حقوق المؤلفين, ميته وخراب كلام النبي المختار!

يا ساتر يا ستار
من الاسد النتار
ومن المرعفيب الجعار
ومن العقرب الرغوف
ومن الدابي الزحوف
ومن ود أبن آدم اب اضيناتن وقوف

(من أقوال صديقتي الاسطورية عاشا بت اب كدوك)

"خسمتك" بالنبي المختار /دي مني انا/"خسومة" الرسول عضو ليها دبرة الحمار/دا كلام بت ابكدوك/

شوف نضم الزول دا:

في بريد الدكتور حسن موسى , http://sudaneseonline.com/forum/viewtopic.php?t=2220&sid=...e436c10eba87d46e53ec
بموقع سودان للجميع, أورد العضو (الوليد يوسف) مداخلة جاء في ثناياها:


Quote: (عضو الحزب والحزب مثل الجسد الواحد أذا اشتكي منه عضواً
تداعي له سائر الجسد بالسهر والحمي).


ان يستعين الاخ وليد بما جاء في "الكتاب والسنة"
للمجادلة في أمر حزبه وعضويته, دي ممكن نقبلا,
حتى ولو رفعنا حاجبينا قليلا!, ولكن أن يجوبك
الاخ وليد كلام "المؤلف" الاصلي ويضيف فيهو من
عندو حتى من دون اشارة لصاحب الكلام!
دي الما قدرت أبلعا!
والكلام دا وين ؟ في مساحة افترعت اصلا للدفاع
عن حقوق المؤلفين!

بعدين لو الاخ وليد داير يعمل بكلام الكتاب والسنة, حقو يمشي
يتدرع العضو " المشتكي" دا ويتوادد
ويتراحم ويتعاطف معاهو! عملا بالحديث كما ورد في الصحيحين:

مثل المؤمنين في توادهم وتراحمهم وتعاطفهم مثل الجسد إذا
اشتكى منه عضو تداعى له سائر الجسد بالسهر والحمى "
رواه البخاري ومسلم.

أو كان من الممكن أن يعود للتراث الشعبي- وهو ايضا
واحد من مصادر التشريع- ويجيب لينا
حكمة البصلة المعفنة- برضو أرحم من انك تقطع
"عضو" وتسيح دمو ودم الناس التانين بصفتهم جز من الجسد الواحد!
, فالبصلة هي بصلة "مستقلة بذاتها" و
اذا شلتها جدعتها من الشوال فالا اظن ان سائر الشوال
يمكن ان يتداعى بالسهر والحمى, وذي ما بقولوا -كل بصلة معلقة من عصبتا-
(اشارة للمثل الشعبي المعروف)