اتكاءة على حيطة جالوص !!!

قسمت ما بيني وبينها نصفين : نهار نلتقي فيه بالكاد نصف ساعة على الأكثر ، في ليمون بزنس ، بالضبط ما بين العاشرة والثلث إلى قبيل الحادية عشر بقليل . وأبلع باقيه بين دفاتر المحاضرات وفردات الحافلة جيئا وذهابا
وليل لا أستطيع فيه مقاومة النوم من الانهداد والتعب ولا يستطيع النوم ـ مع ذلك ـ مقاومة طيفها الذي يصر على مؤانستي طيلة الليل .
- الباقي؟؟؟؟؟
- حاضر !!
- ياولد نزلني هنا
- جدا يا حاجة
- نفرين !!
- معاك منو ؟؟
- اب نضارات الورا داك
- جدا
*******************
- لكن يا سمير القراية كدا ما بتفع !
- ليه ؟؟
- القراية دايرا انك تعيش جو الجامعة بكامل تفاصيلوا
- اكتر من اني بحضر كل محاضراتي تقريبا ودفاتري مكتملة و... و ... بتونس معاك يومي
- لا الجامعة ما كدا
- انت حدودك في الجامعة لي حدي الساعة واحدة صاح ؟؟
- ايوه
- يعني ما قاعد تجي النشاط بالليل ؟؟
- ما بحب السياسة ...
- سمير النشاط ما سياسة بس
- ولا لي في الشعر والغنا والمسرح
- اوكي معليش نتلاقى يكرة
- اوكي ، اتفضلي يا ستي دفترك ... انتهيت من نقل المحاضرات الفاتتني الاسبوع الفات
- اوعا تكون كتبت لي فيهو حاجة زي المرة الفاتت !!! (قالت جملتها هذه بعيون ضاحكة )
- ............................ (غرقت في صمت بهيم )
********************************

قسمت ما بيني وبينها نصفين

...........................

شفاهة أقول لها فيها أحاسيسي متأتأة متلعثمة في شكل إعجاب بخطها الجميل على دفاتر المحاضرات أو ثناء على ذكائها المتقد وهي تجيب على أسئلة الأستاذ المفاجئة أو...
وكتابة ورسم خجولان أخبئ فيهما مشاعري مرموزة خجلى
****
- حاتقضي الاجازة دي وين ؟؟
- في البلد ...
- ضروري
- أكتر من ضروري
- طيب سلم لي على ناس بيتكم
- ..... (أمد دفترين)
- ديل شنو ديل ؟؟؟
- ....
- انت ما حتبطل حركاتك دي
- الدفتر دا مجرد كوكتيل من أغنيات مسموعة
- والتاني
- التاني دا محاولات شعر وخاطرة وقصة
- أيوا لكن انتا كان قتا لي زمان انك ما ليك في الحاجات دي
- يعني
- يعني شنو ؟؟
- يعني دي محاولات خاصة جدا ومابحب اعرضا على زول
- أيواااااااااااااا
- .... في شنو
- يعني أنا مازول يعني
تضحك هي أضحك أنا تضحك ثلاثة أشهرونصف من التذكر بيننا
ونعود لفصل دراسي جديد

******


قسمت ما بيني وبينها نصفين ...

****

~