منو القال

منو القال للسحاب إتلم
واهطل يا مطر ألوان
وأروي سهول غشاها عطش
واسقى غصون شجرة البان
شجرة البان دي أصل الخير
جزورا عميقة في الوديان
وكلها حب ولامة كمان
حواليها الزهور بحنان
حنان امي حنان مليان
وقلبها بالفرح رويان
شجرة البان دي ما امي
ومشتاق ليها يا انسان
والاشواق بسوقا سحاب
وتهطل بالدموع في البان
وأخواني الصغار ازهار
مشبعة بي نداها حنان
بجيك يا يمة اصبري لي
بجيك اشبِع قليبي امان

منو القال للشمس تطلع
تغازل بي خيوتا زهور
تمد النور عشان يوصل
يغطي سهول ويدفي بحور
شمس ما حارة حراقة
شمس دفاية مشتاقة
وحبها للجميع مجهور
شمس بالخير تنادييلنا
ووصفها بالجمال زي حور
وحور من جنة ضواية
بتلمع في ضلام مسحور
شمس تبعد ضلام الليل
وتنصر كل حزين مجبور
وتشرق في صباح واعد
يعز كل الرجاهو دهور

وين يا عمك!!

إنت عارف الأم دي حاجة ما بتتوصف
تقطع نفس خيل القصايد!!

بي مناسبة القصايد دي
ما تبطل لم القروش دا ياخ
أمشي بِل شوقك دا من (ماما) وتعال!!


بي مناسبة الدور الجادي دا

Quote: وتنصر كل حزين مجبور

ياخي أمشي في نسق واحد
يا كلام دارجي .. يا كلام فصيح

لو قلت لي دارجي مفروض تشكّل الكلام

ما تقعد تلف وتدور بينا ياخ!!



المهم ..
مشتاقون ياخ!!

ود الصايم

ياخ انت المحومك لحدي هسة شنو زاتو
امشي شيل ليك فول وتميس واتلم في البيت خلاص

Quote: إنت عارف الأم دي حاجة ما بتتوصف

الام دي دنيا جميلة يا محمد

Quote: ما تبطل لم القروش دا ياخ

هسة الله يسالك غير لم الهموم في البلد دي في حاجة ؟

ومع ذلك طوالي ناطي ليها

الكلام ات العتته من القعدة

Quote: لو قلت لي دارجي مفروض تشكّل الكلام

هسة دي ما دارجية ياخ

وتشكيلا منها وفيها يعني ما محتاجة اتخيل لي موش ولا شنو ؟

Quote: ما تقعد تلف وتدور بينا ياخ!!

سجارة دوكو انا

وعموما تاكد انو كل ملاحظاتك ح انتبه ليها


الشوق بحر يا عمك

وقاطع خبرك مالك ؟

Quote: منو القال للسحاب إتلم واهطل يا مطر ألوان وأروي سهول غشاها عطش واسقى غصون شجرة البان شجرة البان دي أصل الخير جزورا عميقة في الوديان وكلها حب ولامة كمان حواليها الزهور بحنان حنان امي حنان مليان وقلبها بالفرح رويان شجرة البان دي ما امي ومشتاق ليها يا انسان والاشواق بسوقا سحاب وتهطل بالدموع في البان وأخواني الصغار ازهار مشبعة بي نداها حنان بجيك يا يمة اصبري لي بجيك اشبِع قليبي امان

مبدع والله يا مازن وربنا يحفظ لينا كل امهاتنا
بقية القصيدة برضو جيدة بس المقاطع الفوق دي
تاثيرها فيني كان أعمق .
شكراً جميلاً يا مازن اخوي علي هذه القصيدة المعبرة .