Post: #1
Title: عناية إدارة قسم الأخبار بقناة الشروق الفضائية... مع قواسيب مودتي...
Author: أبو الحسين
Date: 04-10-2008, 09:30 AM
الإخوة الكرام...
صبحكم الله بالخير والرضا...
من المعروف أن قناة الشروق بدأت ماشاء الله عليها وعيني باردي... هي ونديدتها هارموني... وعكسن وجه مُشرق وجميل للإعلام المُشاهد السوداني... وبيني وبينكم الأخيرة دي كيف قاعد أريدها عشان دمها خفيف ولذييييذة...
أما الشروق وما أدراك ما الشروق... فهي غاصت بكل صدق وأمانة في الوجدان السوداني لسياحتها في كل ربوع السودان تتفقد دا... وتسال من داك... فنسأل الله للقائمين على أمرها التوفيق والصلاح...
بس يا اخواننا المُلفت للنظر... هو المذيعات من الجنسية غير السودانية...
اليوم داك... واحدي فيهِن ذكرت المُوردة... بالمَوَرَّدة!!! وبما إني موردابي كيف أُوجعني دا أكتر من الأحداث المؤسفة الحصلت في المبارأة مع المريخ!!
وأمس واحدي فيهِن ذكرت الأُستاذ/ محمد إبراهيم نُقُد... بالأُستاذ/ محمد إبراهيم نَقَدْ!!! وقلنا يمكن سهت ولة حاجة... ومشت تاني لا قدام وقالت: وعَبًَّر نَقَدْ!!! إنشاء الله يا المذيعة القالت كدي دي... الجدادي التنْقُد عدوك قولي آمين...
فيا ربي الحكايي دي من شنو؟؟؟
ما ممكن يا إدارة الأخبار النشرة دي تراجعوها قبل ما يقرِنها؟؟
للجميع وكل العاملين في قناة الشروق قواسيب مودتي...
أبو الحُسين...
|
Post: #2
Title: Re: عناية إدارة قسم الأخبار بقناة الشروق الفضائية... مع قواسيب مودتي...
Author: الطاهر عثمان
Date: 04-10-2008, 10:15 AM
Parent: #1
| Quote: إنشاء الله يا المذيعة القالت كدي دي... الجدادي التنْقُد عدوك قولي آمين... |
آمين يا ابو الحسين
والله كلامك عين العقل وباسلوب جميل جدا ويموتك من الضحك
لكن اهو علي الاقل في سماحة تعاين فيها لحدي ما يتعودن علي نقد
قبل أيام حضرت حلقة اظن اسمها التحقيق
مذيعة سودانية معروفة لكن ناسي اسمها
مع ضيفة دكتورة برضو نسيت اسمها
عن اطفال الشوارع (الشماشة)
الضيفة كانت زولة هادية ورزينة وكلامها منطقي جدا
المذيعة اصرت انها تغلطها وباسلوب زي اسلوب الزعل داك
وله غيرة ما عارف
وقالت ليها انو منظمة افريكان كوفدينشيال قالت بان عدد المشردين كده
فقامت فيها الدكتورة ونهزرتها ليك جنس نهزرة
ومن اللحظة ديك والمذيعة دي نقرها من الزولة دي
وتسكت وتغالط فيها
وفي الاخر ختمت الحلقة بدون ما تديها فرصة
وقالت رسالتها بانكم شايفين الاهمال الرسمي
وعدم وجود المعلومة ما عنده سند ودليل
بس لانها انفعلت واخدت الموضوع شخصي
شفته يا حبيب البروفيشنالزم ليها اثر كيف
لك الود
|
Post: #3
Title: Re: عناية إدارة قسم الأخبار بقناة الشروق الفضائية... مع قواسيب مودتي...
Author: أبو الحسين
Date: 04-10-2008, 10:23 AM
Parent: #1
| Quote: لكن اهو علي الاقل في سماحة تعاين فيها لحدي ما يتعودن علي نقد |
 يعني الحكايي كدي؟؟
أما نوعية المذيعين اليمسكو الحلقة علي مضيفيهم دي كتيييييييري!!
بس كيف مُوجعاني الرِيسِي!!
|
Post: #4
Title: Re: عناية إدارة قسم الأخبار بقناة الشروق الفضائية... مع قواسيب مودتي...
Author: Shamael Elnoor
Date: 04-10-2008, 10:44 AM
Parent: #3
ابو الحسين
لاحظ عدد من المشاهدين الاخطاء التى يقعن فيها العربيات وتتركز الاخطاء فى نطق الاسماء والمناطق السودانية (السبب واضح طبعا) فهى كلمات سودانية بحتة وهن غير سودانيات لكن لا يبرر الخطأ ، رسالتنا للقائمين على الامر ، التدريب على نطق الكلمات السودانية قبل النشرات ،،
تحياتي
|
Post: #5
Title: Re: عناية إدارة قسم الأخبار بقناة الشروق الفضائية... مع قواسيب مودتي...
Author: أبو الحسين
Date: 04-12-2008, 06:30 AM
Parent: #4
| Quote: رسالتنا للقائمين على الامر ، التدريب على نطق الكلمات السودانية قبل النشرات ،، |
تسلمي شمايل النور...
ولة كمان كان راياً تاني... يخلوهِن يقرِن الأنباء العربية والعالمية... وشبابنا للنشرة الداخلية...
ولة خوفي كمان يقرِن مدينة (الخَرْج) السعودية "الخُرُجْ" زي ما واحد قالو قراها في اللوحة!!!
|
Post: #6
Title: Re: عناية إدارة قسم الأخبار بقناة الشروق الفضائية... مع قواسيب مودتي...
Author: أبو الحسين
Date: 04-13-2008, 11:51 AM
Parent: #1
.
|
|