للساقطين من ابناء وطني.. لا مكان لكم بيننا بعد اليوم...

بالعربي كدا ومن غير ما الزول يقعد يزوق في الكلام.. انا خلاص مرارتي اتفقعت من البقراو وبشوفو هنا كل يوم.. اي واحد حاسي بروحو راجل وعاجباو رجالتو ما يقعد يتشفتن علي النسوان..

العندو قضية او وجهة نظر عاوز يطرحها ويناقشها يبقى يكون راجل ويتقبل الرأي المخالف بصدر رحب..

اي زول عندو اعتراض علي وجهة نظر انسان معين او انسانة معينة يبقى يلتزم بمبدأ الحوار الديمقراطي وادب اختلاف وجهات النظر..

اي انسان ساقط وبيحاول يرمي قذاراتو لتكميم الافواه فدا احسن ليو يمشي يشوف مكان تاني لممارسة النقص والخلل الموجود في شخصيتو.. واهلنا في المثل بيقولو "الفيك بدربو"..

اليس فيكم رجلٌ حكيم؟؟؟ متابعة وبقرا البورد دا من تلاتة سنين.. كل مرة تستخدم فيو اسلحة اخس من الخسة.. البجي يتكلم عن اسرة انسان مختلف معاو باسلوب اقذر من القذارة.. والبجي يتكلم مع واحدة باسلوب برضو اتفه من التفاهة ويحاول يضحد حجتها بالخوض في عرضها.. بالله دي رجالة دي؟؟؟؟

ودا كوم والشفتنة البقت في البورد دا كوم تاني.. كل واحد يتحاور مع واحدة ويحس انو رايها كان صائب او ممكن تغلبوا في النقاش طوالي ينزلق الى اسلوب شوارعي منحط عشان يكسر عينها ويخليها تنسحب او كمان يعميها الغضب وتجاريو.. وبالتالي يكسب هو المعركة بتصويرها انسانة مامتربية وبتقالب في الرجال وتتلفظ بنفس مستوياتهم..

حاولوا تحقوا تربية جدودكم الهسي بيكونوا منجضين تحت التراب بتصرفاتكم المشينة دي..

حليل الرجال الجد.. الكان الواحد فيهم بيقنع الكاشفات.. موش يكشف المستورات..

علي قول اهلنا "القبور ما بتدي الخطور".. يتدفنوا هم تحت التراب.. ويقدلوا ناقصين المروءة والشهامة..

اذا فيكم رجال راضعين اماتهم بالجد.. مفروض تسجلوا موقف واضح اتجاه اي واحد ينزلق بالحوار مع اي واحدة في البورد دا عشان يثنيها عن طرح وجهة نظرها حتى لو كانت خطأ..

اي انسان بيكتب هنا مسئول عن نفسو وبس وعن اراءو وكتاباتو فقط.. ماف سبب بيخلي اي عضو تاني يفتش في سيرتو الشخصية او ماضيو او سيرة اهلو..

وبتهيأ لي كلكم متابعين الاسفاف البيحصل في البورد دا.. كل يوم واحد مضطر يدافع عن اخواتو او اهل بيتو.. او واحدة مضطرة تدافع عن شرفها او واحدة تنسحب قدام صعاليك البورد!!!!

ياخ اخجلوا عليكم الله.. شفعنا في البيت لما يتشاكلو بنقول للود عيب الراجل ما بيشاكل البنات..

هسي انتو رجالتكم بقت ما بتظهر الا قدام النسوان؟؟

النوع دا.. اريتو اماتكم لو عقروا ياااخ.. مرضتونا الله يمرضكم..

لماذا هذا الغضب العظيم يارشا
سودانيس اونلاين دي
زي سوق ليبيا
فيها بضاعه تمام التمام
فيها بضاعه فاسده
=====
فيها بضاعه غاليه جدا
وفيها بضاعه رخيصه ومتهتكه
===============
فيها سوق الحرامية سارقي جهود وعرق الاخرين
وفيها اصحاب الجهود الذين يتفرجون عليهم ساخرين
==========================
فيها الصالح
وفيها الطالح
=======================
فيها وفيها وفيها وفيها
====================
بس الحمد لله فان الغالب الاعم هم الطيبون
اللطيفون المهذبون
====================
انا ماعارف المشكله شنو معاك لكن حبيت اوضح ليك المسالة
وكوني بخير

Quote: لماذا هذا الغضب العظيم يارشا سودانيس اونلاين دي زي سوق ليبيا فيها بضاعه تمام التمام فيها بضاعه فاسده

وانتي من التمام التمام ده
ركزي مع الناس البتشبهك

تماضر والموصلي

انا ما بتكلم عن نفسي.. الحمد لله حتى الان لم اتعرض سوى لبعض الصغائر التي تجاوزتها بعدم مواصلة النقاش وبس..

انا بتكلم عن الشايفاو والبقراو في البورد دا من تلاتة سنين.. وبالجد الحركة دي وجعتني من جوة.. واتمنيت لو الناس تاخد فيها خطوة حاسمة.. لو ما بقرار اداري بموقف جماعي من الزول البيعمل كدا..

بالجد الفكرة بقت اكبر من اننا نسكت عليها او نتجاوزا..

كل الود..

يعني هسع جبتي البت الاموره دي
تتهكم علي ساقط القول؟؟
اتفهم غضبك النبيل

Quote: يعني هسع جبتي البت الاموره دي تتهكم علي ساقط القول؟؟ اتفهم غضبك النبيل

تصدق يا الموصلي نبهتني لحتة مهمة..

فعلا ممكن ماف زول يشتغل بالغضبة الرهيبة دي مع بنوتي السكرة دي..

دقيقة امشي اجيب لي شيطان بقرون واجي

Quote: بالجد الفكرة بقت اكبر من اننا نسكت عليها او نتجاوزا..

فِعلاً يا رشا ..
الفِكرة بِقت اكبر مِن إننا نسكُت عليها او نِتجاوزا ..

ولازم نشوف ليها حل ..

بس إنتي طوّلي بالِك شوية ..

لانو اجواء النِقاشات في البورد عموماً عايزة طولة بال ..
ونفس هادئ ..

تقديري يا رشا ..

Quote: فِعلاً يا رشا .. الفِكرة بِقت اكبر مِن إننا نسكُت عليها او نِتجاوزا .. ولازم نشوف ليها حل .. بس إنتي طوّلي بالِك شوية .. لانو اجواء النِقاشات في البورد عموماً عايزة طولة بال .. ونفس هادئ .. تقديري يا رشا ..

الاخ عبد الرحمن

تعرف لو الموضوع دا كان ناتج عن غضب من موقف مساني شخصيا كنت حاكتفي بكلام اماتنا "التقماك اقماها"

بمعنى انو الواحد لما يحس انو القدامو ما حيتورع من مواصلة الانحطاط يبقى احسن تبعد بدل ما تجرجر نفسك في حتات ما مستواك اصلا..

نفسي الحار دا جا من تكرار الظاهرة.. كل مرة الواحد يدخل يلقى ناس خايضة في اعراض ناس والا واحدة ملمومين فيها شلة صعاليك بالفاظ زي الزفت عشان يسكتوها.

بالجد كدا مفروض نقييييييييييف.

Quote: ودا كوم والشفتنة البقت في البورد دا كوم تاني.. كل واحد يتحاور مع واحدة ويحس انو رايها كان صائب او ممكن تغلبوا في النقاش طوالي ينزلق الى اسلوب شوارعي منحط عشان يكسر عينها ويخليها تنسحب او كمان يعميها الغضب وتجاريو.. وبالتالي يكسب هو المعركة بتصويرها انسانة مامتربية وبتقالب في الرجال وتتلفظ بنفس مستوياتهم..

ادينا نماذج يا رشا حتى تتم محاصرتها بالرأى العام

Quote: ادينا نماذج يا رشا حتى تتم محاصرتها بالرأى العام

الاخ عادل عثمان

لا اريد ان اكون اداة لتصفية خلافات بينك وبين اخرين..

ولكن بما أنني قد حملت امانة الكلمة فسأضع هنا ما اراه صوابا...

اورد لي الاخ محمد إي سليمان انك قد خاطبت امرأة هنا من قبل بلفظ غير لائق:

Quote: فقد خاطب زميلة بالمنبر واصفا إياها بما يطلقه السودانيون على شريحة لحم البقر (القديد) الذي يجفف ويطبخ به !!وهو بمرادف الفاكهة الفاسدة في الأدب اللاتيني !! لكن المرأة المستنيرة- بزعمها - لا تستطيع الجهر بالإنكار على أمثال عادل من المحسوبين على تيار الاستنارة ومناصرة المرأة

كما اورد رابطا فيه الاشارة الى انك لم تنكر ذلك.. وبقراءة الرابط وجدت اعتذارك عما خطته يداك حقا:

Quote: أنا اعتذرت للاستاذة سارة عيسى، وهى قبلت اعتذارى. هذا ويجب أن تعلم أننى لست ملاكآ. أنا بشر يخطئ ويصيب. ولكننى اتمتع بالشجاعة الاخلاقية التى تحضنى على الاعتذار لو اخطأت. وهكذا أتعلم، وأعى تمامآ أنه ليس ثمة مبتذلين ولا اخلاقيين غير الادعياء. ادعياء الادب والرقة والتحشم الزائف. إحترامى للمرأة وتقديرى لها ولحقوقها لا أنتظر فيه محاضرة من "اللذين يقولون ما لا يفقهون".

وقد كان هذا هو ردي على الامر برمته:

Quote: عدت للرابط المذكور يا حبشتيانو,, ووجدت به هذه المداخلة لعادل عثمان.. واعتقد ان التائب عن الذنب كمن لا ذنب له.. ومن كان ضميره محاسبا له فليس بحاجة لاتهاماتنا.. اعتذار عادل يعني اقراره بالخطأ ويعني بالضرورة عدم العودة اليه مرة اخرى..

ولم اعمد لذكر كل ذلك الا لتثبيت موقف موحد.. وهو الادانة التامة لكل من يعمد الى استخدام الفاظ جارحة في حق امرأة او رجل...

كل الود يا عادل

سلامات يا رشا.

إرهاب بعض الاخوات والطعن في سيرتهم شئ مخجل جدا.

هنا يا رشا في ناس غير تركيب الوش اعلاه لايوجد معاهم حل ابداحتي يرعو

وزي ماقال عادل عثمان يجب محاصرة هذه الاصوات وضربها ضرب غرائب الابل

Quote: هنا يا رشا في ناس غير تركيب الوش اعلاه لايوجد معاهم حل ابداحتي يرعو وزي ماقال عادل عثمان يجب محاصرة هذه الاصوات وضربها ضرب غرائب الابل

ايوا يا كيكي

اهم شي ضرب غرائب الابل دا بالله حتى لا يعلموا من بعد علم شيئا

Quote: سلامات يا رشا. إرهاب بعض الاخوات والطعن في سيرتهم شئ مخجل جدا.

والله يا دينق القصة بقت مخجلة بالجد..

والمشكلة بصراحة ما في الاخوات وبس.. المشكلة في مستوى الحوار العام..

يا اخوانا ما ممكن كدا والله.. ياخ البورد دا انا مفترضاو زي جامعة الخرطوم زمان.. يعني الفيهو

صفوة من صفوة.. لما يكون دا مستوانا.. طيب سبنا شنو للناس الما متعلمين؟؟؟؟

حبابك ..
لا اعـلم ايضـا لمـا غضبك ..
لكن تعرفين ان كل وعــاء بمـا فيــه ينضح !.

وقيل الكبــار يتناقشون عن الافكـار و الصغــار عن الاشخــاص ...

ودمتـي .


_______________________________________________

ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور

Quote: اذا فيكم رجال راضعين اماتهم بالجد.. مفروض تسجلوا موقف واضح اتجاه اي واحد ينزلق بالحوار مع اي واحدة في البورد دا عشان يثنيها عن طرح وجهة نظرها حتى لو كانت خطأ..

لا اعلم ما هو سبب غضبك...فأنت لم تذكري السبب الحقيقي....لكني اوضح لك ان المنبر يعج بأنواع مختلفة من البشر كما ذكر لك الاخ الموصلي اعلاه....ونحن ندخل المنبر هذا في اوقات محدودوة جدا هي كل ما يسمح لنا وقتنا بعد اعمالنا وارتباطاتنا...يبقي الوقت البسيط دا بنحاول نستفيد فيه بالمواضيع المفيدة او نحاول ان نفيد غيرنا اذا ما استطعنا...ونتفادي بقدر الامكان بوستات المهاترات وتضييع الوقت في الفارغة ..وهذا ما انصحك به ...هو ان تستفيدي من المنبر هذا بقدر ما تستطيعين وان تبعدي عن ما لايفيد...

أخيرا اود ان اذكر لك تجربتين لي حاولت ان اتداخل فيهما مع زميلتين كانت لهما مشكلتين مختلفتين مع زميلين بالبورد وفي وقتين مختلفين ايضا...تدخلت واحتديت جدا مع الزميلين لدرجة ان فقدت الود معهما بسب طريقة تعاملهما مع الزميلتين.....بعد وقت ليس بالطويل وجدت ان العلاقات عادت بين الزميلتين والزميلين العزيزين واصبح كل منهما يتداخل في بوست الاخر وبكل الود بل وفي بعض الاحايين يتبادلا اسماء الدلع لكل منهما....واتضح لي انو انا شلت وش القباحة سااكت.....

عرفت ليه الراضعين لبن امهاتهم حلالا...لايتداخلون في مثل هذه المهاترات

لك ودي

Quote: لا اعـلم ايضـا لمـا غضبك .. لكن تعرفين ان كل وعــاء بمـا فيــه ينضح !. وقيل الكبــار يتناقشون عن الافكـار و الصغــار عن الاشخــاص ... ودمتـي .

تسلم يا دكتور وحبابك الف انت كمان..

الاغضبني مستوى الحوار والحالة الوصلنا ليها في التعرض لبعض والمحاولات الرخيصة لتصفية الحسابات ولو باستخدام الطرق الإنسان رخيصة والملتوية..

كل الود

سلامات استاذة رشا حاتم,,,

Quote: اذا فيكم رجال راضعين اماتهم بالجد.. مفروض تسجلوا موقف واضح اتجاه اي واحد ينزلق بالحوار مع اي واحدة في البورد دا عشان يثنيها عن طرح وجهة نظرها حتى لو كانت خطأ..

تسجيل المواقف ضد الإسفاف وإستعمال لغة هابطة وساقط القول لا يحتاج أن يكون موجها ضد إحدى الأخوات وإنما يجب أن يكون فى كل الأحوال وكل الأوقات ,,

Quote: اي انسان بيكتب هنا مسئول عن نفسو وبس وعن اراءو وكتاباتو فقط.. ماف سبب بيخلي اي عضو تاني يفتش في سيرتو الشخصية او ماضيو او سيرة اهلو..

دا كلام صحيح ولكن قد اسمعت إذا ناديت حيا يا رشا,,,

Quote: وبتهيأ لي كلكم متابعين الاسفاف البيحصل في البورد دا.. كل يوم واحد مضطر يدافع عن اخواتو او اهل بيتو.. او واحدة مضطرة تدافع عن شرفها او واحدة تنسحب قدام صعاليك البورد!!!!

متابعين ومستغربين غاية الإستغراب لإستمرار بوستات الشتم والسب والتعريض بالبشر والسخرية التى
تصدر من البعض وهم أول من يسقطون من نظر الناس مهما كانوا ولكن ما يحيرنى فعلا هو هل توجد فعلا لائحة وقوانين تحكم هذا المكان,,

Quote: ياخ اخجلوا عليكم الله.. شفعنا في البيت لما يتشاكلو بنقول للود عيب الراجل ما بيشاكل البنات..هسي انتو رجالتكم بقت ما بتظهر الا قدام النسوان؟؟

فى ناس اصلا ما بعرفوا يشاكلو إلا النسوان ,,,بعدين يا رشا هو شكل البوردات دا شكل!!!
كان نسوان ولا رجال!!! منابيذ طايرة فى الهواء وهى أغلب الأحيان تشبه العواء والهوهوة
ولكن لا شك أن الخلافات التى تصل لهذه المراحل أى مراحل سب الأهل والشتائم القبيحة ومحاولات
التخويف يجب أن يتخذ الأعضاء ضدها موقفا واضحا وإتخاذ إجراءآت ضد مرتكبيها,,,
..

Quote: مرضتونا الله يمرضكم..

ولذلك أصبحنا حذرين لا نداخل من طرف ساى ونحتفظ بآرائنا فى أغلب الأوقات لأنفسنا
حتى لا تجد نفسك فجأةهدفا لمريض أو مريضة ويسمعك ما لا تقدر على الرد عليه هنا ليس
لأنك لا تعرف أو لا تقدر وإنما إحتراما للمكان وإحتراما لإخوة وأخوات كرام لم نر منهم
غير الكلام المهذب والإختلاف المحترم المسؤول الخلوق!!

عرف البعض بسرعة جنوحهم لتلك الأنحاء وإشتهروا بذلك فمن يذهب ويحاور ويداخل فعليه
أن يبل رأسه ويعي أنه وضع نفسه فى مرمى نيران قناصة غير مرئيون وبعضهم لا يملك ذرة
من الأخلاق ولو لم يصيبوك الآن فقد تأجلت المهمة إلى حين لأنك لا توافقهم الرأى ولا تعجبه
طريقة تفكيرك,,,,

الأخلاق لا تتجزأ وليس لنا أن نوزعها هنا أخلاق للرجال وأخلاق للنساء ولكن إذا لم تستح فأفعل
ما تشاء رجلا كنت أم غير ذلك,,,,

أنت تريدينها مدينة فاضلة وذلك مستحيل ولكن وجود ضوابط وخطوط واضحة ولائحة فعالة ورقابة على هذه
الأنواع من الممارسات وإيقافها منذ بدايتها فيه فائدة كبيرة لنا ولهم....

هذا المنبر يحتاج فعلا لمراجعة شاملة فقد ذهب به البعض بعيدا وللأسف الشديد بقى الزبد وطغى ساقط الكلام وفارغه على الكلام المفيد والمواضيع الجادة والتى يجب علينا فعلا أن نتحاور حولها أونعرفها,,,

_________________________________________________________________________________________
التحية لكل الكتاب المحترمين وأصحاب الإهداف النبيلة والأقلام المسؤولة المتواجدين فى زحمة هذا
المنبر ويحاولون إسماع اصوات جميلة تخرج من حين إلى حين من وراء العفار والغبار والخرابات,,
والحرابات الإسفيرية القذرة وأصوات القبح والخبوب....

الاخت رشا تحياتي

لقد طفح الكيل اخيرا في هذا المنبر.....

ولا خير فينا ان لم نقل كلمة الحق......

لقد كثرة المهاترات والاسقاطات بالصورة والقلم...

ولا بد من وقفه....

فان لم نحترم انفسنا لن يحترمنا الاخرين....

وقد هرب الكثيرين من هذا المنبر لذلك...

وقال احدهم ان في المنبر بضاعه جيده واخرى فاسده ولنا ان نختار احداهما ...

فيا عجبي ان نسي ام تناسي مثلنا السوداني...

البصله العفنه بتعفن البصل كله...

وان كل ما يكتب في هذا المنبر ينعكس تاثيره علي اعضائه جميعا...

فما هو السبب

من النقاط التي اري مراجعتهافورا هي الحريه المطلقه التي اعطاها المنبر للجميع فبين الحريه والفوضي شعره....

ان شدت الشعره انقطعت وان رخيتها فكت...فهذه الحريه التي اعطاها المنبر للجميع استغلت من البعض وكانت خربشات في جدار المنتدي

واعلم جيدا ان هذه المساحه او قل السهله ان جاز التعبير لا توجد في اي منتدي اخر ولا في الاجهزه الاعلاميه في جميع

انحاء العالم عجمي كان ام عربي فلماذا لانصون هذه الامانه التي منحها المنبر لنا في ضبط الالفاظ والمناكفات وان نربي

بانفسنا من المهاترات حتي لايفقد المنبر مصداقيته التي بناها خلال السنين الماضيه...واعلم جيدا ان مقص الرقيب لا يتدخل في اي مفرده

حتي قارب في بعض المناقشات حد الفوضي التي يجب ان نعمل علي ايقافها مادامت اصبحت ديدن هذا المنبر...وده بذكرني سوق الاحد.والسؤال

الذي يطرح نفسه هل لو اعطيت هذا الحريه لنا بهذا المستوي في السودان هل سيكون الوضع كما هو الان في هذا المنبر؟

اخوتي واخواتي علينا البعد عن الاسفاف ونبش عورات الاخرين وان نسمو بنقاشنا الي مستوي الامانه التي اوجدها لناهذا المنبر وان نتوثق

من الخبر قبل نشره والاخبار مختلفة الانواع منها الخبر العام ويحتاج الي وثائق والخبر الخاص الذي يجب ان نتحري فيه الدقه قبل نشره

مع الاخذ في الاعتبار الا يسبب ازعاجا للاخرين خاصة اخبار الوفيات حيث في بعض الاحيان يكون قريب المتوفي لم يصله الخبر من اهله ويجده

في المنتدي ونكون قد سببنا صدمة له وليس خدمه....فليكن هذا المنبر انموذجا للحريه والديمقراطيه التي نحلم بها

واستغفر الله لي ولكم وان عدتم عدنا من اجل منبر حر معافي من الاسفاف والمهاترات....منبر نحترم فيه انفسنا والاخرين..

منبر نحافظ فيه علي تقاليدنا وموروثاتنا السمحه....

اللهم ها قد بلغت اللهم فاشهد.....

واخيرا استغفر الله لي ولكم

Quote: لماذا هذا الغضب العظيم يارشا سودانيس اونلاين دي زي سوق ليبيا فيها بضاعه تمام التمام فيها بضاعه فاسده ===== فيها بضاعه غاليه جدا وفيها بضاعه رخيصه ومتهتكه =============== فيها سوق الحرامية سارقي جهود وعرق الاخرين وفيها اصحاب الجهود الذين يتفرجون عليهم ساخرين ========================== فيها الصالح وفيها الطالح ======================= فيها وفيها وفيها وفيها ==================== بس الحمد لله فان الغالب الاعم هم الطيبون اللطيفون المهذبون ==================== انا ماعارف المشكله شنو معاك لكن حبيت اوضح ليك المسالة وكوني بخير (عدل بواسطة Elmosley on 04-04-2008, 12:38 م)

قولنا قالوا الموصلى
الحكمة من لسان العظماء
والزول الفنان زول ماساهل
بيقيس الامور برؤية انسانية
اى زول عندو مبدأ خاص
وانتى اتعاملى بالعام
شكرا رشا

الأخت رشا
أتفق معك في وجوب التصدي لجميع أنواع التجاوز اللفظي و بالطبع يكون التصدي أوجب عندما يتعلق الأمر بإحدى الأخوات. الذين يلجأون إلى تخويف النساء بالشتائم التي تمس (الشرف!) يعبرون عن خوائهم و خسة أخلاقهم و يستحقون أن يتم التصدي لهم.

معقولة بس يا رشا
حقك علينا وزعلك والله ما بندورو وزي ما تفضل اخونا الموصلي
وبعض الأخوان من الجنس الخشن بطرح وجهة نظرهم مفروض تهدي
شوية وتنزلي لينا كم قصيدة كده من قصائدك الجميلة وما في زول بستاهل
زعلك والله انتي إنسانة دواخلك نقية بحكم معرفتي القليلة بيك يا رشا.

ــــــــ
رشا حاتم .. ازيك

ياخ وريني الزعلك ده حتي كما قاصدك ..

علشان امشي و(اضبحه من الاضان للاضان )

انت (نواره) المنبر ده ..بي كلامك السمح داك

والرز ..ومعارف شنو كده .. فروحك مرحه وحلو

ليه الزعل ؟

تحياتي

Quote: ادينا نماذج يا رشا حتى تتم محاصرتها بالرأى العام

فعلا هذا هو المطلوب حتى لا يفلت هؤلاء الاوغاد بفعلتهم
ثم ان اللاكثرية يدخلون البورد فى اوقات محدودة و قد لا يمرون بمثل هذه البوستات

العزيزة رشا حاتم سلامات

والله العظيم يمرضوكي يا بت أمي
إلا الأسلوب القذر يخيل لي سجية ، يعني مش مكتسب بس.
وبعدين هو الرصيد الوحيد لأصحاب الإسفاف والمفلّسين والمفلسات.
خلط الأوراق هو أسلوب العايبيين صراحة.
وانحدار في القدرات والخُلق.

ألاحظ ذلك عند الانهزام يلجأ المفلس إلى نسب الشخص أو محارمه، أو خلقه أو...
افتكر الحالات دي وليدة مرض نفسي مخلوط بسوء أدب ومجافاة ملكة الصبر وأدب الحوار ( حالة معطل فيها دور الدين).

نتيجة هذا العمل الديماغوجي :
صرف الكل عن المشكل المستوطن في البلاد وصرف الكل عن الجادة بل حتى عن النكتة البريئة.
أثمن اتخاذ إجراءات صارمة ضد منتهكي حرمات الغير لمخالفته للأصول والخلق والقيم السمحاء ولدوره في تأجيج البغضاء واستهلاك الوقت بلا طائل
دومي بخير

Quote: لماذا هذا الغضب العظيم يارشا سودانيس اونلاين دي زي سوق ليبيا

أستاذنـا الموصلى،
بالله خلى واحـد فى سـوق ليبيـا يسئ لأمرأة هناك، وشــوف كم عصايـة يقعوا فوق راسه!
سـوق ليبيـا هو سوق اهلنـا الغبش، الأميين (فى الغالب)، ولكن عندهم القيـم والفطـرة
الســودانيـة الأصيلـة.. حتى مسـاعديـة اللوارى والبصات الذين يضرب المثل بمعظمهم
فى الشفتنـة والصعلقـة، لا يتجرأ أحدهـم من المسـاس بأمرأة، أبدا، بل تراهـم يخاطرون
بحياتهم للدفع عنهـا.
بعض الســودانيين هنا صـاروا مسخـاً مشـوهـاً، ولو كان الأمر فى حدود أفرادهـم لكان
أهون ولكن الجديـد أن منهم من يتلقى الأوامـر من قادته السياسيين لإسكات زيد أو عبيد
عن طريق البلاك ميلنق Black mailing، ومنهم من باع نفسـه لمنظمات أجنبيـة نظير
دريهمات معدودة.. فيكون لهم حامى الحمى والحارس الأمين.. وهم يرشدونه كيف يسئ
ويستفز الناس وينشـر الأكاذيب الملفقـة ضدهـم، حتى يتوقف عن نقد أسيادهـم!
كل هـذا يا يوسف معروف ومرصـود جله. نحن نظلم أهلنـا فى سوق ليبـا وشوارع السودان
لو قارناهـم بهـؤلاء.

Quote: اعتبره كل كتابك هذا(طمثك) واقصده طمثك الحقيقي الذي اسبابه بيولوجي او فسيولوجية

تعليق أحد اعضاء البوردفى بوست يوجد فى الصفحة الاولى


اها رشا ما عندها حق؟

Quote: تعليق أحد اعضاء البوردفى بوست يوجد فى الصفحة الاولى اها رشا ما عندها حق؟

والله يا هشام دا مستوى ما مفروض الناس تسكت عليو.. ويفترض يكون عندنا موقف ادبي اتجاه الانزلاق والانحطاط بالحوار الى المستويات المبتذلة دي..

بالجد كدا لا خير فينا ان لم نفعلها..

لا حول ولا قوه الا بالله العلي العظيم



دي عقد نفسيه مزمنه ...نسال الله له الشفاء

رشا بدون زعل كدة

هتافاتك دى مضرة ما كويسة

Quote: دا مستوى ما مفروض الناس تسكت عليو

ياتو مستوى ؟؟ ومستوى منو ؟؟

طبعآ ما قاعد أغالطك وعارفك قاصدة شنو .. وإمكن منو ..

لكن إنتى مسحتى بالمنبر الأرض .. وكلنا جواهو ؟؟

أكتبى عديل .. (يا فلان الفلانى .. هذا فعل مشين)
وسيبك من العاملين رجال .. كان الرجالة مقياس .. إنتى بألف رجل

Quote: حليل الرجال الجد.. الكان الواحد فيهم بيقنع الكاشفات.. موش يكشف المستورات..

الاخت رشا

نحن موجودين بخير و كثرة

حبابك

Quote: اي زول عندو اعتراض علي وجهة نظر انسان معين او انسانة معينة يبقى يلتزم بمبدأ الحوار الديمقراطي وادب اختلاف وجهات النظر..

اخاف أن نتعلم بعد فوات الاوان ...
ليه انحنا عدائيين مع بعضنا البعض ..
لماذا الترهيب والاساءة والتشهير لمن يختلف معك في وجهة النظر ..
التحية لك اختي رشا ..
والبقاء للجيد ...
تحياتي للجميع بحب ...

يا رشا

انا شخصيا ما عندي كلام خايف منو

واي زول يقول شتمتو يجب كلامو

ونحاسب بعض

ومافي زول كبير على الغلط وعلى الحساب

ده نموزج

Quote: حزب الأمة = حزب الحقراء = حزب السياسة القذرة . رئيسه مجهول النسب ابن رئيسه وحرس رئيسه امنجيه واكثر كذاب ممثل له في البورد نص مكنة

Quote: محمد احمد الدنقلاوي كاذب ودجال عبد الرحمن المهدي عميل للانجليز الصديق المهدي متيس وعميل للاسرائيلين الصادق المهدي مجهول النسب وعميل لكل دكتاتور بشرى الصادق المهدي كلب امن ..

لا تتوقعوا مني ان امد خدي الايسر لمن يصفعنا

حتى ولو جو كل ناس حزب الامة وكل المنبر

الكلام المنمق والمجاملات والمطايبات هي البتضر بالمنبر

هل من قانون يردع عادل عبد العاطي ..في التطاول علي الانس...لقانون) ارجو الإفاده

ده المرجع

والناس ما تشوف الفيل وتطعن في ضلو

جيبو كل الاتكتب في المنبر

ونخلي البوست ده محاكمة تاريخية

والرهيفة التنقد

زمااان يا رشا ، اتفقنا نعمل بوست ، كخنص فقط في الاساءات التي يكتبها العضو (وبالمناسبة ، لا تعتبر اساءه اذا قارنتيها بما يقال هذه الايام ) المهم ، واتفقنا ان نقوم بعمل اقتباس لاي كلام سئ في البورد ونلصقه في البوست المعني مع كتابة اسم الكاتب ، وحذف اسم الشخص المساء اليه ، الفكرة كانت اشبه باعداد قائمة سوداء ، للاعضاء ولكن فشلت التجربة نسبة للمجاملات المحيطة بنا ....



ملاحظة ساي لالله كده

لماذا دائما اراكم تلبسون الاخلاق ثوب الرجل ؟ يعني تكررت كلمة رجال او اخلاق الرجال كثيرا في بوستك هذا؟

بعض تجليات عادل عبد العاطي الفكرية !!!

Quote: الكلب والتيس الضكر: والتيس الضكر من بين كل الحيوانات؛ يكره الكلب؛ ويبدو ان الكلب ايضا لا يحبه؛ فحينما رايت كلبا وتيسا ضكرا؛ رايت الاول يطارد الثاني؛ وذلك لما عرف فيه من صفات منحطة؛ ولما استقبحه فيه من رائحة . واذ وجد التيس الضكر فرصة؛ فانه يشتم الكلب؛ واذ اكتسي حلة آدمية؛ فانه يصف اعداؤه بالكلاب؛ وما عرف ان الكلب من لم يعرف للكلب ستين اسما؛ كما قال المعري؛ عندما وصفه تيس آخر بالكلب؛ وما عرف التيس الضكر ان الكلب مضرب العهد في الوفاء؛ وانه مفيد للحي الذي تمر به قافلة التيوس؛ وانه صديق الانسان الاول من بين عالم الحيوان؛ وانه الاذكي من بين الحيوانات مع الحصان والدلفين والقرد ؛ ولكن كل هذه لا يعرفه التيس الضكر؛ ولذلك فانه عندا يري كلبا او انسانا يكرهه ؛ فانه يصرخ ويقول: ايها البليد المتفق علي بلادته؛ انا اكثر ذكاءا منك ؛ انت بليد وانا الاشطر؛ انا التيس الضكر

المصدر

التيس الضكر ..

وهنا يصف عادل بشرى الصادق بالكلب

هل كلب الأمن بشرى الصادق المهدي أيضاً يشع نوراً؟؟ او في...لمخلوقات النورانية !

للاسف هذا هو عادل عبد العاطي

رشوية يا بت امي

بتحفري في البحر سااااكت
الله يعينك

سلامات رشا حاتم .......

قال الامام الشافعي ....



إذا رمت أن تحيا سليماً من الردى ودينك موفـور وعرضـك صيـن
فلا ينطقن منـك اللسـان بسـوأة فكلـك سـوؤات وللنـاس السـن
وعينـاك إن أبـدت إليـك معايبـاً فدعها وقل يا عين للنـاس أعيـن
وعاشر بمعروفٍ وسامح من اعتدى ودافع ولكن بالتـي هـي أحسـن

اختي رشا اتفق معاك تماما .... فينا من يراي انها الحرية التي كفلها له هذا
المنبر ولكن شتان بين الحريه الفوضه.......

عموما ياستي هي المنابر فيها وفيها

دربك اخضر

لا تغضبي... فانا ايضاً احس انك صرخت في وجوهنا .... صرخت وصرخت وصرخت.... لكنني عذرتك لانني افهم دوافعك.... يبدو انك انسانة جيده!!!

لمن كنت ازعل شديد كان ابوي الله يرحمو يقول لي والله انت يا ولدي مسكين!!! الزول ما بسمح لي اي زول انو يزعلو... بعدين يا ولدي الناس ديل ما كعبين والله بس جاهلين!! يعني هم ما قاصدين يضروك او يزعلوك للاسف).... ثم يضحك بضحكته الساخره واستمر هكذا.... يعيش حياته وكأنه يفعل شيئا اخر , ويفهم بعمق حديث عمر ابن الخطاب أعقل الناس اعذرهم للناس) واستمر يعاملهم باحسان...
كان يقول لي أيضاً( يا ولدي ما تطالب الناس باكبر من امكانياتهم... هم لو فاهمين الكلام البتقول فيه ده او بقدرو عليه كان عملوه)!!.

مشاكلنا كبيره يا رشا نحن اكبر من اكبر زعله!!!

سلامات يا رشـا ..
والهل ما من عادتي اطرح مشكلتي في غير مكانـه ..
لكن طالما المسالة جابت ليها قرف زي دا .. والناس يادوووبه صحت وعرفت خطورة الحاصل هنا .. وللاسف الشديد الغير مسارنـا وبقانا رباطية عديل كدا نربط في الشارع .. وزي ما بقولو ناس الكوتشينة طلعنا منها .. يللا خليني اقول ليك:
وين من زمان الكلام دا ..؟
عندي مواقف واضحة هنا ضد الاسفاف دا .. وفي واحد سال واحده قال ليها إنت مطهرة واللا ما مطهرة ..
عديل كدا بالواضح .. ولما قلنا الكلام دا غلط قالو انتو كيزان وما وطنيين ..
طيب جميل الكلام دا كان قبل فترة .. ورخينا ونسينا
حسع دي جابني الكلام الكتبو هشام المجمر دا ..

Quote: اعتبره كل كتابك هذا(طمثك) واقصده طمثك الحقيقي الذي اسبابه بيولوجي او فسيولوجية

وحقيقة ما عارف الكتبو منـو ..
لكن انا حسع دي طالع لي من حصة تشريح وعلم جينات من بوست تاني ..
ايه رايكم ياجماعة في ( حنة وختة وحفلة ) اسفيرية!

Quote: المقدم (تمبس) ما علاقتك ب(التور اب زنود) واغاني الحماسة والفروسية والنضال لفاقد نخوة وشهامة ورجولة وانت قريب الدم بالشهيدة الخالدة التاية ابو عاقلة واولي الناس منا جميعابالاتيان بثارها من قتلتها الاحياء الحقيقيين والذين لا تجرؤ علي قولة ( اف) في وجوههم بل الانكي انك لا تستحي حين تدبج في حق كلابهم قولك ادناه:

ودا كان التبرير للكلام الفوق دا ,,.

Quote: يفتقد الانسان (الرجولة) او (الرجالة) بمفهومها المعنوي وليس البايلوجي اي الذكورة عندما يقبل الظلم والقهر والذل والهوان ولا يستطيع ان يواجه ظالمه ومهينه بكلمة الحق ردا لاعتباره لكرامته وشرفه حيث هذاالظالم اوصل البلاد الي حالة من الفقر المدقع اصبح من السهولة ان تبيع الحرة فيه شرفها وكرامتها بسبب الجوع الكافر والناتج عن سياسات غير عادلة اشاعها هذا النظام الظالم والذي اطال ظلمه وظلامه فينا هؤلاء الصامتون امثال(تمبس) والذين بلا استحياء يمدحون كلابه وعساسيه...وهنا يفتقد الشخص الرجولة وهو يصير ديوثا اي قوادا يقبل ولا يرفض ان تستقبل العاصمة القومية في بلاده في الشهر اكثر من مائة لقيط بالحرام وان يحصد( الايدز) مئات الالوف من شبابنا,,, ويتشرد ويضيع الملايين ويقتات بعض الصبية في زمن المسغبة من رزق تجود به مؤخراتهم! ان شاء الله فهمت يا سعادتو المقدم(تمبس)!

.. ووحات خوتك لحدي الآن راسي بيعمل زننن وما فاهم حاجة .. في انتظار ان افهم ..
والبوست دا والله عايز بصراحة اشوف المعائير المذدوجة بتاعت الناس دي هنا شكلها ح يكون كيف ..
لكن مبدئيا كدا .. اي واحد شايل ليهو معيارين وجاي داخل .. احسن ليهو يقعد في مكانو بعيد ويخلي الناس تعالج .. والساقط يقولو ليهو إنت ساقط .. وفكونا من تبريرات الكلام المعلب ومحشى دا .. وحنك وطنيين وما وطنيين .. دا كلام اصبح ممجوج وما بيأكل عيش .. باختصار كدا .. دا كلام ساكت ..


استاذنا موصلي:
ياخي انت استاذ ومربي اجيال وليك مواقف واضحة هنا دا . كلام سوق ليبيا دا ما مفترض يصدر منك ..
الغلط غلط يا استاذ .. والديمقراطية .. وحرية الرأي ليها سقف محدد للفرد .. لا يتجاوز به حرية الآخرين .. وإلا كان الردع الصارم لكل باحث عن شكل هذه المساحة نضيفة ..
سوق ليبيا فيهو برضو النشالين والحرامية .. لكن كمان ما ممكن نخليهم يسرقو عينك يا تاجر .. ونقول دا سوق ليبيا كمان ..

سلام...

انت راجل موضوعي جدا... انا جيتكم قريب لكن محبط من المستوي الفكري للمنبر بالجد محبط !!!
الناس ما يزعلو من كلامي ده لكن الناس اي زول كويس بكوركو فيه ويتهموه لمن يسكت , المواضيع البتلقي رواج في الاعم هااااااااايفه..... المقالات المهمه والتاريخية بتندثر سريييييييع والبقروها حببببه... العناوين البتعلق فوق للمنبر ما موفقه والاخطاء الاملائية مرات بتطاله زي كلمة "نموذج" المكتوبه هسي.... نحن ما محتاجين نقول الحكومة كعبه... نحن محتاجين نعرف كيف نغير, كيف نأثر, كيف نكون موضوعيين عشان نقدر نحدد ابعاد مشاكلنا... زي البوستات والتعاطف الكبير الكان من كل الناس للاخت سناء بحترمو جدا لكن ما بحترم لسطحية مناقشة الامر ومسبباتو والجهل وخطرو علي حياة الانسان وتحكمو في مصايرنا واقدارنا لدرجة انو طالب جامعي في واحده من اكبر جامعاتنا يقتنع بانو يكب مويه الساعه تلاته في وش اختو وهي نايمه !!!

وعوا اي زول سطحي وما تعزلوه وحافظو علي اي زول كويس واستمراريتو.. والله القوي

سلام...

انت راجل موضوعي جدا... انا جيتكم قريب لكن محبط من المستوي الفكري للمنبر بالجد محبط !!!
الناس ما يزعلو من كلامي ده لكن الناس اي زول كويس بكوركو فيه ويتهموه لمن يسكت , المواضيع البتلقي رواج في الاعم هااااااااايفه..... المقالات المهمه والتاريخية بتندثر سريييييييع والبقروها حببببه... العناوين البتعلق فوق للمنبر ما موفقه والاخطاء الاملائية مرات بتطاله زي كلمة "نموذج" المكتوبه هسي.... نحن ما محتاجين نقول الحكومة كعبه... نحن محتاجين نعرف كيف نغير, كيف نأثر, كيف نكون موضوعيين عشان نقدر نحدد ابعاد مشاكلنا... زي البوستات والتعاطف الكبير الكان من كل الناس للاخت سناء بحترمو جدا لكن ما بحترم لسطحية مناقشة الامر ومسبباتو والجهل وخطرو علي حياة الانسان وتحكمو في مصايرنا واقدارنا لدرجة انو طالب جامعي في واحده من اكبر جامعاتنا يقتنع بانو يكب مويه الساعه تلاته في وش اختو وهي نايمه !!!

وعوا اي زول سطحي وما تعزلوه وحافظو علي اي زول كويس واستمراريتو.. والله القوي

المؤسـف أن كـل هـذا الإسقـاف وهـذا السقـوط من أناس نالـو حظـا من التعليـم
بل يحمـل معظمنا شعارات الوطنية وراية التغييـر

العـلاج هـو عـدم شخصنـة الأمـور

لربما لن أحتاج لاكثر مما قلته فى مداخلتى للأخ مجدى فى بوسته هذا:

معا جميعا من اجل منتدي حضاري معافي

Quote: بواقعية شديدة إن أردت: " منتدى حضارى ومعافى " فأنت تحتاج لأدوات لهذه الصفات الكل يعلم أنه فى ظل وجود عدد من الأقلام لن تتحقق هذه الأمنية بكل أسف !!! أى بعبارة أخرى أنت تحتاج للتخلص من عدد كبير من العضوية لنجد منتدى حضارى ومعافى فقيل آخر العلاج الكي لربما لاحظت أنت أن عدد من البوستات فتحت خلال الفترة الأخيرة تركز على أن يصبح المنتدى نظيف سيرة وسريرة لكن لا حياة لمن تنادى فأنت لا تجد نقاشاً جاداً لا تجد أفكاراً تقارع بمثلها لا تجد من يوقف هذا الهدر فى الأخلاقيات لا تجد من يبكى على شرف الكلمة. لا تجد . . . . . . . بكل أسف هذه الخدمة موقوفة مؤقتاً. . . لكنى أتضامن مع دعوتك وسأرفع يدى لرب السماء فهو القادر على ذلك ووليه فنعم المولى ونعم النصير ولا حول ولا قوة الا به

الطريف إن مثل هذه البوستات والبوستات الجادة لا يتداخل فيها الكثير من الأعضاء

أتضامن مع كل ما ذهبتى إليه اختى رشا ، ، ،

وأعتقد جازماً أن الغالبية من أعضاء المنتدى هم من الأقلام الجيدة واللسان العفيف

لأنه بكل بساطة يمكنك إحصاء الأقلام التى هى غير ذلك

والحمد لله الدنيا بخيرها

وقد قال المصطفى عليه أفضل الصلاة وأتم التسليم

الخير فى وفى أمتى الى أن تقوم الساعة

فقط أنظرى الى النصف المملوء من الكوب يارشا ، ولا يخدعك الجزء الفارغ










شيخ العرب

العنوان ده خايل علي الصفحه الأولي واحداثها وشعور الأشمئزاز..

فوق..

وتااااااااااني فوق

لحين ميسرة....

Quote: للساقطين من ابناء وطني.. لا مكان لكم بيننا بعد اليوم...

وإليك أهدي :
زهوري اليانعه ، إهـــــداء إلى : خدر .. تمبس .. صديق الموج

أبحثوا عن الجمال وانثروه ما استطعتم

أقدر غضبك ,وأتفهمه
لك التحايا والود




.........
قبل يومين كتبت بوست عن خطوره الكتابه فى المنبر..تصورى برغم المشاهدات لم يفتح على أحدهم بكلمة..بينما بوستات الكلام الفارغ ,تجدين المشاركه تكاد تكون سباقا

رشاء تحياتي

أجبت إذ ناديت حياً ولكن ....

Quote: ودا كوم والشفتنة البقت في البورد دا كوم تاني..

وياستي دا كوم وزعلك وغضبك إنتي كوم تاني

نأمل وكم هي كبيرة الآمال ولكن ... البناء يحطمه أعداء الإنسانية
نأمل أن تُبثْ روح ودودة بين الأعضاء عامة وفى إيصال رسالة بسيطة مفادها إن لم تستطع أن تفيد الآخرين بها- بألا تسبب الأذى والضجر من خلالها.
ولتعتمد أولا وأخيرا على جدية الطرح والتناول وحميمية التواصل والحرص على إبقاء ودعم روح المودة والتلاحم .ان زمننا الآن زمن التجاوب والتواصل والتفاعل كلٌّ في حدود إمكاناته مهما ضاقت حدودها .

للساقطين من ابناء وطني.. لا مكان لكم بيننا بعد اليوم واضيف وساقطات القول ...