تصور كيف يكون الحال

بلادي أنا
بلاد ناسا في أول شئ
مواريثهم كتاب الله ،
وخيل مشدود،
وسيف مسنون حداه درع،
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع ،،،
وساقية تصحّي الليل مع الفجراوى..
يبكى الليل ويدلق في جداولو دمع
يخدر في بلادي سلام ..
خدرة شاربي موية النيل ..
تزرد في البوادي زرع
بلادي أنا بتشيل الناس وكل الناس
وساع بخيرها لينا يسع،
وتدفق مياه النيل علي الوديان
بياض الفضة في وهج الهجير بتشع،،،
بلادي سهول ،،بلادي حقول،،
بلادي الجنة للشـافوها ،أو للبرة بيها سمع ،،
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع ،،
بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكنن في طريفو ودع ،،
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره
وسط الداره
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي ، لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا، معايا زي ضلى
لو ما جيت من زي ديل..
كان ،أسفاي..
وآمأساتي..
وآذلي..
تصور كيف يكون الحال
لو ما كنت سوداني وأهل الحارة ما أهلي
تصور كيف؟
مع الشكر للاخ بدر الدين عثمان موسى الذي ذكرنا بهذه القصيدة الرائعة

Quote: يا ناس سودانيزاونلاين ويامن تعاطف مع الطفل عبدالله داخل وخارج السودان. انا اليوم جيتكم بالخبر السار. احد الخيرين السودانيين من شركة سكر كنانه فى السودان قد قام بدفع مبلغ العلاج كله (20,800 يورو) صدقة لروح والدته الطاهرة. قد ارسل طلب التحويل من حسابه فى بنك ابوظبي بالخرطوم من يوم الاربعاء الماضي ولآن المبلغ كبير لم يتم التحويل حينها واليوم هو بنفسه ذهب للبنك من الصباح الى ان تم التحويل واحضر لى صورة من التلكس. حسب كلام بنك ابوظبي انشاء الله المبلغ حيكون فى حساب المستشفى فى برلين يوم غدا الاثنين على نهاية اليوم او الثلاثاء الصباح. دعونا نترحم على والدة هذا الشاب التى انجبت مثله. ونسال الله ان يعظم اجره ويقدره على فعل الخير دوماً. الحمد لله السودانيين بخير الهام لطيف

تصور كيف يكون الحال
لو ما كنت سوداني وأهل الحارة ما أهلي






دي اول واقرب صورة