لا أراكم الله مكروها في عزيز لديكم ...... ولكن ؟؟؟

لزم السرير الأبيض قريب لي منذ أيام في اثر علة أجبرته على البقاء أياما , وكنت ألازمه طيلة هذه الفترة , ولعلها المرة الأولى أرافق فيها مريضا بمشفى خاص خارج حدود الوطن .

لن تحتاج أن تعلن للناس أن لديك مريض بالمستشفى , فمثل هذه الأخبار تنتقل بسرعة البرق , وكذلك أخبار الوفيات لا قدر الله يتداولها الناس وينشرونها بسهولة ويسر , يكفي أن تعلم شخصا واحدا , وأنسى الموضوع وهذا الشخص سيخبر ثلاثة والثلاثة كل منهم سيخبر ثلاثة آخرين , وهكذا تنتقل الأخبار بمتوالية هندسية , ولن ينتظر الناس أن يتقابلوا ليتبادلوا مثل هذه الأخبار فثورة الاتصالات تقوم بالواجب وأكثر .

كل ذلك لا يتم إلا بدافع الشهامة والنخوة والرجولة التي تميز السوداني / هـ عن غيره من من عرفت شعوب الأرض , وتجد وقفة الأصدقاء والجيران وزملاء العمل و كأن بينك وبينهم صلة رحم ودم , ولهذا الترابط طعم خاص ومذاق فريد في بلاد الاغتراب حيث يلتقي السودانيون وقد لا يجمع بينهم أي رابط إلا الصدفة فقط التي جعلتهم يستوطنون هذا المكان في هذا التوقيت , وهنا تكمن غرابة تكون هذه الأواصر ومتانتها فيقدم لك أحدهم عونه ومساعدته ( يده وقدحه ) الحقوق محفوظة للطيب صالح .
خرج قريبي من غرفة العمليات و أمضى وقته بالإنعاش ثم تم تحويله لغرف التنويم في الظهر من نفس اليوم مع تعليق لوحة علي باب غرفته تحوي ثلاثة أحرف إنجليزية ( عرفت فيما بعد أنها اختصار لثلاث كلمات مفادها أن المريض خرج لتوه من غرفة العمليات و تمنع الزيارة الآن ) .

وما أتى العصر إلا وتوافد أخوان فاطنة زرافات ووحدانا , عوائل وعزاب , وما أتى بهم إلا الواجب المقدس مؤازرة للمريض وأسرته , وقوفا معه في محنته , وكسبا للأجر والمثوبة , امتلأت بهم الغرفة عن أخرها , وحتى الممر الطويل بين الغرف الأخرى , ورأوا المريض وكفروا له وتحمدوا له السلامة و دعوا له بالشفاء والصحة والعافية والعمر المديد , وجزاهم الله خير الجزاء

ولكن ,,,
المريض يحتاج للراحة والهدوء , وما يزال البنج يسري في دمائه , ورأسه يثقل بفعل المضادات الحيوية ومسكنات الألم التي تمنح لأي مريض عقب إجراء العملية .
كل الزوار يسألون المريض عن ماذا حدث له والحكاية شنو ؟ , وأساليب جرجرة الحديث والونسة , ما كت طيب آزول مالك ؟ وأدوك شنو ؟ وهسع حاسي بشنو ؟
وأسئلة وأسئلة وأسئلة
أكثرها معلومة للسائل سلفا , ولكنه يود الإجابة من المريض شخصيا و لا أحد غيره
تخيلوا معي كم زائر يزور هذا المريض ويطرح نفس الأسئلة وينتظر إجابتها لتتولد عنده أسئلة أخرى
بل ويحكي بعضهم مواقف وأمراض مشابهة , ويقدم بعضهم اقتراحات لشفاء المريض قد يتعارض بعضها مع رأي الطبيب المعالج .
وتمتد جلسات بعضهم لساعات طوال , وللمريض عزره وحاجاته الخاصة التي لا يستطيع قضاءها أمام الآخرين , ويريد الراحة وتناول طعامه الخاص , وتناول علاجه الذي بعضه ابر ( حقن ) بالإلية مثلا .

هذا جانب وإزعاج المرضى الآخرون جانب آخر .
أصوات الزوار العالية يشتكي منها طاقم التمريض وزوار المرضى الآخرون بالغرف المجاورة , وهذه السمة تخص السودانيون دون غيرهم ( يتوافدون كثر , ويمكثون أوقات طويلة ) .
المشفى ليس ملكا خاصا بنا وحدنا , وهناك مرضى آخرون غير مريضنا ينتظرون الشفاء , نزعجهم بأصواتنا وضحكاتنا , وحتى وقع أقدامنا على البلاط وصرير الأبواب فتحا وإغلاقا , وغيرها مما يزعج المرضى .
لا أحد يرفض أن يزور مريضه الناس , وأن يعودوه , بل قد يتسرب الضيق الي إن لم يزور الناس مريضي
أما أن تكون الزيارة بهذه الكيفية التي ذكرتها أعلاه فمتروكة لتقديركم .
ولا أراكم الله مكروها في عزيز لديكم
كل الود

البشير اخوي سلام

من ترك عادته قلت سعادته او كما قال
وبصراحه وبرغم سؤ المظهر
والازعاج المصاحب لزيارة المريض
الا ان وقعها علي النفس كبير ومحبب
فزيارة الاهل تسعدك وتشعرك بانك لست وحدك
وتشعرك بان من حولك يشعرون بالمك
وزيارتهم خفف الكثير من الالام والاوجاع
وتزيل كثير من الاحقاد والعداوات
فقط
ان تكون تواصلا مع اسرة المريض
وبعيدا عن المريض وغرفته

العزيز البشير
تحية طيبة
نسأل الله الشفاء العاجل للمريض ودوام الصحة العافية
انت عارف الجماعة ديل الا يعينوا ليهم سيستر سودانية
عشان تتفاهم مع الاسر،مرة ناس مستشفى المستقبل لزوا
لينا إدارية سودانية حتى اتخارجوا مننا بعد ما الزيارة
انتهت
سلوك يجب ان نتخلص منه مراعاة لشعور المرضى لكن كيق؟

تحياتي

Quote: انت عارف الجماعة ديل الا يعينوا ليهم سيستر سودانية عشان تتفاهم مع الاسر،مرة ناس مستشفى المستقبل لزوا لينا إدارية سودانية حتى اتخارجوا مننا بعد ما الزيارة انتهت

العزيز عبده عبدالحميد
تحية وتقدير
تعرف يا حبيب المستشفيات الخاصة والعامة هنا في السعودية دائما بشتكوا من الزوار السودانيين
ليس لكثرتهم فقط , ولكن لما يسببونه من أزعاج في أحايين كثيرة للمريض الذي جاءوا من اجل زيارته
وللمرضى الآخرين كذلك , كما انهم يعوقون احيانا عمل الفريق الطبي , ويسببون له الضيق .
عافاك الله اخي ومن تحب .
كل الود

عفوا للتكرار

Quote: البشير اخوي سلام الا ان وقعها علي النفس كبير ومحبب فزيارة الاهل تسعدك وتشعرك بانك لست وحدك وتشعرك بان من حولك يشعرون بالمك وزيارتهم خفف الكثير من الالام والاوجاع

اهلا ومرحبا بك اخي العوض
نعم زيارة المريض له وقع كبير على المريض وذويه , وحبذا لو كانت مختصرة وفي هدو تقديرا لظروف المريض الصحية .
افتقدت احد أصدقاء المريض المقربين , وظننت أنه لم يزره , واستغربت لذلك , ولما سألت زوجة قريبي , أخبرتني أنه
حضر واقفا وسلم على المريض وأطمأن عليه , ودعا له بالشفاء وغادر دون أن يتسغرق ذلك دقيقتين , وقال وهو يغادر الغرفة
زيارة المريض أجر زوروا وخففوا .
كل الود اخي العوض

البشير الجميل
مساء الخير

انا وحاتك امس اختي وضعت في بورسودان الساعة 8 صباحا.....
الساعة 9 صباحا اصريت انوا اتكلم معاها بالتلفون واطمئن عليها .....
برغم محاولات الجميع تصبيري للانتظار الا اني ماقدرت ....
وفي الاخير اتكلمت معاها ويادوووووووب حسيت بالراحة ....
عادة غير جميلة ....وسلوك غير حضاري ....اعترف بتكراره كثيرا .
لكن نعمل شنو ....؟
قلب الوالد ياولدي .

كل الحب

هارون دياب

Quote: البشير الجميل مساء الخير عادة غير جميلة ....وسلوك غير حضاري ....اعترف بتكراره كثيرا . لكن نعمل شنو ....؟ قلب الوالد ياولدي . كل الحب هارون دياب

تحية وتقدير الغالي هارون دياب

وأحمد الله على سلامة أختكم ومبروك المولود .

تعرف يا حبيب عاداتنا وتقاليدنا البنفخر بيها دي ما كلها مبرأءة من العيوب

بعضها محتاج تعديل وبعضها داير يترمي في مزبلة التاريخ عدييييييييييييييل .

يعني ما كلها كلام منزل , لكن البقدر يقول البقرة في الابريق منو ؟

ياهو كلامنا في المنبر ده , ولما نجي للتنفيذ ما بنقدر خوفا من اللوم وشيلان الحال .

لكن الزيارة خمسة دقايق ما فوقها حاجة بتطمن الزول وبتحقق الأجر من رب العالمين .

كل الود

الاخ الفاضل / البشير
تحياتي
هو الحال كما قال الاخ المسلمي

Quote: من ترك عادته قلت سعادته او كما قال وبصراحه وبرغم سؤ المظهر والازعاج المصاحب لزيارة المريض الا ان وقعها علي النفس كبير ومحبب فزيارة الاهل تسعدك وتشعرك بانك لست وحدك وتشعرك بان من حولك يشعرون بالمك وزيارتهم خفف الكثير من الالام والاوجاع وتزيل كثير من الاحقاد والعداوات

والمواقف دي اتكلموا الناس فيها كتير كتير
والحال ياهو نفس الحال وشخصيا عندي تجربة مع صديقي الحميم نصر الدين حقار
ابان فترة مرضه ورقاده في المستشفى .. نصر كان يرفض بشدة التحدث مع اي شخص
في الامر وكان يقول بالحرف الواحد ان الدعوة التي يطلقها له الزائر افضل له مليون مرة
من ان يرتاح جسدياً وان زيارة اي شخص وابتسامته في وجهه تعادل اعلى درجات العلاج الكيميائي
ونحن يا البشير ناساً حنااااااااااااااااااان وبندور الناس واهم حاجة عندنا جية الناس لينا وقت مرضنا
والله اسي انا يا بشير لمن امرض كان لي مراد اطلع لي واحد مداعي عديل يكلم الناس اني عيان وجية الناس قاعدة
تريحني بالحيل العجب كان فيها قعاد جنب الكرعين وعصير كرعين ومرديقن

Quote: وكان يقول بالحرف الواحد ان الدعوة التي يطلقها له الزائر افضل له مليون مرة من ان يرتاح جسدياً وان زيارة اي شخص وابتسامته في وجهه تعادل اعلى درجات العلاج الكيميائي ونحن يا البشير ناساً حنااااااااااااااااااان وبندور الناس واهم حاجة عندنا جية الناس لينا وقت مرضنا والله اسي انا يا بشير لمن امرض كان لي مراد اطلع لي واحد مداعي عديل يكلم الناس اني عيان وجية الناس قاعدة تريحني بالحيل العجب كان فيها قعاد جنب الكرعين وعصير كرعين ومرديقن

الغالي أمير عوض الجمري
متعك الله أخي بالصحة والعافية .
تعرف يا حبيب زيارة الناس ما بناباها , لكن على خفيف كدي ما مقيال يعني .
لأنو راحة المريض مطلوبة , وراحة المرافق والاسرة .
وينصرف الزوار من عصير كرعين المريض ومواساته الى مواضيعهم الخاصة الغربة بقت ما نافعة
والسعودية دخلتها غلا شديدة , والسنة دي ما ح أشيل معاي هدايا السودان ...الخ
ويتجمع النسوة في أحاديثهن المعروفة وطبعا المستشفى نادي راق للمارسة هواياتهن في الحديث
فلانة غيرت دهبها , وعلانة حنتها رهيبة وتعالوا نعمل خته يا اخواتي ... الخ
أما الاطفال فعيني باردة يجروا ويلعبوا في الممرات كانهم في البر .
وتتحول مجاملة المريض بزيارته الى تحقيق رغبات اخرى وممارسة هوايات تانية .
وأجر الزيارة عند الله .
كل الود

شفاه الله وبلغه تمام العافية
لن نقدر على ترك تلك العادة مهما حاولنا
وعلى أنها عادة مذمومة جراء الإزعاج الذي تسببه للمريض والمحيطين
إلا أنها تظل عادة سمحة نفخر ونفاخر بها
نحن قوم نخشى الملامة وإن كان في ما نفعله أكثر منها

Quote: نحن قوم نخشى الملامة وإن كان في ما نفعله أكثر منها

الاخ الكريم بله محمد الفاضل
تحية وتقدير
نعم مجاملاتنا تكون في الغالب خوف الملامة , وأحيانا نجامل بشدة ونجلب لأنفسنا الملامة
من جراء الافراط في المجاملة .
نحتاج أن نعدل ولو بالقدر اليسير في أساليب زيارتنا للمرضى ومواساتهم .
كل الود

الحبيب البشير تحياتي وتقديري لشجاعة هذا الطرح
واتمنى ان يتفهم الجميع ما ترمي اليه بخصوص إنتقاد بعض الاشياء السلبية التي تصاحب الزيارة
وعلي حسب ما فهمت انت لاتتكلم عن إيقاف الزيارة نهائياً
بل وترحب بها واتفق الجميع علي هذا الفهم
من تاثيرها الايجابي علي المريض نفسيا واجتماعياً
ولكن ان تتحول الزيارة لكابوس للمريض ولاهله وللمستشفى نفسها
فهذا مالايرضاه كل من راي ما يحدث في مثل هذه الزيارات

اولاً: طريقة سلام السودانيين غريبة جدا ولو نظرت لمجموعة سودانيين في حالة سلام فانك لاشك ستتعجب من هذه الطريقة والتي لايوجد لها مثيل في كل الشعوب
ازي الحال سلامات-كيف الحال-سلامات-كيف الحال-ازي الحال-سلامات وهكذا متوالية صوتية عالية لاتنتظر إجابة...

ثانياً: الواحدة ماشاء الله علي الاقل معاها اربعة فما فوق بدون اي فوارق في العمر وكلهم فوق بعض واتخيل بس تصادف وجود اسرتين او ثلاثة في زيارة هذا المريض وبكاء الاطفال وده عايز يمشي الحمام وده عايز عصير وجري في الاسياب وشكل وكواريك..

ثالثاً: واهم حاجه طول وقت الزيارة وهو علي حسب فهمي المقصود بهذا البوست ، فمن غير المعقول ان يجلس شخص مع زوجته واولاده من المغرب الي العاشرة مساءاً في المستشفى هو متصدر لمجلس الرجال في ونسة وكلام في السياسة والوضع في السودان وقراية الاولاد والسؤال الازلي نمشي وله نقعد
وزوجته متصدرة مجلس النساء في كلام عن اللبسات الجديدة ومحلات التخفيضات والدهب والحناء والاولاد


فعلا الكثير من عاداتنا تحتاج لاعادة النظر ، ولنبدأ من انفسنا علي الاقل ونحاول فيما حولنا

للجميع التحية والود

العزيز الطاهر عثمان
لك التحية والتقدير
هو ما قصدته بالضبط , ولننظر لعادة زيارتنا للمريض من كل الزوايا
ولندع الجانب العاطفي لتكن نظرتنا أشمل وأعم للمصلحة العامة .
كل الود

أداء الواجب شئ مقدس لا ينكره أحد

بل ينكر الناس من يتقاعس عن أداء الواجبات ومنها زيارة المريض

أتحدث هنا عن حقوق هذا المريض والمرضى الذين يجاورونه بالغرفة نفسها والغرف المجاورة .

حقهم في الراحة والهدؤ

حقهم تلقي العلاج بطمأنينة

حقهم في تناول طعامهم دون ملاحقة نظرات الزوار

......

في بداية التسعينات..
كان الأطباء وطاقم التمريض في المستشفيات بمدينة لندن..
يظنون أن اي مريض سوداني موجود عندهم..هو شخص مهم وفي مركز مهم..
كثرة الزوار جعلتهم يظنون ذلك
اما الآن فقد تعودوا!

فعلا نحتاج أن نفصل احيانا بين عواطفنا وترجمتها في المجاملات.. وبين حالة المريض
التي تحتاج قطعا للراحه..
يمكن التوقيع في دفتر..او ارسال كرت والمتابعه بالتلفون مع اسرة المريض..
ثم الزياره في الوقت المناسب..

تحياتي..

Quote: يمكن التوقيع في دفتر..او ارسال كرت

بت خوجلي إتي بجدك؟

------

الحبيب البشير

قال ليك .. زمان في استبالية الخرطوم .. كتب الدكتور للمريضة خروج .. قامت مسكتو من البالطو .. و قالت ليو يا ولدي خليني يومين تانيات .. عندي اهلي جائني بقطر كريمة لزيارتي

Quote: الحبيب البشير قال ليك .. زمان في استبالية الخرطوم .. كتب الدكتور للمريضة خروج .. قامت مسكتو من البالطو .. و قالت ليو يا ولدي خليني يومين تانيات .. عندي اهلي جائني بقطر كريمة لزيارتي

الحبيب خال فاطمة
التحية والود
كنت أعمل في مستشفى خاص وراقي جدا بالمنطقة الجنوبية بالمملكة , ولأن المستشفى خاااااص فقد كان يطلب بعض المرضى المكوث أياما
اضافية بعد اكتمال العلاج بحجة انتظارهم لزيارة ( بقية الربع ) من الأهل والأقارب .
وكنا نحاسب المرضي على الايام الاضافيه على أجرة الاقامة والضيافة لأن العلاج يكون قد انتهى .
كل الود

Quote: بت خوجلي إتي بجدك؟

طيب ما تتخلع..
لما الزول يكون في العنايه المكثفه..اساسا هو ما بيشوف زول..
البيشوفوه اهل المريض..والتوقيع بيكون عندهم
زيارة المريض المفروض تكون في مواعيدها وبعد خروجه من المرحله الحرجه..
وطبعا انا عارفه انه ده كلام بيكون نظري ساكت عندنا نحنا السودانيين..
لكن حقيقي لابد من التعلم..
في المستشفيات هنا في غرف لجلوس المرضي وزوارهم..
بتساعد كتير علي الزيارات الكثيره..
وبعدين في داعي نمشي احنا خمسه من نفس البيت في نفس الزياره؟
مانمشي في مرات مختلفه..ولا شنو؟
اليوم داك مشينا لزيارة مريض صديق..
انا واثنين من الأصدقاء..
ووجدنا معه زائر آخر..
وتعالت الأصوات والونسه...وانااتلفت يمين وشمال خايفه من الأزعاج!

Quote: يمكن التوقيع في دفتر..او ارسال كرت والمتابعه بالتلفون مع اسرة المريض.. ثم الزياره في الوقت المناسب.. تحياتي..

تحياتي استاذة منى خوجلي

التوقيع في دفاتر تحتاج لعشرات السنين لنصل اليها وقد لا نصل

أما المتابعة بالتلفون فقد يعتبرها المريض وأسرته جفاء , اذ لا بد من حضور الزائر شخصيا .

ولكن الزيارة في الوقن المناسب أفضل ( زيارة قصيرة وسريعة ما مقيال يعني )

كل الود

الجميل/بشير..
لك التحية..

أنزلت هذا البوست فى غيابى..يعنى بقيتوا تذاكروا من ورانا..
.....

Quote: خرج قريبي من غرفة العمليات و أمضى وقته بالإنعاش ثم تم تحويله لغرف التنويم في الظهر من نفس اليوم مع تعليق لوحة علي باب غرفته تحوي ثلاثة أحرف إنجليزية ( عرفت فيما بعد أنها اختصار لثلاث كلمات مفادها أن المريض خرج لتوه من غرفة العمليات و تمنع الزيارة الآن ) . وما أتى العصر إلا وتوافد أخوان فاطنة زرافات ووحدانا , عوائل وعزاب , وما أتى بهم إلا الواجب المقدس مؤازرة للمريض وأسرته , وقوفا معه في محنته , وكسبا للأجر والمثوبة , امتلأت بهم الغرفة عن أخرها , وحتى الممر الطويل بين الغرف الأخرى , ورأوا المريض وكفروا له وتحمدوا له السلامة و دعوا له بالشفاء والصحة والعافية والعمر المديد , وجزاهم الله خير الجزاء

..
نحن شعب طيب لحدى درجة قف..مليانين محنة قاتلة..وشوق يودر..وحب فتاك..نتلم فى البكيات ويكون الحال

ميتة وخراب ديار..الفرح هيلمانة وقومة وقعدة تودر ما وفرته من مدخرات سنة لى قدام..لا معايير عندنا لكثير من ألأشياء..

مريضنا يخرج من العملية طيب وبنجاح نقتلوا نحن بى كيفنك سلام طيب إن شاء الله..كل البتكتب أمام المريض

قليل الذى يعمل به..

والعجب الممنوع من ألأكل للمريض الزوار يجيبوهوا ليهو وياكلوا ويقولوا ما قال نفسو فيهو..

نحن نحتاج للكثير فى التعامل مع مثل هذه ألأشياء...نحتاحج إلى وعى وثقافة..فى ألأمور الحياتية..

شكرآ بشير

مودتى..
إسماعيل محمد احمد عباس...

Quote: .. نحن شعب طيب لحدى درجة قف..مليانين محنة قاتلة..وشوق يودر..وحب فتاك..نتلم فى البكيات ويكون الحال ميتة وخراب ديار..الفرح هيلمانة وقومة وقعدة تودر ما وفرته من مدخرات سنة لى قدام..لا معايير عندنا لكثير من ألأشياء..

الخال الراقي اسماعيل عباس

تحية وتقدير وحمد لله على السلامة

المشكلة زاته في الشوق اليودر والمحنة القاتلة دي .

والمشكلة انو نحن البنقول في الكلام ده , لو ما تعاملنا بالطريقة القلتها انت دي

طرف السوط بلحقنا واللوم ما بنسلم منو .

اعتاد الناس على هذه الاشياء , ولكن لا بد من تدخل العقلاء أحيانا

لراحة المريض الذي نزورة

ورأفة بأهل الفرح وأهل العزاء

ولكل شئ حدود قطعا

ودفع الضرر أولى من جلب المنفعة ولا شنو ؟

كل الود