بريطانيا تخطر الخرطوم رسميا رغبتها في استضافة محادثات دارفور

ابلغ د مصطفي عثمان اسماعيل مستشار رئيس الجمهورية
الصحافيين بذلك قبل دقائق
عقب لقائه سفيرة بريطانيا في الخرطوم .

ساعود بمزيد من التفاصيل
اميرة

الاستاذة / اميرة
مساء الخير

Quote: بريطانيا تخطر الخرطوم رسميا رغبتها في استضافة محادثات دارفور

معناها الطبخة استوت وجاهزة للتقديم ....
واول طبق فيها حيكون:
الاستفتاء حول تقرير المصير....
ذي ماحصل في نيفاشا.....

واه يابلد .....واه ياسودان .....
ربنا يكضب الشينة
التحايا
هارون دياب

د مصطفي قال ان وزير الدولة بالخارجية البريطانيةابلغه بالامر
خلال لقائه به في نيويورك قبل ايام واشار الي انه اثار بعض الاسئلة
مع الوزير البريطاني حول الموضوع .


الاخ هارون ..سلام
شكرا علي المرور .
اميرة

لقاء السفيرة البريطانية حسب د مصطفي
تطرق لبعض الاجابات علي الاسئلة التي طرحها
علي الوزير البريطاني .
الاهم ان د مصطفي ووزير الخارجية دينق الور
حيصلوا لندن الاثنين القادم بدعوة رسمية من الحكومة البريطانية


د مصطفي في تصريحاته للصحافيين اكد ان الحكومة تدرس حتي الان في المقترح
البريطاني ..ولم تحدد موقفها بعد ..
مذيد من التفاصيل غدا
خاصة مواقف قيادات الحركات
اميرة

الاخت العزيز اميرة الحبر ..لك التحية و التقدير ..

اظن ان المكان المناسب لعقد اي مفاوضات قادمة بخصوص دارفور
مهم ..و كما رأينا تلك المهزلة التي حدثت في سرت ..
والاساءات التي طالت اهل دارفور من قبل الرئيس المضيف ..
مكانية المفاوضات يجب ان تكون بعيدأ عن دول الجوار السوداني ..

--------

مودتي وتقديري ..

حمدلله علي السلامه أميره...

منتظرين الأخبار...

الأستاذة أميرة /
تحياتي
في اتظار ما وراء الخبر
ومعرفة موقف ورأي (الحكومة وقادة حركات دارفور )

الاخ العزيز ..محمدين ..سلام
كما قلت فعلا مكان المفاوضات مهم جدا ..والاهم هو
الاجماع حوله ..فالبعض لم يشارك في مفاوضات سرت
بسبب المكان .

ويبدو ان بريطانيا تريد ان تلعب دور كبير في المرحلة القادمة
وليس هناك اكبر من رعاية المفاوضات نفسها .

مني العزيزة ازيك
وكيف يس واية وعبد الرحمن
سلمي لي عليهم شديد

انت عارفة يا مني امبارح فشلت في الوصول
لتلفون احمد حسين ادم الناطق باسم العدل والمساواة
وعرفت انه رجع لندن انشاء الله حاتكلم معاه اليوم اضافة
لموقف حركة تحرير السودان الموحدة وناس عبد الواحد وبقية الفصائل
بس خليك متابعة .
اميرة

أميرة

دى يلزما تلفون عديييييل

أميرة

ردى على التلفون

الاستاذ عوض احمد عمر ..
اتذكر هذا الاسم جيدا واتمني ان تكون انت
عوض احمد عمر نائب رئيس تحرير صحيفة نجوم الرياضة في وقت مضي
عموما مرحب الاخ عوض ..وشكرا علي المرور والمتابعة .
وانا سانقل الاخبار حول الموضوع تباعا
مع تقديرى
اميرة

محي الدين ..أزيك
انت وين من أمبارح
بس أحفظ حقنا الادبى كويس
اميرة

Quote: أميرة دى يلزما تلفون عديييييل

هسع في داعي يا محي الدين اخوي تكلف نفسك كدا ياخ ..؟

شفت يا طلحة ..صحبك وحركات مراسلي القنوات
الاجنبية ..
اتخيل انا الاتصلت عليهو في الاخر

وتلفونه مرة واحدة واظنه كان مسكول .

بلاى هو بقي عالمي يعني يا اميرة ..؟
كان كدا عندو حق يلاقيك في الشارع ويسلم عليك بالتلفون ..

الاستاذة أميرة
التحايا مجددا وعبركم للزملاء في صحيفة الرأي العام العملاقة
مضت نجوم الرياضة ولكن بقى لنا عقد فريد من الزملاء والزميلات هم محل التقدير والإعزاز

الاخت اميرة ليك زمن ما بنت انشاء الله خير سالين منك احوالك شنو واخبارك كنت دايرك في موضوع عسى ان تفيدينى فيه...

تحياتي

الامين

الاستاذ عوض ..تحية احترام وتقدير
والبركة فيكم فى المرحوم الاستاذ حسن عز الدين
كيف احوالك ..وانشاء الله تكون اتذكرتنى .
كثيرا ما التقى ياسر عائس وشجرابى وقسم خالد وبالتاكيد احمد نصر
ونتذكر تلك اللمة .
اتمني ان تكون بخير اينما كنت
اميرة

الامين ..سلامات
وانا كمان بسأل منك ..بس كنت بره السودان فترة
عموما انت بس تأمر وتلفوني معاك طبعا.
اميرة

نعود لأراء الحركات ..
احمد حسين ادم الناطق الرسمي باسم العدل والمساواة
رحب بالمقترح البريطاني من حيث المبدأ..الا انه طالب بالتعرف علي
تفاصيله اولا قبل اعلان رأى رسمي حوله..
يذكر ان حركة العدل والمساواة لديها شروط معلومة قبل الدخول في المباحثات .

اميرة

حركة تحرير السودان قيادة الوحدة برئاسة
الاستاذ عبد الله يحي تحفظت علي التعليق المباشر علي المقترح
وقال لي محمد ابراهيم القدال مسؤول الاعلام في الحركة وعضو هئية القيادة
ان موقفهم تجاه المفاوضات واضح ولابد من التشاور معهم اولا حول
الزمان والمكان
عموما كل من تحدثت معه حتي الان من الحركات لم يقل رأيا صريحا
ويبدو انهم في انتظار المذيد من التفاصيل حول المبادرة

سأعود مرة اخري باراء اخرين
اميرة