السودان .. منو السبب في ضياع المنحة ؟

ما عارف

هل نحن شعب حاسد ؟

أم شعب مستهتر ؟

أم شعب لا مبالي ؟

أم شعب كسلان !!

اسمعوا القصة وبعدين .. جاوبوني ..

مشيت لإحدى السفارت بالخرطوم مع صديقي .. الباحث عن منحة دراسية دراسات عليا ..

وطبعاً استقبلونا بكل إحترام .. وإهتمام .. ودي واحدة من الحاجات الفاقدنها نحن كشعب .. ما بنعرف نتعامل مع بعض.. بإحترام ..

إلا لما نكون شغالين مع أجانب !!!

المهم .. سألنا مباشرة عن المنحة ... وبكل تهذيب قعدونا وجابوا لينا واحد .. سوداني .. مسئول من المواضيع دي ..

الراجل أفادنا بإنو فعلاً في منح تقدم للسودانيين ...

لكن ..

المنح بتمشي عن طريق وزارة الخارجية وهي توزعها ... وهم ما عندهم منح مباشرة ... وساعدنا بان أعطانا عناوين كل الجامعات ..

مشينا عديـــــــــــل .. وزارة الخارجية نطالب بفرصة منحة من المنح العندهم ...

وفعلاً قابلنا المسئول من المنح وأفاد إنو أي منح بتصل الوزارة يتم فوراً إبلاغ كل الوزارات بالمنح المتوفرة وآخر موعد للتسجيل.

والتقديم للمنحة لا يتم عن طريق الخارجية مباشرة لكن يتم عن طريق كل وزارة متخصصة بحسب المنح المتوفرة ..

قلنا كويس .. فضلنا ساكين الموضوع .. عشان نعرف التقديم بيتم كيف من الوزارات ..

وهنا .. المغصة ..

عرفنا إنو وزارة الخارجية في كل منحة بتبلغ الوزارات .. والوزارات .. تتلكلك إلى أن ينتهي زمن التقديم للمنحة..

وتضيع المنحة ورا المنحة ... ما بين درج و دولاب وتربيزة .. والعالم دايشة برة في السخانة أو البرد للبحث عن منحةّ!!!


دي واحدة ...


التانية ... مغصتها أكبر ...

صديقي السوداني حصل على منحة عن طريق الإنترنت .. والله وفقو .. وسافر .. وبعد أن كون علاقات مع الجامعة والبروفيسر ..

أخبروه بوجود 3 منح دراسية كاملة لمهندسين مدنيين .. وكلفوهو يجيب ليها ناس من السودان ...

صاحبنا هميم جداً .. لأنو ضاق عناء البحث عن منحة ..

إتصل فوراً بالمؤسسة الحكومية الكان شغال فيها موظف .. وعرض الفرصة عليهم .. بالتأكيد كان التفاعل كبير ...

من المسئول .. وأكد على أنو الاسماء والاوراق سيتم ارسالها (((( قريباً ))))

ولكن قريباً .. جرت .. وتاني إتصل .. وتالت .. وبرضو قريباً ..

بعد ما الوقت داهم صاحبنا قرر أن يبحث بطريقتو الخاصة عن سعيدي الحظ ...

دخل الإنترنت .. موقع واحدة من جامعاتنا العريقة ... وإختار بروفيسر من الجامعة .. شكلو هميم بحسب الصورة..

وإتصل عليهو ((تلفونياً)) وعرفوا بنفسو وعرض عليهو المنح وطلب منو يساعدو عشان يلقى طلاب للمنح ...

وتفاعل .. وهنأ .. و ... وعد ... قريباً تجهز الأوراق .. والشباب جاهزين !!

و برضو تلفون .. ورا تلفون ... والموضوع برضو .. جرا .. و جرا ..

تبقى على الموعد 3 أيام فقط ...

أخيراً صاحبنا قرر ان يتصل بصديق قديم ((عراقي)) مقيم بآسيا ..

وطلب منو يرسل ليهو أوراق 3 أشخاص بمواصفات تلائم المنحة وبحسب الشروط ..

عارفين حصل شنو ؟؟؟

استلم صاحبنا الأوراق في نفس اليوم ... بعد ساعات من الإتصال ..

وقبل إنقضاء المدة .. الإخوة العراقيين سافروا .. والله أداهم منح ..



و عندي كم قصة واقعية ذي دي ...


بعد ده ممكن تجاوبوا ... دي يقولوا عليها شنو ؟؟؟

الأخ خالد فهمى
أولا الف مرحب بك فى المنبر
قبل أكثر من سنتين قابلت وكيل وزاره الخارجيه البولندى ,وأثناء الحديث تطرقت لمسأله المنح الدراسيه ومنح الدراسات العليا البولنديه للطلاب السودانيين ,وأنها توقفت منذ بدايه التسعينات ,وأوضحت له إن لهم موقف من حكومة السودان فهذا شئ يخصهم ولكن المنح يستفيد منها أبناء السودان فى المقام الأول,فرد الهجوم بأن قال أن إرسال منح للسودان ,تقليد درجنا عليه منذ الخمسينات ,والطلاب السودانيون طلاب متميزون وليسوا من مثيروا المشاكل ونفتخر بتقديم منح الدراسه لهم لأنهم أيضا متفوقون وعندمايرجعون إلى بلادهم يكنون خير بطاقه للعريف ببلدنا.وث مقال إن هذه المنح كانت ترسل سنويا للخارجيه السودانيه وهى تعيدها مره أخرى دون إرسال طلاب للإستفاده منها..
وقس على ذلك يا خالد./.

شكراً .. محمد مكي على الترحيب ..

وصدقني موضوع المنح ده .. موضوع يشيب .. أي دولة تسألها حا يقولوا ليك عندنا منح ..

وبنرسلها ليكم .. ولكن وزارة الخارجية .... والخارجية تقول ليك الوزارات الأخرى ..

وناس الوزارات الأخرى شكلهم الموضوع ما جايب حقو بالنسبة ليهم ...

دي حاجة ...

تاني ذي الزول بتاع الجامعة ده .. مالو ؟؟

لاحظ دي بس المنح الضايعة ..

نحن لسة ما إتكلمنا عن المنح التي يتم تقسيمها في البيت .. وتحت الطاولة .

بدون عدل .. وبدون أي مؤهلات .. بس على أساس ده معانا ولا قريبنا ..

وده مع الخيانة .. ومرات الموضوع بحسب المزاج ..

والحال من بعضو كان حكومة .. ولا هيئات .. ولا منظمات مجتمع مدني !!

لكن حسي لو قالوا أي واحد برشح زول لمنحة بنقش ليهو شنبو ..

تاني تلك الخدمات أبو سريع ..

والله نحن ماشين إلى هاوية أخلاقية خطيرة ...

العيب يا أخوي فينا نحن ... وبعد ده عاملين فيها .. أسياد الفهم ..

حاجة عجبة جد
, لكن من تجربتى إتخل لى دى حاجة مشهورين بيها ناس دول العالم الثالث most of them if not all

لو مشيت تقدم لي حاجة عندها ديدلين و زول الادمشن من such ####ries

إتاكد انك لازم تتابعوا بالتلفونات وتستحمل مذاجو المتغير other wise you will miss the deadline

regardless of the institution's policy at your resident country


Noon

شكراً.. نون

نصيحة .. لكل محسوب على دول العالم الثالث ..

ما حك جلدك مثل ظفرك .... فتولى أنت جميع أمرك

وبعد ده إن شاء الله ينفع..

مرات حتى لو تابعت تلاقي ناس هوايتهم معاكسة الناس

ومصيرنا نظل تحت رحمة المزاجات المتقلبة

سؤال .. أسأله لنفسك ..

إذا جاتك فرصة الآن لترشيح 3 لمنحة دراسية بخارج السودان ..

حا تعمل شنو ؟؟؟؟

ودرجة تجاوبك حا تكون كيف ؟؟؟؟

وهل حا تلاقي تفاعل ؟؟؟

ولو ما لقيت تفاعل من اول مرة حا تعمل شنو ؟؟

جاوب على نفسك عشان نعرف المشكلة في المسئولين ولا في الشعب كلو ؟؟؟