كدي يا جماعة في الاول وقبال ما نبدا البوست دة نثبت حاجة عشان بعدين ما ديرين سلبطة ومعافرة. جميع طلبات الصداقة المقدمة بعد قراءة هذا البوست مرفوضة, انا امينة الصندوق ورئيسة لجنة الاختيار والمتابعة. والانتخابات عندنا لا حرة لا نزيهة يعني كل الطلبات يتم تمزيقها ورفضها دون النظر فيها يعني شغالين بي نظام الانقاذ
واما بقية الشباب والشابات الى ليقو ليهم فرقة كدة بالجنبة وقاعدييييييين ( الكلام دة ليك يا ناديا السر ويا حد الزين ويا .......الخ) انا قاعدة احفر ليكم وناويا ليكم نية ماااااااا ياها
يعني بي صراحة كدة وبي منتهى الشفعنة والعوارة الزولة دي صحبتي وممنوع الاقتراب والتصوير
ما عارفة شنو في هويتنا ولا تركيبتنا وتربيتنا بيخلينا نحن البنات ( بنشترك في تفاصيل بتاعات معاناة اعمق على اساس التقسيم الجندري) ما يكون في بيناتنا رابط اقوى وولاء لي شكل العلاقة البيناتنا, انا بقو ل الكلام دة عن تجربة وعارفة انو معظم البنات متفقين معاي لو ما وضوحا بالسر انو ممكن تكون شكل العلاقات البتربطم بالذكور البنية بتاعتة اكثر سطحية وما فيها ترابط وجداني زي الموجود بين الصحبات (لاحظو اني لمن اقول صحبات ما بتكلم عن اي صحبة ولاحظو اني بالاسم اخترتة ريهان الريح) لاكن في اول منعطف ولا مع اول ظروف حياتية جديدة غالبا بكون فيها وجود جديد لي ذكر بلعب دور الحبيب العلاقة بين البنت وصحبتة بتضعف وتخبى لمن تنتهي. هل السبب انو احنا ما قادرين نبني اكثر من علاقة ونشتغل فيها بمعنى نصقلة (كل العلاقات البناتنا وبين الناس محتاجة شغل عشان تستمر صحية) فبنختار العلاقة الجتماعيا رائجة ومفضلة ( الزواج) حتى لو كانت النتيجة اننا نفقد الشخص البيفهمنا ؟
دايرة اقول لي كل البنات العندهم صحبات بس ما ماخدين الموضوع دة بي جدية, الصحبة البيناتكم دي كنز ومورد ما بينفذ لو اتعاملتو مع بعضكن بي انسانية نسائية.
انا وريهان صحبات من بدري وخلال كل سنوات الصحبة البيناتنا ذكرياتي عنها كلها جميلة حتى الما جميل. اتخيلو زول بدون كلل ولا ملل يحبك ويهتمه بيك اذا كنتة سمح ولا شين, واعي ولا بتتبالد, مبتئس, مكتئب, موجود, بعيد.
انتي يا ريهان عاملة زي نواميس الكون ثابتة ومستمرة في حياتي مع كل التغيرات الحصلت والعمر المشى و الحتفال بيوم المراة العالمي ما هو الا احتفال بي صحبة, بي اخت ما ولدتة امك, بي شابة عندها كمية من المشاكل والمضايقات في مجتمع زي مجتمعنا لاكن لسة عندها نفس وروح تسمعك ولو ما قدرت تنصحك تكون موجودة حولك. في نظري ده هو العيد البستحق انو البنات يحتفلو بيه اكتر من فالنتين واعياد الميلاد, عيد المراءة يا ريهان كان احتفال بي سنوات صداقتنا,احتفال بي الظروف السمحة العرفتني بيك.
وختاما فقد تقرر تغير قواعد واصول اللغة بحيث انو كل الكلمات الجميلة تبقي انتي مدللولة. يعني لمن نشوف بت سمحة نقول "عاينو البت الريهاتية دي " ولمن نشوف زول فاهم وواعي واخلقو عالية نقول ايوا ده زول ريهاني ..... يعني يا ريهان من الخر كدة انتي ريهانية خااااااالص
الجماعة البقروا في البوست ما حيرضو يغيروا كلمات اللغة عشان رفضنا طلباتم بس ما تشتغلي بيهم حتكون كلمت ريهان دي كود بيني وبينك زي كل الكودات المرت علينا وقوت صداقتنا
Quote: انتي يا ريهان عاملة زي نواميس الكون ثابتة ومستمرة في حياتي مع كل التغيرات الحصلت والعمر المشى و الحتفال بيوم المراة العالمي ما هو الا احتفال بي صحبة, بي اخت ما ولدتة امك, بي شابة عندها كمية من المشاكل والمضايقات في مجتمع زي مجتمعنا لاكن لسة عندها نفس وروح تسمعك ولو ما قدرت تنصحك تكون موجودة حولك. في نظري ده هو العيد البستحق انو البنات يحتفلو بيه اكتر من فالنتين واعياد الميلاد, عيد المراءة يا ريهان كان احتفال بي سنوات صداقتنا,احتفال بي الظروف السمحة العرفتني بيك.
المقطع دة يا رجاء ما ناقصاهو غير خلفية موسيقى كمنجة ربنا يديم صداقتكم الحقيقية
Quote: انا وريهان صحبات من بدري وخلال كل سنوات الصحبة البيناتنا ذكرياتي عنها كلها جميلة حتى الما جميل. اتخيلو زول بدون كلل ولا ملل يحبك ويهتمه بيك اذا كنتة سمح ولا شين, واعي ولا بتتبالد, مبتئس, مكتئب, موجود, بعيد.
دي صداقة عجيبة, شي كدة زي من الف ليلة وليلة مفروض يحكوها زي قصص قبل النو للشفع بسبب الدرجة العالية بتاعت الكمالية الفيها غايتو يا lana بس بتمنى ليك تلقي الانا لقيتو
Quote: الجماعة البقروا في البوست ما حيرضو يغيروا كلمات اللغة عشان رفضنا طلباتم بس ما تشتغلي بيهم حتكون كلمت ريهان دي كود بيني وبينك زي كل الكودات المرت علينا وقوت صداقتنا
رجاء هاشم ازيك
اكيد بوجود اصحاب رائعين بتستمر الحياة بشكل افضل...دمتم اصدقاء ولك التحية
Post: #4 Title: Re: ريهان الريح الشاذلي Author: حسين يوسف احمد Date: 04-02-2008, 12:42 PM Parent: #3
Quote: وختاما فقد تقرر تغير قواعد واصول اللغة بحيث انو كل الكلمات الجميلة تبقي انتي مدللولة. يعني لمن نشوف بت سمحة نقول "عاينو البت الريهاتية دي " ولمن نشوف زول فاهم وواعي واخلقو عالية نقول ايوا ده زول ريهاني ..... يعني يا ريهان من الخر كدة انتي ريهانية خااااااالص
سلام يا رجاء .. والله أنا شخصيا بتفق معاك في إنها زولة فاهمة وواعية وأخلاقها عالية جدا جدا .. بس عيبها الوحيد في فهمها دا إنها زي ناس جمال الصادق وانعام عبدالحفيظ . لم أتشرف بمقابلتها وجها لوجه ولكن المنبر أتاح لنا بعض التواصل وعرفت قيمة معدنها وأصالته ونبله .. دامت لك .. ولنا .. ودمت أيضا ..
طبعاً كلام المودة والمحبة المكتوب عن ريهان ده ، بيعبر عني أنا كمان ، فريهان فعلاً من الشخصيات النادرة .. نادرة في إيمانا بحاجات ونادرة في طريقة تعاطيها مع الحاجات دي والناس .. كمان بيعجبني فيها مساحة السماح والتوليرانسي الموجودة عندها ..
بالنسبة لحكاية وجود الذكر في حياة الأنثى الذي يجعل علاقتها بالأنثى التانيه تخبو وتخبو ، فأفتكر إنو الموضوع ما كده بالظبط ، يعني الحكاية ما ذكر وأنثى لأو برضو في أولاد تلقي أصحابم بيشتكوا ويقولوا إنو فلان ده من ما عرف لانه ، خلاص ، فك شوطنا ونسانا !!
الحكايه كلها إنو في ناس ما بيعرفوا يعملوا أكتر من حاجه وحده في وقت واحد ، وفي ناس Multi Track ، بيقدروا يرعوا أكتر من علاقة وأكتر من نوع في وقت واحد ..
بس انتة قولتها ....... اصحاب رائعين = نوعية حياة افضل
يعني مفروض نفكر في الاصحاب زي تفكيرنا في الراتب الاحسن والبيت السمح والعربية الاخر موديل , كلهم ضرورين لراحة حياتنا
Raga
Post: #6 Title: Re: ريهان الريح الشاذلي Author: انعام عبد الحفيظ Date: 04-02-2008, 12:53 PM Parent: #1
Quote: انا وريهان صحبات من بدري وخلال كل سنوات الصحبة البيناتنا ذكرياتي عنها كلها جميلة حتى الما جميل. اتخيلو زول بدون كلل ولا ملل يحبك ويهتمه بيك اذا كنتة سمح ولا شين, واعي ولا بتتبالد, مبتئس, مكتئب, موجود, بعيد.
انتي يا ريهان عاملة زي نواميس الكون ثابتة ومستمرة في حياتي مع كل التغيرات الحصلت والعمر المشى و الحتفال بيوم المراة العالمي ما هو الا احتفال بي صحبة, بي اخت ما ولدتة امك, بي شابة عندها كمية من المشاكل والمضايقات في مجتمع زي مجتمعنا لاكن لسة عندها نفس وروح تسمعك ولو ما قدرت تنصحك تكون موجودة حولك. في نظري ده هو العيد البستحق انو البنات يحتفلو بيه اكتر من فالنتين واعياد الميلاد, عيد المراءة يا ريهان كان احتفال بي سنوات صداقتنا,احتفال بي الظروف السمحة العرفتني بيك.
Quote: واما بقية الشباب والشابات الى ليقو ليهم فرقة كدة بالجنبة وقاعدييييييين ( الكلام دة ليك يا ناديا السر ويا حد الزين ويا .......الخ) انا قاعدة احفر ليكم وناويا ليكم نية ماااااااا ياها
انا اسمى مكتوب هنا ؟
ايوة ........ طييييييييييييييب يا رجوية
حقيقى سعيييييييدة و فخورة لاقتران اسمى بصداقة سرمدية ريهانية تجمعنا انا و انت و بت الشاذلى!
كدي يا جماعة في الاول وقبال ما نبدا البوست دة نثبت حاجة عشان بعدين ما ديرين سلبطة ومعافرة. جميع طلبات الصداقة المقدمة بعد قراءة هذا البوست مرفوضة, انا امينة الصندوق ورئيسة لجنة الاختيار والمتابعة. والانتخابات عندنا لا حرة لا نزيهة يعني كل الطلبات يتم تمزيقها ورفضها دون النظر فيها يعني شغالين بي نظام الانقاذ
يا سامر
يعني بعد المقدمة الطويلة الانا كاتبها تجي تقولي حاجز
Post: #17 Title: Re: ريهان الريح الشاذلي Author: Ibrahim Algrefwi Date: 04-05-2008, 11:26 AM Parent: #1
يا سلام ، والله ريهان لطيفة ياخ ، بسامة وبتسلم علي الناس بوش سِمح وخالي من التوترات ، بلاقيها مرات لي مرات بعيدة في أنشطة وأمكنة عامة ، فعاليات ثقافية وإجتماعية ومناسبات اصدقاء مشتركين ، دائماً ما تلقاني- ككل الناس - بطريقة مرحابة تحترم وجودك ، ده طبعاً غير إنو ريهان اخت أصحابي ( وطبعاً ده كريدت جندري ) ... شُكراً يارجاء ، ويابختك بصديقة ، فليس هناك - بالاطلاق- أجمل واعمق من ان يكون لك صديق ، صديق تحب وهو معك قبل ان تفقده ، بالسفر او بالزمن او بسواه ، هل هناك اجمل من ان تحب مافي يدك ؟
اااه يا كيبورد في ناس كده في الدنيا لمن تجي تقول فيهم كلام تحتاج الي روح قدس ومقدرة عالية علي امتصاص التداعيات التي يرسلها وهجهم العالي.... ريهان الريح زولة من رحيق ونبض بلادي وقلبها الطيب مساحاته قادرة علي التمدد في كل مساحات المليون ميل مربع... لريهان التحايا والتقدير وسعيدين كوننا عشنا عصر صداقتنا لريهان الريح الشاذلي وبرضو نقول (سمح) ياريهان.!!!
وشكرا يا رجاء علي هذا الوفاء النبيل لصديقتك الرائعة ريهان
يا اخوانا ..القصة وما فيها انو رجاء رمتني بداءها وانسلت .. طول عمرها اخت اخوات طوالي محيطانا بعطفها وحنيتها وبالها الطويل وسغالتها وحاجت كتيرة من النوع البيكسرني
ياخي ربنا يديك العافية وتعيشي وتملينا بوستات وشكرا شديد لكن بالله المرة الجاية اشيري ولو بطرف صغير لحكاية المراتب والسفنجات ...
لنا مهدي..يا زولة الله يخليك ويديكي العافية قمر بوبا ..والله صحوبية رجاء دي بتعمل وجع راس وقلب غايتو الله يصبرني .. حسين يوسف... بعثيين وحات اسم الله بعثيين (دايما كنت بقول ليهم الاشقاء البعثيين ديل المغالطهم منو يتحلفو فينا كده) سلامات يا زول وشكرا كتيييييييير
طلال عفيفي.. والله كلام يا دكام يا يمة وقت في الاجتماعات تهرشني وتسكتني مالك ما بتتذكر جنس الكلام السمح ده ..عالم الا يزروها...
انعام ام توب مشتاقين كتير يا زولة..
سامر.. والله كتر خيرك ومقصرين نحن في السؤال عن الجمعية لكن متابعين برضو...
Quote: اااه يا كيبورد في ناس كده في الدنيا لمن تجي تقول فيهم كلام تحتاج الي روح قدس ومقدرة عالية علي امتصاص التداعيات التي يرسلها وهجهم العالي.... ريهان الريح زولة من رحيق ونبض بلادي وقلبها الطيب مساحاته قادرة علي التمدد في كل مساحات المليون ميل مربع... لريهان التحايا والتقدير وسعيدين كوننا عشنا عصر صداقتنا لريهان الريح الشاذلي وبرضو نقول (سمح) ياريهان.!!!
وشكرا يا رجاء علي هذا الوفاء النبيل لصديقتك الرائعة ريهان
مع التحية لصديقى كيكى.. دى من باب حقوق المؤلف وكدة..
