سودانيز اون لاين التعليمية للخريجين الجدد : قواعد بيانات اوراكل ...

بتذكر لمن تخرجنا وجدنا عون كبيرر من الزملاء السابقين لنا ...
كتر الله خيرهم ...
وصراحة خريجي مدرسة العلوم الرياضية (اسكول) بجامعة الخرطوم عندهم تماسك كبير مع بعض ...
بمختلف اشرابهم واتجاهاتهم ..
لرد الدين محاولة للأستفادة من موقع كل السودانين واسع الانتشار سودانيز اون لاين ...
سوف احاول اضع شرح لقواعد البيانات اوراكل وذلك حسب وقتي المتاح ..
اتمنى ان يستفيدو منه خريجي الكمبيوتر ...

المفهوم لقاعدة البيانات :
مكان لتخزين بيانات يمكن الاستفادة منها لجهة ما ..
تكوينها البسيط من
- حقول Fields
- سجلات Records
مثال :
سجل الطالب يتكون من الحقول التالية:
رقمه المميز..
اسمه ..
عمره ..
رمز الكلية ..
تاريخ تسجيله بالكلية ..

قاعدة بيانات الطلاب هي عبارة عن مجموع سجلات الطلاب ..

المراجع التي سوف اخذ منها :
- Oracle Database 10g:Administration
- مقدمة قواعد البيانات اوراكل (المؤسسة العامة للتعليم المهني والفني )
بالمملكة العربية السعودية ..

ولو رايت اي مراجع مهمة ممكن الاخذ منها سوف ندرجها لاحقاًباذنه تعالى ..

المراجع التي سوف اخذ منها :
- Oracle Database 10g:Administration
- مقدمة قواعد البيانات اوراكل (المؤسسة العامة للتعليم المهني والفني )
بالمملكة العربية السعودية ..

ولو رايت اي مراجع مهمة ممكن الاخذ منها سوف ندرجها لاحقاًباذنه تعالى ..

العزيز حمودة
تحية طيبة
موضوع مهم للخريجين الجدد احسنت الاختيار
انشاء الله نساهم معاك

عبده عبدا لحميد جاد الله

Quote: العزيز حمودة تحية طيبة موضوع مهم للخريجين الجدد احسنت الاختيار انشاء الله نساهم معاك

والله مساهمتك ح تكون اضافة حقيقية أخوي عبده ...
ياريت يسمح وقتك..والله وجود خبراء مثلك سوف يساعد الخريجين كتيرر..
منتظرنك ..

أنظمة إدارة قواعد البيانات (Database Mangement System (DBMS:

وهي عبارة انظمة لإدارة قواعد البيانات ،وهي مصممة لتخزين اليبانات في قواعد البيانات ومعالجتها واسترجاعها بطريقة سهلة ..

موضوع مهم ومطلوب وتشكر عليه
لو وجد من هم يحتاجونه من الاعضاء او المتصفحين
يمكن ان نساهم بما نستطيع اليه سبيلا
مبدئياً كدا اليكم اهم المنتديات العربية المتخصصة في اوراكل


http://www.araboug.org/ib/
http://arabopn.com/vb/
وفيها مواضيع جيدة جداً للمبتدئين

وللتواصل
[email protected]
[email protected]

أنظمة إدارة قواعد البيانات (Database Mangement System (DBMS:
ولها 3 انواع :
1/ الهرمية ..Hierarchical ...
2/ الشبكية ...Network ...
3/ العلائقية ...Relational ...

الأخ محمد :
تحية وإحترام ..
أتمنى في هكذا موضوع ان تكون المداخلات والردودو تخدم الموضوع بعيداً عن ردود المجاملات حتى لا ينقطع حبل الأفكار ..
مبدئياً نحن معاك فهل نتداخل مواصلة أم ننتظر حتى تنتهي وبعد داك يبدا النقاش؟

زول ساكت ..
تشكر لهذه المواقع القيّمة ..واكيد كتير من المتصفحين يحتاجون ويفتقدون من يساعدهم ..

ياريت تكون معنا ..


عمر الفاروق ...
صدقت الموضوع يحتاج تنظيم ...حتى تكون الفائدة مركزة ..
ارى ان نأخذ جزئية جزئية وممكن الناس تساهم فيها ...
وياريت تكون فيها امثلة مصورة حتى توضح الصورة اكثر ..
والتسلسل سوف يكون حسب كتاب اوراكل 10 جي في ادارة قواعد البيانات ..
لو عندك اي اضافات او شرح اضافي ياريت لا تتاخر..
تحياتي ..

الأخ محمد :

Quote: لو عندك اي اضافات او شرح اضافي ياريت لا تتاخر..

حقيقي كنت أتمنى أن يكون الشرح يا ابوحميد عن طريق الراس أكتر من تتبع الكتب لأنه صراحة عندي قناعة إنو الخبرة العملية للزول بتكون ساهلة في توصيل المعلومة أكتر من الكتب ..
ممكن الإستدلال بالكتب ووضع الروابط لكن يفضل كلام التجربة ..
عن نفسي إن شاء الله حا أكون مشارك بس حا أكتب ليك من داقوسي ده والغلط تصلحنا فيهو ..

تمام يا عمر يا اخوي ..
ننتظر كلام داقوسك هههههه..وحقيقي الكلام ممتع ..
والتفاعل حلوو..

لشخص ليس خريج كمبيوتر هل يمكنه المواصلة في هذا الدروس والاستفادة منها
وماهي البرامج المطلوبة في جهاز الكمبيوتر قبل البدء في هذه الدروس
وماهي العلاقة بين الـ sql والاوراكل

بعبارة اخرى هل يمكن البدء بالـ sql حالياوالاستفادة منها فقط كعلم منفصل يمكن ربطه بالاكسس مثلا واذا سنحت الفرصة لاحقا يمكن التحول بعدها للاوراكل....

ولكم التحايا

الأخ الطاهر :

Quote: لشخص ليس خريج كمبيوتر هل يمكنه المواصلة في هذا الدروس والاستفادة منها

مثل هذه البرامج تفيد الأشخاص الذين يعملون في مجالات تحتاجها بيئة عمله كشؤون الموظفين والمستودعات والمحاسبة إضافة لهواة البرمجة عموماً

Quote: وماهي البرامج المطلوبة في جهاز الكمبيوتر قبل البدء في هذه الدروس

اولاً هناك تجهيزات HardWare تتعلق بالمساحة التخزينية وذلك حسب حجم قاعدة البيانات التي ستتعامل معها ولا أتوقع ان الذاكرة أصبحت هاجس سواء القرص الصلب أو الرام ..
نظام تشغيل حسب بيئة المستخدم فيمكن ان تكون إكس بي في حالة الإستخدام الشخصي أو الويندوز سيرفر في حال الشبكة ..

Quote: وماهي العلاقة بين الـ sql والاوراكل

ال SQL هي إختصار Standard Query Language وفي بعض الأحيان تسمى الٍهيكلية وببساطة شديدة هي لغة الإستعلامات أو الإستفسارات القياسية ..
وعشان اقرب ليك الفهم حا أقول ليك مش في هيئة قياس عالمية إسمها ال ISO اها كمان ناس SQL ديل عملوا الشركة دي وقالوا لي أي بني ادم عايز تكتب لغة إستفسار لازم تتقييد بي أوامرنا مثلا للإسترجاع تكت SELECT وللتعديل تكتب UPDATE وهكذا ..
لكن أدوك فرصة تطوير اللغة وتضيف حاجاتك من دوال ومن طرق إستخدام البروسيدير والتريجر والفنكشن وووو مما سيأتي شرحه لاحقا بواسطة الاخ محمد أو نحن ..
والعلاقة يا سيدي إنو ناس أوركل دخلوا مجال قواعد البيانات فكان لابد من إستخدام اللغة القياسية أولاً وبعد داك وضعو بصماتهم ..
بالمناسبة يمكن إستخدام SQL مع الفيجوال بيسك والأكسس والدلفي ومعظم لغات البرمجة ..
وعشان الفهم يوضح أكتر إتخييل ال SQL دي زي العربات !! مش كلها عندها حاجات مشتركة من لساتك ودريكسون وتعشيقة ووو لكن بعد داك كل شركة بتعمل حاجات في عربيتها ؟؟؟أها ال SQL دي كده ..

Quote: بعبارة اخرى هل يمكن البدء بالـ sql حالياوالاستفادة منها فقط كعلم منفصل يمكن ربطه بالاكسس مثلا واذا سنحت الفرصة لاحقا يمكن التحول بعدها للاوراكل....

انت كده بديت صاح ..وخشيت الشبكة

تخريمة :
ما تعتمد على كلامي ده كتير سمح ؟

Quote: اولاً هناك تجهيزات HardWare تتعلق بالمساحة التخزينية وذلك حسب حجم قاعدة البيانات التي ستتعامل معها ولا أتوقع ان الذاكرة أصبحت هاجس سواء القرص الصلب أو الرام .. نظام تشغيل حسب بيئة المستخدم فيمكن ان تكون إكس بي في حالة الإستخدام الشخصي أو الويندوز سيرفر في حال الشبكة

بالاضافة الى كلام الفاروق الطالع من داقوسة مباشرة
فعليك بعد الايفاء بالمتطلبات عالية
تثبيت قاعدة بيانات مناسبة وللاستخدا م التعليمي توجد قاعدة بيانات خفيفة وسهلة التعامل
oracle database 10 g express edition
يمكن ربطها على ديفلوبر
6i و 10g
وطريقة عمل خطوات التسطيب( setup) متوفرة
طبعاً من المهم التعرف على مفاهيم قواعد البيانات(لمن لايعرف) وهي مابدأ به الاخ حمودة
ثم التعامل مع لغة sql وذلك من خلال sql plus
ويمكن في مراحل متقدمة التعامل مع البرامج الماعدة التي تفي بنفس الغرض مثل
TOAD وPLSQL DEVELOPER
جدير بالذكر ان هنالك عدة مسارات للدراسة المتقمة في اوراكل منها
مسار مطور برامج اوراكل ORACLE DEVELOPER
مسار مدير قاعدة البيانات DATA BASE ADMINISTRATOR
مسار مستشار تطبيقات APPLICATION CONSULTANT وهذا حسب التخصص مالي او موارد بشريه او انتاج الخ
وهي مرتبطة بشكل اساسي مع Oracle E-Business Suite
من الافضل للمبتديء تحديد التراك الذي يرغب في دراسته ومن ثم العمل في مجاله
ويمكن للأساتذة الافاضة في الموضوع

الطاهر عثمان ان شاء الله عمر الفاروق روى عطشك ..
اسئلتك كويسة ..
اوراكل عالم لوحده ..
لذا تجد مافي حد مغطيه كله ..
به عدة تخصصات ..
وللأن متخصصي اوراكل لهم وضعية خاصة بالسوق ..
واسعارهم عالية ...
واوراكل عندها شهادات مهنية خاصة بها ..
ياريت يا عمر الفاروق لاتبعد ..
بجد طريقتك ممتعة للشرح ..

الاخوان عمر الفاروق ومحمد إبراهيم

والله ياعمر الفاروق ما قصرته ياريت لوكان قرونا زي شرحك ده كان دخلته سكول من اوسع ابوابها

والله ياحبيب انا قررت قبل كده ابدا فعلا في الـ sql لاني شفته فوائدها عندنا في الشغل وعندنا هندي في قسم الكمبيوتر ماشاء الله عليه يدخل الداتابيز (انا شغال في مستشفى) وتقوليه عايز لبن العصفور يجيبه ليك ... يعني اشياء انت تتخيل انها ممكن تتعمل وتحس بانها صعبة وبانك بتحلم فبكل سهولة يقدمه ليك علي طبق وبل يعمل ليك فورم اشان ما تجننه كل مرة وتطلب نفس المعلومات براك...

وعلي الجانب الاخر عندنا برضو متخصص في ارواكل باكستاني برضو ممتاز جدا المهم انا عجبتني الحاجه دي جدا ونفسي اتعلم علي الاقل اساسيات الـ SQL معاكم هنا ...

بعرف كويس في الكمبيوتر وعندي MCP رغم اني ما خريج كمبيوتر وعندي رغبة قوية اتعلم اي حاجه في الكمبيوتر واتخصص فيها ومشكلتنا نحنا السودانيين عدم التخصص فتلقه بتعرف جزء في التصميم وشوية في البرامج التطبيقية وحبة هاردوير مع خلطة فيجوال بيسك ...

فانا قاعد معاكم هنا في مقام التلميذ في الصف الأول اشان اسمع واعاين كويس

ولكم التحايا والتقدير

تحياتي يا شباب وشكرا للمعلومات القيمة ..
معليش عندي تخريمة شوية عن الموضوع
كتب الأخ الطاهر :

Quote: والله ياعمر الفاروق ما قصرته ياريت لوكان قرونا زي شرحك ده كان دخلته سكول من اوسع ابوابها

سكول دي في جامعة الخرطوم - مكان النرجسة والتعالي
يعني كانت أمنيتك دخول الجميلة ومستحيلة .. بس الظروف ما سمحت ..
نحن هناك شن قلنا؟

آسف يا شباب للخروج عن الموضوع .. ويا الطاهر just kidding

زول ساكت كلام تمام ..
عمر الفاروق والله داقوسك حلوو..
الطاهر عثمان اهتمامك وطموحك يشجعنا ...
يا ابراهيم يا هندسة اسعدتنا بالمرور ..بس عليك الله الطاهر دا ابعد عنه هسي هو في حمايتنا..
وما تنسى الفراعة بيتنا التاني ..ولا نسيت يا فردة..
يا جماعة ح افتح بوست لتعليم ال sql
ياريت تشاركو فيه ..
بس يكون ٍاس كيو أل
ونخلي هنا الداتا بيس ..
اظهرو بي هناك يا شباب ..

ابراهيم محمد الحسن

LOOOL بالله انته بجاي ... الواحد ما يعرف يعبر معاك

يازول اسه انا تحت حماية الزعماء

اخوي محمد ابراهيم فتحت البوست بي وين

يالطاهر امشى لف كمان ببوست الا س كيو ال ..
سودانيز اون لاين التعليمية للخريجين الجدد:شرح لغة الSQLبمفهوم اوراكل

ياريت تتابع فيهو ..
وخت اسئلتك المفيدة ..

أها يا شباب حا أواصل ليكم من داقوسي وزي ما قلت ليكم ده حسب فهمي فبالله ما تعصروا علي شديد
والراس براهو كبير فما تزيدوهو وخلوهو كده عشان ناوي أشتري عمّة ..

نرجع للموضوع بتاع قاعدة البيانات ده ويا الطاهر حا أديك مفهوم مبسط حسب فهمي :
انا دائماً بشبه التعامل مع قاعدة البيانات زي البنايات وعلى هذا الأساس وعشان أقرب ليك الفهم حا أعمل ليك مقارنة وانت تقيس عليها ..
مش عندنا في العقارات يقولوا ليك يتم الان طرح مخطط للبيع ؟
المخطط ده مش عبارة عن قطعة كبييييرة وفاضية بتجي تقسما إنت بعدين ؟
أها أول حاجة لازم تعرف إنو في حاجة إسمها الSchemma أو مخطط قواعد البيانات وده الأرض الحا تبني فيها ؟
مش المخطط ده بتبني فيهو أكتر من بناية ؟ أها البناية أو المبنى المقصود ده بسنميوهو قاعدة البيانات DataBase وعليه يمكن أن يحوي المخطط أكتر من قاعدة بيانات كما مخطط الأرض فيهو أكتر من مبنى ..
يعني ممكن تعمل قاعدة بيانات للموظفين وقاعدة بيانات لي مخازن وقاعدة بيانات محاسبة وووو
أها يلا مش البناية دي جواها بتعمل ليك شقق ؟؟
اها قاعدة البيانات توجد داخلها شقق بنسميها الكائنات Objects ولعل شهر كائن فيها هو الجدول Table اللي هو (أكبر شقة تلاتة غرف وصالة وحمامين )إضافة لكائنات أخرى زي الفهارس Index القوادح Triger والدوال والإجراءات Procedure & Function
اها يلا مش الشقة دي جواها بيكون في غرف ؟ أها يلا الكائن الجدول ده جواهو في حقول بنسميها ال Field وهو المخزن الحا أخزن فيهو حاجاتي ولازم طبعا يكون بيلائم نوع الحاجات فمثلا المطبخ بخت فيهو عدة المطبخ والمجلس طقم المجلس وما أظن في زول بيخت ليهو عنقريب في الحمام أها الحقل الرقم للارقام والحرف للحروف وووو
أها يلا مش الغرفة دي جواها بيكون في عفش؟
العفش ده نحن بنسميهو البيانات Data ومجموع بيانات حقول في صف واحد بنسميها سجل Record وعليه وبكل بساطة حا نعرف إنو الجدول ما هو إلا عبارة عن صفوف تسمى سجلات Records أو حقول تسمى Feilds

غايتو ده شرح مبسط حسب فهمي البسييط وإن شاء الله يقع ليك ولو عندك سؤال بالله أسألني بي الدارجي يعني قول لي أها مثلا الملايات دي شنو وممكن اشتري معالق ؟

يامعلم

Quote: (أكبر شقة تلاتة غرف وصالة وحمامين )

يعني لو خليتا اربعة غرف كان حتفرق معاك شنو؟؟؟







قلنا نرفع البوست

عمر الفاروق الله يفتح عليك شقيق ما تقبل

ياخي والله انت مبدع شرح: يازول فكر تمسك ليك مجموعة علي المسنجر والمسنجر الواحد بنقاطة يتم الاتفاق عليها لاحقاً...

انت عارف بالطريقة دي حنحتاج مترجم بعدين اشان الواحد لو اتلخبط حيرجع يقوليك ياعمر ياخي العفش ده كتير علي البناية دي انا خايفه تقوم تقع...

انا معاكم ومتابع وراي يتم ترقيم الدروس اشان لو جاء زول من جديد يعرف يبدا من وين

وعندي كمان تاني فكرة ... طالما انتو ماشاء الله عليكم كلكم كده ارواكل و sql يتم إنشاء قاعدة بيانات بها معلومات الاتصال بكم وممكن تفيدوا بعض لو في واحد منكم بيبحث عن عمل وكفكرة مستقبلية يمكن انشاء موقع للاوراكل السودانيين...

ولكم التحايا والتقدير جميعاً

Quote: يعني لو خليتا اربعة غرف كان حتفرق معاك شنو؟؟؟

بكل بساطة كان ال Trigger بتاع On Update إشتغل وفي زول شال عفشو وعمل ليهو Insert Into Shigga Where city = 'Malaz'

ياعمر الفاروق
هاك الكود الكامل

CREATE OR REPLACE TRIGGER RAHOOL
After update ON ACCOMMODATION For each row
Declare
;V_SHAGA VILLA%type
Begin
If
PRICE<= 20000
;AND CITY = 'AMALZ' THEN insert FAMILY
Elsif PRICE> 20000
THEN CALL FRIEND FOR HELP
;'WHERE FRIEND='FAROUG
ELSE
;(ما اكثر الاخوان حين تعدهم لكنهم في النائبات قليل)DBMS_OUTPUT.PUT_LINE
;END IF
End;

The update trigger is fantastic and funny

wesamm

Quote: The update trigger is fantastic and funny

اخونا وسام
ياخ حبابك الف وبركة ال trigger العجبك
ويظهر انك ضلييييييييييع في ال coding

يلالا يدك معانا

يا شباب دا كتاب الكتروني (PDF) رفعته على 4shared
عبارة عن مقدمة في اوراكل(SQL) ولو في زول عايز المصدر
مستند وورد ممكن يراسلني على الـ E-mail
وما في أي مانع ممكن يجري عليه اي تعديلات ويعيد نشره
الرابط: SQL Notes

E-Mail: [email protected]

تحياتي

Quote: يا شباب دا كتاب الكتروني (PDF) رفعته على 4shared عبارة عن مقدمة في اوراكل(SQL) ولو في زول عايز المصدر مستند وورد ممكن يراسلني على الـ E-mail وما في أي مانع ممكن يجري عليه اي تعديلات ويعيد نشره الرابط: SQL Notes E-Mail: [email protected] تحياتي

الاخ عبده
قمت بالاطلاع على المذكرة القيمة
وبها مجهود مقدر وانصح الاخوة
بتحميلهامن الموقع لفائدتها الكبيرة في ترسيخ
مفاهيم قواعد البيانات اوراكل
وجزاك الله الف خير ياخي

زولنا الما ساكت :
أول حاجة أعيب على هذا ال Trigger خطأ برمجي ربما يعلّق بالبرنامج
وهو تعمدك لعدم وضع ال Exception Handler في حال حدوث خطأ
عليه نرجو التعديل:
CREATE OR REPLACE TRIGGER RAHOOL
After update ON ACCOMMODATION For each row
Declare
;V_SHAGA VILLA%type
Begin
If
BRISE <= 20000
;AND CITY = 'AMALZ' THEN insert FAMILY
Elsif BRISE > 20000
THEN CALL FRIEND FOR HELP
;'WHERE FRIEND='FAROUG
ELSE
;(ما اكثر الاخوان حين تعدهم لكنهم في النائبات قليل)DBMS_OUTPUT.PUT_LINE
Exception:
If Shigga Not Found The
;(عفواً المبلغ لا يغطي تكلفة الإيجار)DBMS_OUTPUT.PUT_LINE
Else:
;(يا ابو مرووووووووووة )DBMS_OUTPUT.PUT_LINE


;END IF

ُ
End

Quote: الاخ عبده قمت بالاطلاع على المذكرة القيمة وبها مجهود مقدر وانصح الاخوة بتحميلهامن الموقع لفائدتها الكبيرة في ترسيخ مفاهيم قواعد البيانات اوراكل وجزاك الله الف خير ياخي

شكراً العزيز زول ساكت
بالرغم من انها تحتاج الى بعض التحديث
نتمنى ان نجد الوقت لذلك،اقتراحتكم نتعلم منها
ونفيد القراء.

تحياتي

تسلم يا ابو إبراهيم
وفقت في هذا الموضوع
فهو غاية الأهمية
وخاصة للخريجين الجدد
وكذلك القدامى والهواة
وفعلا يكون سودانيز اون لاين
موقع لكل السودانيين
يشاركهم افراحهم واتراحهم
وحتى اكاديمياتهم
بمجهوداتكم
ومجهودات كل من يملك علم
ودمت

ودا كتاب oracle 9i بالعربي رائع جداً
ياشباب لو في زول عنده مشكلة في الرابط
ممكن يراسلني على e-mail
الرابط : Oracle 9i بالعربي

ياشباب ملاحظة
او قل نقطة نظام

الموضوع على اهميته لم يحظى بتداخل من اعضاء المنتدى
او الزوار
ربما لانه موضوع للمختصين
واذا لم يجد هذا الامر من يستفيد منه
فحرام ان يضيع هذا الجهد من غير فائدة

وهذا يقودني لسؤال اتمنى ان اجد له اجابة
ماهو وضع قواعد بيانات اوراكل في سوداننا الحبيب
من ناحية نوعية وعدد الشركات التي تطبق انظمة ارواكل
ومن حيث المعاهد الخاصة والعامة التي تدرس مناهجها

يا زولنا الما ساكت :

Quote: الموضوع على اهميته لم يحظى بتداخل من اعضاء المنتدى او الزوار ربما لانه موضوع للمختصين واذا لم يجد هذا الامر من يستفيد منه فحرام ان يضيع هذا الجهد من غير فائدة

الموضوع زي ما قلت انت متخصص شوية وممكن تلاقي ناس مهتمة وناس ما عندها فيهو نفقة وناس عايزة تتعلم منو ..
وممكن موضوع زي ده يطلع ليك خبرات ودرر من ناس الزول ما كان عارفهم وبس خاتيهم في البورد ده ناس ضحك وونسة ساي ..
أصبر عليهو وغن ما مشى فبرضو تأكد هناك من يتابع من الخارج ..

Quote: وهذا يقودني لسؤال اتمنى ان اجد له اجابة ماهو وضع قواعد بيانات اوراكل في سوداننا الحبيب من ناحية نوعية وعدد الشركات التي تطبق انظمة ارواكل ومن حيث المعاهد الخاصة والعامة التي تدرس مناهجها

الأوراكل ضارب السوق في السودان لكن زي ما عارف فموضوع الحظر الأمريكي على السودان يمنع التداول بصورة رسمية ..
بالمناسبة موضوع الحظر ده اكتر ناس متكويين منو ناس الكمبيوتر وفي جميع المجالات في الاتصال والبرمجة والاجهزة وحت الشهادات الدولية ..

نشكر وسام للمرور ..خليك معانا ..

يا مراحب بالخبير اسامة ادريس (الزعيم)..
اتمنى وقتك يسمح تشاركنا ...
...
عبده عبد الحميد يا غالي الروابط جد مفيدة ..وننتظرك اكتر ..

..
زول ساكت وعمر الفاروق....
تعالو نبدأ بشرح عام عن مكونات قاعدة البيانات..
وبعديها ننتقل التنزيل (Instalition)..وهكذا نتابع جزء جزء حتى نركز ...
قلتو شنو ..

يا ابوحميد :

Quote: تعالو نبدأ بشرح عام عن مكونات قاعدة البيانات.. وبعديها ننتقل التنزيل (Instalition)..وهكذا نتابع جزء جزء حتى نركز ... قلتو شنو ..

كلامك صاح يا زعيم ..
بالجد الواحد عايز يسيطر على البوست لكن تعرف من الصعب جدا تمشي خطوة بخطوة في ظل المداخلات المختلفة فانا ما عارف هل نقوم نقيف ونخليك تواصل ولا يتحدد Topic معين والناس تدلو بدلوها ولحدي ما يخلص نشوف البعدو ..
تسلم يا زعيم والكورة في ملعبك ونحن معاك..

عمر الفاروق

Quote: كلامك صاح يا زعيم .. بالجد الواحد عايز يسيطر على البوست لكن تعرف من الصعب جدا تمشي خطوة بخطوة في ظل المداخلات المختلفة فانا ما عارف هل نقوم نقيف ونخليك تواصل ولا يتحدد Topic معين والناس تدلو بدلوها ولحدي ما يخلص نشوف البعدو .. تسلم يا زعيم والكورة في ملعبك ونحن معاك..

والله اسلوبك في الشرح سحرني عمر الفاروق...
ياريت تتجه لمجال التدريب ...فهو مجال يدر ذهب ..
التوبك الاول هو شرح مكونات قاعدة البيانات ...
DATABASE ARCHITECTURE

ولنبدأ ...
كل يشرح بطريقته ..
واكيد الناس ح تجد ما يناسبها ...
والشرح من داقوس عمر الفاروق ...

حاولته ارد علي عمر الفاروق وجات مداخلتي بعد مشاركته ولكن يبدو انكم لم تروها

المهم هاهي المداخلة ولكم التحايا:

عمر الفاروق الله يفتح عليك شقيق ما تقبل

ياخي والله انت مبدع شرح: يازول فكر تمسك ليك مجموعة علي المسنجر والمسنجر الواحد بنقاطة يتم الاتفاق عليها لاحقاً...

انت عارف بالطريقة دي حنحتاج مترجم بعدين اشان الواحد لو اتلخبط حيرجع يقوليك ياعمر ياخي العفش ده كتير علي البناية دي انا خايفه تقوم تقع...

انا معاكم ومتابع وراي يتم ترقيم الدروس اشان لو جاء زول من جديد يعرف يبدا من وين

وعندي كمان تاني فكرة ... طالما انتو ماشاء الله عليكم كلكم كده ارواكل و sql يتم إنشاء قاعدة بيانات بها معلومات الاتصال بكم وممكن تفيدوا بعض لو في واحد منكم بيبحث عن عمل وكفكرة مستقبلية يمكن انشاء موقع للاوراكل السودانيين...

ولكم التحايا والتقدير جميعاً

ياابوحميد

Quote: والله اسلوبك في الشرح سحرني عمر الفاروق... ياريت تتجه لمجال التدريب ...فهو مجال يدر ذهب ..

وياالطاهر

Quote: ياخي والله انت مبدع شرح يازول فكر تمسك ليك مجموعة علي المسنجر والمسنجر الواحد بنقاطة يتم الاتفاق عليها لاحقاً

ياخ الزول براهو راسو كبير ومصلع بالطريقة بتضيعونا
نحنا بناخد دروس مجاني
يقوم يشخت لينا ويعمل فيها
ارخميدس

ابدأ ياعمر ابدأ

يا زول :
والله إتجهجهت وشايف زي في بوستين فما عارف نشوت على وين فهل المتابعة بي هنا ولا بهناك ولا فهمكم شنو
متابعين معاكم..
تخريمة :
ما تعصر علي شديد إمكن الفي داقوسي كملت

عمر الفاروق

Quote: يا زول : والله إتجهجهت وشايف زي في بوستين فما عارف نشوت على وين فهل المتابعة بي هنا ولا بهناك ولا فهمكم شنو متابعين معاكم.. تخريمة : ما تعصر علي شديد إمكن الفي داقوسي كملت

شنو يا عمر الفاروق ..
انت واخونا زول ساكت ...
والبروف عبده عبد الحميد ..
وينكم ..