعت بالمثل -الغير سري - و القائل " الفحل ما عواف "

بررراي سويتا في نفسي
...
انا كان مالي و مال زي دا




يا محمد كمان ما لدرجة العجايز
اخوك عزال بس و خاصة في المسائل دي بالذات
ما بتتحمل يا فردة

اها ..
ما قلت لي هيثم موقفه شنو في الموضوع دا ..!!

هيثم دا احد الاسباب الرئيسية في كل ما يحدث

Quote: كنتيجة طبيعية لقرب بيتنا من المقابر

يا أخينا إنتو رحلتو ولا شنو ؟!!!!

Quote: يدخلوك جوة ترقد تنوم لغاية الساعة تجي و يجي يشفع ليك الرسول

يعني كسير تلج مافي؟










_
مناماتك عينة

حمد امبس

تحياتي

بما أنو الأحلام عبارة عن تفريغ لمكنونات العقل الباطن و مجريات الأحداث المخزنة فيها بما فيها الأماني و كل الزخم من شخصيات و الأمكنة ..

لذا فإن أردت أن تجد سيناريو كويس و نص جيد لكل حلم أن تفعل الآتي .. و النتيجة فتاكة :

1. شيل من ذاكرتك دكين و حميدة و طارق نقد و كل من جرى جريهم.

2. لا تتعشى تركينج بعد الساعة التاسعة مساء.

3. لا تتفرج على مسلسلات مصرية بالليل .. لأن رد الفعل بتاعا عكسي ... من عينة ( في واحد فينا حيروح في داهية .. يا إنت يا إنت ) ..

4. أمشي جنب البحر كتير و استمع لقراءات شعرية من MP3

5. غير الصنف ( أقصد صنف العشا ... و كتر من الإندومي )

و أديني خبر

Quote: 2. لا تتعشى تركينج بعد الساعة التاسعة مساء.

قتلتني يا رجل
عارف يا ابو جهينة الاربعة وصايا الباقية مقدور عليها
لكن شوف لي حل مع دي


ياخ انا من شدة ما بقيت معلم في صناعة التركين
اخدتا شهادة ( التي سي سي ) من البروفسير ذويق تركين ايمن تنقو و اللواء اركان اكل تركين دكين و المخضرم طارق عبده
تجي بي بساطة تقول لي سيبو

حيدر انتا احمد الله المرقتا من كسير الضلع و الثعبان القالو طولو سبعين ضراع داك
كسير التلج نرجاه في الجنة القبر دا خليه ناشف كدا احسن

Quote: مناماتك عينة

ما اظن لاقتك منامات اهبل من كدا موش

البيت العشتا فيهو الطفولة دي كان حوش كبير بتاع ناس جدي
بعدين رحلنا منو
و نكاية فيه كسرناه
و عملناه مزرعة نخل




البيت الانتا جيتني فيهو دا بيتنا الجديد

حمد سلامات ...

Quote: لا اذكر كثيرا الاحلام الجيدة التي رائيتها نائما

Quote: صراحة لم استطيع التغلب نهائيا على هذه الكوابيس

Quote: لم تقتصر المنامات سيئة الاخراج على كوابيس الطفولة و احلام الغربة غير المنطقية فقط ، بل امتدت و شملت حتى المنامات ذات الطابع الجنسي

ــــــــــــــ
عندي الحل وصلت ..... تب

تلحقنا و تنجدنا بيه يا كع الله لا يسيئك