قناة هارموني تبّث إعلان سهرة حنان بلوبلو.. وهي (بلوبلو) .. تنفض غبار السنوات الماضية وتستعيد بريقها الفضائي هذه المرّة.. وماحدش أحسن من حد..
إعلان السهرة.. فيه بلوبلو .. بإبتسامة عريضة.. ومعها فرقة إستعراضية كاملة.. ورقص ما بعده رقص.. مسحت عيوني.. وقلت معقول دي قناة سودانية!؟
أهذه العولمة؟ أم الباك لاش .. ورّد الفعل للقيود المفروضة على كل إمرأة تهّوب ناحية الشاشة القومية..
_____ من جهة أخرى .. ظهرت عافية حسن بقناة زول وحاولت أن تغني "زيدني من دلّك شوية" لسيد خليفة.. فجنت على الأغنية .. وعلى المشاهدين..
_____ وسعدالدين .. كالعادة.. يبيع الموية في حارة السقايين أمس مع الإذاعي محمد خير البدوي والفنان الشامل سامي المك.. وعرفت لماذا يبدع الناس ويتميزوا خارج السودان.. فيعلوا شأنهم ويفوزوا بالجوائز.. ولماذا يغتس حجرهم وتموت مواهبهم بداخل بلادي..
إرتدى سعيدالدين في هذه السهرة قميص من البلاستيك الأسود... وكان ناقصه بس موتر هارلي ديفيدسون..
______ ومع عودة بلوبلو.. تعود لكم الدرر والدراب.. وفي حلّة جديدة ايضا.. ما فيها مساء جديد ولا بليد.. لا تسابيح ولا بقية العقد الفريد في عصره.. ولا الشاب المزعج داك في برنامج مراجعات بالشروق.. ولا رهام وهي تحسب ألو مرحبا برنامجا..
______ بكل أسف قنعت من خيرا في الفضائيات السودانية.. وتحوّل الشغف بريحة البلد .. الى قرف..وأسف.. لكنه أضعف الإيمان..
ونعود..
Post: #2 Title: Re: درر .. ودرّاب.. مقتطـفـات فضائية .. وغير فضائية.. Author: Osman Musa Date: 04-02-2008, 08:03 PM Parent: #1
نجوان يا طاعمه سلام اها . اقتطفى زى ما تقتطفى . تحياتى وشكرى على البوستات أم دم شربات .
رحم الله بوستات الربع الأول من هذه السنة 2008 التي يعدها أهل الرياضيات سنة كبيسة ويتشاءم بها ( أهل البوكر ) إذ أن محصلتها صفر ( بيش ) . من تلك البوستات ما كتبتيه وعملت ( خروج بلا عودة ) حنـان بـلوبـلو بهـارمـوني.. أي معلومـات؟ في ذلك البوست كان لي مداخلة معك أعيدها هاهنا حيث بدأت هذا البوست بـ ( بطلة ) طرفة المداخلة .
Quote: تحياتي وسلامات يا نجوان
أهديك ( طرفتنا ) مع حنان بلوبلو
الزمان 1984 المكان مدينة السجانة بالخرطوم
كنا شلة أصدقاء تخرجنا لتونا من الجامعة واستأجرنا سكناً في هذه المدينة ، كان زميلنا ( م ) يعمل في وكالة السودان للأنباء وبهذه الوضعية فقد كان مصدرنا الأساسي للأخبار ( الطازجة ) ، كان ( م ) ربما بحكم عمله شديد الإهتمام بالأخبار والتحليلات السياسبة ولا يتعبه البتة أن تكون كل نقاشاته في هذا الإتجاه . لم نكن مثله تماماً ، كنا نحب الوسطية في كل شئ ، لكنه كان ينظر لإهتماماتنا بالكورة و الكوتشينة والحفلات على إنها ( إنصرافية ) لا تجوز لمن هم مثلنا . ولأن القلوب كانت عامرة بالمحبة فقد ( تحملنا ) و ( تحملناه )
المهم يا ستي ( تلك الفذلكة كانت مهمة لمعرفة أجواء الطرفة )
لا حظنا أن الساعة الخامسة مساء ساعة مقدسة في يوم صديقنا ( م ) ، يسوق ( عربيتنا ) الجماعية لآخر الميدان الذي يطل عليه بيتنا ويظل بداخل العربة لمدة ساعة أوساعة ونصف ويعود راجعاً . لفت ذلك نظرنا فلم نسأله ، تتبعناه يوماً خلسة ، وعندما إقتربنا لاحظنا أنه يستمع لجهاز التسجيل باهتمام شديد فسرح بنا خيال تلك السن إلى أنها قصة حب يخفيها عنا . إقتربنا من العربة بحذر وفوجئ بنا داخل المقعد الخلفي ولم يستطع من ( لخمته ) إيقاف شريط الكاسيت . كان الشريط لفنانة تلك الفترة حنان بلوبلو ألمني وسافر ما كلمني حمادة دا
وكان ضحكنا الهيستيري أن كيف يا من ( بستفتنا ) على إهتمامنا بالكورة وحفلات كبار الفنانين أن تتمايل طرباً مع حنان بلوبلو
نظر إلينا نظرة لم أستطع تصنيفها وأردف حكمته
" صدقوني ، في أعماق كل منا حنان بلوبلو عاوز يسمعها لكين خايف من كلام الناس "
قبل قليل بهارموني.. أغنية حقيبة بالرّق الأصلي الزمان داك .. الأغنية للعبادي.. "ببكي وبنوح وبصيّح.."
الفّنان متمكّن.. صوت بدوي قوّي.. شايل الرق القديم.. في سوق أمدرمان.. كما يبدو.. . .
. .
. .
الفنان.. قاعد في سطح عربية.. لابس جينز.. تي شيرت أبيض.. قصة شعر قصيرة.. بالجل.. ونظارة شمس على نهاية الأغنية ترينرز بيضاء.. (سنيكرز يا نا س كندا وأمريكا..) والكورس (ما قدرت أقول شيّالين ) قاعدين في راس فورويل.. ولا شئ قريب من كده.. لابسين جينز.. بنطلونات كاموفلاج.. وغايتو!
إخراج الجعيلي.. والفنان.. في تترات النهاية.. أحمد البنا..
النبي يا نجوان جيبي لينا من الدراب بتاع الحبكانات داك..
الفيهو (الفيتيو كلب ) والجكسوية حردانة من الجكس والا الاتنين مجكسين في حدايق ستة ابريل امات كراسي حديد مصدية ديك وهو لابس نضارات الشمس ويطوطح لينا في يدينو واصابعينو.. غايتو وهمة اليدين دي ناس الراب زاااااااااتم قشروها ليهم
والا الرشاقة بتاعة شروق في غنيتا الطارحة فيها روحا بت ام لعاب ديك.. واااااااااااااي انا غايتو بالغت.. والله لما اشوفا اتذكر الاهزوجة (حلوة اهزوجة دي موش؟ ) بتاعة حبوبة زمان لما تحنسنا للاكل "جانا كلب سنونو صفر قلب الناقة في الشنقاقة كرج يا فار.. بتريد ماما والا بابا؟؟)
_____ هالة أغا قبل شوية.. قيديو كليييب من إخراج الجعيلي.. الأغنية ما مفهوم ليها أول ولا آخر.. (وده ما جديد) هالة لابسة زي فلاحة مصرية كدة.. (قلنا أوكيه ماااشي)
Quote: لكن.. قريب آخر الأغنية تشيل وتاكل في النجيلة!
تحياتي مجدداً يا نجوان
والله لو كنت المخرج، كان طوالي أجيب اللقطة البعديها وهي نائمة في السرير وبتاكل في الملاية، يعني نظام كانت حلمانة.أعتقد دا المخرج (بفتح الميم والراء) الوحيد.
طوال الفترة الماضية، ارتحت نسبياً من متابعة فضائاتنا إلا لمباريات كرة القدم (وهي بالمناسبة مصدر حقيقي للدراب ... والنجيلة )، ولكني من الآن وصاعداً سأحرص على المشاهدة، ليس بغرض الترصد وتصيد الأخطاء، بل بغرض التقييم. علٌ وعسى ينصلح الحال. أتمنى أيضاً أن ينتبه زملاء البوست القديم وعلى رأسهم ممكونة والباشمهندس أبوبكر ليتحفونا بملاحظاتهم القيمة.
هل من أخبار عن النجم الكبير عوض إبراهيم عوض. سؤال من a big fan
Post: #30 Title: Re: درر .. ودرّاب.. مقتطـفـات فضائية .. وغير فضائية.. Author: نجوان Date: 05-18-2008, 07:09 AM Parent: #29
Quote: من الآن وصاعداً سأحرص على المشاهدة،
أها وبعدين؟؟ شفقّتنا يا حسن!
Post: #31 Title: Re: درر .. ودرّاب.. مقتطـفـات فضائية .. وغير فضائية.. Author: نجوان Date: 05-18-2008, 07:25 AM Parent: #30
بعد غيبة طويلة.. فتحت التلفزيون على النيل الأزرق مساء أمس وشفت شخص يشبه الأستاذ محمد وردي بصورة غريبة! بس أصغر سنا..
قلت دي مسابقة ولا إيه
المهم.. إتضّح .. بعد أغنية كاملة.. غنّاها هذا الشخص.. أنه بالفعل عبدالوهاب محمد وردي.. وإتضح أيضا.. إنه إبن الوز.. ليس بالضرورة أن يكون عوّاما..
ورث عبدالوهاب فيما يبدو الكثير من والده.. الشكل.. الثقة بالنفس.. والجرأة أمام الكاميرا.. إلا أنه لم يرث أيا من جينات الغناء.. لا من قريب ولا من بعيد..
ربما بإمكانه كتابة ألحان.. قطع موسيقية.. لكنه ليس بمغنّي على الإطلاق.. ونجوم الغد.. يبدوا بدور إبداع مقارنة بعبدالوهاب..
فيا عبدالوهاب أرحم نفسك وأرحمنا..
_______ من جهة أخرى.. أبدع المذيع.. (اللي كان لا بأس به في برامج سابقة) في الإتيان بأسئلة قمّة في السخف.. فلسفة .. ولولوة.. أقرب لأسلوب سعدالدين..
أحد الأسئلة.. سأله المذيع بجدّية غريبة: "منو من الفنّانيين بتسمع ليهو؟.. منو بيثير إنتباهك.. يعني لو ماشي كده وسمعتو بتكون عايز ....أقول ليك السؤال بصورة تانية..إذا.." عبدالوهاب مقاطعا بإبتسامة "ما السؤال واضح!"...
المذيع مصرّا "يعني لو ح تغّني دويتو.. يكون مع منو من الفنّانين؟" !!!
Quote: وإتضح أيضا.. إنه إبن الوز.. ليس بالضرورة أن يكون عوّاما..
حتى لو كان عواماً جداً يا نجوان، ما مفروض يعيش على تراث والده بالمرة، والأمثلة كثيرة. عماد أحمد الطيب ظل يردد أغنية اشتهر بها والده حتى صار الناس يكرهونها ويكرهو اليوم الغناها فيه أبوه. ولمنه اكتشف ذلك بعد حين وحاول أن يؤسس لهويته الخاصة ونجح إلى حد ما.
حالة ثانية هي عز الدين أحمد المصطفى والذي لم يكتفي بأخذ أغاني والده الراحل، بل استعار منه نبرة الصوت والأسلوب الهادئ وبصورة تكاد تكون متطابقة تماماً، فهل أضاف جديداً؟ وهل حاول ولو على سبيل التجربة أن يغني أغنية خاصة به؟
لم اشاهد حلقة عبد الوهاب، ولكنني متأكد تماماً أن الأغنية التي أداها هي واحدة من اغنيات والده
Quote: يعني لو ماشي كده وسمعتو بتكون عايز ....أقول ليك السؤال بصورة تانية..إذا.." عبدالوهاب مقاطعا بإبتسامة "ما السؤال واضح!"...
لاحظت أن المذيعين الجدد ديل الواحد فيهم بيطرح السؤال كأنه مسابقة. وما عارف منو القال ليهم إنه الواحد لازم يفسر السؤال بعد طرحه لأن الضيوف ما بيفهموا من المرة الأولى. ولله في خلقه شئون.
Post: #33 Title: Re: درر .. ودرّاب.. مقتطـفـات فضائية .. وغير فضائية.. Author: نادية عثمان Date: 05-18-2008, 09:44 AM Parent: #32
الحبيبة صاحبة الاسم الجميل نجوان
صباحك بنكهة القهوة الحبشية السمحة !
والله سعدت لأن هذا البوست اطلّ هنا من جديد ليعطي التنوع المطلوب لواجهة المنبر التي أصبحت في معظمها صراخاً وعويلاً وشق جيوب ولطم خدود !!
شكراً جميلا للغة الراقية والمهذّبة في الطرح والموضوعية في النقد بخفّة ظل وروح حلوة تخرج من القلب ضحكة حقيقية والله في زمن ندُر فيه مجرّد الابتسام !!
أها أنا دوري ماجا يانجو ( نجو) دي نظام تكسير تلج عشان ( تسلخيني براااااااحة)
ودي فائدة العضوية هنا والصحوبية معاك المامتوفرة لسعد الدين وعوض ابراهيم عوض
هذا البوست ابتدرته واختارت عنوانه وأطلقته نجوان، ولكن كل هذا لن يمنعني من الترحيب بك هنا كصحفية مرموقة. ولا شك أن ملاحظاتك القيمةومهاراتك النقدية من واقع خبرتك كإعلامية محنكة سوف تسهم في إثراء البوست.
Post: #36 Title: Re: درر .. ودرّاب.. مقتطـفـات فضائية .. وغير فضائية.. Author: محمد الطيب حسن Date: 05-18-2008, 01:23 PM Parent: #35
درر
Quote: والله لما اشوفا اتذكر الاهزوجة (حلوة اهزوجة دي موش؟ ) بتاعة حبوبة زمان لما تحنسنا للاكل "جانا كلب سنونو صفر قلب الناقة في الشنقاقة كرج يا فار.. بتريد ماما والا بابا؟؟)
ودراب
Quote: لكن.. قريب آخر الأغنية تشيل وتاكل في النجيلة!
شفت كتير.. بالذات في الآونة الأخيرة.. من المغنيين أبناء فنانين.. بعضهم موهوب.. وإن لم يتحّرر من تأثير والده الفني.. بعضهم نصف موهوب.. والبعض موهبته أقّل
لكن لم أر مثل عبدالوهاب.. لا مقارنة بوالده.. ولا مقارنة بأي فنان صاعد آخر.. عبدالوهاب ببساطة ما بيعرف يغني مهما تفلسف ..وأقنع نفسه بغير ذلك.. بإختصار.. كان غناؤه من أردأ الغنا الذي سمعته حتى الآن..
لم أحضر اللقاء من بدايته.. لكنه لم يغني في الجزء الشفته أيا من أغنيات والده.. بل لم يتحدث عنه حتى..
مرة سألوا وردي عن أسوأ مغني .. فأجاب بكل الصراحة التي تميزه: عبد الوهاب وردي.
Post: #43 Title: Re: درر .. ودرّاب.. مقتطـفـات فضائية .. وغير فضائية.. Author: حمد فتح الرحمن Date: 05-18-2008, 09:58 PM Parent: #1
نجوان ازيك
المذيعة بتاعة برنامج شنة و رنة الفي هارموني ديك دردرتيها و لا لسة صوتا مزعج شديد
في واحدة من شناتا في سوق شعبي كدا لمت في حجة كبيرة بتبيع طباق و مفاريك و طواقي قش و حاجة يدوية قديمة بداية البرنامج عرفتنا بالحجة و بعديها طوالي تبدا تمسك مفراكة من مفاريك الحجة و ترفعا للكاميرا يا حجة الحاجة دي ما كان زمان ليها شنة و رنة و اسة انتهت الحجة مسكينة ما عايزة تبور حاجاتا القال ليك منو يا بتي الناس كلهم بشتروها
اها موضوع الحلقة كلو مساجلة بين الحجة و المذيعة في انو بضاعتا دي كان ليها شنة و رنة و انتهت مع الزمن و دفاع مستميت من الحجة في محاولة اثبات رواج الباضعة حتى الان
غايتو في النهاية طلعنا بي انها بوظت للحجة سوقا و الحجة ما قصرت فيها بوظت ليك برنامجا
Post: #44 Title: Re: درر .. ودرّاب.. مقتطـفـات فضائية .. وغير فضائية.. Author: نجوان Date: 05-19-2008, 04:56 AM Parent: #43
يا حمد فتح الرحمن.. يا حليل التلفزيون لما كان ليهو شنة ورنة..
____ البرنامج ده حضرت جزء منه مرّة واحده وضيفته كانت حواء الطقطاقة.. لقيت المذيعة كل دقيقتين بتقول "شنة ورنة".. شنو كده ما عارف.. "شنة ورنة"... وإيه كده .."شنة ورنة".. قلت أكيد ده تعبير أصبح من التعبيرات الموضة في السودان.. إتضّح إنه إسم البرنامج..
الفكرة حلوة.. بس سوء الإعداد..والعوارة!
_____
Quote: غايتو في النهاية طلعنا بي انها بوظت للحجة سوقا و الحجة ما قصرت فيها بوظت ليك برنامجا
واحدة بواحدة..
Post: #45 Title: Re: درر .. ودرّاب.. مقتطـفـات فضائية .. وغير فضائية.. Author: محمد الطيب حسن Date: 05-19-2008, 10:43 AM Parent: #44
غايتو يانجوان اجزم واكاد اقسم ( حلوه دي مش ) انو اي واحد ساعد او شارك في ا لكليب بتاع هاله غاغا زعلان منها او عايز ينتقم منها
بالغت لكن يا د / احمد فرح شادول
Post: #46 Title: Re: درر .. ودرّاب.. مقتطـفـات فضائية .. وغير فضائية.. Author: نجوان Date: 05-19-2008, 11:33 AM Parent: #45
Quote: هاله غاغا
أرجّح أن الغين الأولى غير مقصودة يا محمد الطيب
_____ هارموني دي زي علبة مليئة بعدّة اشياء.. بعضها جميل وقيّم.. والبعض الآخر خردوات وكرور غير مفهوم من شاكلة شنة ورنة.. والشابة ذات الصوت الكديسي.. البتجي بين البرامج "هارموني.. نبدع الماعارف شنو.."
بالنيل الأزرق.. لقاء مع عزالدين هلالي.. هو والمذيع.. في الخارج.. خلا كده في الحقيقة.. وسائد على الأرض.. شوية قاعدين.. وشوية متكيين ..الإتكاءة السودانية بتاعة حدائق 6 أبريل ديك
ونيران حولهم.. نيران حمراء على الأرض.. (إنشالله الحلقة تكون سجلت في الشتاء)..
طاقم البرنامج .. بالذات صاحب فكرة الديكور ده لم يكلفوا أنفسهم بنظافة مكان التصوير.. وإبعاد القش والحجارة.. وأشياء أخرى.. هلالي والمذيع قاعدين تقريبا كده في كوشة (معليش .. لم أجد كلمة أخفّ )
دي واحدة.
التانية .. مقدرتنا الغريبة على إعادة تدوير ..recycling .. الغناء والشعر.. يعني في 2008.. مازال هلالي يشرح أغنيته التي كتبها وغناها صلاح ابن البادية "في عيونا كنا بنشيل الصبر" و"قول النصيحة"..
حضرت جزء من لقاء آخر مع هلالي قبل أشهر.. وعلى نفس القناة.. دار نفس الحوار.. بى ضبانته..
اتخيلت المغنية البتاكل في النجيلة قبل ما أشوفها، إلى أن أنزل الأخ محمد الطيب مشكوراً الفيديو فوجدت أن الخيال لا يبتعد كثيراً عن الواقع، والمخرج لو شد حيله شوية وأضاف بعض الحوارات بلهجة صعيد مصر كان طلعنا بمسلسل جديد نتسلى بيه في رمضان الجايي
لكني حتى الآن أعجز عن تخيل
Quote: الشابة ذات الصوت الكديسي
Post: #51 Title: Re: درر .. ودرّاب.. مقتطـفـات فضائية .. وغير فضائية.. Author: نجوان Date: 05-20-2008, 06:32 AM Parent: #49
Quote: عفارم عليك يا أوباما
يا كوستا.. دع الأوهام جانبا..
أوباما الرجل المناسب.. في المكان غير المناسب
سيتقرمش.. كما البوبكورن.. في كابيتال هيل..ويشربوا وراهو بيبسي.. ديل بيقتلوا القتيل.. وبمشوا في جنازته.. عااادي.. بس هيلاري تعرف المدينة الظالمة جوّة وبرّة..
الحزب الديمقراطي في مأزق
_______ بلو بلو مالها كمان؟ غايتو!
Post: #52 Title: Re: درر .. ودرّاب.. مقتطـفـات فضائية .. وغير فضائية.. Author: نجوان Date: 05-20-2008, 06:50 AM Parent: #51
Quote: لكني حتى الآن أعجز عن تخيل
Quote: الشابة ذات الصوت الكديسي
ولا تتعب نفسك يا حسن في التخيّل.. عليك بهارموني في الفواصل بين البرامج ..
خليط من خفة الدم المفتعلة والعوارة.. لا أدري إن كانت هناك فضائية سوفيستكيتد بتجيب مذيعة تعلن عن "إبداع وتميّز" وكأنها في برنامج أطفال ياخ الشفع ذاتهم إستلموا القلاصة.. بقوا ما شفع .. يعني الشفع ما ح يرضوا بالمذيعة دي تتكلم معاهم بهكذا طريقة
______________ لسة أنا confused بخصوص الجعيلي.. هل هناك أمل.. أم أنه نفس قالب القائمين على أمر التلفزيون القومي والنيل الأزرق..
Post: #53 Title: Re: درر .. ودرّاب.. مقتطـفـات فضائية .. وغير فضائية.. Author: محمد الطيب حسن Date: 05-20-2008, 12:47 PM Parent: #52
العزيزه نجوان
Quote: أرجّح أن الغين الأولى غير مقصودة يا محمد الطيب
قبل كم يوم شفت حمزة عوض الله بيقدم ليه في برنامج من نوعية "آلو مرحبا .. منو معاي". وقدبان عليه التأفف، ربما لاعتقاده بأن مشواره الطويل في الحقل الإعلامي ينبغي أن يعفيه من تقديم مثل هذه البرامج السخيفة. ولئن اختلفنا أو اتفقنا على مدى كفاءته كإعلامي، إلا أننا نعتقد أنه كان محقاً في تأففه، فالـ ٌRookies على قفا من يشيل، فلماذا يفرضون على الـ veterans تقديم مثل تلك البرامج.
لم يتسنى لي التمعن للتأكد من اسم المحطة، ولكن ألم يعي أولئك أن مثل هذه البرامج التليفونية ينبغي أن تتوقف تماماً، وإن كان لابد، فلا بأس من حصرها على البرامج الحوارية التي تحتاج إلى بعض التعقيبات أو استضافة أطراف تعذر حضورهم للأستوديو.