Post: #1
Title: لقاء مع ..(بائعة شمار)
Author: صلاح أبودية
Date: 04-06-2008, 06:28 PM
Parent: #0
المقصود هنا بالشمار الكلام أو القوالة أو الأخبار المهمة فكان لنا عظيم الشرف بإجراء هذا الحوار مع أول بائعة شمار فقد عرف الجميع بائعات الشاى وبائعات الفول وحتى بائعات اللبن والهوى ولكن تجارة الشمار ؟
فى البدء لم أصدق الأمر أخبرتنى زوجتى شمارياً أن فلانة تبيع الشمار وصدمت من هول المفاجاة ، كيف ذلك ؟ وأقسمت بالله أن فلانة هذه تبيع الشمارات عديل كده بالقروش ، يبدو أن لزوجتى تجربة خاصة معها.
حملت قلمى ووريقات وذهبت لمقابلة فلانة بائعة الشمار وكان هذا اللقاء العجيب!!!!
أنا : السلام عليكم.
هى : وعليكم السلام ، خبرك؟
أنا : ما عندى خبر ، خبرى إنتى.. أنا جاى أعمل معاك لقاء.
هى : لقاء شنو؟ ملح ساى ول بقروش؟
أنا : بقروش ما ملح عاوزة كم؟
هى : لم ننتهى... قول..
أنا : سمعت إنك بتبيعى الشمارات للنسوان صحى الكلام ده؟
هى : لا ما صحى أنا ببيع للنسوان وللرجال كمان.
أنا : طيب ليه مش كده حرام تبيع وتشترى فى أعراض الناس؟
هى : والله أنا كنت فى حالى مستورة ومتزوجة وساكته ساكت بس إطلقت وقالوا كده ولموا فينا خلق الله وقالوا فينى جنس كلام !
أنا : يعنى أنتى بتنتقمى من الناس ؟
هى : فى البداية بس لكن هسى ما عندى غرض فى زول المهم أقبض وبس.
أنا : طيب إنتى بتجيبى الشمارات دى من وين؟
هى : بشتريها .
وهذه مفاجاة ثانية يعنى الموضوع تجارة رسمية
أنا : من وين بتشترى الشمارات ؟
هى : من ناس الحلة .
أنا : وكم تدفعى؟
هى : والله فى شمارات غالية شديد وفى شمارات بالمقايضة وفى شمارات ما جايبة تعبها .
أنا : الشمارات الغالية دى زى شنو كده؟
هى : والله أغلى شمار زواج المرة التانية وبعديهو طوالى شمار الطلاق.
أنا : لا حول ولا قوة إلا بالله وشمارات المقايضة دى زى شنو؟
هى : يعنى مثلاً فلانة راجلها رفدوا وفلان ماشى دبى وفلانة بتتسلف من بتاع الدكان وكده وناس فلان دايرين يبيعوا بيتم.
أنا : والرجال بشتروا ياتو شمار؟
هى : والله الرجال ديل همهم فى أكل عيشم الترقية والعلاوات والرفت وكده.
أنا : ودى إنتى بتجيبيها من وين؟
هى : بشتريها من الكتبة بتاعين الوزارات والسكرتيرات.
أنا : والشباب من الجنسين نصيبهم شنو ؟
هى : والله البنات دايرين العرس قولت فى عريس دى بتعشى عديييل.
أنا : والأولاد؟
هى : والله كلو واحد حسب طلبوا واحد عاوز يسافر السعودية وواحد عاوز يمشى ألمانيا ووحد عاوز يسجل فى المريخ .. زى ده كان جبت ليهو سيرة جمال الوالى ساى بديك العندو كلها.
أنا : كلو تجارة عندها موسم إنتى موسمك الحار متين؟
هى : أنا والله السنة كلها موسم بس بتعب شوية فى رمضان.
أنا : ليه بتتعبى فى رمضان؟
هى : والله الناس بتكون صايمة وما عندها حيل للكلام.
أنا : بس عشان كده ول عشان ده شهر كريم والناس ما بتحب تجرح صيامها؟
هى : لا والله بس بكونوا تعبانين وما قادرين يتكلموا من العطش والجوع لكن بالجد شمار العيد حار.
أنا : العيد كمان فيهو شمار؟
هى : كيف ... من ثبوت الرؤية لغاية الخبيزوهدوم العيد دى كلها شمارات.
ثم فاجأتنى بالسؤال :
هى : أسمع إنت القال ليك أنا ببيع الشمار منو؟
أنا : تدفعى كم؟
|
Post: #2
Title: Re: لقاء مع ..(بائعة شمار)
Author: انعام عبد الحفيظ
Date: 04-06-2008, 08:52 PM
Parent: #1
Quote: هى : أسمع إنت القال ليك أنا ببيع الشمار منو؟
أنا : تدفعى كم؟
|
تحياتي للمدام لأني بعرفها ودا شمار حاااااار
اها تدفع كم؟ 
لي عودة تانية للحديث
|
Post: #5
Title: Re: لقاء مع ..(بائعة شمار)
Author: صلاح أبودية
Date: 04-07-2008, 07:57 AM
Parent: #2
Quote: تحياتي للمدام لأني بعرفها ودا شمار حاااااار
اها تدفع كم؟ |
قالت عرفتك وقالت ليك القروش الشلتيها منها وين؟
|
Post: #3
Title: Re: لقاء مع ..(بائعة شمار)
Author: ناهد بشير الطيب
Date: 04-06-2008, 09:38 PM
Parent: #1
اخونا صلاح
الشمار منشط للدوره الدمويه ...
وبشيل اللوايه
وبشيل المغص ...والالتهابات
والعجب لو اكلته بالذبادى والملح
انعام
وجع الضرس كيف
|
Post: #4
Title: Re: لقاء مع ..(بائعة شمار)
Author: انعام عبد الحفيظ
Date: 04-06-2008, 09:44 PM
Parent: #3
Quote: انعام
وجع الضرس كيف |
ناهد انتي الشمار ما وصلك ولا شنو؟
اها النديك شمارو مجاني الضرس انا قلعتو ياخ
|
Post: #6
Title: Re: لقاء مع ..(بائعة شمار)
Author: صلاح أبودية
Date: 04-07-2008, 08:02 AM
Parent: #3
Quote: الشمار منشط للدوره الدمويه ...
وبشيل اللوايه
وبشيل المغص ...والالتهابات
والعجب لو اكلته بالذبادى والملح |
كم جرام الشمارول بتاعك ده؟
|
Post: #7
Title: Re: لقاء مع ..(بائعة شمار)
Author: عزام حسن فرح
Date: 04-07-2008, 08:11 AM
Parent: #1
ما بخليك براك يا خوي يا صلاح ... النِسوان عاوزين يستلِموا البوست ده ولا شِنو
سمِح ... سمِح ... أصُبري بحدِثو ... يا صلاح : بِت إبراهيم (مرتي) عاوزة تشارك
بِشمار مُمكِن ... ضُرساً قديييييم تاورا
|
Post: #8
Title: Re: لقاء مع ..(بائعة شمار)
Author: صلاح أبودية
Date: 04-07-2008, 08:20 AM
Parent: #7
Quote: ما بخليك براك يا خوي يا صلاح ... النِسوان عاوزين يستلِموا البوست ده ولا شِنو
سمِح ... سمِح ... أصُبري بحدِثو ... يا صلاح : بِت إبراهيم (مرتي) عاوزة تشارك
بِشمار مُمكِن ... ضُرساً قديييييم تاورا |
حصل التخفيضات يا عزام وكلم بت إبراهيم قول ليها إتفضلى فى المسنجر
|
Post: #9
Title: Re: لقاء مع ..(بائعة شمار)
Author: عزام حسن فرح
Date: 04-07-2008, 10:28 AM
Parent: #1
أمانةً عليك ... دحين ده مو شماااار ؟
|
Post: #10
Title: Re: لقاء مع ..(بائعة شمار)
Author: صلاح أبودية
Date: 04-07-2008, 10:39 AM
Parent: #9
| Quote: أمانةً عليك ... دحين ده مو شماااار ؟ |
والله يا عزام الشمار عند بدرالدين إسحق القال خاتينا أنا وإنت فى قائمة واحدة
بتاعت شنو..؟ الله أعلم
|
|