امى جات اليومين ديل مافى زول زى ضمه حاسة انى سابحه فى بحور المحنة ومحلقة فوق فوق السحاب باقى يا خوانى وخلانى امى جاتنى احمد الله ل..لى كم يوم شبععععععت نوم اشم فيها الصباح والعشية.. لا طريت الغربة ولا فرقتها .. ولا قعدت نص الليل احسب فى مدتها ولا سرحت بعيد خترت ليها هناك .. ولا وشوش قليبى ولا فر بى طروتها كانها طوت الاهل كلهم فى طرف توبها وجابتهم لى معاها حارساها وبعاين فيها وبسمع فى حجاها.. وفى نضميها وغناها مبحلقة احفظ فى حكمتها ممتعه عويناتى بى بهاها وفى عويناتها شايفه روحى لسه صغيرة بحبى وبتتاى.. وبتاوق يوماتى.. بعاين لا جوه عشمانه فى ضمة وبين بسيماتها شفت الفريق صباحية ومناغمة الجيران باكريه ومطايبة بى فوق الحيطان ومحنة موكره زى شعب الصرفان وبين مسيراتها لعبوا جهال الحلةعصرية .. واتلملموا الحبان .. وعكلت القهوه ام هبهان و الفناجين تراقص بخور التيمان الونسة عفوية والضحكه عفوية و بنوت فريقنا و اللمه فى ليلة قمرية فرحتى بيك يمه زى غيمه ضهرية فرت نسيماتها نديانة مروية ورشت مطيراتها رويانة حنية ***** فى زيارة عزيزة لى شرفتنى امى الحبيبة واختى الغالية غادة اتمنى لهن اقامة طيبة وعقبالكم يا احبة تشوفوا اهلكم ويشوفوكم بالسلامه ربى يخلى كل امهاتنا ويبارك لينا فيهن ويمتعن بالصحة والعافية
Post: #2 Title: Re: *** أمى جــات *** Author: خالد علي محجوب المنسي Date: 04-15-2008, 08:19 PM Parent: #1
Quote: فى زيارة عزيزة لى شرفتنى امى الحبيبة واختى الغالية غادة اتمنى لهن اقامة طيبة وعقبالكم يا احبة تشوفوا اهلكم ويشوفوكم بالسلامه ربى يخلى كل امهاتنا ويبارك لينا فيهن ويمتعن بالصحة والعافية
نفرح معك وانت جنب الأم .. الام نجيها صغار نجيها كبار فهي الأم وقلبها الكبير لم يتغير رغم تغيرنا ( كبرنا )...... الأخت اسماء الجنيد هنيئاً لك وندعو الله أن لا يفرق بينكم ويطول عمر امك تريها دوما في صحة وعافية أمامك ...
Quote: الأخت اسماء الجنيد هنيئاً لك وندعو الله أن لا يفرق بينكم ويطول عمر امك تريها دوما في صحة وعافية أمامك ...
اخوى خالد الحنين يعلم الله الشوق قمر دورين آميـــــــــــن يا رب العالمين جمعا ان شاء الله يا ود المنسى الموكر محنة طلتك بالحيل عجبتنى يا دخرى الحبان شاحده الله السعاده تبقالك رفيق طول الطريق والعافية تبقالك هدم يا ود العم وشكرا قدر فرحتى بى جية امى وسلامك وصل تب... والدعوات منها ليك ممتده لامن تصلك وتفوتك لى غادى شكرا أردب محنة
Quote: حمدا لله على سلامتهم يا أخت أسماء. و إن شاء الله ربنا يجعل أيامنا كلها سعادة و يحفظهم لينا و يعينا على برهم.
اخى العوض تسلم من كل بلا ان شاء الله حبابك وتسلم على طلتك الجميلة يعلم الله زى كانك جيتنا بادرب وسلامتهم وطايبتهم بى محنة يديك الف عافية اخى العزيز صدقت والله .. نتمنى من المولى الكريم ان يعينا على برهم شكرا اخى العوض شكرا جروف وخدار قيوف
الف حمدا لله على سلامة امك واختك وربنا يجمع شملكم دائما فى ارض الوطن الجميل وتنبذى الغربة وتطلقيها طلاق ثلاثة ... حقيقة زيارة احد الاقربين تجعل الحياة رائعة وجميلة ولها طعم ثانى فهى مع الشخوص تستدعى كل زكريات الطفولة وكل الحياة الجميلة السابقة فيعود الانسان كما كان صغيرا وخاليا من الهموم ..
هنيئا لك عزيزتى بهذه الزيارة وادام الله كل ايامك هناء وفرح وسرور
وسلمى لى عليهم وقولى للحاجة تدينا دعوات بالله تعدل حالنا وتفكنا من الغربة ....
مع مودتى
Post: #13 Title: Re: *** أمى جــات *** Author: صالح عبده Date: 04-16-2008, 10:15 AM Parent: #1
اختي اسماء حمد لله على سلامة امك واختك انا افتقد امي كثيرا فهي لم تفارق مخيلتي ولو للحظة ادعو لها ليل نهار توفيت وتركتني وحيدا ..كم كانت حنينة اذكر انها مدت يدها لي وانا اغادر السودان وهي تقول( سامحني يا صالح وانا مسامحاك) غفر الله لها ولوالديها ومتعكم بالصحة والعافية.
___________ أَحِـنُّ إِلَى الكَـأْسِ التِي شَـرِبَتْ بِهَـا وأَهْـوَى لِمَثْـوَاهَا التُّـرَابَ وَمَا ضَـمَّا ـ المتنبي ـ _______________________
Post: #51 Title: Re: *** أمى جــات *** Author: Ahmed El Gasim Date: 04-25-2008, 09:46 PM Parent: #14
اسماء حمد لله على سلامة امك واختك انا افتقد امي كثيرا(بتول بنت نور الدين) فهي لم تفارق مخيلتي ولو للحظة ادعو لها ليل نهار توفيت وتركتني وحيدا .. اخبريها سلامنا وان تدعو لنا ..معكم..ربنا يخليها ليكم..والله كنت ابكي امي اليوم ...وحيدا فقد كانت صديقتي بحق.. اسف لجعل بوستك حزينا معي واخي صالح...
Quote: _______وأَهْـوَى لِمَثْـوَاهَا التُّـرَابَ وَمَا ضَـمَّا ـ المتنبي ـ
Post: #15 Title: Re: *** أمى جــات *** Author: انعام عبد الحفيظ Date: 04-16-2008, 01:01 PM Parent: #1
بختتتتتتتك يا سوما
أمك جاتك انشاء الله ربنا يديها الصحة والعافية
إنتي أمك جات وانا أمي سافرت لأختي في قطر
طبعا مما وصلتهم قطعوا اتصالاتهم
بقينا نتصل نحنا ونسأل عنهم وعنها
بس أوعى إنتِ كمان تنسي ناس السودان من الإتصال والسؤال
الأخت اسماء لك تحياتي من ابها وحمد الله على سلامة الوالدة وكذلطك تحياتي لكل الأخوات بالنادي السوداني . و الله فاقدنكم كتير و الحمد لله حانتواصل على الاثير وعلى النت انشاء الله ومدتي اختكم سونا
حمد لله على سلامة الوالدة ويا هناك وسعدك وبلغيها تحياتنا واطلبي لينا منها الدعوة الصالحة وفي ظهر الغيب الدعوة مستجابة وابقى مليون على هدية السماء الجاتك
Quote: يافرحتي يافرحتي اليوم تمت نعمتي ... الحمدلله اللماك مع أمك ومع أختك ومع النوم رقيق الحاشية.
تحياتي لك ولهما.
اخوى محمد هارون .. حبابك يابا عجبتنا طلتك بالحيل يا ضيا شلع فى عز سواد الليل تسلم يا العشا وسلامك وصل لك التحيا كيمان والدعوات من الوالده اطنان شكرا محنة قلوب
Quote: سوما الحنينة اخت الرجال في البدء حمداً لله علي سلامة رجوعك للمنبر وحمداً لله علي سلامة امك وربنا يديكم الصحة والعافية وطول العمر
ود القبائل اب طبعا مو مايل اخوى هاشم احمد خلف الله كيفنك يا الزين.. يا دخرى الزينين تسلم ان شاء الله وتسلم ايامك شكرا على الطلة يا ود الفريق والحلة تحياتى عبرك للاسرة الكريمه شكرا حجا حبوبات
الف حمدا لله على سلامة امك واختك وربنا يجمع شملكم دائما فى ارض الوطن الجميل وتنبذى الغربة وتطلقيها طلاق ثلاثة ... حقيقة زيارة احد الاقربين تجعل الحياة رائعة وجميلة ولها طعم ثانى فهى مع الشخوص تستدعى كل زكريات الطفولة وكل الحياة الجميلة السابقة فيعود الانسان كما كان صغيرا وخاليا من الهموم ..
هنيئا لك عزيزتى بهذه الزيارة وادام الله كل ايامك هناء وفرح وسرور
وسلمى لى عليهم وقولى للحاجة تدينا دعوات بالله تعدل حالنا وتفكنا من الغربة ....
مع مودتى
قرشو عمدتنا الحنين يعلم الله الشوق نيلين والود حواشات سكر الجنيد كيفنك يا ود الاهل الطيبين صدقت والله اخوى قرشو .. زيارة الحبان سمحه حتى لو كنت داخل ارض الوطن ولها طعم مميز ونكهة خاصة فى ديار الغربة تحس انه اهلك كلهم حواليك .. والدنيا كلها فرحانة معاك ربنا يدوم الافراح ويلم الجميع على السمح والزين شكرا اخوى قرشو على الطلة والدعوات الجميلة ربنا يرجعنا ديارنا الطيبة سالمين وتامين بركة رب العالمين سلامك ليهم وصل .. بلغوك كتير السلام وليك دعوات خاصة من الحاجة شكرا اخى قرشو شكرا دعوات قبيلة
Quote: اختي اسماء حمد لله على سلامة امك واختك انا افتقد امي كثيرا فهي لم تفارق مخيلتي ولو للحظة ادعو لها ليل نهار توفيت وتركتني وحيدا ..كم كانت حنينة اذكر انها مدت يدها لي وانا اغادر السودان وهي تقول( سامحني يا صالح وانا مسامحاك) غفر الله لها ولوالديها ومتعكم بالصحة والعافية.
اخوى الحنين صالح عبده يشهد الله دموعى غلبتنى وانا بقرا فى عباراتك المؤثرة للغاية كنت وقتها فى المكتب .. شحدت الله انه ما يجى زول داخل على والحمد لله على كل حال .. وياها دى حال الدنيا احمد الله انها عافتك وصافحتك فى ايدك انت سعيد ووالدتك رحمها الله سعيده ربنا يرحمها بعدد ذرات المطر . وعدد صفق الشجر وعدد كل البشر .. وعدد كل من حج او اعتمر آمين يا رب العالمين شكرا اخى صالح على طلتك ربى يصبرك .. واصل لها فى الدعاء فهو خير لها بعد مماتها ..لها الرحمه والمغفرة ولك اخى التحايا النواضر ارجو منك العفو .. دون قصد صحيت فيك الذكرى الحزينة
الاحبة الغاليين سلام بعد غياب طال وعذرا للتأخير الما بالخاطر والله التحية لكل الاخوة والاخوات المتداخلين وشكرا عميقة سوف اقوم بالرد عليكم جميعا فردا فردا لكم التحية فرح قبائل وخيرا طائل ****
Quote: بختتتتتتتك يا سوما
أمك جاتك انشاء الله ربنا يديها الصحة والعافية
إنتي أمك جات وانا أمي سافرت لأختي في قطر
طبعا مما وصلتهم قطعوا اتصالاتهم
بقينا نتصل نحنا ونسأل عنهم وعنها
بس أوعى إنتِ كمان تنسي ناس السودان من الإتصال والسؤال
نعومه الحنينة سلامات يا غالية الشوق ممتد قدر المسافات البينا تصدقى يا نعومه نفس الحصل مع اختك حصل لينا لقينا امى ونسينا العقاب لكن مره مره كده بنخجل ونتصل نفقدهم وكل مره طبعا شكلة كبيرة لكن الحنينه زاتها ما بتقدرتطول منهم .. كل يوم تقول لينا اتصلوا شوفوااخوانكم كيف اصبحوا لك التحية اختى انعام وربنا يمتع الحاجة بالصحة والعافية ويرد غربتها بالسلامه شكرا بعمق محنة اماتنا
Quote: الأخت اسماء لك تحياتي من ابها وحمد الله على سلامة الوالدة وكذلطك تحياتي لكل الأخوات بالنادي السوداني . و الله فاقدنكم كتير و الحمد لله حانتواصل على الاثير وعلى النت انشاء الله ومدتي اختكم سونا
الاخ ود الشيخ والاخت الحبيبة سونا سمحة طلتكم فى كل الاوقات حياكم الله وبارك فيكم مسقط واهل مسقط يفتقدون لمتكم السمحة ورقة تعاملكم السلام وصية.. فى ليلة امس الجميلة بدار النادى السودانى التى احياها الفنان الجميل عمر احساس كانت اللمه والونسة وذكراكم العطره وتحية لكم تحديدا من د/ احمد القرشى وكل الرفاق شكرا على الطلة الجميلة ويبقى التواصل حبل ود بيننا دوما لكم كل الود
Quote: حمد الله على السلامة لمن نجيكم بي غادي طبعا أنا كنت عايشة الحاجات دي علي الأصول ورجعت قبل كم يوم ومازال صداها يجلل
سلامي للجميع
الاخت سميةمرحب حبابك وحمد الله على سلامة وصولك انتى كمان طبعا زيارتهم لينا هنا ليها طعم ونكهة خاصة اكثر جمال وفرحة من ملاقاتنا ليهم نحن هناك لما نزورهم فى الاجازات لانه بنكون طول اليوم معاهم براهم .. ما زى الجرى الشديد والمساسقة مع المناسبات الما بتكمل يا دوب هنا لقيت روحى متونسة مع امى الحمد لله رغم زحمة الشغل لكن اهو الواحد بجى باقى اليوم كلو معاها مرحب بيك تشرفى فى اى وقت وشكرا على المرور
Quote: حمد لله على سلامة الوالدة ويا هناك وسعدك وبلغيها تحياتنا واطلبي لينا منها الدعوة الصالحة وفي ظهر الغيب الدعوة مستجابة وابقى مليون على هدية السماء الجاتك
مع مودتي
نصرالدين ود عمى الجعلى تسلم يا يابا من كل بلا ان شاء الله تحياتك وصلت تب والدعوات ليك منها ممتده وربنا يتقبل ان شاء الله والله الهدية قيمة بالحيل يا نصر يا خوى ربنا يخليها لينا ويديها الصحة والعافية وربى يسعدك بقدر فرحتى بى طلتك السمحة شكرا يا نبيل شكرا بعمق النيل
Quote: الله يمتعك بهم وأمنياتنا أيضآ لهم بأقامة طيبة معكم..
فقدناك بجد... لكن مادام فى سبيل الضيوف وفى سبيل ألأم العزيزة وألأخت بنجد ليك العذر.. تحياتنا للأخ/الفاتح الجنيد..وجميع ألأسرة الكريمة..
مودتى.. إسماعيل محمد احمد عباس....
الاخ اسماعيل عباس سلام يا ود القبائل ما تفقدك شينة ان شاء الله تسلم على طلتك البتفرح ديمه سلامك للاسرة وود الجنيد وصلت وببلغوك خاص التحايا والشكر الجزيل شكرا اخى الكريم وان شاء الله نجيك فى السمح والزين
حمد الله على السلامة وربنا يطول ليكم في عمرها ويملاها عافية بجاه من بيته في طيبة حرم (ص) .
تحياتي وتقديري
اخى العزيز الازهرى حبابك يا المهل ضل الاهل ربى يسلمك ويعافيك ان شاء الله يا الدخرى كتر الف خيرك على الامنيات الغالية ربنا يسمع منك ان شاء الله ويضاعف ليك امثالها .. قادر يا كريم ان شاء الله نجيك فى الفرح دائما يا الازهرى يا اصيل شكرا محنة وطيبة اهلنا
بختك واحلالي عليك انشاء متهنية بيها وسعيدة خصمتك بالنبي ضميها لي شديد وبوسيها لي يمين وشمال وفوق في جبهتا قلي ليها من بنيت ليك مشتاقة لي ضمة صدر ودعوة صباح تسعدي وتفرحي انشاء بي لمتا
طبعا البيت كله فرحان , ان شاء الله دايما فرحانين .
فسحيها ما تخليها تزهج اصله الجماعه ديل ما بحبو
يقعدو محل واحد وجنهم وجن الشقق .
الله يخليها ليكى ويطول فى عمره وان شاء الله دايما معاكى .
ود الابيض
العزيز الغالى ود الابيض والله الشوق بحر يا ضل المطر وينك ومشتاقين لى طلاتك السمحة ان شاء الله انت طيب اخوى حمد والله البيت كلو فرحان بى جية امى الحبيبة وكان لى الوليدات لو بى مرادهم المدرسة ما يمشوها يجوا جاريين من المدرسة جرى على اوضتها يفقدوها وباقى اليوم كلو حارسنها ربى يخليها لينا ان شاء الله وحاتك كل ما نلقى فرقة طالعين بيها بره عشان ما تزهج وصحى كلامك جنهم وقفلة البيوت طبعا متعودين عندنا هناك على الحوامه وسط الفريق شكرا ود الابيض على الطلة السمحه ربى يسعدك ديمه ان شاء الله تحياتى عبرك للاسره الكريمه
Quote: سوما كيفنك ياخ إزيك حسدتك عدييييل قبيل نصت نهار رن جرس التلفون جاني صوت حاجة طيبة والجبنة داقة في برندتا الهبابية أريتك ياوليدي كان كنت جنبي تعال ياعشاي صاد يقطع الغربة وسنينة إتلخبتت شراييني في الأوردة والشوف صبح طشاش
بختك ياأسماء وربنا يخليكم لي بعض
اخوى نور الهادى .. يعلم الله الشوق بى غادى حاشاك من الحسد والله .. اظنك بغران ساى تعرف وصفك لى جبنة خالتى طيبة وونستها ونضميها معاك خلانى اجرى امشى اتبن فى امى قاعده جمبى ولا انا بحلم اتخيلت منظرك وحاسة بيك يعلم الله اسال الله الكريم ورب العرش العظيم يلمك بى ست الحبائب قريب وتتهنا بى ونستها وقعدتها ربى يخليها ليك ويخليك ليها يانور يا خوى شكرا على الطلة السمحة الفرحتنى بالحيل تسلم يا ود ملوك النيل شكرا أردب محنة
يسلملى خال فاطنة حبابك وحباب طلتك بعد غياب طال كيفنك وكيف الاهل كلهم تسلم خال فاطنة من كل بلا يا رب والله يا خال فاطنة يا خوى جيتهم لى اكتر من حواشات الجنيد كلها لو عارفاك نفسك فى قصب سكر كان وصيتهم ليك والمحل قريب بالبصات برسلوا ليك .. هههه شكرا ليك يا اصيل وربنا يجمعنا بى اهلنا قريب ان شاء الله
Quote: بختك واحلالي عليك انشاء متهنية بيها وسعيدة خصمتك بالنبي ضميها لي شديد وبوسيها لي يمين وشمال وفوق في جبهتا قلي ليها من بنيت ليك مشتاقة لي ضمة صدر ودعوة صباح تسعدي وتفرحي انشاء بي لمتا
الغالية الحنينة الاخت ناهد على تسلمى على الطلة السمحة يا نوارة كتر الف خيرك على كلامك الحنين زيك يا حنينة من بطن الاهل عجبتنى طلتك بالحيل يعلم الله وعجبتنى اكتر الصور الجميلة فى االبرو فايل فيها الاصالة والمحنة باينه فى ملامحهم تسلمى يا ست الناس وسلامك وصل بالحيل النبى عزيز وغالى وصيتك وصلت تب ليك منها كتير السلام وكتير الدعوات والامنيات الطيبة شكرا مارقة من الجوف شكرا خضرة جروف
سومة الغالية والله مشتاقين يعلم الله عنوان البوست هبشني جووووة في بكانن وجعو قاسي وفرحو حلو اتلفت يا بت امي زي كأني سمعت واحدة من اخواتي دخلت علي قالت امي جات ولما ما لقيت امي جنبي لقيت فرحتك ماليه كليماتك وعصرت دميعاتي الملت عيني عشان افرح معاك وشفتها امك في امي وشفت امي في امك كاسره مسايره وتعدل في طرف توبها ساعة دخلة نسابتها وحسيتها بطايب في حبايبكم هناك في مسقط وشيخ الطاهر دخل عليكم تسبقوا دعواته وتحياته. يايمه اه واحيي من محنة الامهات . طلبتك بالله ياسوما يا اختي تضميها قوييي وتسالميها وتقولي ليها بنيتك اسماء بت الامين بتسلم عليك . وسلمي علي غادة وربي يهنيكم بي بعض ويديم العافية والسعادة في وسطكم وما تشوفوا شرا في حياتكم . محبتي اسماء
الأستاذة / أسماء السلام عليكم ورحمة الله وبركاته متل حنيتك ده وبرك بوالدتك ، بخلي حياتك سعيدة . أسماء الكلام الصادق النابع من القلب، بدخل طوالي جوا القلب وبتحكر فيه. صدقيني يا أسماء ناس كتيرة تكون بكت لمّن يكون قرأت ترحيبك وفرحتك بوجود أمك حبيبتك وغادة أختيك معاك، ،وأكيد أنك أسعد زول في السلطنة اليومين ديل، مادام بتكحلي عيوناتك صباح ومساء بشوفة أمك، ومادام بتتكرفي في ريحته مع قلوة اللبن ومع قنانة شاي الصباح، . عليك الله يا أختي أسماء في أسعد من الزول أقوم من النوم يلقى أمه جنبه في غربة "الخلاء والسواد دي"،
ويا حليل أمي يا أسماء الكانت كلما مرقت لمناسبة في الحلة تجيء صارة لي في طرف توبةالحلاوة والكيك وحتى الكعك والموز تجيء شايلاهو عشان تفرحني ، ، يا حليل أمي الكانت كلما تصلي تخت أيده فوق رأسه وتدعو: يا الله تديني ميتة الخميس وصبحانة الجمعة وتديني الشهادة عند الإمّدادة، وزي ضربة البندق، يا أختي أسماء أمي أدت الروح مع أذان الفجر صباح الجمعة 14/4/1978م، ومن الوقت داك يا أسماء ، كلما صليت أدعو بدعاء أمي . معليش يا أختي، أفسدت عليك فرحتك بأمك، لكن طريت أمي، وهي ما فارقت ذاكرتي يوم من الأيام، اللهم ارحمها وجميع أمهات المسلمسن واسكنهن فسيح جناتك يا كريم.
Quote: سومة الغالية والله مشتاقين يعلم الله عنوان البوست هبشني جووووة في بكانن وجعو قاسي وفرحو حلو اتلفت يا بت امي زي كأني سمعت واحدة من اخواتي دخلت علي قالت امي جات ولما ما لقيت امي جنبي لقيت فرحتك ماليه كليماتك وعصرت دميعاتي الملت عيني عشان افرح معاك وشفتها امك في امي وشفت امي في امك كاسره مسايره وتعدل في طرف توبها ساعة دخلة نسابتها وحسيتها بطايب في حبايبكم هناك في مسقط وشيخ الطاهر دخل عليكم تسبقوا دعواته وتحياته. يايمه اه واحيي من محنة الامهات . طلبتك بالله ياسوما يا اختي تضميها قوييي وتسالميها وتقولي ليها بنيتك اسماء بت الامين بتسلم عليك . وسلمي علي غادة وربي يهنيكم بي بعض ويديم العافية والسعادة في وسطكم وما تشوفوا شرا في حياتكم . محبتي اسماء
اسماء الحنينه كيفنك و يا حليلك ياالغالية المافى زيك بالمسافةانتى منى بعيده ولى قليبى دائما قريبة جيتك لى وطلتك دى حسيتها جوه جوه يعلم الله كانك جيتينى بالدرب تتونسى وتنضمى معاى شايفاك قدامى حقيقة ما خيال تسلمى من كل بلا يا حنينة من ريحة الاهل امى ياها امك من لحمك ودمك بتسلممممم عليك كتير السلام هى وغادة وبتدعو ليك بى كل خير ويشهد الله طريناك اليوم داك يوم جانا شيخ الطاهر شرفنا والغالية رفيدة الله يبارك فيها شرفونا بالزيارة الكريمة والدعوات المباركات.. حاولنا الاتصال بيك كتير .. وكنا دايرين نعمل ليك مفاجأة لكن الحظ عاكسنا حاول شيخ الطاهر كتير لكن الخط كانت فيه مشكلة اوعدك بى اتصال قريب ان شاء الله تحياتى عبرك للاهل وباقى العقاب كتر الف خيرك على الاطلالة السمحة زيك شكرا محنة اماتنا وحبوباتنا
Quote: اسماء حمد لله على سلامة امك واختك انا افتقد امي كثيرا(بتول بنت نور الدين) فهي لم تفارق مخيلتي ولو للحظة ادعو لها ليل نهار توفيت وتركتني وحيدا .. اخبريها سلامنا وان تدعو لنا ..معكم..ربنا يخليها ليكم..والله كنت ابكي امي اليوم ...وحيدا فقد كانت صديقتي بحق.. اسف لجعل بوستك حزينا معي واخي صالح...
سلام اخى العزيز احمد القاسم يعلم الله كلامك حسيتو جوووة فى حشاى كم آلمنى المك وحزنك على الوالده بتول رحمها الله رحمة واسعه واسكنها فسيح جناته مع الصديقين والشهداء .. اسال الله لك ولاخيك صالح الصبر الجميل.. لا تتاسف اخى .. تلك احاسيس غصبا عنا عليكم بالدعاء لها فى كل صلواتكم.. دى الحاجه البتنفعها ومحتاجة ليها منكم حاولوا بقدر الامكان ان تحبسوا دموعكم الدموع والبكاء لا يفيد غير عذاب للميت الفراق مر والصبر حار .. لكن ده ابسط شىء اننا نتحمل من اجلهم لك التحايا اخى العزيز والامنيات الطيبه ربى يبارك فيك واخوانك واخواتك لك سلام خاص من الوالده وبتدعوا ليك كتير وامنياتها ليك ربنا يديك الفى مرادك ان شاء الله شكرا اخى احمد وتحياتى للاخ صالح شكرا محنة
Quote: الأستاذة / أسماء السلام عليكم ورحمة الله وبركاته متل حنيتك ده وبرك بوالدتك ، بخلي حياتك سعيدة . أسماء الكلام الصادق النابع من القلب، بدخل طوالي جوا القلب وبتحكر فيه. صدقيني يا أسماء ناس كتيرة تكون بكت لمّن يكون قرأت ترحيبك وفرحتك بوجود أمك حبيبتك وغادة أختيك معاك، ،وأكيد أنك أسعد زول في السلطنة اليومين ديل، مادام بتكحلي عيوناتك صباح ومساء بشوفة أمك، ومادام بتتكرفي في ريحته مع قلوة اللبن ومع قنانة شاي الصباح، . عليك الله يا أختي أسماء في أسعد من الزول أقوم من النوم يلقى أمه جنبه في غربة "الخلاء والسواد دي"،
ويا حليل أمي يا أسماء الكانت كلما مرقت لمناسبة في الحلة تجيء صارة لي في طرف توبةالحلاوة والكيك وحتى الكعك والموز تجيء شايلاهو عشان تفرحني ، ، يا حليل أمي الكانت كلما تصلي تخت أيده فوق رأسه وتدعو: يا الله تديني ميتة الخميس وصبحانة الجمعة وتديني الشهادة عند الإمّدادة، وزي ضربة البندق، يا أختي أسماء أمي أدت الروح مع أذان الفجر صباح الجمعة 14/4/1978م، ومن الوقت داك يا أسماء ، كلما صليت أدعو بدعاء أمي . معليش يا أختي، أفسدت عليك فرحتك بأمك، لكن طريت أمي، وهي ما فارقت ذاكرتي يوم من الأيام، اللهم ارحمها وجميع أمهات المسلمسن واسكنهن فسيح جناتك يا كريم.
سلام اخى اسحق بلة الامين سلام بعمق المحنة الجوة يا حليلك انت والله وانت شايل طبع اهلنا القبيل موكر محنة حد السقف .. ومسكون بساطة.. والاصالة فيك من ساسك لى راسك عجبنى سردك الشيق.. السهل الممتنع ما شاء الله رغم الحزن المطوى فى تفاصيل كلامك ودقة وصفك.. الله يرحم الوالده ويسكنها فسيح جناته الله يرحمها كانت سعيده سلمت روحها فى صباح يوم الجمعه اليوم المبارك.. الزى الوالده الزمن ده قليل.. معروفين بى نيتهم البيضاء وقلوبهم النقية ربنا يبارك فيك انت واخواك ان شاء الله حاشاك والله ما افسدت على فرحتى يا خوى الحنين بالعكس طلتك شرفتنى واسعدتنى وامى وخيتى ايما سعادة الوالده بتسلم عليك كتير وبتدعو ليك بالصحة والسعادة وبتوصيك تقرا للوالده كتير وتترحم عليها فى كل صلاة لك التحايا اخى الكريم قدر طيبتك الساكناك شكرا لا تكفى على اضافتك الجميلة يا ود القبائل شكرا مطامير فرح
الرسول فيك ضميها علي صدرك شدددددديد وقولي ليها دي من نادية!
وتحياتي للأخت غادة..
ندوية الحنينة يا زهور فى جنينة واحشانا يا بنية يا ضى القمر تسلمى يا حبيبة على الطلة السمحة زيك الايام دى منورانا والله فى شاشات التلفاز وفرحانين بيك كتير يلا واصلى واتحفينا بالجديد الجاى منك الرسول عزيز وبلدو بعيد سلامك وصل وبالاحضان لى ست الحبايب وهى بدورها بتسلمممممم عليك كتير سلام واشواق حارة ومعاها امنيات حلوة تستاهليهاوالله غاده بتسلم عليك وبتشكرك على التحية الجميلة شكرا ندويه شكرا زهرة ندية
الف حمد لله على السلامة .. ان شاء دائما مجتمعين وسالمين وتامين ..
التحية للوالدة وللاخت غادة واجازة سعيدة يارب ..
يا ريت تجيبيهم عمرة وتزورونا في الرياض ..
تسلموا كلكم
تخريمة :
حمالتك علي انا كان امي جات الكي بورد ده الا يكورك لي عديل تعال طقطق ....
علاء الدين.. وينكم يا اهلنا السمحين يعلم الله الشوق قمر دورين تسلم يا ود القبائل كيفك وكيف الاهل على حسك تسلم من كل بلا ان شاء الله تحاياك وصلت للوالده وغادة برسلوا ليك كتير السلام كتر الف خيرك على الطلة الجميله قلت لى بتحارب الكى بورد كان الوالده جاتك ؟ هسه انا عليك الله شوفنى مقصرة كيف مع كل زول ؟ فى الاسبوع بجى مره ولا اتنين لما خجلانه من الضيوف والزوار.. وخجلانه من ردودى المتأخرة ليهم يعلم الله ما تجاهل ..لكن مشغوله بيهم والله والونسة انت عارفها ما بتكمل عقبالك يا علاء قول آمين تحياتى عبرك للعقاب وشكرا لمة حبان
Quote: سومه العزيزه حمد لله علي سلامة أمك وبركه الشفتيها طيبه ااشواق وسؤال عنك و أخبارك... مودتي ة محبتي لك
مهـــا
مها يا حبيبة البى مشتاقة ليك والله يا الحنينة احوالك انتى واخبارك ان شاء الله طيبة وكل الاهل يا رب تسلمى من كل بلا ان شاء الله تحياتى لك كل افراد الاسره شكرا على الطلة شكرا ندى الحقول
بخخخخخخخخخخخخخخخخخختك يا اسماء وحمدا لله على سلامتها وربنا ينوّلك عفوها .. انا زيك امي معاي هي واخوي جوني زيارة .. وحاتك اول امبارح سبحتها ضاعت ضيعتها ليها بتّي الصغيرة .. جريت جري جبت ليها اتنين وقلت ليها يا بت محمود نحن ماشين بي يا لطيف البتحصنينا بيها بالسبحة دي .. تجي لمى المفعوصة دي تضيعها !!!! تاني مليون حمدا لله على سلامة امك يا اسماء .. وتااااني ربنا ينوّلك عفوها ورضاها .. تحياتي ليها
ياسلاااااااام ياسوما يا حليل أيام زمان ربنا يعودها من تاني تحياتي وسلامي الحار للوالدة وللأخت غادة وياريت لو تذكرني قلي ليها الزول الجاء معاكم من مدني لرفاعة وأكيد الفترة طالت، شوفت صوركم الجميلة وصورة الوالدة العزيزة ربنا يحفظها ليكم ويديها الصحة والعافية وتقضي معكم أياماً جميلة وسعيدة، وفعلاً وجود الوالدة في الغربة بديها طعم ونكهة خاصة وتنسيك كل الهموم وتخرج للعمل بنفس منفتحة وصدر منشرح وتعود في لهف وشوف ما عادي (أسالي مجرب) تحياتي للأسرة الكريمة
معذرة للتاخير شفت البوست مؤخرا وحمداً لله على سلامة الوالدة أطال الله عمرها و متعها بالصحة و العافية .. بالتاكيد الاستاذ مؤيد الايام دي في قمة سعادته
اهلا بى شيخ البطانة ود شيقوق حبابك انا غايتو مالى دخل كان جاء ناطى صاحبك ابو بكر وقال لى شيخ بطانة شنو كمان يا سومة ؟ هههههه
تسلم من كل بلا اخى شيقوق والسيد مؤيد الايام دى عنده حصة ونسة يومية واسئلة غريبة جدا بجمع فى قصص ظريفة لو لاقيتو بتستمتع ونسة وضحك كتر خيرك ود شيقوق وبالله تعال بالدرب المطايبة البى الهواء دى ما بتنفع تب.. ونحن فى بلد واحد شكرا لمة فرح
الخال حمزاوى سلامات يا رجل من الزمن الجميل والله مشتاقين مالك على يا خال مبكينى فى نص الليل ده.. ربنا يرحم الاموات ويسكنهم فسيح الجنات البركه فيك وفى وليداتك تحياتى عبرك للاسرة الكريمه.
Quote: بخخخخخخخخخخخخخخخخخختك يا اسماء وحمدا لله على سلامتها وربنا ينوّلك عفوها .. انا زيك امي معاي هي واخوي جوني زيارة .. وحاتك اول امبارح سبحتها ضاعت ضيعتها ليها بتّي الصغيرة .. جريت جري جبت ليها اتنين وقلت ليها يا بت محمود نحن ماشين بي يا لطيف البتحصنينا بيها بالسبحة دي .. تجي لمى المفعوصة دي تضيعها !!!! تاني مليون حمدا لله على سلامة امك يا اسماء .. وتااااني ربنا ينوّلك عفوها ورضاها .. تحياتي ليها
امير الجمري
امير ود عمى الجمرى سلامات وسلام بى قلدة محنة لى امنا بت محمود ربى يديها الصحة والعافية ويخليها ليكم ويخليكم ليها بينى بينك السبحه والتبروقة ياهو فال اماتنا وحبوباتنا دعواتهن بنحسها جووة فى الحشا كتر خيرك اخوى امير على الاطلالة السمحة اللهم آمين جمعا ربنا يدينا عفوهن ورضاهن سلامى الكتير لى الوالده بت محمود والاسرة الكريمة قول ليها كترى الدعوات لى بتا ليك فى الغربة بى غادى تسلم يا ود القبائل وشكرا دعوات من بت محمود الله يديها الف صحة عافية
Quote: ياسلاااااااام ياسوما يا حليل أيام زمان ربنا يعودها من تاني تحياتي وسلامي الحار للوالدة وللأخت غادة وياريت لو تذكرني قلي ليها الزول الجاء معاكم من مدني لرفاعة وأكيد الفترة طالت، شوفت صوركم الجميلة وصورة الوالدة العزيزة ربنا يحفظها ليكم ويديها الصحة والعافية وتقضي معكم أياماً جميلة وسعيدة وفعلاً وجود الوالدة في الغربة بديها طعم ونكهة خاصة وتنسيك كل الهموم وتخرج للعمل بنفس منفتحة وصدر منشرح وتعود في لهف وشوف ما عادي (أسالي مجرب) تحياتي للأسرة الكريمة
يا سلاااام عليك انت اخى ابراهيم على طلتك براها بالدنيا يعلم الله بعد غيبة طويلة.. ان شاء الله تكون وكل الاهل بالف خير ونعمه صحيح انه المده طالت لكن الاخت غادة متذكراك تماما وحكت لى فى نفس الفترة عن اللقاء ومعرفتك لها من خلال الشبه .. ما شاء الله عليك.. بتبلغك خالص التحايا لك وللاسره الكريمة ولك تحايا خاصة خالصة ودعوات من الوالده العزيزة شكرا اخى ابراهيم شكرا لمة اهل
Quote: و الله بختك.... و ربنا يديها العافية و يخليكم لبعض
و بالله عندي طلب...... قبلي الرأس الجميل ما بين المسيرتين القداميات و قبلي المشاط الوراني... (و لا الوالدة موديل حديث)
المهم بلغيها تحياتي.... و أهم شئ إستمتعي بيها شديد...
ودي
العزيز ازهرى نور الهدى سلامات يا خوى ونور الله دروبك بكل خير يا ود عز القبائل عجبتنى بالحيل الطلة يا ود الفريق والحلة سلامك وصل تب بى وصيته وتحاياك وصلت للمساير وست المساير ام شبها ناير لا ياخوى وحات خوتك نحن غبش من وسط الغبش مانا من الجيل الحديث.. ولا الموديل الحديث تسلم اخوى ازهرى من كل بلا الوالده بتسلمممم عليك كتير ودعواتها ليك ممتد قدر المسافات البينا شكرا حجا حبوبات
الحنين ود الجروف والطين اخى الصادق شيخ الدين تسلم يا ابو مريم وتسلم مريم زاتها على الطلة الحنينه ..زى غنا الحبوبات وانت جاى طاوى لى فى طرف عمتك محنة بلد من امدرمان للقضارف ام خيرا وارف الوالده بتسلم عليك كتير وبتدعو لي بكل خير قالت ليك يا حليلكم يا اهلنا الهمارير التحية عبرك للاخت هالة وكل ناس البيت وتحايا خاصة من غاده لكم .. وكم فاضت ذكريات القضارف بطلتك السمحة الما بتشبها طلة غير طلة ابو مريم شكرا الصادق شكرا مطر قضارف
*** تخريمة تحايا من الاعماق للجميل عركى لو وصل عندكم قول ليه قالت ليك سوما... الشوق نيلين وقمر دورين وغيمة ومطرتين
سجيمان سلامات احوالك وصحتك ان شاء الله طيب وينك اختفيت وما باين؟ مشغول مع الفضائيات الكتيره دى ولا شنو ؟ قصدوك عديل وبقوا يجيبوا ليك ندى القلعه كل يوم تحياتى لك وتحيات الوالده ودعواتها الكريمه كتر الف خيرك وشكرا على الطلة يا العشا
آى والله صدقت اخى بلة محمد الفاضل انا غايتو ما عارفة القال منو لكن كلامك سمح تسلم من كل بلا وربنا يمتعك بالصحة والعافية لك تحياتنا جميعا كل الاسرة على اطلالتك الجميلة وشكرا نيلين
ربنا يحفظ الوالدة ويحفظ جميع الأمهات ويرحم من فارقن هذه الدنيا هن بحق نعمة لا تقاس بمكيال
كل الأشواق
الشفيفة الوريفة سلمى صبحى طلتك نسمات صباح معتقة بنفس الاهل تسلمى يا غالية وتسلم ايامك وربنا يحفظك ويخليك يا ستهن لك التحايا الخالصة من الاسره وتحية خاصة من الوالده
اللهم آمين يا رب ربنا يحفظ كل الامهات ويرحم الاموات منهن شكرا حبيبة شكرا ندية زيك
الاخ محمد صباحى تسلم انت من كلا بلا ان شاء الله شكرا حجوات
Post: #88 Title: Re: *** أمى جــات *** Author: محمد عثمان محمود Date: 05-13-2008, 09:55 PM Parent: #85
أسماء
حمداً لله على وصول الوالدة والأخت غادة بالسلام وهنيئاً لك بهذه السعادة أدامها الله واوعى بعد شوية الوالدة تقول ليك أنا زهجت من بلدكم دي وعاوزة أرجع أهلي.