Post: #1
Title: عاجل الى متابعى برنامج اغانى واغانى السرقدور لهذا العام 2008م
Author: ASIM AL BANNA
Date: 04-15-2008, 12:54 PM
Parent: #0
قعدنا على مهلنا فى قاهرة المعز شخصى الضعيف واستاذى السر قدور منتبادل اطراف الحديث عن سلبيات وايجابيات ماقدم فى برنامج النيل الازرق الرمضانى اغانى واغانى ... واخلصنا الى تباين فى الاراء ما جعل نجاح هذا البرنامج مؤكد للجميع ... ولكن بعد كمية من الهرشات جاءت على راسى وازعاج سببته للاستاذ كاد ان يودى بحياته من الرجفة بعد الشكلة والاضطراب العصبى ... اصررت على ان يتم تغيير فى كيفية تقديم البرنامج هذا العام بحيث تكون هناك طريقة مختلفة اخراجيا مع الحفاظ على هذف البرنامج الاساسى ... وتكررت روايات ومقترحات ... وورد فى خاطرى ان اطرح هذه المساحة لمقترحاتكم التى تنير الطريق قبل بدء تسجيل البرنامج وهى مساحة حرة لمقترحاتكم سوف ناخذها للقائمين على الامر ولابد من وجود كل ماهو مفيد منها لكم محبتى ...
ودمتم
|
Post: #2
Title: Re: عاجل الى متابعى برنامج اغانى واغانى السرقدور لهذا العام 2008م
Author: نصر الدين عثمان
Date: 04-15-2008, 01:06 PM
Parent: #1
الأستاذ عاصم البنا تحياتي،،،
شكراً لك يا رائع .. فعلاً ده خبر جميل جداً
أمنياتي لكم بالتوفيق .. مع فائق مودتي وتقديري
|
Post: #3
Title: Re: عاجل الى متابعى برنامج اغانى واغانى السرقدور لهذا العام 2008م
Author: nazar hussien
Date: 04-15-2008, 01:15 PM
Parent: #1
| Quote: اصررت على ان يتم تغيير فى كيفية تقديم البرنامج هذا العام بحيث تكون هناك طريقة مختلفة اخراجيا مع الحفاظ على هذف البرنامج الاساسى ... |
يا عاصم البنا...يا ايها الفنان الغلبني اجيبو في عرسي.....لأسباب تخويفية بالميزانية
العرسية وقتها...
نجي للبرنامج:
اقتراحي بعد اذنك ان تخصصوا كل حلقة لشاعر معين...سيرته واغانيه الخالدة...ومناسبات القصائد...
علي ان تنتقل هذه الحلقات لخارج الاستوديو...وتغنوا لينا من بحر اب روف...وحي العرب...ومدني..
وشندي وكبوشية...والخرطوم...وان صعب الامر عليكم يمكن ان تنتقل الكاميرا لمنازل هؤلاء الشعراء
لتعريف المشاهد علي الاقل باحفاد من نغني لاجدادهم او أبائهم ان كان ابنائهم احياء...
علي شرط تبدوا لينا من خليل فرح...
ويمكن ان تنقل رأي لعمنا السر قدور وتقول ليه دا رأي ود ناس محمود حسين خضر
|
Post: #4
Title: Re: عاجل الى متابعى برنامج اغانى واغانى السرقدور لهذا العام 2008م
Author: أشرف البنا
Date: 04-15-2008, 02:44 PM
Parent: #1
أخي عاصم ...
تحية و بحور أشواق ...
انا هنا الآن للتحية ... و عبرك لوالدنا بابكر و جميع الأهل ..
و لاحقاً سأطل للإدلاء بما يتيسر ...
محبتي و تمنياتي بالتوفيق ...
|
Post: #5
Title: Re: عاجل الى متابعى برنامج اغانى واغانى السرقدور لهذا العام 2008م
Author: mamkouna
Date: 04-15-2008, 02:50 PM
Parent: #1
كان جبتو سيرتي...
عندي ليكم مقترحات و أفكار جديدة..
كان ما جبتو سيرتي..
لا بيني ..لا بينكم.
|
Post: #6
Title: Re: عاجل الى متابعى برنامج اغانى واغانى السرقدور لهذا العام 2008م
Author: ASIM AL BANNA
Date: 04-15-2008, 04:00 PM
Parent: #1
الاخوة نصر الدين ونزار وابن العم العزيز د. اشرف والممكونة والمسكونة بالابداع نحن فى انتظاركم واليوم عندنا جلسة خطيرة فى القاهرة على ان نعلن فيها راى الاخ نزار العرس وفتح لينا .. وان كان الفكرة جميلة جدا بس تكلفة الانتاج والزمن غير محددين هنا .. على العموم رايك ده انا متاكد انه من الاراء الجميلة والمحطات الخارجية للبرنامج دون شك تكسر رتابة الحلقات لطالما كانت 30 حلقة . ... ممكونة بنجيب سيرتك اصلو وقت سيرتك يجيبوها اهلى كتير بعزوها .... فى انتظار المزيد ...
اشرف البنا ... خليت العود ولا خلاك ؟؟
محبتى
|
Post: #7
Title: Re: عاجل الى متابعى برنامج اغانى واغانى السرقدور لهذا العام 2008م
Author: Shams eldin Alsanosi
Date: 04-15-2008, 04:07 PM
Parent: #1
متابعين بهناك
وحنتابعك بهنا
مع تحية خاصة
|
Post: #11
Title: Re: عاجل الى متابعى برنامج اغانى واغانى السرقدور لهذا العام 2008م
Author: محمد المرتضى حامد
Date: 04-15-2008, 05:17 PM
Parent: #7
عاصم،
ليالي الحلميه دي طالما لاقت كل هذا النجاح وستبث في رمضان القادم فلابد من إبقائها في شكلها الحالي مع تغيير بعض الممثلين وأقترح البدء بآثار الحكيم وأبو مكنه تيربو ، عارفك مابتقدر تقول بِغِم في كلامي دا، الشئ الآخر مطلوب من السر قدور أن يتيح فرصة أوسع للمطربين للحديث الموجز المفيد بعيدا عن الخوف من (الهرش) ، هذا البرنامج حقق شعبيته من خلال عفويته والعفوية لاتعني الفوضى التي بدرت من بعضهم بل العكس فإنها تتطلب إعدادا جيدا والتزاما من الجميع،
|
Post: #8
Title: Re: عاجل الى متابعى برنامج اغانى واغانى السرقدور لهذا العام 2008م
Author: محمد الواثق
Date: 04-15-2008, 04:33 PM
Parent: #1
الأخ عاصم البنا
تحيات ام درمانية من ابوظبي ممزوجة بغبار شارع ابوروف السوق مزدانة بطيبة اهله جميعهم، لك ولجميع الأصدقاء اولاد البنا - الحوش -
البرنامج بطريقته السابقة جميل جداً ويؤدي الغرض منه المتامشي مع وقت بثه بعد الفطور مباشرة وهو وقت يتطلب كبسولات سريعة .
والمعلومات التي تقدم فيه من الأستاذ الموسوعي السر قدور رائعة جداً .
اقترح انو الأغاني توزع بينكم كل حسب امكانيات صوته واضافة صوت نسائي آخر .
كما اقترح كتابة كلمات الأغنيات وبثها في شكل فلاشات مع الأغنية .
واذا تم تغيير موعد بث البرنامج سيكون لنا اقتراحات اخرى .
احترامي للجميع
|
Post: #9
Title: Re: عاجل الى متابعى برنامج اغانى واغانى السرقدور لهذا العام 2008م
Author: abubakr
Date: 04-15-2008, 04:56 PM
Parent: #1
فردتنا انت شرفت ؟؟؟... يا مراحب ... يعني سبعة شهور عشان تنوم السهر وتجيتا قبل رمضان باربع شهور.. المهم جيت....
مش عايزين ندوشكم بمقترحات لكن الاعداد للحلقة بحيث ان يتم تناول موضوع الحلقة دون هرشات و خروج عن النص .. بعدين اللبس ؟؟ يافردة ما معقول الكاروهات واشكال والوان من كل الازياء من داخل وخارج القطر .. يعني لولا غناكم السمح الواحد كان جاكم بكرباج ... وليه مثلا ما تكون كل حلقة لشاعر اغنية مثلا سيد عبد العزيز دة كرومة براهو غني ليهو كام وخمسين اغنية والعبادي قال عنو معاوية يسن بانه " الاب الحقيقي للاغنية السودانية الحديثة " وابوصلاح وودالرضي وووالمساح وعبدالرحمن الريح والعمرابي وعبيد ع الرحمن وناس البنا دييل شوف طريقة معاهم .. المهم حلقة لكل شاعر فيها مختارات من اشهر اغانيه بيكفو الشهر وشوال كمان ...بعدين فرفور دة جيبوه بعد ما يكمل كل الدموع والفرفرة يعني جاهز ....وبعدين حاجة مهمة جدا وهي ان تبدء كل حلقة اما بابيات من شعر السر قدور بصوته او ابيات مغنية تكريما لهذا الكشكول الابداعي السوداني .. يجب ان يكون مكرما طيلة هذا الشهر الفضيل ففي بلادنا ليس هنالك من يهتم بالمبدعيين في كافة المجالات ( علمية او انسانية -فن ادب شعر .. الخ ) بصورة لائقة تبقيهم في ذاكرة الاجيال ولقد لاحظت ان برنامجكم هذا يستقطب الاف من كل الاجيال الصغيرة والكبيرة وهذه مناسبة لتكريمه بصورة تبقي في ذاكرة الجميع
ولك مودتي
الرطاني
|
Post: #10
Title: Re: عاجل الى متابعى برنامج اغانى واغانى السرقدور لهذا العام 2008م
Author: Baha Elhadi
Date: 04-15-2008, 05:04 PM
Parent: #9
الأخ:الفنان جدا جدا
من غرائب الأمور أني استمع لواحدة من روائعك الخالدات
وبأدائك المميز
اقتراحي بعد اذنك ان تخصصوا كل حلقة لشاعر معين...سيرته واغانيه الخالدة...ومناسبات القصائد...
علي ان تنتقل هذه الحلقات لخارج الاستوديو
أثني هذا الاقتراح
وأضيف عليه
ان تخصص كل حلقة منفردة لفنان
وتقدم كل أغانيه
وتعريف بشعراء الأغاني
ومناسبتها كنوع من التوثيق
هذا مع حبي لطريقتك في الأداء
|
Post: #12
Title: Re: عاجل الى متابعى برنامج اغانى واغانى السرقدور لهذا العام 2008م
Author: سامى عتبانى
Date: 04-15-2008, 05:37 PM
Parent: #10
Quote: اقتراحي بعد اذنك ان تخصصوا كل حلقة لشاعر معين...سيرته واغانيه الخالدة...ومناسبات القصائد...
علي ان تنتقل هذه الحلقات لخارج الاستوديو...وتغنوا لينا من بحر اب روف...وحي العرب...ومدني..
وشندي وكبوشية...والخرطوم...وان صعب الامر عليكم يمكن ان تنتقل الكاميرا لمنازل هؤلاء الشعراء
لتعريف المشاهد علي الاقل باحفاد من نغني لاجدادهم او أبائهم ان كان ابنائهم احياء...
علي شرط تبدوا لينا من خليل فرح |
وكده بذيد جمال فوق لجمالو
ورونق فوق لرونقو
|
Post: #13
Title: Re: عاجل الى متابعى برنامج اغانى واغانى السرقدور لهذا العام 2008م
Author: عمر سعد
Date: 04-15-2008, 08:35 PM
Parent: #1
اهلا باخ جارى
حا اقول كلام حار جدا جدا استحملو
اولا مافى التزام فى الحلقة من ناحية توزيع الفرص
اعتقد ان الموجودين من الفنانين لا يمثلون روح الحقيبة يا ريت يجو ناس من دار فلاح
مثلا فرفور دة جيبوهو يوم زنقار
اما نادر خضر جارى دة جيبوهو يوم الحبش
دة للمثال لا اكثر
عمى السر قدور داير زول تانى يكون معاهو وممكن نقول ادريس البنا او من جيلو
حتى لا تكونالمسالة كانها طلبة واستاذ
زمن البرنامج عندنا فى قطر مع الصلاة يا تصلى او تشوف البرنامج ........
لو تم تصوير الحلقة فى بيت الشاعر بيكون احسن ........
دائما حق الشعراء مهضوم والملحنين...............
محاولة ابراز دورهم بيكون احسن ....................
كدى لمن اجى القاهرة يوم الجمعة بقابل عم السر وطبعا لى مية سنة ما شفتو بيكون نسانى
ونسى الدامر كلها ...........................
قلت اخفف ما اتقلة
|
Post: #14
Title: Re: عاجل الى متابعى برنامج اغانى واغانى السرقدور لهذا العام 2008م
Author: mamkouna
Date: 04-15-2008, 09:47 PM
Parent: #1
على بال ما أجيكم بالإقتراحات..
حقو تقرو التعليقات على....
(( أغاني و أغاني 1 )).....
هنا..
أبو الكلام
---
و ..
(( أغاني و أغاني 2 ))...
هنا...
ما أحلى ساعات اللقاء...
|
Post: #15
Title: Re: عاجل الى متابعى برنامج اغانى واغانى السرقدور لهذا العام 2008م
Author: جمال السنوسي
Date: 04-15-2008, 10:12 PM
Parent: #14
عاصم الجميل
تحياتنا ليك وشوقنا بحر عديل
يا زول يا فنان
برنامجكم ده توثيق وتقريبا في ناس كتار بعرفهم بيسجلوا الحلقات ومهما ينعزموا فطور رمضان بره البيت ما بيمشوا عشان يستمتعوا بالغنا الجميل والزمن الجميل وانا اولهم
اها المقترحات كثيرة بس الميزانيات بتكون المشكلة
انا غايتو مع اقتراح 30 حلقة تتصور في صالون بيت 30 شاعر او في صالون احد ابنائه ( بشرط ان يكونوا كلهم في رحاب الله عشان الموجودين اطال الله عمرهم ما يزعلوا) وللاختيار تتعمل لجنة من 5 اشخاص ويطرحوا الاسماء ويتم الاختيار بالتصويت للترجيح عند الاختلاف
تاني حاجة تقدم في الحلقة نماذج من اعمال الشاعر ثم اغنية كاملة له في ختام الحلقة
ثالث : ميزانية البرنامج كده ممكن تكون كبيرة بس في طريقة واحدة لتغطية التكلفة وهي الرعاية من قبل المعلنيين
رابع شيء وده المهم انه ناس النيل الازرق ومن خلال مدخول الاعلان من هذه الحلقات يقدموا مبلغ معتبر لاسرة الشاعر المذكور تقديرا لما قدمه من اسهامات في تشكيل وجدان الشعب السوداني ( بالله تكون بعيدا عن ناس درع تذكاري وما شابه) حتى انتوا كفنانين شباب والكثير منكم يؤدي روائع هؤلاء المبدعين فلتكن منكم هدية مبلغ مالي يقدم لاسرة الشاعر خلال الحلقة على الاقل يعينهم في ظروف الحياة الصعبة دي وعرفانامنكم تجاه اسر هؤلاء الشعراء المختارين
ما عارف رايكم شنو
تحياتي للاستاذ السر قدور استاذ الاجيال وكل الزملاء
جمال السنوسي
|
Post: #16
Title: Re: عاجل الى متابعى برنامج اغانى واغانى السرقدور لهذا العام 2008م
Author: mamkouna
Date: 04-16-2008, 08:14 AM
Parent: #1
صباح الخير يا ناس و عُشاق أغاني و أغاني..
عندي ليكم بعض الإقتراحات البسيطة...
1/ الشعب السوداني شعب ملول بطبعه..لذلك لابد من مراعاة أن التجديد و إضفاء لون و شكل جديد للبرنامج من الضروريات. و أقترح أن يظهر هذا التجديد في الإعلان أو الدعاية للبرنامج .
يعني تكتبوا مثلاُ...عودة أغاني و أغاني بحُلٌة جديدة..أو ترقبوا أغاني و أغاني في مفاجأت غير متوقعة...إلخ إلخ إلخ.
2/ أقترح إستضافة عدد من المهتمين بالغناء السوداني بصفة عامة ...و أغاني الحقيبة بصفة خاصة...حتى يتبادلوا المعلومات مع السيد/ السر قدور...للفائدة العامة..و عشان ما تحصل مغالطات تاريخية..فالتاريخ لا يُروى من جانب واحد.
أقترح أسماء مثل..دكتور الفاتح حسين..دكتور أنس العاقب..محمدية ..عباس تلودي..
و عبر الأقمار الصناعية...دكتور أحمد القرشي..عثمان موسى..أحمد طراوة..نهى محسن أبو راس.
3/ لابد من تغيير جذري في الكاست..cast ...يبدأ أولاً بتفنيش فرفور و نادر خضر و أسرار..مع كامل إحترامي و إعجابي بيهم/ن.
أقترح دماء جديدة..كسميرة دنيا..ياسر تمتام..و..أبو بكر سيد أحمد الفنان (( ما الرطاني سيد بوست ما أحلى ساعات اللقاء )).
4/ الإبقاء على الفرقة الموسيقية كما هي..فقد كان أداءها أكثر من ممتاز.بس بقترح إعطاء محمدية فرصة التحدث ..فتاريخه حافل بالكثير من المعلومات التي قد تُثري البرنامج.
5/ تسجيل البرنامج على فترات متباعدة..حتى لا يُصاب الكاست بالممل و الفرفرة كما حدث في السابق...و التنوع في الإستضافة سيجعل ذلك ممكناً.
6/ إطالة زمن الحلقة.
7/ مناشدة السيد/ السر قدور بإعطاء ضيوفه فرصة للتعبير عن أحاسيسهم و مشاعرهم.
مع مطالبته بالإحتفاظ بروحه الحلوة المرحة..التي تُضفي على البرنامج بريق و تميٌز.
و..
أخيراً..و ليس آخراً ..
8/ تغيير زمن بث الحلقة...أقترح يكون البرنامج سهرة....
يعني بعد التراويح ...عشان الكانو بره يرجعوا..و الكانوا جوٌه يمرقو.
و....عشان الممكون ما يدق لي خروج بدون عودة .
|
Post: #24
Title: Re: عاجل الى متابعى برنامج اغانى واغانى السرقدور لهذا العام 2008م
Author: عمر سعد
Date: 04-17-2008, 02:07 AM
Parent: #16
يبدأ أولاً Quote: بتفنيش فرفور و نادر خضر و أسرار..مع كامل إحترامي و إعجابي بيهم/ن.
أقترح دماء جديدة..كسميرة دنيا..ياسر تمتام..و..أبو بكر سيد أحمد الفنان (( ما الرطاني سيد بوست ما أحلى ساعات اللقاء )). |
نؤيد دون تحفظ
|
Post: #17
Title: Re: عاجل الى متابعى برنامج اغانى واغانى السرقدور لهذا العام 2008م
Author: حسين محي الدين
Date: 04-16-2008, 08:25 AM
Parent: #1
عاصم لك التحية ولاستاذنا الكبير السر
وحقيقة برنامج مميز ومشاهد بنسبة عالية
لي عودة
(هذا بمثابة تسجيل حضور)
خالص الود
|
Post: #18
Title: Re: عاجل الى متابعى برنامج اغانى واغانى السرقدور لهذا العام 2008م
Author: nazar hussien
Date: 04-16-2008, 08:40 AM
Parent: #17
يا ممكونة وعاصم البنا
اسرار اوعكم تهبشوها....وكذلك عاصم البنا...وعصام محمد نور...
ممكن تجيبوا وليد زاكي الدين....غنا بس...نضم ما فينا
|
Post: #19
Title: Re: عاجل الى متابعى برنامج اغانى واغانى السرقدور لهذا العام 2008م
Author: nazar hussien
Date: 04-16-2008, 08:50 AM
Parent: #18
| Quote: نعلن فيها راى الاخ نزار العرس وفتح لينا |
هو انا بقدر افتح ليك....لكن غلبني اجيبك عديل كدي...في وقتها ودا كان سنة 2000
بس حالف حلفا ما ينكسر علي...كان الله مدّ في الاجل...علا
أسمع (المقدرة) في اقرب مناسبة...عندنا ان شاء الله
|
Post: #20
Title: Re: عاجل الى متابعى برنامج اغانى واغانى السرقدور لهذا العام 2008م
Author: قرشـــو
Date: 04-16-2008, 09:13 AM
Parent: #1
المطرب الجميل والاستاذ الجليل عاصم البنا
لك التحية والتجلة
لن تصدق ان قلت لك اننى لم ارى اسمك كمشترك هنا فى هذا البورد الا اليوم مع انه البروفايل بتاعك من العام 2006 ويبدو ذلك لاننى اكن منتظما فى الفترة السابقة فى المنبر فارجوك اعذرنى واقبل ترحابى الكبير بشخصك الجليل فانا من عشاق الطرب الاصيل وانتم حاملين لواء الطرب الاصيل والجميل وحتى شبلكم الصغير احمد اشاهده هذه الايام على هارمونى وهو يتغنى بالجميل من الغناء ...
اسال الله ان يحفظكم جميعا حاملين لواء الطرب الاصيل والجميل وان تثروا الساحة السودانية بكل جميل ورائع ....
سعيد للتلاقى بك فى هذه المساحة وارجو ان يدوم التلاقى ...
عن موضوع البوست
حديثكم العذب على النيل الازرق وهذه قناة المرتاحين ونحن البؤساء لا مكان لقناة النيل الازرق على أجهزتنا لانها مشفرة ويبقى كلامك ده للناس العندها قروش ....
طيب ياخى ما تعملوا خير وتقدموا لينا حلقات على هارمونى او الشروق او زول او حتى الفضائية السودانية حتى يتثنى لنا مشاهدتها .....
ده اقتراحى ليكم بكل صدق ...
مع مودتى وتقديرى واحترامى ....
|
Post: #21
Title: Re: عاجل الى متابعى برنامج اغانى واغانى السرقدور لهذا العام 2008م
Author: جمال السنوسي
Date: 04-16-2008, 02:36 PM
Parent: #20
يا اخوانا
اسرار دي ما ساهلة ومستحيل تكون برة المجموعة
وانتو عارفين راي محمد وردي فيها
كمان ياريت ينضم ابوبكر سيداحمد لانه صوت مع عادي
مع تقديري لكل المشاركين
عاصم
عصام
اسرار
هم عماد الحلقات
جمال
|
Post: #22
Title: Re: عاجل الى متابعى برنامج اغانى واغانى السرقدور لهذا العام 2008م
Author: ASIM AL BANNA
Date: 04-17-2008, 01:54 AM
Parent: #1
والله ياها المحرية فيكم ياحلوين والله كلكم احاسيسكم مقدرة وبالتاكيد هى مقر احترام وتقدير الجميع وبالفعل تم الاتفاق بالامس بينى وبين الاستاذ السر على ان تطبع هذه المقترحات الجميلة كى تضيف الى البرنامج الق وضياء تستنير به محصلة القائمين على الامر من مخرجين ومنتجين ومنفذين ... ودون شك ان الاستاذ السر فى القريب العاجل سيكون رده بينكم على الكثير من الاراء والمقترحات فى هذه المساحة ... اما عن المغنيين (عليهو الطلاق يغيرو زول واحد مايقدم البرنامج) ... والحقيقة يا اهل الحق (لبنت وياكلها الطير؟؟؟ ماجاية موش
ممكونة ....
انا كان قالو لى غنى لى صلاح مصطفى بتلفت ... نادر خضر امانا ما حلال عقد
نحن من الامس فقط ... وفاطين سطر ... طوالى المقدرة .
واختم بالصلاة على النبى
وحب الناس مذاهب
|
Post: #26
Title: Re: عاجل الى متابعى برنامج اغانى واغانى السرقدور لهذا العام 2008م
Author: mamkouna
Date: 04-17-2008, 06:44 AM
Parent: #22
Quote: ممكونة ....
انا كان قالو لى غنى لى صلاح مصطفى بتلفت ... نادر خضر امانا ما حلال عقد |
نادر خضر صوت جميل و شخصية محترمة و رزينة..
و كان من أكثر نجوم أغاني و أغاني إلتزاماً..شكلاً و موضوعاً...
دموعي نقطت عديييييل في الواطة لمن غنى...حبيت عشانك كسلا..
لكن لابد من إستبداله...لأنو حضوره ضعيف.
--
أسرار بابكر..صوت واعد و حضور مريح جداً..
و برضو ملتزمة شكلاً و موضوعاً..
و برضو بكينا معاها في..لاقيتو باسم..زهر المواسم..
لابد من إستبدالها..لأنو طبقات صوتها لا تتناسب و معظم ما يُقدٌم.
---
فرفور..
إسم على مُسمى..
كان لفرفرته الغير عادية أسوأ ردود الفعل..
طغت بالتالي على حلاوة و طلاوة صوته المميزة..
لابد من إستبداله..لأنو مستهتر و مستخف بجدية البرنامج.
| Quote: اما عن المغنيين (عليهو الطلاق يغيرو زول واحد مايقدم البرنامج) |
إذا إبتعدتو عن المجاملة و تطييب الخواطر..ح تتحدوا الملل..
otherwise ...
...
تعالوا قولوا ممكونة قالت..!!
|
Post: #23
Title: Re: عاجل الى متابعى برنامج اغانى واغانى السرقدور لهذا العام 2008م
Author: نهي محسن أبوراس
Date: 04-17-2008, 02:01 AM
Parent: #1
أخي الفاضل عاصم والزوار الأفاضل
كيفنكم عساكم بخير..
برنامج أغاني وأغاني برنامج هادف وجميل جدا جدا وضع الماضي والحاضر في بوتقة تركت في نفوسنا جميعا الأثر الطيب...
فشكرا لكم علي المجهود الجبار...
إقتراحي هو:
أن تخصص حلقة كل أسبوع عن شاعر من شعراء الحقيبة ....حياته, مشواره.قصائده الغنائية...والمطربين الذين تغنوا له من الجيل القديم والحديث..حتي نضمن وصول المادة مكتملة إلي المشاهدين وبأكثر من أداء...
ربنا يوفقكم يارب علي ماتقدمون
ويديكم ألف عافية..
مودتي
|
Post: #25
Title: Re: عاجل الى متابعى برنامج اغانى واغانى السرقدور لهذا العام 2008م
Author: الحاج حمد الحاج
Date: 04-17-2008, 06:34 AM
Parent: #23
الفنان المبدع عاصم البنا
أكيد أن طريقة تقديم البرنامج العفوية هي سر نجاح و أن التقيد بشاعر معين قد يفقد التنوع الذي تتميز به الحلقة الواحدة..الطريقة الحالية مناسبة و اذا أمكن الاستعانة ببعض المشاركات المسجلة لذوي المعرفة على شرط الا تاخذ وقت نسبة لقصر وقت البرنامج..تحياتي لك و عبرك للمبدع السر القدور.
|
Post: #27
Title: Re: عاجل الى متابعى برنامج اغانى واغانى السرقدور لهذا العام 2008م
Author: كمال علي الزين
Date: 04-17-2008, 07:01 AM
Parent: #25
(*)
(عاصم) وضيوفه الكرام ..
قد تلاحظون جميعاً أن البرنامج في موسمه الأول كان أكثر زخماً ..؟
ولا خلاف حول أنه أميز ماقدم في الآونة الأخيرة , ..
لكن , إعتماده على عفوية وتمكن أستاذ / السر , وتجربته الإعلامية العريضة , ومقدرته على السيطرة
على المتلقى لن تدوم طويلاً ..
لذا أقترح أن تستحدثوا العمل على طريقة (السيناريو) المعد مسبقاً , وهي ما نفتقده في برامجنا حيث أننا (تلفذيونياً) لم نعرف حتى اليوم التفريق بين (الإعداد) و(الإنتاج) ..
أقترح الإساعانة بأحد هذين لإعداد سناريو مسبق :
لقمان همام
أو (النور الكارس)
ولمزيد من التوضيح يمكنك مراجعة (لقمان) ..
شكراً يا(سيدي) , ..
أرجو تزيين هذا البوست (بساعي البريد) عشان نجيك تاني ..
|
Post: #28
Title: Re: عاجل الى متابعى برنامج اغانى واغانى السرقدور لهذا العام 2008م
Author: مرتضى الكجم
Date: 04-17-2008, 07:33 AM
Parent: #1
المبدع عاصم
* اثنى مع الاضافة للاقتراح القائل (( تخصيص كل حلقة او عدة حلقات لشاعر معين او فنان ,,
سيرته واغانيه الخالدة...ومناسبات القصائد))
* الحلقة داخل الاستوديو مع عرض شريط تسجيلى لزيارة منزل الشاعر او الفنان المعنى مع القاء الضوء
على بعض مسيرة حياة اسرته
* استضافة ( ضيف ) يومى من اعمدة الفن والموسيقى والابداع والمهتمين فى بلادى لاظهار بعض الجوانب
الفنية والتاريخية والادلاء بالدلو مع السر
* ومحمدية دا ادوهو فرصة يحكى شوية
* والفرفرة ومعرض الازياء المتغير دا خلوه شوية مع حبة انضباط وتوزيع فرص
* بالله اسرار دى اوعا تغيروها لانها زهرة الحلقات وكل المواسم
|
Post: #29
Title: Re: عاجل الى متابعى برنامج اغانى واغانى السرقدور لهذا العام 2008م
Author: nazar hussien
Date: 04-17-2008, 09:28 AM
Parent: #28
| Quote: عليهو الطلاق يغيرو زول واحد مايقدم البرنامج |
حليفة عمراب...وبسويها...
أها خلينا المطالبة بالتغيير...هو زاتو نحن المطالبن ليها شنو؟ لينا 19 سنة ما طالبنا
نطالب...هسي...؟
طيب جيبو معاكم عود للحلقات دي يا عاصم...بالاضافة للفرقة...عشان النماذج الصغيرة صغيرة
تقولوها بالعود...اسهل وأسرع...من دخول الفرقة في النماذج الصغيرة...وانت خطير في العود
|
Post: #30
Title: Re: عاجل الى متابعى برنامج اغانى واغانى السرقدور لهذا العام 2008م
Author: omer osman
Date: 04-17-2008, 10:12 AM
Parent: #1
الاخ عاصم
التحية لك ولفريق البرنامج الرائع اقتراحي يتعلق بزمن البرنامج ياريت لو بقي الساعة 10م مثلاً
ثانيا انا ضد الاراء البتنادي بتغير التشكيلة وتغيير التشكيلة في الكورة بجيب الغلب وزي مابقولوا
ناس الكورة البتغلب بيهو العب بيهو وحتى فرفور وحركاته هي جزء من نكهة البرنامج لانو القصة ما فصل
في مدرسة وحصة عن تاريخ الغناء.
وكل عام وانتم بخير.
|
Post: #31
Title: Re: عاجل الى متابعى برنامج اغانى واغانى السرقدور لهذا العام 2008م
Author: امير عوض الجمري
Date: 04-17-2008, 04:32 PM
Parent: #1
الأخ الفنان الرائع عاصم
تحية واجلالاً
اعتقد ان مقترحات الأخوان/ت كلها تصب في مصلحة هذا البرنامج التوثيقي الرائع
وكل الأراء والمقترحات نابعة من متابعة دقيقة للبرنامج في دوراته السابقة وبالضرورة
عليكم انت استاذي عاصم والقائمين على امر البرنامج النظر بحصافة لهذه الأراء واخذها
بالجدية بما كان وفي اعقادي ايضاً ان الأراء الواضحة والصريحة التي تطرحها الأخت ممكونة
هي آراء الكثير من المتابعين ولذلك أرى أن تخصص كما قال البعض كل حلقة عن شاعر معين او مغني معين
من الرعيل الأول وحتى اجيال الوسط ممن رحلوا عنا بعد ان عطروا سماواتنا بروائعهم الخالدة .. لكن
هنا يبدو رأي اختنا ممكونة بضرورة التناوب بين الاخوة المغنيين على الحلقات وذلك من اجل التجويد
ولابد من اختيار الفنانين حسب الحلقات بحيث يكون المغني هو اكثر من يجيد الغناء الذي سيطرح في الحلقة
وده طبعاً بحتاج للجنة تقييم وبرضو عشان الناس ما يصيبم الملل من التكرار .. فلا بد من تغيير المغنيين
والسودان بحمد الله يكتنز بوفرة عالية من المغنيين الجيدين الذين يؤدون مثل هذه الأعمال بجودة عالية وبذلك يصبح
البرنامج برنامج شامل ويرضي كل الاذواق .. وكمان بيكون في تشويق للحلقات يعني كل الناس بيكونوا في انتظار
الحلقة والكل يخمّن في فناني الحلقة وهذا ايضاً من عوامل نجاح البرنامج من ناحية جماهيرية ..
على العموم اتمنى لكم كل التوفيق في قادم الحلقات واشكركم جزيل الشكر للمتعة الحقيقية التي وهبتمونا في سابق الحلقات.
فيصل عبد اللطيف - خالد الصحافة - ياسر تمتام - عمار السنوسي - هشام درماس - محمد اسماعيل - ابوبكر سيداحمد - نانسي عجاج -
امثلة لا حصر لفنانين يمتلكون خامات وامكتنيات عالية تزيد من جودة البرنامج..
|
Post: #32
Title: Re: عاجل الى متابعى برنامج اغانى واغانى السرقدور لهذا العام 2008م
Author: عبدالوهاب همت
Date: 04-17-2008, 07:53 PM
Parent: #1
للامانه برنامج أغاني واغاني يوازي نصف الارث الفني السوداني
العملاق السر قدور الفنان الشامل يستحق الانحناءة شاعرا وملحنا ومغنيا وكاتبا مسرحيا ومقدما للبرامج الهادفه . يكفي أنه يعتقل جل افراد الشعب السوداني حال ظهوره في أي برنامج وهو كالمطر أينما وقع نفع.
والتحيه للفنانيين في مقدمتهم انت ايها العاصم مؤديا للحقيبه وحافظا للكثير من شعرها وشعرائها وهذه غرس طيب من أسرة طيبه معطونه أدبا وفنا.
أعتقد وحسب تصوري البسيط اضافة الاستاذ عوض بابكر في التقديم مع العملاق قدور سيجعل البرنامج جامعة مفتوحه ينهل كل فرد من حيث شاء.
اضافة الفنان المبدع ياسر تمتام أمر هام جدا في مقابل ذلك يسحب نادر خضر لان وجوده وسط هذه الكوكبه يعد نشاذا بكل حق وحقيقه.
أسرار بابكر هي فيروز الغناء السوداني يجب الاحتفاظ بهالانها تأحذ المستمعين الى الثريا بصوتها الملائكي الساحر وادائها المتمكن.
عصام محمد نور وجمال فرفور يمكن ان يشاركا في اداء اغنيات الحقيبه أو أغنيات الشلال الاعظم ابراهيم الكاشف.
أقترح أن تخصص كل حلقه لفنان بعينه أو لشاعر بعينه حتى تنقشع غشاوة الاميه في اوساط الشباب الذي ينسب أغانيات الكبار الى الشباب.
خليل فرح.. حدباي.. عمر البنا.. الجاغريو.. الامي..المساح..خالد ابو الروس..عبدالرحمن الريح..هؤلاء العمالقه يستحقون أن تشيد لهم التماثيل..
التحايا مجددا للاستاذ السر قدور وكم أكون شاكرا اذا مددتني برقم هاتفه هنا او في الماسنجر
وقبل ان أختم لابد من الاشادة بالفرقه الماسيه التي يقودها الاستاذ محمديه واضافة الوتر الخامس عثمان محي الدين عازف الكمان المتكمن ستضفي على فنكم النبيل المزيد.
|
|