Post: #1
Title: اقسى لحظة
Author: Afaf Elsadig
Date: 04-30-2008, 06:25 PM
أقسى لحظة تمر على
لما إنت تكون مسافر
نبقى هى المر الحقيقة
وبحسب الزمن البعدى
بينا بالثانية ودقيقة
ولما انت تكون مسافر
بستف الحب بين ملابسك
شان يلامسك
كل هدماً ترتديهو
تلاقى فيهو
قليبى حارسك
ولما تهدأ فوق وسادتك
تلقى روحى ملت جوانحك
ولما تغمض رمش عينك
ابقى فى نومك ازاحمك
ولما تبقى امام مرايتك
تلقى صورتى كست ملامحك
ولما تزعل من قرايبك
امحو زعلك يوم امازحك
وكل موقف من مواقفك
ابقى قدرك
وابقى فيهو انا البشابهك
ولما تمرق لى صحابك
وكل زول بشوق يسالمك
تلقى فى إديهو إيدى
ولما بالأحضان يصافحك
تلقى فى احضانو حضنى
ولمحة من عينى تصابحك
حتى فى نغمة كلامو
تلقى صوتى مزج كلامو
ونحس بىّ أنا البصارحك
وين تسافر منى تمشى
وين تقبل منى تبرى
يانى فيك أنا امتزجتّ
بمزج النفس البيطلع
مرة شهقة
ومرة زفرة
أكوّن الدم فى عروقك
وامشى فى شريانك ابرى
مسلك الحب فى وريدك
منوأغرف ومنو أروى
يانى ندك وليك نديدك
عنك اكتب ومنك اقرأ
والتزاماً بالقضية
والتمسك بالمبادىء
والمبادى هى الحقيقة
والحقيقة العندى هىّ
لامساومة
لامسالمة
فى المقاومة بى مداومة
والتزاماً
حق تماماً
انا البريدك ....انا البريدك
وين بتمشى بلايا درباً
كل درباً تمشى فيهو
لى بودى
وكل حدود الدنيا عندك
هى حدى
وأينما قبلت تلقى
إنك إنت منى لىّ
وإنك إنت
كل ما عندى
عفاف
|
Post: #2
Title: Re: اقسى لحظة
Author: Osman Musa
Date: 04-30-2008, 06:56 PM
Parent: #1
الأخت عفاف
سلامات
ربك يلم الشمل ..
سلام شديد
|
Post: #3
Title: Re: اقسى لحظة
Author: الحاج حمد الحاج
Date: 04-30-2008, 07:46 PM
Parent: #2
Quote: أقسى لحظة تمر على
لما إنت تكون مسافر |
ان شاء الله يرجع بالسلامة و ترجع أيامكم الجميلة
|
Post: #4
Title: Re: اقسى لحظة
Author: انعام عبد الحفيظ
Date: 04-30-2008, 08:44 PM
Parent: #1
يا سلااااااااام يا استاذة عفاف
عارفه قبل فترة بالمساء
بالصدفة فتحت اذاعة البيت السوداني FM 100
ولقيت القصيدة دي بصوتك في الإذاعة
وإتمنيت القى النص بتاعها كامل
شكراً لإهداءك لينا جميل الكلمات
وتسلمي يارب
|
Post: #6
Title: Re: اقسى لحظة
Author: jini
Date: 04-30-2008, 11:55 PM
Parent: #1
أقسى لحظة تمر على
لما إنت تكون مسافر
نبقى هى المر الحقيقة
وبحسب الزمن البعدى
بينا بالثانية ودقيقة
ولما انت تكون مسافر
بستف الحب بين ملابسك
شان يلامسك
كل هدماً ترتديهو
تلاقى فيهو
قليبى حارسك
ولما تهدأ فوق وسادتك
تلقى روحى ملت جوانحك
ولما تغمض رمش عينك
ابقى فى نومك ازاحمك
ولما تبقى امام مرايتك
تلقى صورتى كست ملامحك
ولما تزعل من قرايبك
امحو زعلك يوم امازحك
وكل موقف من مواقفك
ابقى قدرك
وابقى فيهو انا البشابهك
ولما تمرق لى صحابك
وكل زول بشوق يسالمك
تلقى فى إديهو إيدى
ولما بالأحضان يصافحك
تلقى فى احضانو حضنى
ولمحة من عينى تصابحك
حتى فى نغمة كلامو
تلقى صوتى مزج كلامو
ونحس بىّ أنا البصارحك
وين تسافر منى تمشى
وين تقبل منى تبرى
يانى فيك أنا امتزجتّ
بمزج النفس البيطلع
مرة شهقة
ومرة زفرة
أكوّن الدم فى عروقك
وامشى فى شريانك ابرى
مسلك الحب فى وريدك
منوأغرف ومنو أروى
يانى ندك وليك نديدك
عنك اكتب ومنك اقرأ
والتزاماً بالقضية
والتمسك بالمبادىء
والمبادى هى الحقيقة
والحقيقة العندى هىّ
لامساومة
لامسالمة
فى المقاومة بى مداومة
والتزاماً
حق تماماً
انا البريدك ....انا البريدك
وين بتمشى بلايا درباً
كل درباً تمشى فيهو
لى بودى
وكل حدود الدنيا عندك
هى حدى
وأينما قبلت تلقى
إنك إنت منى لىّ
وإنك إنت
كل ما عندى
عفاف
ياسلام
الله لا حرمكم من بعض ولا حرمنا منكم
جنى
|
Post: #7
Title: Re: اقسى لحظة
Author: اسيا ربيع
Date: 05-01-2008, 05:54 AM
Parent: #6
عفاف الحيبه
أبداك كيف ..؟؟
وأنا لسه يا دأب بكتشف
امشي وآلف
الخطوة ليك بتر تجف
اعرق و اجف
و الحرف مازال معتكف
في محراب جمالك اللبادي من الألف
الليلة جيتك اعترف
اقدل معاك
ما الدنيا بيك بتختلف
...
عفاف كيفك يمه.. مشتاقين شديد
كوني بخير يا اعزه الناس
اللوحه دي هديه ليك يا عفاف ,, من الفنان التشكيلي محمد دفع الله .. انشاءالله بس تكون قدر جمالك .
|
Post: #8
Title: Re: اقسى لحظة
Author: احمد العربي
Date: 05-01-2008, 06:25 AM
Parent: #7
عصفوره تلًت
في الغصن
واتنفضت
طارت ودارت في الغصن
واتمايلت
عزفت
قصايد الانشراح
وافاها بالإفصاح
صباح
واتمددت
فردت جناح
امل الربيع
وباليسار
فردت جناح كل الامل
واتمددت
واتلفتت
يمين شمال
وافاها في لمحة بصر
اتمايلت
وافاها بالحب والامل
اتباركت
همسات
فرح
واتمايل الغصن السلام
واتمايلو الاتنين
نغم
واتوسدت همساتم
الفرح الجميل
اتذايدت واتمددت
عصفوره تلَت في الغصن
واتمددت
|
Post: #9
Title: Re: اقسى لحظة
Author: عمران حسن صالح
Date: 05-01-2008, 07:33 AM
Parent: #8
Afaf Elsadig
يظلمكـ (بكري) ويظلمنـــا وهو يضع إسمكـ هكذا ...
شكراً للدكتورة :
عفاف الصادق حمد النيل ....
يا الكحلت عيون الدنيا
بلون الغنوة
يا الضفرت ضفاير
إحساس الكلمه الحلوه
يا الشتت نجوم الليل
في وش النيل
عقدا فوق القمرة
بيقدح فينا الضو
يا الطقطقت أصابع السحب
الشالن جو
دفق عسل المطرة
ونقط
كبت شو
نضمت غنت
سكتت صنت
مرقت دخلت
قامت وقعدت
شن بتسو؟
واقفة تلملم
فوق النجم
اللمَ حداها
نسجت منه الضل
الخت وباقي ضراها
فتقت منه الشدرة
الشال انحت جناها
الصلحة وسترة غطاها
واقفة تحزم
باقية تلزم
خيرا جاها
إيدها تسلم
تدي تعلم
ترفع جاها
تهدي تكلم
صوتها يرنم
يزيدها وجاها
وغنت ليك الغنوة السمحة
المابية تتم
إتضارت عين القمرة
تتاوق
|
Post: #10
Title: Re: اقسى لحظة
Author: عبدالله كع
Date: 05-01-2008, 08:09 AM
Parent: #1
Quote: وابقى فيهو انا البشابهك
ولما تمرق لى صحابك
وكل زول بشوق يسالمك
تلقى فى إديهو إيدى
ولما بالأحضان يصافحك
تلقى فى احضانو حضنى
ولمحة من عينى تصابحك
حتى فى نغمة كلامو
تلقى صوتى مزج كلامو
ونحس بىّ أنا البصارحك
وين تسافر منى تمشى
وين تقبل منى تبرى
يانى فيك أنا امتزجتّ
بمزج النفس البيطلع
مرة شهقة
ومرة زفرة |
عفاف سلامات ..........
حركتي فيني الشي الجامد الساكن ......
لكي كل تقدير ..........
ابدعي............ واني لكي صاغيا
ــــــــ
دربك اخضر انشالله
|
Post: #11
Title: Re: اقسى لحظة
Author: محمد الطيب يوسف
Date: 05-01-2008, 09:23 AM
Parent: #1
لااله الا الله
|
|
