تعبيرات دارجة - بليغة

درسنا في مادة البلاغة أشياء كان العرب يقولونها ويقصدون غيرها، فمثلاً يقول العرب في مدح المرأة (بعيدة مهوى القِرط)، ومهوى القِرط هي المسافة بين حلمة الأذن والكتف، فإذا كانت المرأة "بعيدة مهوى القرط"، فهي طويلة الجيد، وهي علامة جمال. كما يقولون أن فلان (جبان الكلب)، ويريد القائل هنا أن الكلب لا ينبح في الأغراب، وذلك لأنه متعوِّد على رؤية الأغراب، فهم غالباً ما يدخلون البيت جماعات، وذلك بسبب أن صاحب البيت مِضياف، والكرم إحدى صفاته، وهذا ما يريد القائل الوصول إليه، أن (فلان كريم).

طيب، كان حيحصل شنو لو قال إنو فلان كريم، وفلانة رقبتها طويلة؟ عالم تحب تعقّد الإشياء بس.

عندنا في السودان تعبيرات مشابهة في دارجيتنا الجميلة. تعالوا نحاول نجمّع ما نذكر من تلك التعبيرات.

تعبيرات زي ...

إيدو لاحقة
و
لسانو طويل

محمد

تحياتي

شكرا على هذا البوست في خضم المعارك الدائرة

نجي للتعبيرات

أباطو و النجم : كناية عن الفلس الشديد

نفسو حار : كناية عن سريع الغضب

إيدو مقدودة : كناية عن الإسراف و الصرف البذخي

صبراً يبل الآبري : و يبدو أن الأبري كان أكثر شيء يتطلب أن يصبروا عليه : كناية عن طلب الصبر

و واصل

دمتم

محمد ابو العزائم
تحياتي وشكري علي الموضوع اللطيف جداً
دي فرصة اقول ليكم واحد من ابلغ الجمل التي سمعتها.. ولكن يلزم ان اذكر السياق كامل ليتضح المعني.
طالبة الشهادة السوادنية يسألها عمها الكبير في السن عن أي كلية ترغب في الدراسة بها بالجامعة.
قالت: كلية الطب.. عشان ابقي دكتورة واعالجك كان مرضت.
قال: والدراسة كم سنة.
قالت: ستة سنوات
قال: ستة؟؟؟
اكون بقيت للتراب بقاقة
لم اسمع في حياتي من يذكر الموت ويصف القبر ابلغ منه

شكري لك مرة اخري

أبا جُهينة
أكيد عندك الخبر اليقين

Quote: نفسو حار : كناية عن سريع الغضب

وعكسها أيضاً صحيح (نفسو بارد)

وعلى ذكر الأنفاس:
هناك من (نفسو طويل)، وهو الذي يصبر على الأشياء حتى ينال مراده.
والعكس (نفسو قصير)

أشكرك على المشاركة والإضافة

و ... واصل معانا[GREEN/]

Quote: واصل معانا

كمال ...

أبقى داخل ... أنا عارف جرابك مليااان

ابو الريش

سلامات

الزول البواصل الناس ويصلهم في أتراحهم وأفراجهم كراعو طويلة

وللبسرق وبمد يدو على حاجات الغيرة أيدو طويلة



وبجيك راااجعة

الأخ مجدي بحر ..

شكراً على الإطلالة والإضافة الجميلة ..

خليك قريب

الأُستاذُ / محمَّد أبو العزائم ..

لكَ التَّحايا ممهورَةً

بالودادِ وبالرُّقِيّ ..

وسأَعُودُ إليْكَ هُنا

ثانيةً بإذنِ واحِدٍ

أحَدْ ...

فزَمَنِيَ الآنَ أبيضُ مِنْ سِرْبَالِ

الطَّبَّاخْ ..

..

قَمَرٌ لأجلِكَ وحَرْفِكْ ..



احترامي ...




أخوك / محمَّد زين ...

إنعام ..

Quote: كراعو طويلة

ده زول كويس شديد .. لكن في واحد تاني كراعو حارة أظنو البيجي داخل والناس طالعين

Quote: أيدو طويلة

مش برضو بيقولوا إيدو خفيفة؟

Quote: وبجيك راااجعة

مستنييييك

الأخ الكريم محمَّد زين الشفيع

أشكر إطلالتك .. وفي انتظارك .. هات ما في جعبتك وتعال

أبو العزائم و ضيوفو الكرام ...

هاكم دى حاجة بسيطة و جاييكم راجع..

بطنو غريقة: دة البيحفظ او يكتم السر، أو ما بيطلع أمورو الخاصة حتى على أصحابة

لسنه فلقة ..لسنو فاكى .. لسانه متبرى منو: ده لما الواحد بيقول الكلام البيجى فى راسو من غير ما يراعى للناس الحواليه

الأخ الكريم محي الدين سر الختم

أشكرك على الإطلالة والإضافة الجميلة

الجبيب ود ابو العزئم

بوستيك ظريف وما بنفات

زمان فى السبعينات كنا ساكنين فى ود مدنى
بحكم عمل الوالد (رحمه الله) فى ادارة التوجيه التربوى
مره جاتنا خالتى (الله يرحمها) فى زيارة من البلد ،
والوقت داك لسه الكهرباء والمويه ما دخلت قريتنا
الخاله لما جات احتفينا بيها طبعا، وأكرمناها ، اكل إيه
وتحليه كاستر ، وفواكه ، وبيبسى
بعد ما الخاله اتظبطت كويس بالحاجات دى قامت قالت :
اتاريكم قاعدين هنا تاكلوا فى الحنتويل وتشربوا فى المويه الباردة ،،،
لى هسى ما عرفنا الحنتويل ده شنو ....

اها اديك كمان ع السريع كده :

عينوا طايره : الزول البعاين للنسوان
اضانو خفيفة :الزول الشمشار ، البنقل الاخبار
ايد ورا وايد قدام : دليل على العودة خالى الوفاض
حانف وشيشو تقول بدور يقع منو : للزول البكون زعلان لمن عاوز يطق
الرماد كال حماد : دليل حدوث كارثة او مصيبة
التُرابه فى خشمك ، خُم وصُر : تقال عندما يفشل الشخص فى تحقيق نتيجة ايجابية فى شى ما

الحبيب ود الجنيد ..

طبعاً جنس الكلام ده بعجب ناس البادية بالحيل.

غايتو الحنتويل ده يطرشني .. لكن دي فرصة تفتش وافتش معاك .. يمكن نلقاهو.

(عينو طايرة .. وأضانو خفيفة) دي فعلاً من الأمثلة القاصدها في البوست، وشايف بالتحديد العين والأضان ليهم تعبيرات كتيرة. وأضانو خفيفة ممكن برضو تعني (حاد السمع) وعكسها (أضانو تقيلة).

خليك قريب ..

مودتي

راسو خفيف ...*












----------------
* هم اللي قالولي

الأخ محجوب البيلي ..

الراسو خفيف ده طبعاً البيسكر من كاس واحد والاّ إتنين.*

لكن الغريبة تعبير (راسو تقيل) ما عندها صلة براسو خفيف، وهي تعني (النوم كابس عليهو) .... مش؟

شكراً للمشاركة.




___________________________
* أنا كمان هم اللي قالولي

قلبو كبير
كناية عن الزول الجبان لية ما عارف



زمتو واسعة
البياكل حق الناس

الأخ Mohammed Kaddam

Quote: قلبو كبير كناية عن الزول الجبان لية ما عارف

صراحة أنا برضو ما عارف ليه.

وكمان نفس التعبير بيتقال للزول المسامح

يديك العافية

Quote: وبجيك راااجعة

وكت طولتي كراعك وطولتي يدك ...
طوّلي بالك برضو لو سمحتي ...

ومعانا معانا بالدرب الطويل ...
قشه ما تعتر ليك ...

Quote: قلبو كبير كناية عن الزول الجبان لية ما عارف

صحي ما عارف !!!!
مع الاعتذار للأغنية ...

زول بطنو غريقة ...
وزول قدامى ..
وزول تقش فى طرق توبو ..

غايتو لااعرف مدى المام اهل الحواضر ناس برى بزى كلامنا
دا ..لو غلبك قول عوك ..سلام ياابوالريش ..

ارجوا ان تكون مداخلتي خفيفة الظل لانها من الدارجي جدا من ديار المسيرية

يقولون ان فلان عنكريب سجالة ( السجالة تعني الاصحاب او الاصدقاء )
و نكريب السجالة كناية عن قوة التحمل حيث ان الاصدقاء يجلسون باعداد كبيرة في عنكريب واحد فهو دئما يحمل اثقالا لبيرة دون كلل او ملل

محمّد أبوعاقلة

Quote: وكت طولتي كراعك وطولتي يدك ... طوّلي بالك برضو لو سمحتي ...

الله يدينا طولة البال بس

مرورك ظريف

محمّد عبدالرحمن ..

Quote: غايتو لااعرف مدى المام اهل الحواضر ناس برى بزى كلامنا دا ..لو غلبك قول عوك ..سلام ياابوالريش ..

يا زول والله ناس بري ديل (تقش في طرف توبم)

تعال وجيب لينا كلام ناس الجزيرة

تحياتي

الأخ adam alamar

Quote: ارجوا ان تكون مداخلتي خفيفة الظل لانها من الدارجي جدا من ديار المسيرية يقولون ان فلان عنكريب سجالة ( السجالة تعني الاصحاب او الاصدقاء ) و نكريب السجالة كناية عن قوة التحمل حيث ان الاصدقاء يجلسون باعداد كبيرة في عنكريب واحد فهو دئما يحمل اثقالا لبيرة دون كلل او ملل

ياخي زولك ده ما ياهو زاتو البنقول عليهو نحن (جمل الشيل).

أتحفنا بالمزيد من ديار المسيرية .. شكراً ليك .. أديت البوست بُعد جديد

تحياتي

ابو الريش ياعمك....
هاك دي بمناسبة اسبوع قوة العين اليومين ديل

عينو/ها بيضا - كناية عن الجرأة الغريبة و التناحة وعدم الحياء و حاجات تانية

سلام أبو الريش ، هاك ديل :

شنقلي طوباي تلقي دهباي

دفن الليل أب كراعاً برة

الـ في سروالو قداي ...ولا بفنقل ( أو يشنقل ) --- ده عايز ترجمة

دنيا دبنقة ..دردقي بشيش ..

الحسنة في المنعول ...زي الشرى في القندول

والنواية بتسند الزير..

بعدين ، الفولة في خشمو ما بتنبلا

والسايقة ..واصلة

والعريجا ...لي مراحا

وكلام القصير ..بتلقي ورا ...( يعني ضحى الغد )

لو اتذكرت حاجة تانية ...بجيك راجع ...شكراً على البوست المفيد الخفيف ...
ودي وتقديري ..لك ولزوارك الكرام ...

الأخ إبراهيم فضل الله ..

يا زول زيدنا من كلام كردفان الحللللو وطاعم ده.

Quote: الـ في سروالو قداي ...ولا بفنقل ( أو يشنقل ) --- ده عايز ترجمة

ده كان ترجمتو ما بجيب الفضايح ..... هو سروالو فيهو قدَّاي .... البخلي يفنقل شنو؟

شكراً على الأمثلة المعبّرة

تحياتي

أبو حتوت ياعمّك

Quote: عينو/ها بيضا - كناية عن الجرأة الغريبة و التناحة وعدم الحياء و حاجات تانية

السؤال هنا ياتو عين بتعلو على التانية (العين البيضاء) والاّ (العين القوية) .....

بعدين عرفنا (الجرأة) و(التناحة) و(عدم الحياء) لكن ما عرفنا (الحاجات التانية) دي .... تكون (حاجات تانية حامياني) على قول ترباس؟

شكراً على المرور و ... خليك معانا

شكراً لكل المتداخلين ....

بجيكم واحد واحد ..... هسي ماشي أتغدّى

Quote: لكن في واحد تاني كراعو حارة أظنو البيجي داخل والناس طالعين

ابو الريش

بحب الحاجات دي موت.

شوف آخر واحد حيخش البوست ده

وبعدو مايتدخل زول وحاتعرفو أنو :

كراعو حاره.

وكتين :
( عالم تحب تعقد الأشياء )
إتو شن بوديكم للكلب يعضيكم!؟

Quote: الراسو خفيف ده طبعاً البيسكر من كاس واحد والاّ إتنين.*

القال ليك منو ؟
بجيك بس هسع:
ماني لاقية إيدي
غير :
ماني لاقية خاتري

سلام كتير بابوالعزائم

الأخ صلاح الأحمر ....

يا زول إسمك ده أنا شامّي فيهو ريحة كردفان ..

كان ظني صحيح .. تعال ورينا جرابك الكردفاني فيهو شنو.

وكان ما صحيح .. ورينا العندك محل ما تبقى.

عاطر التحية

بت الحسن كيفنّك ..

تعالي ... بتلقي خاترك ..
بس إنشاء الله تلقي إيدك.

و .... سلام أكتر من الرسلتيهو

ابو الريش كيفنك
جينا بس نخت بنبرنا لامن نفضى
وكان عايز تشبيهات انا جاهز

راسو ناشف(يابس)
ضراعو اخدر(اخضر)
جلدو خشن
نفسو طويل
نفسو قصير

ماضي ..

الغريبة إنو في كل الأمثلة الأوردناها هنا، مافي علاقة بين الوصف والموصوف، بمعنى إنو التعبير غريب (بطنو غريقة) ... الغريق ده طوالي بنفكِّر في بير والاّ بحر. وقلبو كبير .. أظن أهل الطب بيقولوا كبر عضلة القلب يعني اعتلالها عافاكم الله. رغم كدة ... ورغم غرابة جمع الوصف والموصوف بهذه الطريقة، إلاّ أنهامعبّرة جدّاً.

حذف للتكرار (الجهاز علق)

حذف للتكرار

يا زول والله إحلوّت حلا!

طارق جبريل بي جلالة قدرو معانا هنا؟

Quote: ابو الريش كيفنك جينا بس نخت بنبرنا لامن نفضى وكان عايز تشبيهات انا جاهز

يا زول وهِّط بنبرك وادينا من تشبيهاتك ووصفك البعرفو داك.

وهات من حق أهلك الشايقية.

حبابك ألِف

بقولو فلان الغنماية تاكل عشاهو لوصف الانسان الذى لايستطيع الدفاع عن نفسه..

و ركاب سرجين لوصف الانسان المنافق..

وشو يلعن قفاهو للزول الغضبان وصارى وشو..

كمان بقولو فلان ياكل مال النبى الخدر للانسان الغشاش المخادع فى امور المال ..

فلان يمسّح ويكتّح للذى يفعل الشئ ونقيضه فى نفس الوقت ..

التعديل لوضع الشدة على السين والتاء

فلان تاكل وتمسح يدك فى هدومو للانسان المتسامح ..

فلان دقو ليه الطار يعنى شهرو بيه ..

بطنو غريقة
عينو قوية

جكس شرط
كراعو حارة

أب سكاكات

لسانك حصانك

تضوقي يا بنية
تضوقي كان حية

أمشي عامل راسك زي اللديتر

الولف كتال



كرمبا

Quote: فلان يمسّح ويكتّح للذى يفعل الشئ ونقيضه فى نفس الوقت ..

ويفلق و يداوي؟


سلامات يا أبوحميد.

محمد المرتضى

حكاية "يفلق" دي بتذكّر الزول بي تعبير "صلعتو (نضيفة)"

أرقد عافية

Quote: بطنو غريقة عينو قوية جكس شرط كراعو حارة أب سكاكات لسانك حصانك تضوقي يا بنية تضوقي كان حية أمشي عامل راسك زي اللديتر الولف كتال كرمبا

كرمبا دي واحدة من التعبيرات والاّشنو؟

ليك التحية

يختو على الجرح يبرأ

عينوحارة

روحه روح كلب


سليمان

سلامات

الكلب بريد خنّاقو

فلان مخه تخين

كلام القصير ما بتسمع

كيفك يا أبو الريش

تشبيهات المدح بما يشبه الزم

قال الشاعر: أنا العفنه المقابلة الريح .. وأنا الشافوا كلو أبو

الزم بأسماء الحيوانات
جن وسعر
بخ سمو
لسعتو والقبر


والنشال الحريف بسرق الكحلة من العين

تحياتى

رأفت ....

Quote: أنا العفنه[/B] المقابلة الريح .. وأنا الشافوا كلو أبو الزم بأسماء الحيوانات جن وسعر بخ سمو لسعتو والقبر

ياخ نحن مالو كلامنا كلو شين كدة؟

__________
خارج النص:
خلي سلوى صيام تواصل معانا ... وبطِّل أمور التحريش دي

عادل التجاني يا حبُّوب

Quote: فلان مخه تخين

الغريبة إنو المُخ يوصف بإنه (تخين)، وفي نفس المعنى، الفهم يوصف بإنه (تقيل) .... فهمو تقيل

تحياتي

صاحب المداخلة .. سوسن عبدالله والاّ سليمان ...
أيّاً كان ... حبابو عشرة

Quote: روحه روح كلب

التعبير ده محيّرني ... لأنو المعروف إنو الكديسة هي الروحها طويلة .. وكمان بيقولوا عندها تسعة أرواح .. ما عارف الكلب جابها من وين؟

الفقرة الفوق دي جابت لينا تعبير تاني من التعبيرات المقصودة، وهو (روحو طويلة).

تحياتي

رقيّق وزادو موية
اذا باظ الامر نهائياً ولاينفع اصلاحه ..

دخرى الحوبة
للانسان المِقدام..
عشا البايتات القوى
للانسان الشهم..

جناً تعرفو ولا ملايكةً تغباك
دى بقولوها فى حالة تكون ما عايز تجازف وتدخل فى المجهول ..

سلام يا رأفت ..

Quote: جن وسعر

كمان بقولو .. جنّ وفقد المحنة مش كدة ..
يا اخوانا وين سيد البوست .. نحن غايتو استلمنا المحل وقعدنا ..

كيفك يا سلوى

Quote: يا اخوانا وين سيد البوست .. نحن غايتو استلمنا المحل وقعدنا ..

شعرة جلدو كلبت .. قال الروب .. وقام صوف

ابو الريش
ســلامات
بوست ظريف

(فلان في جيبو عقرب) كناية عن البخل الشديد
(فلان قلبو رهيف) يعني ريــّاد
(فلان راجل فنجري) يعني ظريف
(فلان غيتوني)

مودتي

أستاذنا جعفر اسماعيل ..

Quote: (فلان قلبو رهيف)

غايتو نحن كلنا ما بنقدر على الهبباي في عز الصيف

وده لو طبّقوا عليهو (محل رهيفة التنقد) أمانة ما حيتمقلب.

طلّتك مفرحة

حباب سلوى صيام ....

Quote: يا اخوانا وين سيد البوست .. نحن غايتو استلمنا المحل وقعدنا ..

يا زولة ما عندك أي مشكلة ....

إستلميهو .. وضيِّفينا فيهو

_______
كلام في أضانك:
أوعي من رأفت ده بتاع شبك .. شايفاهو طلّعني مجنون وسعران

ابو الريش
سلالالالالالالالالالالالالالالام

وكمان...
كل حوض يشرب مويته
يعني فركش العلاقة

والحشاش يملا شبكته
نظام هلال مريخ وكده
وبرضو راجع ليك

هارون دياب ..

Quote: كل حوض يشرب مويته

دي ما مشكلة ... المهم ما تكون موية غسيل.

تحياتي

ومن احلي التعبيرات ....

ماكل نيم.....
ودي اسال منها ناس ود الصافي ونبيل الطيب
اصلوا النيم كتير في بورسودان

عذراً ....
أنا قلت ماشي أتغدى وأجي ....
لكن الحكاية طالت شوي ..... أظن كتير كمان.



جينا

الزول دة ... ركب الظلط

الزول دة ... فاطي سطر

هاكم دى أمثال للنسوان المبشتنات

الحتوت الرتوت أمات حدا برا موت

والما عندها تيلة بتسوى الحد حيلة

وجاياكم

حزف للتكرار

مع الحصل فى السودان اخيرا
بقينا ما عارفين كوعنا من بوعنا

Quote: مع الحصل فى السودان اخيرا بقينا ما عارفين كوعنا من بوعنا

عايرة وأدوها سوط
و
زادت المِطِمة قضاف

الأستاذة ناجية مصطفى

شوفي لينا من جرابك كلام نسوان مدبرسات ..... مفلهمات .... مسطَّحات .....

أقبض .... (مسطِّح) دي من التعبيرات البنفتش عليها ....

نوّرتي البوست

عبدالرحمن سوركتّي

الزول الفطَّ سطر ده مش بيكون مخو (فوَّت)؟

تحياتي

سمية الحسن طلحة ..

Quote: زادت المِطِمة قضاف

ممكن تتكلمي معانا بالعربي؟ أو تختي الترجمة على الشريط.

______
ما تشتغلي بالكلام الفوق ده ... وادينا كمان من كلام البادية

ابو العزائم مالك
تريان ومندي كاسي الكتان والهندي


وشِنْ القَعدة

يا أبو السُّرة

في ضُل العمارات أم كمرةً برّة

ضُقْنا الحَنْضَل اليانكي

وبَلَعْنا المُرّة

كِمْلَتْ كوتة التُّمبَاك

صَقَعْنا الجِّـرّة

ووكت إتقفّلَتْ شِقّيشْ

قَبَلْ بي المرّة

نَرْمي أمُرنا في بلد المعاني الحُـرّة

الشّمْ خَوّخَتْ

بَرَدَنْ ليالي الحّـرّة

والبرّاق بَرَقْ ..

مِنْ مِنّا جاب القِرّة

شوف عيني الصِّقير بجناحو كَفَتْ الفِرّة

تلقاها ام خدود الليلة مَرَقَتْ بَرّة

محمد أبو العزائم
مليح الماعرفت المطمة ولا القضاف
عشان بطنك ما تطم وتقضف

باقي محنانين في البحصل للوطن

المحن قعدن في الصحن وقامن يرقصن

تعالي يامحنة سلمي علي أبوك

محمّد الطيب ..

شايفك مركِّب مكنة القدّال الليلة .... إنشاء الله خير ..

شكراً يا ظريف

دكين مر من هنا ..
و .. راجع

ابو الريش ..
سلام ..
هاك ديل إن شاء الله ما يكونوا مكررات :
العين ما بتعلى علي الحاجب
السواي مو حداث
سهر الجداد ولا نومو
تاكل بضرسك تنفع نفسك
الماتلحقو جدعو
باب النجار مخلع
اتعلم الزيانه في قفا اليتامى
الماعنده ضهر ينضرب علي بطنه

الفولة بتتملى والبقارة بجوا (يعنى لابد من رجوع أصحاب الحاجة )

ورلك صنقع (كناية عن أستحالة الشئى أو بعده )


بت الرداف ما بتخاف ( يعنى بنت الرجل المزواج لا تخاف من الضر)


الكمدة بى الرمدة ( للشئ التاثيره ومباشرسريع )


الفى والوالدك بقالدك ( تعنى التشبه بصفات الوالد)

شوكة حوت لابتنبلع لاتفوت(للشخص المجبرعليه )

عماد عبدالله ...

جايينا بي قلم أسود، قرّبت ما أعرفك .... الحبر عندك خلص والاّشنو؟

سيبك من دكين هسي يجي يقول ليك (كااااك) وما عارف شنو.

تعال إنت وورينا العندك ما تيقى زول ((ضلّك ميِّت))


إزيك ياخ

القندول الشنقل الريكة ..

الأخ محمد علي طه الملك

Quote: العين ما بتعلى علي الحاجب السواي مو حداث سهر الجداد ولا نومو تاكل بضرسك تنفع نفسك الماتلحقو جدعو باب النجار مخلع اتعلم الزيانه في قفا اليتامى الماعنده ضهر ينضرب علي بطنه

أشكرك على الأمثلة المعبّرة.

حبّذا لو تدينا من نوع الجُمَل التي يكون فيها جمع الوصف والموصوف غريباً على شاكلة (كراعو حارَّة) و(بطنو غريقة) و(عينو طايرة) إلخ

تحياتي

الأخوة والأخوات ....

التعبيرات التي قصدتها في هذا البوست هي التي تتكون فيها الجملة من مبتدأ وخبر، أو صفة وموصوف (أرجو تكون معلوماتي اللغوية صحيحة). وسأحاول هنا تبويب هذه التعبيرات كالتالي:-

وصف العين:
1) عينو طايرة.
2) عينو قوية
3) عينو بيضاء

وصف الإيد:
1) إيدو لاحقة.
2) أيدو مقدودة.
3) إيدو طويلة.
4) إيدو خفيفة.
5) إيدو تقيلة.
6) ضراعو أخدر.

وصف الكُراع
1) كراعو طويلة.
2) كراعو حارَّة.

وصف الراس:
1) راسو خفيف.
2) راسو تقيل.
3) راسو ناشف.

وصف القلب:
1) قلبو كبير.
2) قلبو رهيف.
3) قلبو قوي.
4) قلبو خفيف.

أوصاف النَفَس
1) نَفَسو حار.
2) نَفَسو بارد.
3) نَفَسو طويل.
4) نَفَسو قصير.

أوصاف اللسان:
1) لسانو طويل.
2) لسانو فاكّي.
3) لسانو حلو.
4) لسانو زِفِر.

أوصاف الأضان:
1) أضانو خفيفة.
2) أضانو تقيلة.

أوصاف متنوّعة
1) بطنو غريقة.
2) ذمّتو واسعة.
3) بالو طويل.
4) بالو واسع.
5) جلدو خشن.
6) مخّو تخين.
7) فهمو تقيل.
8) روحو طويلة.
9) ضهرو قوي.
10) دمو خفيف.
11) دمو تقيل.
12) نفسو صغيرة.
13) أخلاقو ضيّقة.
14) أخلاقو واسعة.
15) ضلّو ميِّت.

والباب مفتوح للإضافات

الباب مفتوح للإضافات

يا محمد أبوالعزائم أبوالريش
مشيتوا وين ؟

أنا أمى رحمها الله كان عنها لغة ما عارفا داجة ولا قاطعاها من راسا

مثلآ الزول (البلباص) ودى من تعابيرا ..

تقول ليك نخرتو صاقطة

ياخي رحمة الله على الوالدة .... لكن بصراحة (نخرتو صاقطة) دي ما مرّت علينا .. غايتو نعتمدا والحقوق محفوظة للوالدة.

دي بتذكرني إنو نسينا تعبير (عينو حارة)