.. طارق جبريل ..

Post: #1
Title: .. طارق جبريل ..
Author: عامر تيتاوى
Date: 04-19-2008, 00:23 AM
Parent: #0

مرت ايام دون يتحكر طارق جبريل فى بيته الامتدادى بين اهله وناسه
حاولت ان التقيه هناك فى بوست اى بت شديدة لكن دون جدوى
بحثت مليا بين البوستات المتعاقبة صعودا وهبوطا لكننى لم اظفر
بلقياء الانسان الجميل طارق جبريل
لماذاالغياب ونحن دائما فى انتظارك
طارق جبريل وينو !
عل المانع خير ياودجبرين

Post: #2
Title: Re: .. طارق جبريل ..
Author: انعام حيمورة
Date: 04-19-2008, 00:30 AM
Parent: #1

الاخ عامر تيتاوي

فعلا وانا افتقد حبيبنا طارق شديد ...

لنفرد له مساحات من الصفاء ليعود !!

Post: #3
Title: Re: .. طارق جبريل ..
Author: HAYDER GASIM
Date: 04-19-2008, 01:02 AM
Parent: #2

Quote: طارق جبريل وينو !
عل المانع خير ياودجبرين

وأفتقد معكم ... هذا الطارق الصادق
والأخ المبدع ... المبين.

ود جبرين ... أبقى مارق, عطشانين ليك
... يا واحد ... من نوار ... قليل.

شكرا ... تيتاوي ... وإنعام

مع مودتي

Post: #4
Title: Re: .. طارق جبريل ..
Author: خالد حاكم
Date: 04-19-2008, 01:14 AM
Parent: #3

طارق يا جميل
لاباس
مزيان؟
محمد كرم الله ظهر وانت اختفيت؟
اظهر ياخ

Post: #5
Title: Re: .. طارق جبريل ..
Author: مجدي عبدالرحيم فضل
Date: 04-19-2008, 06:49 AM
Parent: #4

تسلم أخي عامر العامر

ود.طارق رحيق مختوم بختم إمتدادي أصيل

والله الشوق نفس يشتاق إليك طارق جبريل

وإن شاءالله عافية ياأخي الأكبر وصديقي الجميل

أبقي مارق لناااس البتحبك ,

،،،،أبوقصى،،،،

Post: #37
Title: Re: .. طارق جبريل ..
Author: طارق جبريل
Date: 04-20-2008, 12:16 PM
Parent: #5

صديقي الجميل ابو قصي
انها ضريبة الجسد
حين تتعبه المشاوير

كن بخير يا صديقي

Post: #17
Title: Re: .. طارق جبريل ..
Author: emad altaib
Date: 04-19-2008, 05:49 PM
Parent: #4

ــــــــــ
الاخ طارق جبريل ..

اتمناك ان تكون ..بالف خير..

وإن شاء الله زحمة عمل وتعدي...

نشوفك علي خير ..يا حبيبنا..

تحياتي

Post: #44
Title: Re: .. طارق جبريل ..
Author: طارق جبريل
Date: 04-20-2008, 08:12 PM
Parent: #17

عماد كيفنك شديد آآآيابا
باين علي كبرت
فشان كدي قبل ما نخرف نتملكم القصي ألت عوض
ولا شن قولك

Post: #33
Title: Re: .. طارق جبريل ..
Author: طارق جبريل
Date: 04-20-2008, 12:09 PM
Parent: #4

خالد وليد حاكم
كيفنك
كي داير آآآلوين
ياك لا باس
توحشناك بالزاف

محمد كرم ذلك المبدع الخرافي
افرحني جدا رجوعه

Post: #32
Title: Re: .. طارق جبريل ..
Author: طارق جبريل
Date: 04-20-2008, 12:05 PM
Parent: #3

زعيم الصحافة ود قاسم كيفنك
يسأل الله اساسق بين البوستات
عشان اشوف مداخلتك
فهي قطع ادبية ساحرة
كن بخير يا صديقي

Post: #31
Title: Re: .. طارق جبريل ..
Author: طارق جبريل
Date: 04-20-2008, 12:02 PM
Parent: #2

انعام كيفنك
يسألني الله مشتهي ونستكم
وجمال دواخلكم

Post: #6
Title: Re: .. طارق جبريل ..
Author: امير عوض الجمري
Date: 04-19-2008, 09:33 AM
Parent: #1

حبيبنا عموري
سلامات يا الغالي

طبعاً انا اتوقعت ان البوست يكون عن شخصية حبيبنا دكتور طارق وما قام به من عمل كبييييييييييير
وحّد به كل الجبهات الامتدادية بكل طوائفها وتوجهاتها.
وطبعاً غيابات طارق بتترك فراغ كبييييييييييييير للغاية .. وانت دائماً سبّاق وياها المحريّة تفقد الناس.

طارق طبعاً كان عيّان شويييييييييييييية ما كتير كان قايم عليهو الم المعده (امراض الحبوبات) لكن الحمد لله الآن متعافي
وجاي وجايب معاهو الغنائم .. مش بقول : (من غاب جلب الغنائم) .. بس اصبروا واتذكروا كلامي ده.

دمت يا حبيب

Post: #45
Title: Re: .. طارق جبريل ..
Author: طارق جبريل
Date: 04-20-2008, 08:15 PM
Parent: #6

ود الجمري كيفنك
نصيح نت ووليداتك

Post: #7
Title: Re: .. طارق جبريل ..
Author: انعام عبد الحفيظ
Date: 04-19-2008, 09:43 AM
Parent: #1

طارق دا بكون غرقان في نعيم الدنيا

سلامات يا طارق ومشتاقين

عامر سلامات

Post: #46
Title: Re: .. طارق جبريل ..
Author: طارق جبريل
Date: 04-20-2008, 08:19 PM
Parent: #7

انعام كيفنك
وحاتك غاتس في جحيم المعدة

Post: #8
Title: Re: .. طارق جبريل ..
Author: بدرالدين يعقوب
Date: 04-19-2008, 09:54 AM
Parent: #1

سلام الاخ طارق جبريل وانشاء الله اجر وعافيه وتعود لينا بالسلامه

Post: #9
Title: Re: .. طارق جبريل ..
Author: بكرى الخليفة الكتيابى
Date: 04-19-2008, 10:49 AM
Parent: #8

Quote: سلام الاخ طارق جبريل وانشاء الله اجر وعافيه وتعود لينا بالسلامه

Post: #50
Title: Re: .. طارق جبريل ..
Author: طارق جبريل
Date: 04-20-2008, 08:27 PM
Parent: #9

ود الخليفة كيفنك
تسلم يا الحبيب

Post: #47
Title: Re: .. طارق جبريل ..
Author: طارق جبريل
Date: 04-20-2008, 08:21 PM
Parent: #8

تسلم يا بدر الدين
ما بقيتوا تلاتة

Post: #10
Title: Re: .. طارق جبريل ..
Author: waleed dawash
Date: 04-19-2008, 11:09 AM
Parent: #1

بارك الله فيك يا اخ عامر

يشهد الله انني افتقده مثلك .. و فكرت في انزال بوست كهذا..

الاخ طارق

قوم يا راجل يا عجوز نحن راجينك

كفرالله سيئاتك و ربنا يواليك بالعافيه

وليد دواش

Post: #48
Title: Re: .. طارق جبريل ..
Author: طارق جبريل
Date: 04-20-2008, 08:23 PM
Parent: #10

وليد كيفنك
النبي آآبلقالي عندك دواء خرف وزهايمر
ان بقيت بي حالتي دي آآبقدر اتملكم القصي

Post: #11
Title: Re: .. طارق جبريل ..
Author: الزبير صالح الزبير
Date: 04-19-2008, 11:14 AM
Parent: #1

Quote: كان قايم عليهو الم المعده (امراض الحبوبات)

حمد لله علي السلامة يا طارق
بعدين مرض الحبوبات دة ما بخوف حبتين سلفا وتروح.
الحقيقة انا كنت خايف بكري يكون شال العدة اصلوا الايامات الفاتت دي كان فيها شيل عدة تقيل.
حمد لله علي السلامة

Post: #49
Title: Re: .. طارق جبريل ..
Author: طارق جبريل
Date: 04-20-2008, 08:25 PM
Parent: #11

ود صالح كيفنك
هسي عليك النبي السلفي دي هني في المغرب دة
القاها وين

Post: #12
Title: Re: .. طارق جبريل ..
Author: عبدالله كع
Date: 04-19-2008, 12:34 PM
Parent: #1

يادكتور ......

تسلم من كل شر والم

نحنا (ناس الامتداد) منتظرين وناس اي بت شديده منتظرين وناس الاميلات مشتاقين

يلا ياحبا

Post: #51
Title: Re: .. طارق جبريل ..
Author: طارق جبريل
Date: 04-20-2008, 08:28 PM
Parent: #12

ود كع
يعلم الله اني اشتهيت لمتكم

Post: #13
Title: Re: .. طارق جبريل ..
Author: omer abdelsalam
Date: 04-19-2008, 12:53 PM
Parent: #1

مرت لحظات وكمان ساعات ولسه في غيابك منتظرين
أنا الليلة ساحضر تمرين فريق الجالية عصر هذا السبت وبالطبع طارق صخرة دفاع فريقنا ، كان ماجاء ساعلن حالة طارئ وغدا صباحا ستجدون الخبر اليقين

Post: #14
Title: Re: .. طارق جبريل ..
Author: Salah Waspa
Date: 04-19-2008, 02:17 PM
Parent: #13

Quote: سلامات يا طارق ومشتاقين

Post: #15
Title: Re: .. طارق جبريل ..
Author: Ibrahim Algrefwi
Date: 04-19-2008, 03:15 PM
Parent: #14

ياجماعة والله انتو اولاد حلال ن أنا طارق جبريل ده مغرووض فيه

عديل ، ما كلام بتاع منبر وسودانيز وبتاع ، كلام بتاع واطة رسمي .

اها المغرب دي كيف يا ناس الجالية؟ جايين نزور ، بتفتحو الباب ، يامروكو ،يا قناوة .؟

طارق ، أظهر وبان عليك أرطال الأمان

Post: #53
Title: Re: .. طارق جبريل ..
Author: طارق جبريل
Date: 04-20-2008, 08:32 PM
Parent: #15

يا سلام ياخي قرمبوز كله بي هني
ومرحب بيك يا حبيب
المغرب تتشرف بيك
ودة الايميل:
[email protected]

Post: #52
Title: Re: .. طارق جبريل ..
Author: طارق جبريل
Date: 04-20-2008, 08:29 PM
Parent: #14

صلاح كيفنك
يمين الشوق للركب

Post: #16
Title: Re: .. طارق جبريل ..
Author: راشد جبريل
Date: 04-19-2008, 05:11 PM
Parent: #1

سلام للجميع

شكرا ليكم عن سوالكم

وطارق كان بوعكة بسيطة وانشاء الله راجع

ليكم وبسلم عليكم

وشكر للجميع

Post: #18
Title: Re: .. طارق جبريل ..
Author: عبدالكريم الامين احمد
Date: 04-19-2008, 05:56 PM
Parent: #16

يسلم دكتور طارق ويطيب ويرجع لاسفيره معافي جميلا ملهما
وكل الشكر يا تيتاوي علي اشراكنا في صيحة البحث عن طارق

Post: #54
Title: Re: .. طارق جبريل ..
Author: طارق جبريل
Date: 04-20-2008, 08:33 PM
Parent: #18

كيكي يا هندسة
جاييك بهناك محل القطاطي المطرفي
مع ناس الحياة التانيي

Post: #19
Title: Re: .. طارق جبريل ..
Author: محجوب البيلي
Date: 04-19-2008, 06:29 PM
Parent: #1

أخانا عامر تيتاوى

لا تصدق كلام راشد جبرين الذي يروج لإشاعة مفادها أن
Quote: طارق كان بوعكة بسيطة

الحقيقة أنه ـ كما يقول أهلنا المغاربة ـ "أصحّ من ظالم".
كل ما هناك أنه يُصاب بين فترة وأخرى بنوبة من "الفسالة" لم ينفع معها علاج.
امير عوض الجمري
Quote: طارق طبعاً كان عيّان شويييييييييييييية ما كتير كان قايم عليهو الم المعده (امراض الحبوبات) لكن الحمد لله الآن متعافي
وجاي وجايب معاهو الغنائم .. مش بقول : (من غاب جلب الغنائم) .. بس اصبروا واتذكروا كلامي ده.

(امراض الحبوبات) ولا (كلام الحبوبات) ؟
معليش ... ما قدرت أصبر

--------------------------------
سجن ... سجن، غرامة ... غرامة

Post: #20
Title: Re: .. طارق جبريل ..
Author: فيصل محمد خليل
Date: 04-19-2008, 06:50 PM
Parent: #19

قريبي بالدرجة طارق

عد لنفرح

كفرح البعيد العاد

Post: #56
Title: Re: .. طارق جبريل ..
Author: طارق جبريل
Date: 04-20-2008, 08:37 PM
Parent: #20

خال اولادي ود هليل كيفنك والبنيات السمحات ديك في
بوست ابو ساندرا وبنياتو

Post: #55
Title: Re: .. طارق جبريل ..
Author: طارق جبريل
Date: 04-20-2008, 08:35 PM
Parent: #19

ود البيلي مالك مستعجل خلني اسوي الشي داك
بي مهلي فشان اجي افتو هني
بس اصبرلي اماني ما حا اجننلك بت بغداد جن

Post: #21
Title: Re: .. طارق جبريل ..
Author: انعام عبد الحفيظ
Date: 04-19-2008, 07:03 PM
Parent: #1

الف سلامة لطارق

ويا رب ما تشوف شر

Post: #22
Title: Re: .. طارق جبريل ..
Author: صلاح الأحمر
Date: 04-20-2008, 01:02 AM
Parent: #21

محتكرو براي في المسنجر

ونسه ونكات يوميا.

وبعدين فتشو عليهو في منتديات

البركل تلقوهو شغال خيانات

ساكت .

Post: #58
Title: Re: .. طارق جبريل ..
Author: طارق جبريل
Date: 04-20-2008, 08:43 PM
Parent: #22

وحاتك يا ابو رضا
قامت علي المعدي ورتني الهوايل
نجمتني نجام
بعد كلامنا داك طوالي اتتواتتني
والبركل عاد ياهن اهلي اسويلن شنو اجدعن عاد

Post: #57
Title: Re: .. طارق جبريل ..
Author: طارق جبريل
Date: 04-20-2008, 08:39 PM
Parent: #21

تسلمي يا انعام
و(تنعمي) في الدنيا دي

Post: #23
Title: Re: .. طارق جبريل ..
Author: محمد أبوالعزائم أبوالريش
Date: 04-20-2008, 05:51 AM
Parent: #1

يا طُلبة ... أقصد يا حبة ...

ياخي كدي قول بسم الله وسف ليك حرجل وتعال العالم راجياك ...

ما تشوف شر

Post: #59
Title: Re: .. طارق جبريل ..
Author: طارق جبريل
Date: 04-20-2008, 08:47 PM
Parent: #23

ود ابو العزائم كيفن
نان يا الحبيب الحرجل هني اجيبو من وين
تسلم

Post: #24
Title: Re: .. طارق جبريل ..
Author: السمؤال بدرالدين
Date: 04-20-2008, 07:02 AM
Parent: #1

اتحداكم كلكم مافي زول مشتاق لي طارق اكتر مني يعلم الله
فقدناك
انشاء الله تكون تربط في الشنط وجاي علينا
تسلم تيتاوي

Post: #25
Title: Re: .. طارق جبريل ..
Author: asmhan hashim
Date: 04-20-2008, 08:43 AM
Parent: #24

طارق سلامتك
ان شاء الله ماتشوف شر
وبنات العمارات كلهم كرامتك..

Post: #61
Title: Re: .. طارق جبريل ..
Author: طارق جبريل
Date: 04-20-2008, 08:52 PM
Parent: #25

اسمهان كيفنك
نان يا بت عمي ناس العمارات بيكرمولي باقيلك
مالك دايري توجعينا اكتر من ما موجعين

Post: #60
Title: Re: .. طارق جبريل ..
Author: طارق جبريل
Date: 04-20-2008, 08:49 PM
Parent: #24

السمؤل قريبي
يشهد الله علي انا ناوي الجية فشان ابل شوقي من شوفتك
وان بقيت مكضبني اسال بت ناس حيمورة

Post: #26
Title: Re: .. طارق جبريل ..
Author: Sara Mahgoub
Date: 04-20-2008, 09:10 AM
Parent: #1

سلامات ياالساكنيييين مساماتنا سلامات

كيفنكم ياناس المنتدى العام انا عضو جديد معاكم ومن طرف حلة طارق جبريل . ياطارق من يوم اشتركته فى المنتدى ماشفته مشاركاتك حرتو وله شنو . تحياتى لكل الاخوان والاخوات والف سلامة ياطارق لو موعوك او مورود بلغة اهلنا الشوايقا

Post: #27
Title: Re: .. طارق جبريل ..
Author: Raja
Date: 04-20-2008, 09:59 AM
Parent: #26

عامر يا عزيز..

بنسأل معاك عن صديقنا الحبيب طارق..

إن شا الله بس ما يكون غاطس في العمارات ..

العزيزة سارة محجوب..

ألف مرحب بيك في المنبر.. ونوًرتي

Post: #28
Title: Re: .. طارق جبريل ..
Author: Sara Mahgoub
Date: 04-20-2008, 10:06 AM
Parent: #27

منور بى ناسو يارجاء
انا من مربع 9 فى الامتداد وماادراكم ما الامتداد ذالك الحى الرائع اصلاً وجزورا سكنته فيهو 26 سنة وبعرفو كلو من مربع 1 الى مربع 14 .

Post: #63
Title: Re: .. طارق جبريل ..
Author: طارق جبريل
Date: 04-20-2008, 08:56 PM
Parent: #27

العزيزة رجاء كيفنك
عاد يا بت امي العمارات بيغتسوا فيها
ولا بيطفحوا فوقها

Post: #62
Title: Re: .. طارق جبريل ..
Author: طارق جبريل
Date: 04-20-2008, 08:54 PM
Parent: #26

سارة بت اهلي وبت جيرانا السمحين
كيفنك وحاتك كنت مورود
وبطني تلغلغ
بس اصبريلي بجيك هني بي مهلي

Post: #82
Title: Re: .. طارق جبريل ..
Author: Raja
Date: 04-21-2008, 02:11 PM
Parent: #62

طارق صاحبي الجميل..

حمد لله عا السلامة..

هو بيقولو: غاطس في البطاطس ..

يعني الغطسة حلوة ..

سارة مرحب بيك تاني وتالت وحأجيكم في بوست الترحيب

عامر سيد البيت.. سلامات

ودي

Post: #29
Title: Re: .. طارق جبريل ..
Author: omer abdelsalam
Date: 04-20-2008, 10:23 AM
Parent: #1

غاب امس { اسد وعملاق دفاع فريق الجالية بالمغرب } عن التمرين
فتم اتصال سريع بلاعبنا الكبير طارق ، فصرح الى وكالات الأنباء الدولية بأنه مصاب بوعكة خفيفة وسيعاود الظهور في المنبر والعودة للميدان الأخضر في اسرع وقت ..ولكن اشم رائحة{ صفقة } انتقال الى فريق { ميلان } [/
B
تجري في سرية تامة

Post: #64
Title: Re: .. طارق جبريل ..
Author: طارق جبريل
Date: 04-20-2008, 08:58 PM
Parent: #29

ابو انس كيفنك
عاد انا ابيع ابراهيم ميرغني
يا زول ها انت قايلني نزار الشريف
يمين فريقي ما بفارقه حتى لو طلبتني البرصا
كن بخير

Post: #30
Title: Re: .. طارق جبريل ..
Author: طارق جبريل
Date: 04-20-2008, 12:00 PM
Parent: #1

الجميل تيتاوي
كيفنك
والله يا حبيبنا شوية آلام في المعدة ورتني النجوم بالنهار
لا استغرب سؤالك
كعادتك دائما جميل
تتفقدالغائب وتسأل عن المريض

تيتا بنحبك يعلم الله

Post: #35
Title: Re: .. طارق جبريل ..
Author: مجدي عبدالرحيم فضل
Date: 04-20-2008, 12:12 PM
Parent: #30

ألف سلامة ياريس تتعارك المصارين فالبطن واحده

نسأل الله لك العافية في الدنيا والآخره وتكون سعيد

دارين والدار من بعد خلاء والحي أظلم نوره ويشكي العمي

،،،،أبوقصى،،،،

Post: #65
Title: Re: .. طارق جبريل ..
Author: طارق جبريل
Date: 04-20-2008, 09:01 PM
Parent: #35

ابو قصي (رجل الصلات الطيبة في المنبر)
ياخي ما تشوف شر ان شاء الله
والله انا فاقدكم يعلم الله

Post: #36
Title: Re: .. طارق جبريل ..
Author: عامر تيتاوى
Date: 04-20-2008, 12:12 PM
Parent: #30

الان فقط يمكن ان نتغنى عاد الحبيب
المنتظر عودا حميدا مستطاب
طارق جبريل يعلم الله اننا جميعا نحبك
وندين لك بفضل هذه اللمة الجميلة
التى كنت رائدها
وفى حبك ياود جبرين لسنا وحدنافكثيرون
يشاركونا هذا الاحساس النبيل لذلك اثرت
ان نتقاسم هذا التداعى الجميل فى السؤال
الملح
ربنا يحفظك لريم ومحمد ولاسرتك الصغيرة
والكبيرة
تحية الحب والمودة لكل المتداخلين اللذين
جاءوا للسؤال عن الحبيب طارق

Quote: شوية آلام في المعدة ورتني النجوم بالنهار

سلامتك ياخوى وخلى بالك من بسكويت بركة

Post: #66
Title: Re: .. طارق جبريل ..
Author: طارق جبريل
Date: 04-20-2008, 09:07 PM
Parent: #36

يا تيتا في صقيع الرباط والزمهرير الانت عارفه داك
مافي شي بيخليك تتوازن غير حبك للناس الهني ديل
تفرح لي فرحهم وتزعل لي حزنهم
تتقاسم معاهم البسمي والدمعي
تشيل معاهم الهم وتنفرج اساريرك لي افراحهم
الدنيي دي ماني داير منها شي غير كدي
نعمة ورضا
لاني حاريلي اموال لا غنائم
قلوب الناس الهني ديل راس مال اغلي واكبر من كل شي

يا تيتا بحبكم يشهد الله

Post: #34
Title: Re: .. طارق جبريل ..
Author: NGABY AJOOZ
Date: 04-20-2008, 12:12 PM
Parent: #1

الجميل عامر تيتاوي ليك وحشة شديدة وكل العقد الفريد ابناء الامتداد
الحبيب الغالي ود جبريل الف سلامة وتسلم من كل شر وبلية اجر وعافية
خضر

Post: #41
Title: Re: .. طارق جبريل ..
Author: عامر تيتاوى
Date: 04-20-2008, 01:02 PM
Parent: #34

الكاشف والسر قدور وعصام محمد نور
هدية لك وللمتداخلين فى هذا البوست الحنين
وكل الاشواق

Post: #68
Title: Re: .. طارق جبريل ..
Author: طارق جبريل
Date: 04-20-2008, 09:11 PM
Parent: #41

تيتا بتكتل ليك زول بي طريقتك دي

Post: #67
Title: Re: .. طارق جبريل ..
Author: طارق جبريل
Date: 04-20-2008, 09:09 PM
Parent: #34

النقابي العجوز كيفنك
يا زول انت حي
مالك مخاصمنا بي هناك وغاتس مننا

تسلم

Post: #38
Title: Re: .. طارق جبريل ..
Author: ناهد بشير الطيب
Date: 04-20-2008, 12:19 PM
Parent: #1

اخونا عامر

دائما ماانزلق فى منحنيات السؤال عن الاحباب ...
امثال طارق ود عمى جبريل

اخونا الواد (الطلبه) طارق ...
كما هو معروف عنه انه بيتمى لسلالة( شايق بن حميدان)....
والسلاله دى معروف عنها
مثل هذه الغتسات ......فلا تستغربوا......

سلامات الدكتور طارق
وياراشد لك كل التحيه

Post: #39
Title: Re: .. طارق جبريل ..
Author: Sara Mahgoub
Date: 04-20-2008, 12:41 PM
Parent: #38

ناهد كيفنك وتحياتى ليك واول مره اراسلك ويبقى بينا عربون موده اصلوا نحن الشوايقة حننان بالحيل ومامعروف عن الشوايقة انهم بغطسووينقطعو لكن بدو مساحه للاشواق ولو ماكنت من زى ديله وااأسفاى واا مأساتى واازلى
تحياتى لكل الشوايقة الفى المنتدى

Post: #40
Title: Re: .. طارق جبريل ..
Author: Sara Mahgoub
Date: 04-20-2008, 12:43 PM
Parent: #38

ناهد كيفنك وتحياتى ليك واول مره اراسلك ويبقى بينا عربون موده اصلوا نحن الشوايقة حننان بالحيل ومامعروف عن الشوايقة انهم بغطسواوينقطعوا لكن بدو مساحه للاشواق ولو ماكنت من زى ديله وااأسفاى واا مأساتى واازولى
تحياتى لكل الشوايقة الفى المنتدى

Post: #42
Title: Re: .. طارق جبريل ..
Author: بابكر التوم
Date: 04-20-2008, 04:04 PM
Parent: #40

شكرا تيتاوى

وياها المحرية فيك

وهذة هى ادبياتنا فى الامتداد الجميل

الريس طارق

حمدلله على السلامة من الوجعى .

(بطل رمرمة)

Post: #43
Title: Re: .. طارق جبريل ..
Author: عماد شمت
Date: 04-20-2008, 04:38 PM
Parent: #42

يا تيتا الزول ده كتر من الحريرة اكيد ما نسيت الحريرة ...

سلامتك ياريس والامتداد واحبائه كرامتك

ربنا يديم عليك نعمت الشفاء

Post: #71
Title: Re: .. طارق جبريل ..
Author: طارق جبريل
Date: 04-20-2008, 09:20 PM
Parent: #43

فنانا الحبيب عماد
وحاتك الحريرة لي منها سنين
الدكتور وقف لي فيها ديدبان رسمي
علي اخوك يموت في اللغاويس

Post: #70
Title: Re: .. طارق جبريل ..
Author: طارق جبريل
Date: 04-20-2008, 09:17 PM
Parent: #42

ود التوم كيفنك
عاد يا يابة انت لا تفوت لا تموت
وتسأل منك العافي
لكن وحاتك الرمريم آآبخلي

Post: #69
Title: Re: .. طارق جبريل ..
Author: طارق جبريل
Date: 04-20-2008, 09:13 PM
Parent: #38

بت عمي ناهد
كيفنك
وحاتك الغتسي ألتي دي غتسة مرض
ماها عتسة ألت اهلنا الحنان ديك

سلميلي علي بنياتك والمحسي أليلك

Post: #72
Title: Re: .. طارق جبريل ..
Author: عبدالكريم الامين احمد
Date: 04-20-2008, 09:29 PM
Parent: #69

حمد الله علي السلامة ياطارق
جانا في صيحات غيابك وعدنا الان لنجد الشوق والريد تعطر المكان
وعصام محمد نور وووهج الكاشف يملاء المكان موشحا بحضورك المفرح
وحبابك في القطاطي والخجانين

Post: #73
Title: Re: .. طارق جبريل ..
Author: طارق جبريل
Date: 04-20-2008, 09:35 PM
Parent: #72

تسلم يا هندسة
وانا جاييك بي هناك
للعالم التحتي الجميل

Post: #74
Title: Re: .. طارق جبريل ..
Author: salma subhi
Date: 04-21-2008, 04:35 AM
Parent: #73

حمد الله علي السلامة أخ طارق

وتحياتنا أخ عامر

تقديري

Post: #76
Title: Re: .. طارق جبريل ..
Author: طارق جبريل
Date: 04-21-2008, 10:10 AM
Parent: #74

شكرا سلمى

محبتي الاكيدة

Post: #75
Title: Re: .. طارق جبريل ..
Author: Safia Mohamed
Date: 04-21-2008, 06:53 AM
Parent: #1

د طارق
حمد الله على السلامة

Quote: وحاتك غاتس في جحيم المعدة

انا ما قايلة البرزتة خليتها اتاريك لسع
الميز كيف قادي ولا نجي بهناك
تحياتي للجميع

صفية

Post: #77
Title: Re: .. طارق جبريل ..
Author: طارق جبريل
Date: 04-21-2008, 10:12 AM
Parent: #75

د. صفية كيفنك
وحاتك الميز مظبط بس انت ابقي جاية
والحلة علي

كيفنهم الوليدات وابوهم

Post: #78
Title: Re: .. طارق جبريل ..
Author: عز الدين عثمان
Date: 04-21-2008, 10:21 AM
Parent: #77

Quote: ود جبرين ... أبقى مارق, عطشانين ليك
... يا واحد ... من نوار ... قليل

أنا اتأخرت، لكن أخير من أن لا آتى.ما تغيب كتير من الحكى الزى: أى بت شديدة........الخ، وتسلم يا أمير

Post: #79
Title: Re: .. طارق جبريل ..
Author: طارق جبريل
Date: 04-21-2008, 10:25 AM
Parent: #78

عز الدين المبهر
تسلم يا حبيب
للحكي طقوسه واهلنا الشوايقة حكيهم لا ينضب
سوف اعود لاحكي عنهم

Post: #80
Title: Re: .. طارق جبريل ..
Author: منزول محمد توفيق
Date: 04-21-2008, 12:38 PM
Parent: #1

الأخ عامر تيتاوي
حسنا فعلت وانت تبحث عن الاخ طارق
فهو يستحق اكثر من ذلك
فشخصيته تجبرك على احترامه وتقديره -وكفى

Post: #86
Title: Re: .. طارق جبريل ..
Author: طارق جبريل
Date: 04-21-2008, 10:40 PM
Parent: #80

العزيز منزول كيفنك
يا سيدي الفاضل انا استمد قوتي من محبتكم
اتوه بينكم درويشا يبحث عن الخلاص

محبتي الاكيدة

Post: #81
Title: Re: .. طارق جبريل ..
Author: نسرين جمال
Date: 04-21-2008, 01:43 PM
Parent: #1

سلام الاخ تيتاوي انشاء الله بخير

الاخ طارق

الف حمدلله علي السلامة

والف لا باس عليك اجر وعافية باذن الله

بطل غتساتك دي ولا عايز تعرف محبت الناس ليك

حمد لله علي السلامة مرة تانية

Post: #83
Title: Re: .. طارق جبريل ..
Author: صلاح أبودية
Date: 04-21-2008, 03:04 PM
Parent: #81

يا إبن خالتى

شفقتنا وقطعت قلبنا

شنو حكاية المعدة دى ورث دياب ول شنو؟

باقى أنا عذبتنى وشالت 11 سنة من عمرى لغاية ما لميت فى دكتور إسمو طارق عامر (الكمدة بالرمدة)

الله يبارك فيهو... ويخدر ضراعو

حمدلله على السلامة

Post: #88
Title: Re: .. طارق جبريل ..
Author: طارق جبريل
Date: 04-21-2008, 10:46 PM
Parent: #83

ود خالتي صلاح كيفنك
وكيفنو عقاب الدياب
عاد ورثنا منهم كل شي نسوي شنو
مسؤول من الخير تسلملي علي خالتي
وتبوسلي راسها

كن بالف خير

Post: #87
Title: Re: .. طارق جبريل ..
Author: طارق جبريل
Date: 04-21-2008, 10:43 PM
Parent: #81

بتنا العزيزة نسرين
انت بت جمال وانت كل الجمال
يا ستي اخوك الكبير عجز وخرف
عشان كدي ان بقيت هضربت لا تلوموني

Post: #84
Title: Re: .. طارق جبريل ..
Author: omer abdelsalam
Date: 04-21-2008, 07:20 PM
Parent: #1

Quote: يمين فريقي ما بفارقه حتى لو طلبتني البرصا
كن بخير

البرصا ..قال
ياخوي ياطارق البرصا بتاعة اسبانيا بقت اخير منها فريق { البرصا } بتاع بلدنا في الشمالية [/
- اخير ليك تجي لي فريقنا الريالي B]
المهم حمدالله على سلامتك وتعود - اسدا - كما كنت للميدان الأخصر

Post: #85
Title: Re: .. طارق جبريل ..
Author: HAYDER GASIM
Date: 04-21-2008, 10:27 PM
Parent: #84

فرحي الأكيد ... بعودة الزعيم المحبوب

لي كم مليون ياربي ...؟

{ بس أوعى تحصلا الأربعين
عشان ما إتململ كيم إيل سونغ فى قبره }

عاد طارق بقلمه الإستثنائي وبحبر البلد ولكنة
أهلها ومنطوقهم الحنين, بقلبهم الطيب وخلقهم الأمين.

قلت قصة عوض ... عليك الله كملا ... قبلما أموت,
أها كده حننتك ول لا؟

ونسمع منك وعنك كللل الخير.

يا ود عبدالسلام ... إنت وين ياخ

فاقدنك ونسأل عنك الطير وصفق الشدر

... فأرحمنا من هذا الحب ... بإطلال مبين

على ناحية الصحافة ... فقد كوجناها تاريخا

ومرمي وإحساسا ... ودايرين بعد كده نعوس ,

حتى نحظي بالآبري ... فصحافتنا تصوم وتفطر

على وفاء أبنائها ... ونشوفك يا غالي.

مع مودتي

Post: #90
Title: Re: .. طارق جبريل ..
Author: طارق جبريل
Date: 04-21-2008, 10:55 PM
Parent: #85

زعيم الصحافة العزيز حيدر

ليك طولة العمر ياخي
عوض وقصته يطيروا
ربنا يديك الصحة

اكيد محبتي

Post: #89
Title: Re: .. طارق جبريل ..
Author: طارق جبريل
Date: 04-21-2008, 10:53 PM
Parent: #84

ابو انس
قلتلك لا تحوقص شي
انا فريقي آآآببدلو

Post: #91
Title: Re: .. طارق جبريل ..
Author: عصام الدين حسين حسن
Date: 04-22-2008, 06:17 AM
Parent: #1

تعرف يا عامر الواحد بحب أولاد الإمتداد لي الله ، فيهم كم هائل من الأصالة وأظن البيئة لعبت دور كبير فهم أولاد نتاج حاجات كثيرة ، وطارق جبريل بتاعك ده واحد من الناس البدخلوا القلوب توش ،، بس أنا زعلان منو رغم عن إنه فردة كرة طائرة مغمور بس نحن ناس الإمتداد بنحترمهم عشان حيدر طيفور وعابدين و عندنا أحسن من ناس حداده ،

سبب الزعل أخوك دكتور طارق لخصنا نحن ناس مدني في سيد سليم ، وده ما صاح منو أهو إنته بتحييه بعصام محمد نور وهو مركب مكنة الكاشف ،

وفوق ده كلو قام أصبح عضو في منتدى مدني ودور أي بت شديده بي هناك ، وأنا خايف حبو لي مدني المستتر إخليوه إكملها مع ناس مدني ..

حبي الأكيد للمبدع طارق والحبيب إلى القلب عصام علي ولكم عامر تيتاوي .

Post: #92
Title: Re: .. طارق جبريل ..
Author: طارق جبريل
Date: 04-22-2008, 10:10 AM
Parent: #91

العزيز عصام الدين
التحايا الكبرى
اقوليك حاجة مدني دي عندي فيها ذكريات بحكم النيل وطعمه
وحبي ليها نابع من ارتباط وجداني شديد الوهج
بعدين ياخي سيد سليم واحد من رموز كثيرة انجبتها مدني
وما تنسى انه انا مريخابي للنخاع
وعامر دة ازرق من السماء
بعدين يا عزيزي والله البت الشديدة دي حيرتني معاها
انا بكتب من الذاكرة مباشرة لاحداث انا عايشتها
لا بجهز ليها لا حاجة
لمن يكون المزاج رايق ببدأ اكتب
وان شاء الله بنتمها

يا زول اقوليك حاجة
محبتي الاكيدة ياخ

Post: #93
Title: Re: .. طارق جبريل ..
Author: عصام الدين حسين حسن
Date: 04-22-2008, 10:46 AM
Parent: #1

تعرف يا ود جبرين كما يحلو للقريبين منك ، كلامك وصل حتى هاجت مياه العيون ،، فأنت صادق

وذاكرتك بحجم من يمتنهنون الكتابة ،، يا روائي الصدق والفطرة ، ياخي بنحبك ولا على كيفنا ،،

وكمان ود ود تيتا

Post: #94
Title: Re: .. طارق جبريل ..
Author: طارق جبريل
Date: 04-22-2008, 11:22 PM
Parent: #93

العزيز عصام الدين
التحايا الكبرى
اثقلت علي يا سيدي
انا لست روائيا ولا كاتبا
ممكن تقول حكاي
او عندي ذاكرة كويسة
لكن قصة كاتب وروائي دي كتيرة علي
احاول انقل بعضا من ما عشته
في منطقة احببتها بعمق
تعرف
انا بكتب بدافع الحنن لا اكثر ولا اقل
احاول ان امد الجسور مع عوالم تعني لي الكثير
كانت فردوسا على ايامنا رغم الفقر وضيق اليد

لك من اعماق الذات كل التكوين