( لا بيغلط عليك لا بيوسخ اضنيك) على قول عماد عبد الله

ناس زي ديل بقوا زي( لبن الطير)

يا ناظم
ده كلام عمكـ عبدالله شخصيا
عماد كان بعرف يقول كلام زي ده
بختو

خدر ازيك

والله انت و{عماد) من الناس البتمنى الاقيهم كان ربنا طول فى الاجال


مودتى لك

Quote: انت و{عماد) من الناس البتمنى الاقيهم

ياناظم خذها نصيحة منى وغير فى امنيتك هذى!!!
الدنيا ليست بعزقةً ياصاحبى
منعم

يا ناظم سلام
دى

Quote: لا بيغلط عليك لا بيوسخ اضنيك

و دى

Quote: والله انت و{عماد) من الناس البتمنى الاقيهم

يتلمو كيف؟


نصيحة : ركز في لبن الطير ... احتمال تلقاهو اكبر


تحت تحت كده: الدنيا ـ موش الانترنت ـ فيها ناس يملو القلب و الروح و العقل همبريب ... يا سلام على الاصحاب رغم المسافات و الشلهتة و محن الدنيا

يا سلام على الاصحاب

إتلموا عليك الحبرتجية يا ناظم ..!!!
معليش .. قدر اللهُ و ما شاء الله .. فعل ..
و للضمان .. أمسك ليك إسم .. ما بتجيك عوجة ..

Quote: يا سلام على الاصحاب رغم المسافات و الشلهتة و محن الدنيا يا سلام على الاصحاب

لا بيغلّطوا عليك .. لا يخلوا رحمة ربنا تنزل ..


مساء الخير يا ناظم ..
و ح نتلاقى .

غايتو ياناظم انا نصحتك بمنعرج اللوى!!!!!
انت وحظك...

خاصة النوع التحت دا... بودى الديم طوالى

( وحق الله) كما يحلف اهل المغرب


(ده يوم كبير)

منعم الجزولى

عصام جبر الله
عع عماد عبدالله

معرفه وخفه روح وناس براها

مودتى

يا (منعم) الصوره دى بدون تعليق ولا شنو

تفتكر النوع دا محتاج تعليق؟؟؟!!!
دا مَعَلَّقْ جاهز!!!

Quote: تفتكر النوع دا محتاج تعليق؟؟؟!!! دا مَعَلَّقْ جاهز!!!

جازولت اقول ليك قولة
يازول انا بحبك عديل كدددده


سلام يا ناظم
وامسك في كلام منعم ده قوووي

(عبد الكريم) ازيك

كلامو ماشى

يحكى والعهدة على الراوي


ان الانصار زمان كان عندهم وجبه يسمونها(سمن المهدى) وهى عبارة عن(كسره بمويه) فجاء المثل


(لابيغلط عليك لا بيوسخ ايديك)

هل نحن شعب (جلف)


بمعنى فقر القاموس اللغوي من كلمات المجامله والتشجيع والامتنان للاخر

الحمدلله أولاد ختمية....

الله يكرمك يا(ود الخليفه)

Quote: الله يكرمك يا(ود الخليفه)

على ذكر الختمية و الخلفاء يا ناظم ..
جدك محمد حمزة رحمة الله عليهو .. في حولية سيدي علي ..
بنمشي معاهو .. نرجحن و بعدها نباري الفتة ..
يقول لينا : خشمكم و عندكم .. ما تاكلوا مع الناس , تاكلوا مع الخلفا بعد الناس تاكل ..
و قد كان الرجل خليفة بياقة دائرية و عمامة صغيرة ..
فنجلس بعد النوبة و نحن صبية جائعون ..
مع الخلفا ارضا و بيننا القدح الكبير الما خمج بالفتة و الرز الساخن أبو بوخ ..
و عيننا على الباسطة البعيدة ..
فيأمرنا قائلاً :
( يا ولد .. امسك دقن أبوك ) ..
فنمسك أطراف القدح الدائرية عند تناولنا كل لقمة حتى لا يدور القدح حول نفسه ..
و بذلك تكون ملزماً بالأكل مما يليك .. حيث أن كلٌ يمسك دقن أبوه ..
فتلقى القدح مثبت كالوتد إلى الأرض .
و طارق إبن خالتي يغافل الخلفا و يلم لحماية وارمة جوه لقمة الفتة ..
فيقول جدي مداعبا :
( الجواب أبو طابعة لأ ) .


ناظم يسعد مساك يا رجل ..
الخرطوم مخرفة الأيام دي ..
قول بختنا .

و بمناسبة الخلفاء يا ناظم و عماد
يحكى انو جدنا سيداحمد وهو خليفة كان عضاض جدا،وفي كل وجبة يخصص له اكبر عظم ملتفة حولو لحوم ، ده كان قانون يعرفه الجميع. مرة جو ضيوف من بعيد، جابو العضة و الناس بدت تاكل، واحد من الضيوف مد ايدو على العضم اياهو ، الخليفة من غير يرفع راسو او عينو قال ليهو "همممم .... مو هولك"

و ذهبت مثلا في اسرتنا

Quote: "همممم .... مو هولك"

شديدة يا صاحب ..




.....
دحين هسه في لحمة هول زول ؟؟
هو العضماية زاتا في غضب الله ..
( لحمتك يا رب ) .

عماد عبد الله

وود جبر الله

كلامكم طاعم زي فته( الختميه)

الله رمانى فى ميس الدنيا مع بشر التقول عملوا ليهم (انترفيو وجابوهم)

ربنا يكتر من الزيكم ويحمينا من ناس(المؤمن حلوي)

( هين تستخفه بسمه الطفل

قويا يصارع الاجيال)

رحم الله الشاعر (ادريس جماع)

وكل مبدعينا من قتلتهم( الجلافه)

(خليل فرح )و(محمد المهدى المجذوب) و(التيجانى يوسف بشير )وووو

ذهبوا بين مدمن ومسلول ومذهول

على ذكر الخلفاء أيضاً..ونتمنى المغفرة من غارة الأسياد.كان للسيد على أثنان من الخلفاء الملازمين لحضرته واصحاب الشورة والرأى على أيام حزب الشعب الديمقراطى فى الستينات واحدة من مهامهم أنذاك هو الأطلاع على الصحف اليومية بعد أن يكمل مولانا قراءتها..أحد هؤلاء الخلفاء شايقى والثانى جعلى قلت أن مهمتهم تنحصر فى قرأة الصحف بعد مولانا فقد كان السيد على يضع دوائر بالقلم الأحمر على بعض المواضيع من أخبار ومقالات وعلى الخليفتين الأنتباه لموضع هذه الدوائر باعتبارها ستكون أجندة الحوار حين يدخلون على مولانا..حتى يتم وضع رأى رسمى (أو خط الحزب)بحسب أخوانا الشيوعيين..وفى مره استلم احدهم الصحف ووجد دائرة مولانا الحمراء على خبر رياضى..اليوم الأمير والكوكب بميدان عقرب سارع للخليفة الأخر وهو ممتلئ بالدهشة والفرحة ربما سائلاً اياه..أنت مولانا ده بقت عنده أهتمامات رياضية ولاشنو راجع الأخر الخبر ورد سريعاً.. وبلكنة شايقية قال (أزول ها مولانا مالوا ومال الفياقة دى مولنا داير يسألنا بس..ميدان عقرب ده مسجل بأسم منو)


غفر الله لى
جد جد


والله ياناظم قصة البوست ده شنو ماعارف لكن قلنا نخش نسالم ونسلم

حاتم ازيك


والله مشتاقين


سمعت نكته( سبعتاشر عل مستفيد) بحكيها ليك لما نتفابل(مدلى البلد قريب)

عمري ما حبيت غير الجمال في الروح
تعال و لو مرة واسي الفؤاد مجروح
....
تبخل علي بلقاك و انا يا حبيب مجروح
باكي العيون ساهرة كتّر عليّ النوح
و إنت تحكي الفل و الورد لما يفوح
....
حبيبي يا أسمر خدك عليهو فصود
جرحتني في قلبي و رمتني بعيون سود
تتغابى آلامي و انا قلبي مشغول بيك


و ياااااا ناظم .. هذا من صنف الكلام الذي لا يغلط لا يوسخ
سمعتو و الليل واقف في حتتو أبى يمشي ( و الليل حمارٌ حرون .. مثل حمار الشيخ الذي وقف بالعقبة ) ..
و يا ناظم لقيتني ما سمعت الغنوة دي من أكتر من كم و عشرين سنة
و إبراهيم عوض يديها و يديها .. و هي تستجيب ليهو و تديهو ..
أدو بعضهم كده لما دخل صوت أبوخليل في صوت القانون على الفلوت ..
و عمل القانون هنا شغل ماااااااياهو يا ناظم ياخي ..
يوجعك يطلع أبو ميتين حنانك يا السامع , لا رحمة لا عدالة ..
و إنت بس تتململ و تتحسبن لحدي ما دمك يقيف نشاب من الطرب السكران ..

صورة إبراهيم عوض حقتك دي ذكرتني دسديس إذاعاتنا لدرر الغوالي عندهم .. و وين و وين لما يبروك بشي يسند جوعك أولاد أم زقده ..
هسه كمان يا خينا .. شوف حل في صورة إبراهيم عوض دي .

بتلاوز ياخ

عماد صباحاتك فل


الست(ام كلثوم) لما تصل اعلى درجات الطرب بتصل مرحله (السلطنه)

وابراهيم عوض و(الجابري) يملكون هذه المقدره شوف زي الكلام ده



{محبوبى وكتين يبتسم الدنيا ياناس تنقسم}


و يا سلام على الطرب البنضف الاضنين

اشكرك

((هذا مجمل الواجبات: لا تعامل الغير بما إذا عوملت به آلمك)) (البراهمانية، مهبهراتا، 5: 1517).
ــ ((لا تؤذ الغير بسلوك تجده أنت بنفسك مؤذياً لو سلك معك)). (البوذية، أوداناــ فارقا، 5: 18).
ــ ((هذا حقاً مثل المحبة اللطيفة: لا تعامل الغير بما لا تريد ان يعاملوك به)). (الكونفوشيوسية، ديوان، 15: 23).
ــ ((الشيء الذي تبغضه، لا تعامل به صحبك، هذا مجمل الناموس، وكل ما تبقى شروح)) (اليهودية، التلمود، شباط: 31أ).
ــ ((فكل ما تريدون ان يفعل الناس بكم، افعلوا هكذا انتم أيضاً بهم، لأن هذا هو الناموس والأنبياء)) (المسيحية، إنجيل متى، 7: 12).
ــ ((لا يكون المؤمن مؤمناً حتى يحب لأخيه ما يحب لنفسه)). (الإسلام، حديث نبوي شهير متواتر).