المقترح (ُمعدل) يا بكري أبوبكر /وباقي الزملاء/ات

قدمت مقترحاً بالأمس يلتمس من الأعضاء بالمنبر التوقف عن الكتابة في منبر سودانيز أونلاين لمدة يوم واحد تهدئةً للخواطر ووقفة مع النفس وضبط لها حتى يخلو المنبر من المشاحنات الشخصية التي شهدها موخراً ، وقد قلنا أن هذا المقترح لايهدف الى إضعاف الموقع بقدر ما يهدف الى تعزيزه وتقويته وقلنا ان المقترح لا يهدف لتجريم المختلفين او تبرئتهم بقدر ما يهدف لإستكشاف الأشياء التي تجمعنا على قلتها وأهميتها ولكن
ربما أستشعر الأخ بكري ابوبكر مقترحنا ذلك على أن فيه ضرر سيلحق بالموقع اذا توقف الأعضاء عن الكتابة لمدة يوم ، وقام بحذف البوست مع أنه لو وضح لنا ذلك لتنازلنا عن مقترحنا طوعاً وإختياراً فلا حاجة لنا في مقترح يضعف الموقع ، عليه قمت بتعديل مقترحي للتالي :-
أن تقتصر كتابة الأعضاء في اليوم المحدد على بوست واحد (يجترحه) بكري أبو بكر بينما نتوقف نحن كأعضاء عن الكتابة لمدة يوم واحد في البوستات الاخرى ، وبذلك نكون قد تجنبنا مغبة قلة (الكلكات) التي يخشاها بكري كنتيجة لتفعيل المقترح ( أو هكذا حسبنا)
أها رائكم شنو يا جماعة ورائك شنو يا بكري في مقترحي الجديد دا

تخريمة:
في هذه السانحة اشكر الإخوة الطاهر عثمان ، محمد إي سليمان ، تولوس ، محمد سليمان ، عبداللطيف السيدح على مشاركتهم في ذلك البوست وكنت قد كتبت لكل منهم رد منفصل قبل أن تأخذه الشيمة
تحياتي المقيمة وشكراً لكل من يهتم بما نكتب من خطرفات ، ولكن قالوا الكحة ولا صمة الخشم
Siddike(AT)yahoo.com

دفرة

Quote: قدمت مقترحاً بالأمس يلتمس من الأعضاء بالمنبر التوقف عن الكتابة في منبر سودانيز أونلاين لمدة يوم واحد

الحبيب صديق
كيفنك
اقتراحك دا انا مسوي لي ستة شهور وما فكتيتو الا بالمداخلة دي

Quote: دفرة

قالوا البكاء بحرروا اسيادو
اها فوووووووووووووق
بس والله يا صديق اخوي في ناس كان ما جات هنا يوماتي
تجيهم كاروشة عديل

الشقيق الامين
حمد لله على السلامة والعودة المفرحة ، وياريت لو تجي كل يوم

Quote: بس والله يا صديق اخوي في ناس كان ما جات هنا يوماتي تجيهم كاروشة عديل

أنا واحد من الناس ديل يومي الما أجي بتمسكني كاروشة عديل كدة وبحسد الناس البلقو زمن يخشوا طوالي ويقدروا يردوا على كل المواضيع الجادة ...
وبالمناسبة لا يعني هذا المقترح عدم زيارة الأعضاء والقراء للبوستات ،
سيتم زيارة كل البوستات ، وقرأتها مع الإكتفاء بالمداخلات في البوست الذي سيقوم بكري بفتحه وهذا المقترح فقط هو دليل عملي من أعضاء البورد على إمكانية تبني قرار جماعي (وبرضو ممكن العكس) ، وتوصيل رسالة للمختصمين بضرورة التريث في الكتابة ودعوة للوقف مع النفس وضبطها... لكن برضو كان ما حصل نقول خير
وفي كل خير , وخير دليل على ذلك زيارتك الميمونة وابقى عشرة على وصيتك القلتها ليك ديك

يتخيل لي العنوان ما ظاهر عشان كدة لا بكري ولا أصدقاء الأمس

هو نحن جينا متين عشان نقيف ؟




في شنو ؟

الحبيب لؤي
يا قمراً يشيع من أضوائه الحبور ، ويسحبك من تلافيف الحزن حتى تسافر في مدى العشق وتتعقب فرحاً هارب ، وتسكن كلماتك حافة قلمٍ وغبطة تهتز بالنشوى وتعج بالأفكار
يا زول بجيتك دي والله البورد نور كلو زينة ...
وبالنسبة للمقترح فهو يهدف لظهور امثالك لانو انت غيبتا من هنا فترة طويلة وأكيد بسببك ربما إستياء من بعض التصرفات في البورد أو ربما ظروفك الخاصة .. ولذلك نحن علينا أن نجترح حلول جماعية تقرب أمثالكم منا وتجنبنا بعد أمثالك ...
أقيف معانا ساعتين تلاتة وللا يدك ماكلاك ؟؟؟

العزيز صديق..

سلامات وتحايا..

تعرف أمبارح كتبت مشاركتي تمام التمام. ولما عملت إرسال جاتني صفحة بكري الما بتغباني..

حأرجع ليك للمقترح الجديد.
ولازم الجميع يطلعوا بحل ينقذ المنبر.

تحاياي

الشقيقة رجاء
المنبر في حاجة لإستحضار مقترحات وتفعيلها من أعضائه ، فالحلول لا تهبط وحدها من السماء
نحن غلبنا النسويهو في سودانا المبشتن بالحروب والظلم لانو ما مشاركين في السلطة وبعيدين جداً عنو بالسنوات / لكن نحن في المنبر دا مشاركين مشاركة أصيلة عشان كدة لازم نضبط نفسنا ، ولا نستسلم لموجة الغضب التي تعترينا....
فالغضب مهم جداً في حياتنا ومحفز جيد لقراراتنا ولكن الغضب وحده لا يكمل المهمة ...
أنتظر عودتك الداعمة ومقترحاتك النيرة وأبقي عشرة على التنفيذ

تخريمة : لؤي دا نعمل ليهو إستثناء عشان الزول دا يدو ماكلاهو شديد الظاهر


معليش بكري حذف البوست أعتبر انو المقترح بينقص عداد المنبر وفي دي معاهو حق لكن برضو التضحية لازمة من اجل واقع جديد .... وهسع عدلنا ليهو المقترح ولم نستسلم لموجة الغضب حينما أكتشفنا إختفاء البوست
والله بيني وبينك اول مرة أعرف حذفة البوست دي حارة كدة لانو أول بوست يتحذف لي ، وليها حق تراجي وحسين ملاسي وبقية الناس لمن يكتبوا بوست بدل فاقد ... قربت أعمل زي صديقنا الغائب في بهائه (عثمان محمد صالح) وأكتب فيرشن ون ، وفيرشن تو ، وفيرشن ثري

معليش التعديل لإضافة مهمة

Quote: والله بيني وبينك اول مرة أعرف حذفة البوست دي حارة كدة لانو أول بوست يتحذف لي

مع انو ما شفنا البوست المذكور (قصدي المرحوم)

لكن انشاء الله يكون آخر بوست يتحذف

الشقيقة انعام
لو صح هذا المكان وضبط الناس مشاعرهم الى حدٍ ما ، فلن يكون بكري في حاجة لحذف البوستات
وحتى حذف البوستات ليس حلاً بل هو محفز لإنتشار الغضب وردة الفعل التي جعلت هذا المكان يغلي كالمرجل ...
نعم هناك قضايا شاخنة ، ومعارك دامية تشهدها بلادنا ... وهناك مرارات تشفق من حملها الجبال لكن في النهاية التحدي الكبير هو كيف نحافظ على ما يربطنا في هذا المكان ، وكيف نحافظ على ما يجمعنا لا مايفرقنا ... فما يجمعنا رغم قلته مقارنةً مع ما يفرقنا لكنه من الأهمية بمكان .... ويستحق المثابرة للإبقاء عليه حتى في أحلك الظروف ...
تضامننا في وجه الطغاة ، وفي وجه التحديات الكبيرة في دافور والشرق والشمال والجنوب أهم من الإختصام الفردي مهما كان حجم الفائز او الخاسر في معارك فردية ...
كلنا أبناء هذا الوطن الذي على شفاء حفرة من الضياع
فعلاً إن شاء الله يكون أخر بوست يتحذف لاي واحد في هذا المكان مع انو بكوري دا مامضمون

.
.
.

الحبيب صديق تحياتي

طعبا بوست امبارح ما اتشهد
بس جيت ارد كده والقاهو مافي

بكري مفترض يجاوب علي سؤال مهم جدا

الكليكات ؟ وله الكواليتي ؟

وبالاجابة بنكون علي الاقل فهمنا ما يحدث

لك التحية والود

Quote: بكري مفترض يجاوب علي سؤال مهم جدا الكليكات ؟ وله الكواليتي ؟

الصديق الطاهر
أنا بفتكر الإقتراح الجديد المعدل بيضمن لبكري الأثنين معاً الى حدٍ ما ...
يعني كليكات وكوليتي دي ما مولد عديل كدة ...

أنت في البوست الفات أقترحت يوم 20/إبريل وانا قلت ليك الموعد دا بعيد لكن برضو عاوزين إقتراحاتكم وإقتراحات الشباب بخصوص اليوم والكيفية
تحياتي للشباب يا طاهر

.

.

اي مقترح من صديق الجميل مثنى من دون اي تردد او تفكير

الكسلاوي عمر الفاروق
حبابك عشرة بلا كشرة ووينك مسجل غياب ؟؟؟
شكراً للتثنية واتمنى ا، يلقى هذا المقترح حظه من المناقشات والتعاضد
وأتمنى أن نحدد اليوم وأن يدلى بكري أبو بكر بدلوه في هذا الشأن

تحياتي المقيمة ومودتي التي لاتنقطع

Quote: مع انو ما شفنا البوست المذكور (قصدي المرحوم)

ياخي بكري ينفذ احكام الاعدام بدون صك شرعي وبدون اعلان او اصدار بيان توضيحي... نقف مع المقترح الاول ونقبل بالثاني بتحفظ
شكرا يا حاج

وتحية خاصة لانعام

الصديق تولوس
يا زول نحن علينا أن نقدم مقترحاتنا حتى ولو لم تجد الأصغاء والتطبيق
فالبذرة مهما تكون حتبقى يوم شجرة ...
المقترح الاول او الثاني أو مقترح جديد ما فرقت بس المهم الناس تجمع علي حاجة وتطبقها وتكون قدر التحدي
تحياتي

.

Quote: والله بيني وبينك اول مرة أعرف حذفة البوست دي حارة كدة لانو أول بوست يتحذف لي

والله ولاتاخد في بالك ... بس هو أول بوست (محذوف) حار لكن بعد كدا بتسلك ...
أحمد موسى
سوداني (
العمر (43) بوست محذوف

الاخ أحمد موسى
أهو نحن يا داب برالمة في مسألة الحذف دي وبتعلم من خبراتكم في المجال دا
وين مرئياتك عن المقترح بس فالح لي للشماتة
إقتراح عن اليوم ، الكيفية وأي حاجة مفيدة
ولك شكري وتقديري