Post: #1 Title: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 05:55 AM Parent: #0
سيد عبد العزيز (1930_1975) نشأ وتربي في بيت عز وحسب..كان والده شيخ في الطريقة القادرية..تعلم صنعة الحدادة وعمل بعدها في النقل الميكانيكي ولكن هذا لم يمنعه من مجالسة الشعراء وتذوق الشعر والغوص في أعماقه هو وصحبه...ما أكسبه ملكة النظم وقدرته علي بث عواطفه الجياشة في المفردات... في فترة صباه قيل أنه كانت هنالك فتاة تدرس في كلية المعلمات بأمدرمان وكان شاعرنا متيم بها ولكنه لم يجرؤ علي الإقتراب منها بل كان يكتفي بأن يرقبها هي وصويحباتها عند خروجهن من المعهد من علي البعد.. كانت فتاته تخرج في المقدمة وتلحقها بقية زميلاتها وكأنها قائد لأسطول كبير تسير هي في مقدمته..فنظم فيها..
يا قائد الإسطول تخضع لك الفرسان .. يا ذو الفخار والطول أرحم بني الإنسان
ويواصل نجواه وحنينه الدائم إليها بصعوبة الوصول إليها وإنشغال الألباب بسحرها وجمالها..
مين لي سماك يطول .. مابطولك اللمسان .. معناك شرحو يطول .. والله يا إنسان .. أصدق كفاك مطول .. يا ذو الحسن وحسان .. أنا عقلي بيك مشغول.. والناس عقول ولسان ..
وإنتقل الشعر إلي مرحلة اللوم والعتاب من قلة الحنان وإخلاف الوعود وكلها تنصب في بوتقة الحب الصافي الطاهر... يا علة المعلول كم أومى ليك بنان كم من أسير مغلول مالاقى لحظة حنان يرى وعدك المحلول زى حجة الوسنان والكان سكونه تلول ما ببدلهم بجنان
وقفز الشاعر إلي النقطة الفاصلة بين فقدان العقل والإيمان وعاد إلي صوابه ولكنه في المقابل شحذ الأمان والسكينة..ويعاتبها بجرمها في النفوس والأفئدة المتيمة بهواها وما جناه حسنها وجمالها..هي أسمي آيات العتاب الرقيق واليائس والذي ينقل صاحبه إلي حيث لا قوانين تحكم سوي الحب ....
ما بنكر المعقول آمنت بالأيمان يالطلسم المصقول بدل لخوفى أمان بالنور سحرت عقول كانت صميمة زمان
يا من تحق القول قتل النفوس حرمان
وما الجندى والمكتول و طالب الغفران من أيده راح منتول واتوهد النيران فاقد الصواب مبتول مما رأى حيران أصبح زهر مشتول وفاح ملا الجيران
وسقط الشاعر بين مطرقة الحب والحنين وسندان العتاب والنجوي فجسد أحاسيسه ودوزنها لتعبر عن ما يجيش به فؤاده الطاهر الذي يري من خلاله المحبوبة وكأنها نجم بعيد المنال يراه الكل ولايري أحد وشبه خطاها وكانها أصول تدرس ولا تنسي من فرط جمالها وكمالها والكمال لله وحده..
يا حبيبي كون ممهول وليكون ماكان والفى غد مجهول والماضى إسمه الكان نفداك شباب وكهول ونبقى ليك أركان لحيك المأهول ونخدم السكان يالفى سماك مفصول تنشاف عيان وبيان ما عرفنا ليك وصول وما دنيت أحيان إنت الخطاك أصول يعلم بك الديان مثلت فينا فصول ما بيدرسها النسيان
رحم الله الشاعر الفذ سيد عبدالعزيز الذي سافر بنا في بحور الشعر المعتق المتمكن والذي جسد به أسمي آيات الحب العفيف والوصف المتقن للمحبوبة... حب لم تنطفئ جذوته خلال حياته والتي أوصلته للخلود. فامتطى صهوة جواد البوح ليلقى فى قلبه وقلوبنا شعرا نورانيا مصفى عفيفا خلد في قلوبنا وفاء وعلمنا معني أن نحب ...
قائد الأسطول
يا قائد الإسطول تخضع لك الفرسان .. يا ذو الفخار والطول أرحم بني الإنسان مين لي سماك يطول .. مابطولك اللمسان .. معناك شرحو يطول .. والله يا إنسان .. أصدق كفاك مطول .. يا ذو الحسن وحسان .. أنا عقلي بيك مشغول.. والناس عقول ولسان يا علة المعلول كم أومى ليك بنان كم من أسير مغلول مالاقى لحظة حنان يرى وعدك المحلول زى حجة الوسنان والكان سكونه تلول ما ببدلهم بجنان ما بنكر المعقول آمنت بالأيمان يالطلسم المصقول بدل لخوفى أمان بالنور سحرت عقول كانت صميمة زمان يا من تحق القول قتل النفوس حرمان وما الجندى والمكتول و طالب الغفران من أيده راح منتول واتوهد النيران فاقد الصواب مبتول مما رأى حيران أصبح زهر مشتول وفاح ملا الجيران يا حبيبي كون ممهول وليكون ماكان والفى غد مجهول والماضى إسمه الكان نفداك شباب وكهول ونبقى ليك أركان لحيك المأهول ونخدم السكان يالفى سماك مفصول تنشاف عيان وبيان ما عرفنا ليك وصول وما دنيت أحيان إنت الخطاك أصول يعلم بك الديان مثلت فينا فصول ما بيدرسها النسيان
أنقلها إليكم بأكثر من صوت وأتمني أن تنتقلوا معي رحاب الي الحب والشفافية....
_____________________________________ التعديل كان لتنسيق أبيات القصيدة..
Post: #2 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 05:58 AM Parent: #1
أولا بصوت سرور
Post: #3 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 05:59 AM Parent: #1
ثانيا بادي محمد الطيب... صراحة أعجبتني الأغنية بأداء الكروان الراحل...
Post: #4 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:01 AM Parent: #1
مبارك حسن بركات
Post: #5 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:03 AM Parent: #1
بصوت قيقم..
شوفوا الرمية القبال الأغنية رائعة كيف وهي في رثاء الراحل بادي محمد الطيب
Post: #6 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:04 AM Parent: #1
ومن الأصوات النسائية الرائعة حنان النيل صاحبة أقوي مخارج ألفاظ...
Post: #7 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:06 AM Parent: #1
وبصوت سليل العمالقة وأجدر من يحمل لواء الحقيبة من الجيل الحالي الرائع عاصم البنا..
Post: #8 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:08 AM Parent: #1
بصوت المجموعة (عصام محمد نور, أسرار بابكر, عاصم البنا, جمال فرفور, ونادر خضر)
Post: #9 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:10 AM Parent: #1
رغم تعاقب الأجيال وإختلاف الأذواق وإختلاف الأصوات تبقي الكلمة الجميلة هي الأقوي وتبقي ذكري كاتبها خالدة ... رحم الله مبدعينا بقدر ما أثروا حياتنا بحلو النظم وجمال الكلم...
Post: #10 Title: Re: رحلة ***قائد الأسطول** عبر الأزمان مع سيد عبدالعزيز Author: mohmed khalail Date: 03-24-2008, 06:18 AM Parent: #9
اهلين نها ..
اهلين يا غواصة في بحر النغم..
سجلنا اسمنا في دفتر الحضور..
متابعين
Post: #12 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:20 AM Parent: #10
حبابك مليون أخي محمد ونورت البوست... مودتي
Post: #11 Title: Re: رحلة ***قائد الأسطول** عبر الأزمان مع سيد عبدالعزيز Author: Balla Musa Date: 03-24-2008, 06:20 AM Parent: #9
Quote: في فترة صباه قيل أنه كانت هنالك فتاة تدرس في كلبة المعلمات بأمدرمان وكان شاعرنا موله بحبها ولكنه لم يجرؤ علي الإقتراب منها بل كان يكتفي بأن يرقبها هي وصويحباتها عند خروجهن من المعهد من علي البعد.. كانت فتاته تخرج في المقدمة وتلحقها بقية زميلاتها وكأنها قائد لأسطول كبير ..فنظم فيها..
الأخت نها
تحياتى وشكرا على هذا الدر المنثور والأختيار الجميل..
سمعت من أحد المهتمين بالحقيبة بأن هذه القصيدة رغم طابعها الغزلى ولكنها كتبت فى السيد عبد الرحمن المهدى. وقد قيل أن سيد والعبادى كانا من المقربين للسيد عبد الرحمن وانضم إليهما أبوصلاح بعد أن أعلن إسلامه على يد السيد.
Post: #14 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:38 AM Parent: #11
أخي الفاضل بلة تحياتي وتقديري أولا ألف شكر علي الإطلالة والإضافة الثرة.. ثانيا لقد بحثت كثيرا في مناسبة هذه القصيدة وسمعت الكثير من القصص ولكن قصة فتاة كلية المعلمات كانت المرجحة ...أتمني أن يساعدنا ذوي الخبرة في معرفة ماهية القصة الحقيقية هل هي فعلا في الفتاة أم في السيد عبدالرحمن المهدي.. وفي كل الأحوال هي قصيدة رائعة كتبها شاعر رائع وتغني بها فنانون رائعون...
أسعدني حضورك وشرفني وأتمني أن تساعدنا في البحث عن الحقيقة
مودتي
Post: #13 Title: Re: رحلة ***قائد الأسطول** عبر الأزمان مع سيد عبدالعزيز Author: Abdalla Alfadlabi Date: 03-24-2008, 06:33 AM Parent: #1
الشفيفة نها. لك من الاهداْْْء، اضعاف ما تحمل جوانحك من جمال.
Post: #15 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:40 AM Parent: #13
أخي الفاضل عبدالله
Quote: الشفيفة نها. لك من الاهداْْْء، اضعاف ما تحمل جوانحك من جمال.
لك من الشكر أضعاف ما تحمله كلماتك الرقيقة والمشجعه..
كامل مودتي وخالص تقديري...
Post: #16 Title: Re: رحلة ***قائد الأسطول** عبر الأزمان مع سيد عبدالعزيز Author: Emad Abdulla Date: 03-24-2008, 06:42 AM Parent: #13
إنّا لله .. إنتي ما نصيحة .
هسه الواحد يعمل شنو ؟؟
Post: #17 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 06:46 AM Parent: #16
أخي الجميل عماد كيفنك؟؟
Quote: إنّا لله .. إنتي ما نصيحة .
الحال من بعضو
Quote: هسه الواحد يعمل شنو ؟؟
تسمع الأغنية وتورينا عجبتك بياتو صوت مع إنو الإختيار صعب بين جميل وبديع وحلو.. لكن لو وصلت لنتيجة ورينا...
Post: #18 Title: Re: رحلة ***قائد الأسطول** عبر الأزمان مع سيد عبدالعزيز Author: صديق الموج Date: 03-24-2008, 07:07 AM Parent: #1
Quote: يا حبيبي كون ممهول وليكون ماكان والفى غد مجهول والماضى إسمه الكان نفداك شباب وكهول ونبقى ليك أركان لحيك المأهول ونخدم السكان
نها ابو راس..ورينا قصدك شنو؟؟ اها وبعد تلحقى ليك زول الرقدو ..تستفيدى شنو؟؟ تخيلى اصلحك الله... ونخدم السكان... بعدين اتخيلى زمان الخدمة كانت المويه بجيبوها بالجوز يعنى صفيحتين مع بعض وفى وسطهم عود ... والحطب يكسروه من اخر الدنيا... والبيوت كبار .. غايتو يا نها انا فى حيك مقيم.. لك الشكر اضعاف ما اسبغ حاج الماحى واسهب فى مدح المصطفى عليه الصلاة والسلام..
Post: #19 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 07:17 AM Parent: #18
أخي الرائع صديق كيف أخبارك ويين ماظاهر...
عارف..نزلت ليك في بوست جسمي المنحول وصفة طبية ناجعة ومجربة..إسمها أملي وغاية المنية..وماوريتنا النتيجة عشان نقدر نواصل في صيدلتنا دي واللا نشوف لينا شغلة تانية...
عديييييل كده وبدون لف ودوران قصدي أساهر بيك وبي كل الناس عشان ما أجن براي بالغنا الصعب ده..
Quote: تخيلى اصلحك الله... ونخدم السكان... بعدين اتخيلى زمان الخدمة كانت المويه بجيبوها بالجوز يعنى صفيحتين مع بعض وفى وسطهم عود ... والحطب يكسروه من اخر الدنيا... والبيوت كبار ..
شوف البساطة بتتخلل الكلمات كيف..وفي نفس الوكت المفردات متماسكة وقوية جدا والمعاني المن وراها دنيا تانية...عليك الله الجماعة ديل ماحققوا المعادلة الصعبة ووصلوا للمستحيل...
Quote: غايتو يا نها انا فى حيك مقيم.. لك الشكر اضعاف ما اسبغ حاج الماحى واسهب فى مدح المصطفى عليه الصلاة والسلام..
وأنا أتشرف بوجودك في حينا البمثل أكبر إضافة ليه..وربنا مايحرمنا من طلتك أخي صديق..
مودتي الخالصة
Post: #20 Title: Re: رحلة ***قائد الأسطول** عبر الأزمان مع سيد عبدالعزيز Author: Elbagir Osman Date: 03-24-2008, 07:24 AM Parent: #1
شكرا نها
مجهود كبير يناسب القصيدة التاريخية
بس
أعتقد النص الصحيح لصدرالبيت:
Quote: أنا عقلي بيك مشغول
هو أنا عقلي بيك مسطول
وحورها البعض لاحقا
لاحظي أن المقطع يلتزم لزوم ما لا يلزم في القافية
الباقر موسى
Post: #21 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 07:29 AM Parent: #20
أخي وأستاذي الفاضل الباقر
تحيات طيبات شكرا ليك كتير وعلي حضورك الذي شرفني..وأشكرك علي التعديل ...الحقيقة أنا سمعتها كثيرا لأتأكد من نطق الكلمات ولكن يظهر لعدم وضوح الصوت إختلط علي اللفظان أشكرك مرة أخري
مودتي
Post: #22 Title: Re: رحلة ***قائد الأسطول** عبر الأزمان مع سيد عبدالعزيز Author: وائل فحل Date: 03-24-2008, 07:48 AM Parent: #21
.. عمل جميل يا نها .. .. الاغنية دي انا كمان سمعتها بصوت الفنان الشاب محمود عبد العزيز , ولا اخفى عليك اننى عرفت عندها المعنى الدقيق لعبارة ( تواصل الأجيال ) !! فمحمود قدمها بصورة جميلة جدا , للأسف لا املك التسجيل الان , سأحاول ان انزله لاحقا , واتمنى من الاخوة ان يفعلوا لو تيسر لهم ذلك. .. تحياتي
Post: #23 Title: Re: رحلة ***قائد الأسطول** عبر الأزمان مع سيد عبدالعزيز Author: Ahmed al Qurashi Date: 03-24-2008, 12:16 PM Parent: #22
الأخت العزيزة / نها محسن أبو رأس
دائما مبدعة استمتعت كثيرا بهذه القصيدة وأتمنى أن تجودي برابط الحفظ لان بعض القراء لايملكون الانترنت السريع لذلك يستمعون إلى الأغنية مقطعة.. مما يقلل من نشوة الاستمتاع .. أغنية قائد الأسطول هي من الحان الحاج محمد احمد سرور ولقد سجلها لشركة ميشان سنة 1935 وكان معه في الكورس عطا محمد وبشير سليمان وعبدالروؤف عطية وعلى الكمان السر عبدالله ثم بعد ذلك سجلها لبرنامج الحقيبة في الإذاعة والذي كان يقدمه المذيع على محمد شمو الفنان عبيد الطيب وكان ذلك سنة 1955 وكان التسجيل على الاسطوانات ثم سجلها الفنان عبيد الطيب مرة أخرى سنة 1958 على الشرائط الممغنطة .. وفى بداية الستينات سجلها للإذاعة الفنان بادي محمد الطيب .. حكي لي الفنان بادي محمد الطيب إن مسابقة قد أجريت بمسرح الإذاعة لأغنية قائد الأسطول ولقد كان مشتركا في هذه المسابقة الفنان عبيد الطيب وعبدالعزيز محمد داود وأولاد المأمون وآخرين وبعد انتهاء وصلاتهم صعد بادي إلى المسرح ولم يكن وقتها معروفا وطلب غناء هذه الأغنية ووافقت اللجنة على ذلك وساعده الفنانين الذين ذكرتهم ككورس.. فأبدع بادي ونال الجائزة الأولى وهى راديو ترانزستور وكانت البداية الفعلية لهذا الفنان العظيم ... أتمنى عزيزتي نها إن تتحفينا بالتسجيل القديم لأغنية قائد الأسطول بصوت بادي (بدون موسيقى ) .. ومن يملك تسجيل الأغنية بصوت عبيد الطيب يكون قد أكمل اللوحة ...( عبيد الطيب كان يسمى تلميذ سرور )
Post: #24 Title: Re: رحلة ***قائد الأسطول** عبر الأزمان مع سيد عبدالعزيز Author: هاشم أحمد خلف الله Date: 03-24-2008, 01:05 PM Parent: #23
اختي الشفيفة الجميلة نهي , نفسي أدخل في عروقك واغوص في محراب فنونك وانتشي من باقي فنك واعبر الأزمان لـِ محلك واستفيد من صافي عِلمك وابقي تلميذ يحفظ إسمك ورغم علمي بصغر سِنك صرتي اكبر بفصاحتك ومواهبك وذكائك وحِنك . نهي كل مرة إكتشف فيك شفافية غير عادية , ربنا يحفظك ويخليك لينا في هذا المنبر الكبير الذي اصبح ملجانا الوحيد من هجير الغربة وضغط العمل وتسلط اصحاب العمل , لقد قضيت ما يقرب من الساعة وانا اتنقل من أغنية إلي اخري بنفس الكيف والمزاج . شكراً جميلاً نهي وإنشاء الله نفرح بتخرجك وبزفافك قولي آمين .
Post: #25 Title: Re: رحلة ***قائد الأسطول** عبر الأزمان مع سيد عبدالعزيز Author: محمد المرتضى حامد Date: 03-24-2008, 08:02 PM Parent: #24
قائد الأسطول يا نها
والشكر لموقع الحلاويين
Post: #26 Title: Re: رحلة ***قائد الأسطول** عبر الأزمان مع سيد عبدالعزيز Author: الطيب شيقوق Date: 03-24-2008, 08:39 PM Parent: #25
نها بت اب راس سلام
المرتضي
ودالقرشي
انتو بجاى ؟ حراااااااااااااام عليكم ما تكلموني بهذا الابداع
زعلان ومع السلامة
Post: #27 Title: Re: رحلة ***قائد الأسطول** عبر الأزمان مع سيد عبدالعزيز Author: GamarBoBa Date: 03-24-2008, 08:59 PM Parent: #26
شيقا برضو هنا زعلان؟؟؟ لازم ترجع
عبد العزيز دفع الله عبدالعزيز ابن اخ الشاعر سيد عبد العزيز زميل دراسة وصديق عزيز دائما يحكي لي عن سيد عبدالعزيز
سأجعله غدا يحكي لكم
وسنعود
شكرا نها.....
عمدة قلت هسة نسوي شنو
بس غني مع سيد عبدالعزيز واظننا طرينا عزيز قبل ساعات في ونسة
Post: #34 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 10:51 PM Parent: #27
أخي الكريم قمر بوبا
شكرا ليك كتير علي الإطلالة ويديك ألف عافية.. ونحن في إنتظار الأستاذ عبدالعزيز علي أحر من الجمر ليحكي لنا عن سيرة العبقري الراحل سيدعبدالعزيز....بس قول ليه ماتطول علينا
مودتي
Post: #33 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 10:49 PM Parent: #26
أخي الجميل الطيب شيقوق كيفنك والله نورتنا وشرفتنا كتييييير
Quote: المرتضي
ودالقرشي
انتو بجاى ؟ حراااااااااااااام عليكم ما تكلموني بهذا الابداع
زعلان ومع السلامة
إنت هنا في دارك ومع أهلك ونحن ضيوف عندك...عليك الله نحن لاقينك وين.. وكلو إلا زعلك ..وعشان نرضيك بهديك الأغنية بصوت الأمين البنا وإنشاءالله تعجبك لانها تسجيل قديم.. الامين البنا
Post: #32 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 10:30 PM Parent: #25
أخي الرائع محمد المرتضي
كيفنك ؟؟
ياسلاااام عليك والله البوست فعلا كان محتاج لصورة للكروان الراحل بادي...والحقيقة أنا فتشت علي صورة كبيرة وواضحة ليه ومالقيت..والحمدلله إنت قمت بالمطلوب وجبت صورة فاقت كل التوقعات...
شكرا ليك مرة تانية وشكرا لموقع الحلاوين...
مودتي
Post: #31 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 10:26 PM Parent: #24
أخي الجميل هاشم
Quote: اختي الشفيفة الجميلة نهي , نفسي أدخل في عروقك واغوص في محراب فنونك وانتشي من باقي فنك واعبر الأزمان لـِ محلك واستفيد من صافي عِلمك وابقي تلميذ يحفظ إسمك ورغم علمي بصغر سِنك صرتي اكبر بفصاحتك ومواهبك وذكائك وحِنك .
دائما تخجلنا بكلماتك الرقيقة والجميلة والتي أشعر بأنني لا أستحقها... لأنك إنسان دواخلك كلها جميلة تري فقط الجمال...ربنا يديك ألف عافية علي تشجيعك الدائم لي..
Quote: نهي كل مرة إكتشف فيك شفافية غير عادية , ربنا يحفظك ويخليك لينا في هذا المنبر الكبير الذي اصبح ملجانا الوحيد من هجير الغربة وضغط العمل وتسلط اصحاب العمل , لقد قضيت ما يقرب من الساعة وانا اتنقل من أغنية إلي اخري بنفس الكيف والمزاج .
إنشاءالله يارب ربنا يسعدك ويخفف ليك آلام الغربة لأنها فعلا قاسية وملجأنا الوحيد هو المنبر البحسسنا إننا لسة مع أهلنا وناسنا..ربنا يجمعك بيهم وتلقاهم كلهم بخير يارب...
التخرج وإتخرجناه أما الزفاف فأجلناه لكن عشان دعوتك الجميلة دي آميين
مودتي وتقديري ياأحسن زول
Post: #30 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 10:13 PM Parent: #23
أخي وأستاذي د. أحمد القرشي دائما مشاركاتك معانا ووجودك في أي بوست هو إضافة حقيقية ومفيدة والحقيقة نحن دائما ننشدها لما تتسم به من معلومات دقيقة ونادرة عن حقبة قلما نجد من يعلم بأغوارها وأسرارها..فلك الشكر أجزله علي ماتقدمه وماقدمته... الحقيقة ..لقد عثرت علي تسجيل قديم للأغنية ولا أعلم إذا كنت تعنيه هو بالتحديد.. أما بصوت عبيد الطيب فسأجده إنشاءالله..
بادي محمد الطيب
وأتمني أن تساعدنا للوصول إلي القصة الحقيقية لقائد الأسطول..والتي إختلف فيها الكثيرون..فياريت تفتينا... أما أغنية أنة المجروح فأنا الآن أجمع أكبر عدد من الأصوات التي تغنت بها ومن أجيال مختلفة وأتمني أن تكون مشاركة دسمة بمساعدتكم وتوجيهاتكم... موجتي وتقديري
Post: #29 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 10:07 PM Parent: #22
أخي الفاضل وائل شكرا علي إطلالتك الجميلة ...
بهديك الأغنية بصوت محمود عبدالعزيز وأنا تحت الأمر في أي طلبات أغاني
مودتي
محمود عبدالعزيز
Post: #28 Title: Re: رحلة ***قائد الأسطول** عبر الأزمان مع سيد عبدالعزيز Author: Alsa7afa_30 Date: 03-24-2008, 09:30 PM Parent: #1
تسلمي يا نها على الروائع ..
Post: #35 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 10:52 PM Parent: #28
أخي الجميل حسام شكرا علي طلتك الجميلة مودتي
Post: #36 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-24-2008, 10:53 PM Parent: #1
أستاذ أحمد القرشي سأقوم بتنزيل جميع روابط الحفظ بإذن الله..
Post: #37 Title: Re: رحلة ***قائد الأسطول** عبر الأزمان مع سيد عبدالعزيز Author: الملك Date: 03-25-2008, 00:27 AM Parent: #1
بوست جميل بشكل,,!!
Post: #38 Title: Re: رحلة ***قائد الأسطول** عبر الأزمان مع سيد عبدالعزيز Author: Hamza Abdelghani Date: 03-25-2008, 01:40 AM Parent: #37
ابداع وحاجة حلوة
Post: #39 Title: Re: رحلة ***قائد الأسطول** عبر الأزمان مع سيد عبدالعزيز Author: مصطفي سري Date: 03-25-2008, 02:06 AM Parent: #38
قريبتي نهى ابوراس .. مثلتي فينا فصول تعرفي لمن خليل فرح النوبي كتب القصيدة بتاعت الحقيبة عمل تحول ... لانو كتب قصيدة وطنية هي عزة في هواك .. وانت النوبية اليوم تقدمين ابداع جديد ... تخصص حقيبة ... وتذوقك للحقيبة يعني انك ... حقيبة ... وكفى ..
Post: #40 Title: Re: رحلة ***قائد الأسطول** عبر الأزمان مع سيد عبدالعزيز Author: Balla Musa Date: 03-25-2008, 02:36 AM Parent: #39
وما أجمل سيد فى معارضته لقيس بن الملوح فى قصيدته ماشقيتك عندما قال:
الإبار الدقت شفاك والخضاب الحنن يداك هل خطيبا طالب يداك ولا زينك قلبوه ينك
وقال على لسانها: لاخضابا حنن يدايا ولاخطيبا طالب يدايا هذا أثر البكا ياضنايا
وقيس عندما قال:
لما التقينا بسبح رامة** رأيت بنان العامرية أحمرا فقلت خضبت البنان بعد فراقنا** قالت معاذ الله ذلك ماجرى لكننى لما رأيتك راحلا** بكيت دما حتى بللت به الثرى فمسحت بأطراف البنان مدامعى** فصار خضابا باليدين كما ترى
Post: #45 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-25-2008, 04:38 AM Parent: #40
أخي الفاضل بلة
كيفنك وأنت تثري البوست بحلو الكلام ودقيق المعلومات.. وزي ماعملت المقارنة الجميلة جدا بين:
نفس المعاني وأيضا البيت المشهور للرائع عتيق في قصيدة جسمي المنحول:
كيف ليك وصول... وسكونك فوق بين سهيل وثري
Quote: وما أجمل سيد فى معارضته لقيس بن الملوح فى قصيدته ماشقيتك عندما قال:
الإبار الدقت شفاك والخضاب الحنن يداك هل خطيبا طالب يداك ولا زينك قلبوه ينك
وقال على لسانها: لاخضابا حنن يدايا ولاخطيبا طالب يدايا هذا أثر البكا ياضنايا
وقيس عندما قال:
لما التقينا بسبح رامة** رأيت بنان العامرية أحمرا فقلت خضبت البنان بعد فراقنا** قالت معاذ الله ذلك ماجرى لكننى لما رأيتك راحلا** بكيت دما حتى بللت به الثرى فمسحت بأطراف البنان مدامعى** فصار خضابا باليدين كما ترى
ياسلااااااااااام عليك يارائع وأن تنقلنا لذاك العالم البهيج.. شوف الزول ده كان كيف في المجاراة والرد وشوف تمكنوا التام من اللغة العربية وأسرارها وغموضها..والله حاجة تدعو للفخر إنو الناس ديل مننا ونشأوا وأبدعوا وهم في بلدنا.... نسأل الله لهم الرحمة والمغفرة...
وتسلم علي مشاركتك الرائعة وياريت تزيدنا منها...
مودتي
Post: #44 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-25-2008, 04:25 AM Parent: #39
قريبي العزيز مصطفي سري
مسكاقمي ..إلم بينا فيميني
Quote: تعرفي لمن خليل فرح النوبي كتب القصيدة بتاعت الحقيبة عمل تحول ... لانو كتب قصيدة وطنية هي عزة في هواك ..
الحلفاويين ديل دايما رواد يامصطفي في أي حاجة لأنهم بيبتدوا الإبداع وبعدين يجوا الباقيين ويكملوا.. الكلام ده بيني وبينك ماتكلم بيه زول عشان ما يكسرونا...
Quote: وانت النوبية اليوم تقدمين ابداع جديد ... تخصص حقيبة ... وتذوقك للحقيبة يعني انك ... حقيبة ... وكفى
والله انا عشان قريبتك مكبر لي كومي ساااااااااااي ...الموضوع كلو إني بحب غنا الناس دي شديييد وغيورة جدا عليه وعايزة جيلنا الحالي يتذوق حلاوة المفردات وروعة الأداء الإتسم بيها ذاك الجيل.. لكن شكرا ليك كتييير علي الإطراء.... وتحياتي لناس البيت
Post: #43 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-25-2008, 04:09 AM Parent: #38
أخي الكريم حمزة
شكرا علي وجودك معانا ويديك ألف عافية..
مودتي
Post: #42 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-25-2008, 04:07 AM Parent: #37
أخي الرائع الملك نورت البوست والله جميل بوجودك...
مودتي يا كينج
Post: #41 Title: Re: رحلة ***قائد الأسطول** عبر الأزمان مع سيد عبدالعزيز Author: محمد حيدر Date: 03-25-2008, 03:21 AM Parent: #1
الاخت نها مجهود توثيقي مقدر حقيقة أغنية قائد الاسطول تستاهل بخصوص الشخصية التي قيلت فيها هذه القصيدة فقد قرآت عنها زمان و لا اذكر تحديدا أين
فالشاعر سيد عبد العزيز كان يعشق في صمت احدى السيدات حفيدات الخليفة عبدالله التعايشي وكانت تسكن حي الامراء بالعباسية أمدرمان ولم يكن يجرؤ علي الحديث معها آنذاك وكان ينتظر خروجهامن كلية المعلمات ليتمتع برؤياها وقال فيها تلك المعلقة التي عقلت بعقل ووجدان الشعب السوداني
لك الود
Post: #46 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-25-2008, 04:40 AM Parent: #41
أخي الكريم محمد حيدر تسلم علي إطلالتك البهية...
وشكرا ليك علي تأكيد القصة التي ذكرتها في أول البوست ...فلقد إختلطت علينا القصص وصرنا ننقب وراء القصة الحقيقة لتلك القصيدة الرائعة...أتمني أن تكون فعلا هي القصة الحقيقية ..أو أن نجد ضالتنا المنشودة في أقرب وقت...
مودتي وتقديري الكبيرين
Post: #47 Title: Re: رحلة ***قائد الأسطول** عبر الأزمان مع سيد عبدالعزيز Author: Elbagir Osman Date: 03-25-2008, 05:21 AM Parent: #1
العزيز بلة
أوردت
Quote: الإبار الدقت شفاك والخضاب الحنن يداك هل خطيبا طالب يداك ولا زينك قلبوه ينك
والبيت الأخير
ولا زينك قلبوه شين
Post: #52 Title: Re: رحلة ***قائد الأسطول** عبر الأزمان مع سيد عبدالعزيز Author: Balla Musa Date: 03-25-2008, 03:13 PM Parent: #47
شكرا الباقر
Quote: ولا زينك قلبوه شين
لقد سقطت الشين و المقصود (شينك)
Post: #48 Title: Re: رحلة ***قائد الأسطول** عبر الأزمان مع سيد عبدالعزيز Author: mamkouna Date: 03-25-2008, 07:06 AM Parent: #1
في أجمل من إنو الزول يبتدي يومو بالبوست دا..؟؟!!
Post: #49 Title: Re: رحلة ***قائد الأسطول** عبر الأزمان مع سيد عبدالعزيز Author: salma subhi Date: 03-25-2008, 07:16 AM Parent: #48
يا نهى.... سلااااام الشاعر سيد عبدالعزيز قال...
الجِنان في الدنيــا والليالي تدور أم دي ليلة وجمعت بين شموش وبدور
وما أجمل ما جمعّت ومن جمعّت هنا.........
عميق ودي
Post: #55 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-28-2008, 06:15 AM Parent: #49
الرائعة جدا سلمي كيفك ياخ مشتاقين شديد... الرائع سيد عبد العزيز رقم كبير في تاريخ الفن السوداني ويعتبر من الرواد الغيرو مسار الشعر الغنائي في السودان..ومتمكن من اللغة العربية تمكن أهله لأن يرتقي إلي مصاف رواد الحقيبة..رحمه الله بقدر ماأمتعنا وعلمنا.. أسعدتني طلتك كثيرا وشكرا ليكي
محبتي
Post: #54 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-28-2008, 06:11 AM Parent: #48
الجميلة جدا ممكونة أسعدني حضورك كثيرا فقد كنت أترقبه... ربنا يسعدك يارب ويجمل أيامك.. مودتي
Post: #50 Title: Re: رحلة ***قائد الأسطول** عبر الأزمان مع سيد عبدالعزيز Author: عمر الفاروق Date: 03-25-2008, 07:27 AM Parent: #1
الأخت نها : القصة مؤكدة والشاعر كان يعشق فتاة من بيت ال المهدي ويقال أنها من ال بيت السيد عبد الرحمن تسكن في حي الامراء تقدم الشاعر لخطبتها وتم رفضه بسبب السمعة السيئة التي كان يعتقدها البعض عن الشعراء والفنانين في ذلك الوقت من عربدة وتلذذ بالحياة .. بعد رفضه أصبح الشاعر ينتظر فتاته تحديداً عند ميدان الخليفة (المولد) حالياً وأستحوى فكرة قائد الإسطول من مشهد الطالبات عند الخروج من المدارس كنا يخرجن في جماعات متفرقة ولكن محبوبته كانت تخرج وحيدة واول طالبة فكانت كأنها قائدة لهذا الفوج !!! انا من المعجبين حد الثمالة بهذا المقطع من الأغنية وأرددها واترنم به كثيرا:
Quote: وما الجندى والمكتول و طالب الغفران من أيده راح منتول واتوهد النيران فاقد الصواب مبتول مما رأى حيران أصبح زهر مشتول وفاح ملا الجيران
دي الشهادة عدييييييييييييييييييييل !!
المعلومة مؤكدة ومصدرها كتاب عن الشاعر سيد عبد العزيز كتبه الروائي الفذ علي المك لو لم تخني الذاكرة .. تخريمة : كثيرون لا يعرفون ان سيد عبد العزيز كان فناناً مغنيا له صوت جميل ويقال في إحدى الحفلات بمدينة المسلمية بالجزيرة كان يتغنى في الحفل وأعجبته فتاة جميلة جدا ولكنها كانت (شترة) في الرقيص فقام سيد عبد العزيز وبسرعة بتغيير اللحن ليتناسب مع رقصة الفتاة ويصبح الاخرون هم (الشتر)
Post: #51 Title: Re: رحلة ***قائد الأسطول** عبر الأزمان مع سيد عبدالعزيز Author: Ahmed al Qurashi Date: 03-25-2008, 12:31 PM Parent: #50
Quote: وما أجمل سيد فى معارضته لقيس بن الملوح فى قصيدته ماشقيتك عندما قال:
الإبار الدقت شفاك والخضاب الحنن يداك هل خطيبا طالب يداك ولا زينك قلبوه ينك
وقال على لسانها: لاخضابا حنن يدايا ولاخطيبا طالب يدايا هذا أثر البكا ياضنايا
الاخ العزيز بله موسى
سلامات ... اغنية ماشقيتك تشيه اشعار سيد عبدالعزيز ولكن شاعرها هو خضر حسن سعد.. لقد لحنها وسجلها للاذاعة الفنان حسن سليمان الهاوى ... ومن اغانى خضر حسن سعد اغنية (يحيا الحب مادام صفانا .. عاش النيل الروانا ) وهى من الحان وغناء الفنان حسن عطية ولقد توفى الشاعر خضر حسن سعد ولم يتجاوز عمره 35 سنة بداء الصدر وكان ذلك فى منتصف الاربيعنات .... لك الود عزيزى بله على تذكيرنا بهذه الاغنية الجميلة والرائعة... وشكرا لك اختى نها على اتاحة الفرصة .
Post: #53 Title: Re: رحلة ***قائد الأسطول** عبر الأزمان مع سيد عبدالعزيز Author: Balla Musa Date: 03-25-2008, 03:17 PM Parent: #51
Quote: سلامات ... اغنية ماشقيتك تشيه اشعار سيد عبدالعزيز ولكن شاعرها هو خضر حسن سعد.. لقد لحنها وسجلها للاذاعة الفنان حسن سليمان الهاوى ... ومن اغانى خضر حسن سعد اغنية (يحيا الحب مادام صفانا .. عاش النيل الروانا ) وهى من الحان وغناء الفنان حسن عطية ولقد توفى الشاعر خضر حسن سعد ولم يتجاوز عمره 35 سنة بداء الصدر وكان ذلك فى منتصف الاربيعنات
الأخ أحمد القرشى
تحياتى وعظيم امتنانى على هذه المعلومة القيمة.
Post: #59 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-28-2008, 03:46 PM Parent: #53
أخي الفاضل بلة شكرا علي وجودك معانا إضافاتك الثرة.... يديك ألف عافية... مودتي..
Post: #58 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-28-2008, 03:44 PM Parent: #51
أخي وأستاذي الفاضل د. أحمد القرشي كيفنك؟ فعلا ومنذ الوهلة الأولي شعرت أن قصيدة ماشقيتك الإبار الدقت شفاك والخضاب الحنن يداك هل خطيبا طالب يداك ولا زينك قلبوه شينك هي للشاعر سيد عبدالعزيز فهي تشبه قصائده وعلي نفس النمط... شفت كيف وجودك معانا مهم جدا ومفيد جدا جدا ... يديك ألف عافية علي ماتكللنا به من قيم المعلوم وحلو الكلام....
مودتي
Post: #56 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-28-2008, 06:20 AM Parent: #50
أخي الفاضل عمر الفاروق تحيات طيبات تغشاك وأنت تشرفنا بحضورك الجميل والمفيد... لقد بحثت كثيرا عن القصة الحقيقية وكانت هي أكثر قصة مرجحة وهاأنت ذا تؤكد صحتها ومن مصدر موثوق جدا بما لايدع مجالا للشك... شكرا ليك كتير ويدك ألف عافية..
تخريمة: شوف الزول ده كان حساس كيف...غير اللحن عشان شترة البت...والله ماقصر معاها عديل كده وشتر ليها باقي الناس... رحم الله الفنان الإنسان الشاعر الحساس سيد عبدالعزيز وأسكنه فسيح الجنان...
شكرا علي حضورك
مودتي
Post: #57 Title: Re: رحلة ***قائد الأسطول** عبر الأزمان مع سيد عبدالعزيز Author: محمد عثمان Date: 03-28-2008, 06:44 AM Parent: #1
نهاا..
متالقة دايما كما عودتينا..
شكرا ليك كتير و انتى توثقين لحقبة مهمة من تاريخ الغناء السودانى الجميل..
مودتى...
Post: #60 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-28-2008, 03:50 PM Parent: #57
أخي الرائع الجميل محمد عثمان شكرا ليك كتير علي حضورك الجميل المتألق و علي تشجيعك المستمر لي ولكل مهتم بتراثنا الأصيل... بفضلكم تعلمنا ونتعلم الكثير.. كامل مودتي وشكلري وتقديري
Post: #61 Title: Re: رحلة ***قائد الأسطول** عبر الأزمان مع سيد عبدالعزيز Author: Nasr Date: 03-29-2008, 04:46 AM Parent: #1
شكرا يا نهي فقد أبهجتني هذه التحف الرائعة ونتمني نشوف حاجات تانية زي دي
Post: #62 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-29-2008, 05:05 AM Parent: #61
أخي الفاضل نصر أولا شكرا علي الإطلالة الجميلة..نورتنا وشرفتنا كتير.. ثانيا إنشاءالله سنواصل علي هذا النسق بفضل تشجيعكم المستمر.. مودتي
Post: #63 Title: Re: رحلة ***قائد الأسطول** عبر الأزمان مع سيد عبدالعزيز Author: Seif Elyazal Burae Date: 03-29-2008, 05:32 AM Parent: #1
الاخت نهي
اختيارك للاغاني يدل علي حس وذوق فني عالي.
سيري وعين الله ترعاك.
مودتي
سيف اليزل
Post: #64 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-29-2008, 06:05 AM Parent: #63
أخي المرهف سيف اليزل شكرا ليك كتير علي الإطراء يديك ألف عافية.. مودتي
Post: #65 Title: Re: رحلة ***قائد الأسطول** عبر الأزمان مع سيد عبدالعزيز Author: Balla Musa Date: 03-29-2008, 06:07 AM Parent: #63
الأخت نها
تحياتى
ياريت تفردى لينا بوست عن بادى محمد الطيب على أن نستدعى المعلومة الغزيرة التى يتمتع بها أخونا أحمد القرشى عن الحقيبة.
والله نفسى فى مثل هذا البوست وتكون البداية الكواكب إحتفلوا بالقمر.
Post: #66 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-29-2008, 06:15 AM Parent: #65
أخي الفاضل بلة كيفنك؟ عارف والله انا بجهز فعلا لمادة أتمني أن تكون دسمةعن الكروان الراحل بادي محمد الطيب وأحاول أن أجمع اكبر قدر من أغنياته ... تابع معانا وبإذن الله ستجد البوست ماثل أمامك وخلال أيام ...بس ياريت تساعدوني وإنشاءالله د.أحمدالقرشي والأستاذ أحمد طراوة يساعدونا بمعلوماتهم الغزيرة وجميع الزملاء في البورد.. مودتي
Post: #67 Title: Re: رحلة ***قائد الأسطول** عبر الأزمان مع سيد عبدالعزيز Author: الملك Date: 03-29-2008, 09:21 AM Parent: #1
أخيراً قبل الأرشفة
.. قائد الأسطول بصوت "حامد ابو سبح"
Post: #69 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-30-2008, 06:37 AM Parent: #67
أخي المرهف الكينج كيف أخبارك والله نورتنا وشرفتنا زي عوايدك....
شكرا ليك كتير كتير علي الإضافة تصدق أنا كنت كايسة ليها بصوت حامدأبو سبح ومالقيتها... يديك ألف عافية... وماتحرمنا من إضافاتك ووجودك معانا... مودتي
Post: #68 Title: Re: رحلة ***قائد الأسطول** عبر الأزمان مع سيد عبدالعزيز Author: سيف الدين مصطفى كرار Date: 03-29-2008, 10:18 AM Parent: #1
يسعد صباحك
فعلا اى شاعر يكنى محبوبتة باوصاف يرى انها حسب مخيلتة ذلك الوصف.
لانك من اصدقاء ومحبى فن الحقيبة ,اةد ان اقدم لك كتابأ حقيباوى (مصنف حقيبى)قدمة الاستاذ
محمد حسن الجقر ويسمى حقيبة ام درمان,يذكر خلفية معقولة ان لم تكن شاملة عن هذا الفن الرائع. تناول فية رموز فنانى الحقيبة مع توضيح التدرج الهرمى لهم حسب الجيل الذى فية الفنان ,مثلأ رواد الكلمة الاولى كبوشية ,ودالفكى ,الطنابرة.ثم بعدهم الجيل الاخر عثمان بدرى المهدية وخليل فرح ود الرضى وحدباىو....
اسباب حقيبة امدرمان
1- عدم وجود كتاب منتخب من الشعر العامى والغنائى بصفة خاصة يجمع بين طياتة نماذج لقصائد غنائية منظومة من عهد مملكة الفونج , حتى العقد الاخير من القرن العشرين . 2-صعوبة الحصول على دواوين الشعراء السودانيين ,لاسيماالذين نفدت كتبهم .ولم تهتم دور النشر مرة اخرى بطباعتهما. 3-وجود عدد من الدواوين الخخوطة التى لم تطبع بعد . هدف اعداد حقيبة الفن 1- التعرف بالشعر العامى الغنائى وشعراء الاغنية الشعبية متمثلة فى اغنية الحقيبة واغانى الحماس فى السودان ,والاغنية الوطنية . 2- اثارة غريزة الاستطلاع عند الباحثين والدارسين للغوص فى اعماق بحار الشعر الغنائى العامى واغنية الحقيبة بصفة خاصة للبحث والدراسة والفن . طبيعة المنهج اتبع فى اعداد حقيبة امدرمان المنهجين التاريخى والفنى,فقد ضم بعض اغانى من قبل المهدية الى فترة الخمسينات , كما اشتمل على نماذج تمثل التيارات الادبية والاتجاهات الفنية المختلفة التى عرفها الساحة الفنية فى السودان عام 1881-1946.
معايير اختيار الاغانى
تم اختيار القصائد الغنائية بنء على الموضوعات الاتية:
1- موضوع عقائدى 2-موضوع وطنى 3-موضوع غزلى.
4-موضوع وجدانىز اعتقد هذة مقدمة عن هذا الكتاب الذى يحوى نماذج من اشعار حقيبة امدرمان.. بعد
Post: #70 Title: Re: رحلة ***قائد الأسطول** عبر الأزمان مع سيد عبدالعزيز Author: abuguta Date: 03-30-2008, 08:45 AM Parent: #68
نها وضيوفها انا داخل عشان اقول مريت من هنا بصراحة كدا,,ما بعرف انتو ناس معانا ولا دا برنامج حقيبة الفن مرة اقول عوض بابكر ومرة اقول مصعب الصاوى معهم مرتضى الغالى
بالذات مداخلات احمدالقرشى روعة وزات البوست ولعة والنار فينا مندلعة وشعورنا منخلعة والقائد اب لمعة وليك يا نها كامل السمعة
بوست جدير باعادة القراءة والتامل مودتى
Post: #72 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-31-2008, 02:30 AM Parent: #70
أخي الجميل abuguta
تحيات طيبات تغشاك وأنت تشرفنا بحضورك الجميل...
Quote: بالذات مداخلات احمدالقرشى روعة وزات البوست ولعة والنار فينا مندلعة وشعورنا منخلعة والقائد اب لمعة وليك يا نها كامل السمعة
أشكرك جدا علي شعورك الطيب وكلامك الجميل الشرفني كتير وأسعدني.. وحانكون سعداء أكتر بوجودك الدائم معانا... مودتي وتقديري
Post: #71 Title: Re: رحلة ***قائد الأسطول** عبر الأزمان مع سيد عبدالعزيز Author: نها محسن أبورأس Date: 03-31-2008, 02:26 AM Parent: #68
أخي الفاضل سيف الدين كيفنك يازول ياراقي..
Quote: لانك من اصدقاء ومحبى فن الحقيبة ,اةد ان اقدم لك كتابأ حقيباوى (مصنف حقيبى)قدمة الاستاذ
محمد حسن الجقر ويسمى حقيبة ام درمان,يذكر خلفية معقولة ان لم تكن شاملة عن هذا الفن الرائع. تناول فية رموز فنانى الحقيبة مع توضيح التدرج الهرمى لهم حسب الجيل الذى فية الفنان ,مثلأ رواد الكلمة الاولى كبوشية ,ودالفكى ,الطنابرة.ثم بعدهم الجيل الاخر عثمان بدرى المهدية وخليل فرح ود الرضى وحدباىو....
شكرا ليك كتير ويديك ألف عافية.. الرائع محمد حسن الجقر يعتبر باحث وناقب مهم جدا لتراث الحقيبة..ففي ندوة له عن فن الحقيبة قال: الهدف النهائي من الاستماع الى غناء الحقيبة هو صول الطرب". وقال أيضا: أغنية أن أغنية الحقيبة من وحي العقيدة، وذلك لما تشتمل عليه الحقيبة من المعاني والاقتباسات، والجناس والطباق، وكل فنون البلاغة العربية المعروفة، وقد عمل شعراء الحقيبة على الاستفادة من كل هذا التراث الديني في القرآن الكريم والسنة النبوية الطاهرة. وهاجم الجقر بشدة الذين يقولون بأن فناني الحقيبة يمثلون الفن الشعبي، وتساءل: ما هو الفن الشعبي؟؟ هل ارتداء العمة والشال مع (الجلابية) هي الشعبية؟؟ أم أن الشعبية في أشعار هؤلاء المغنين؟؟ وإذا كان اللباس الأفرنجي (الفل سوت) كافيا لتوصيف الفنان بأنه فنان حديث، فإن عميد الفن السوداني الحاج محمد أحمد سرور كان من أكثر الفنانين أناقة، يهتم بمظهره وأناقته ولباس البدلة مع ربطة العنق، لكن الحقيبة جمعت من الشعب قيمه ومعانيه السامية.. وأضاف: ورغم ما تتمتع به الحقيبة من أشعار رصينة وألحان خالدة ظلت تجد (تهميشاً) في الأجهزة الإعلامية، ونرى ذلك بوضوح من خلال تقديمها بالإذاعة مثلاً في وقت يستعد فيه الناس لصلاة الجمعة. وعاد الجقر الى الحديث مرة أخري عن الأثر الديني في شعر الحقيبة مبتدئا ذلك منذ حسان بن ثابت الذي قال له النبي(ص): أرمهم يا حسان.. ولم يكن حسان يملك سهماً أو قوساً الا شعره وكلماته ليذود بها عن الإسلام.. وأهل السودان في كل مكان كانوا يدخلون باكراً الى الخلاوي قبل الدخول الى المدارس والكتاّب، وهذا جعل الأثر الديني في شعر الحقيبة واضحاً.. فتجد مثلاً عند صالح عبد السيد (أبو صلاح) في قصيدته (فيك برا وطه ويس وهود)، وهي سور معروفة من كتاب الله الكريم.. وقد كتب شعراء الحقيبة في عيد الصليب وعيد المسيح. بعد ذلك قدم الفنانون بالمنصة لعبيد عبد الرحمن أغنية (من حور الجنان)، وجاء بالأغنية:
سبحان من نشاك حسنة وفي غاية الجمال
يهواك الجنوب وإليك ينقاد الشمال
وبها، كما قال الجقر، مدخل إيماني عميق بتنزيه الخالق، ولا يقولنّ قائل إن شعراء الحقيبة لا يلتزمون المعاني في شعرهم، وهذا بالطبع صحيح في بعضها، لكن من منكم لم يطرب لعبيد عبد الرحمن في أغنيته (محبوبي ساكت قصد عنادي)؟
وقال الجقر مرة أخرى: إننا نلحظ الأثر الديني واضحاً من خلال قوله (المقدر لا بد يكون)، وكذا في قوله (ما عصيت مولاي ماني فاجر... نفسي يا أحباب ليها زاجر)، ثم تحدث عن أغنية ياسمير للفنان كرومة، وهي من أشهر الأغنيات التي ورد بها اقتباس مباشر من القرآن الكريم في قوله: "الشجر أقلام جميع والنيل مداد، لو كتب أشواقي ليك ما عدّدا". وعاد الجقر ليتحدث عن اقتباس أبو صلاح من قوله تعالى في سورة الأعراف الآية (134): (فَلَمَّا تَجَلَّى رَبُّهُ لِلْجَبَلِ جَعَلَهُ دَكًّا وَخَرَّ موسَى صَعِقًا فَلَمَّا أَفَاقَ قَالَ سُبْحَانَكَ تُبْتُ إِلَيْكَ وَأَنَاْ أَوَّلُ الْمُؤْمِنِينَ)، في أغنيتة (كم نظرنا هلال) "لو أدار لحظو على جبل دكالو.. لو بسم أنزل دمع السحاب أبكالو"..
أثبت الأستاذ محمد حسن الجقر فهمه العميق لأغنية الحقيبة من خلال تعمقه في مفاهيمها وشعراءها ومغنينها..
Quote: اسباب حقيبة امدرمان
1- عدم وجود كتاب منتخب من الشعر العامى والغنائى بصفة خاصة يجمع بين طياتة نماذج لقصائد غنائية منظومة من عهد مملكة الفونج , حتى العقد الاخير من القرن العشرين . 2-صعوبة الحصول على دواوين الشعراء السودانيين ,لاسيماالذين نفدت كتبهم .ولم تهتم دور النشر مرة اخرى بطباعتهما. 3-وجود عدد من الدواوين الخخوطة التى لم تطبع بعد . هدف اعداد حقيبة الفن 1- التعرف بالشعر العامى الغنائى وشعراء الاغنية الشعبية متمثلة فى اغنية الحقيبة واغانى الحماس فى السودان ,والاغنية الوطنية . 2- اثارة غريزة الاستطلاع عند الباحثين والدارسين للغوص فى اعماق بحار الشعر الغنائى العامى واغنية الحقيبة بصفة خاصة للبحث والدراسة والفن . طبيعة المنهج اتبع فى اعداد حقيبة امدرمان المنهجين التاريخى والفنى,فقد ضم بعض اغانى من قبل المهدية الى فترة الخمسينات , كما اشتمل على نماذج تمثل التيارات الادبية والاتجاهات الفنية المختلفة التى عرفها الساحة الفنية فى السودان عام 1881-1946.
معايير اختيار الاغانى
تم اختيار القصائد الغنائية بنء على الموضوعات الاتية:
1- موضوع عقائدى 2-موضوع وطنى 3-موضوع غزلى.
4-موضوع وجدانىز اعتقد هذة مقدمة عن هذا الكتاب الذى يحوى نماذج من اشعار حقيبة امدرمان..
كم أتوق لقراءة هذا الكتاب وإلتهام صفحاته الواحدة تلو الأخري.. ياريت تنتقي لينا بعض من صفحاته لننهل ودون ملل من حديث الأستاذ محمد حسن الجقر.. كامل مودتي وخالص شكري وتقديري لشخصك الكريم...وإضافاتك المفيدة جدا لي وللقراء..
Post: #73 Title: Re: رحلة ***قائد الأسطول** عبر الأزمان مع سيد عبدالعزيز Author: سيف الدين مصطفى كرار Date: 04-03-2008, 06:58 PM Parent: #1
مساء الخير استاذة نها
قبل ان ادخل فى موضوع المناظرة التى ذكرها الاستاذ محمد حسن الجقر فى كتابة حقيبة ام درمان
او ان ابحر قليلا فى كلمة (مناظرة)لما لها من مدلولات ومعانى جم.
المناظرة هى وضع مادتين او اكتر لتقييم اوجة الاشتراك والاختلاف بينهمافى اكثر من موضوع .
هذا باختصار ,عالميا وجدت بعض المناظرات شهرة كتلك التى دارت بين الدكتور الباكستانى احمد ديدات
والقس....
اعود لموضوعنافى كتاب الحقيبة
المناظرة قبل ان ندخل فى عالم المناظرة بين الحقيبة وما نسميةبالفن الحديث ,فهناك من تشدق واخر من افترى بل ويتهم شعراء اغنية الحقيبة فى عالم الحسيات والشهوانية,وعندما نختار كلمة مناظرة المقصود منها هو ان نترك اغنية الحديثةوعلى اغنية الحقيبةان تثبت برائتها ومضمونها من خلال بعض النماذج والكلمات عرضا,ونترك القارى ليكون الحكم والفيصل,وللاسف الشديدفقد اقيمت الندوات والمحاضرات فى ذلك الافتراء والتهكم المزعوم على مستوى الاجهزة الاعلامية المسموعة والمرئية الامر الذى وجد الكثير من الاذعان والقبول بان اغنية الحقيبة حسية, ولم يلتفتوا الى الاغنية الحديثة وماقالتة,علما ان شعراء الاغنية الحديثة المخضرمين والفحول ينظمون ويالفون الاغانى عن مشاكلهم العاظفية الخاصة وكان رائعا منهم انذاك.
وهذا نموذج صغير من رائعة (بازرعة) التى لاشك انة نظمها فى شبابة الباكر تحت اسم (ليالى الغرام)
وهكذا يستهل بازرعة ليالية فى جراءة وصراحة:
على النجيلة الخضراء كنت اجلس ليهو كنت الثم ثغرو وايدى فى خديهو ثم افضل اراقب واشوف سحر عينيهو واقى عينى انبهرت من بروز نهديهو
ثم ماذا؟؟؟؟ ثم الثم جيدو وانسجم فى ريدو واروى منو غليلى يا ليالى الغرام
يا لها من روعة وشعر راقى ,القصة التى يرويها الاستاذ بازرعة ورقم(التقديرية)الواضحةفى الجزء
التالى من ليالى الغرام الا انها حقا تنبىء عن ذوق (غزلى) واختيار جيد لادوات البناء الشعرى,وسنرى
ذلك عيانا عندما نقراء:
فى حذا الاشجار كنا نحكى هوانا
تشهد الازهار كل يوم بلقانا
كم نظمت الدرر فى جمال سيقانا
وهى تنظر لى بى عيون خجلانا
ثم يقول: فى الخدود حمرة وفى الشفاء خمرة ياليالى الغرام
وهنا لا ابرىء ولا انزة نفسى وانا اكتب تلك المشاهد الرائعة فقد كانت بحق والى عهد قريب من اجمل الاغنيات التى اسمعها ولازالت .اما عن الاستاذ (ابو عفان) فهو استاذى وفناتى المفضل الى هذة الحظة.
نزدلف الى الشاعر الشيخ محمد ود الرضى ,تشبع بدراسة القران والخلوة ,فاخترنا هذا النموذج من قصيدة ليالى الخير جادن,علما بان ود الرضى هو المتهم الاول بتوغلة فى الشهوانية والحسية
اسمع ان شئت مقطع صغير من (ليالى الخير) مثلما كانت ليالى الغرام لبازرعة ,رغم الاختلاف الكبلير فى الصناعة والادوات بيد ان كل فصول قصيدة ليالى الخير مجرد حلم وطيف عابر لم يستمر كثيرا,
يقول ود الرضى الذى وصف بالحسية:
شفت فى الاحلام ظبا بتهادن برخيم نغمات خلى تنادن
عبرات الشوق بى ازدادن تلكم احلام ليت تمادن
شفت الحسن حافل رافل فى ثياب العز و العز كافل
رائع واحل تاية غافل لادن هادل ضامر كافل
نترك ود الرضى ونعود الىالاستاذ بازرعة ورائعتة تحت اسم (صبابة) التى تغنى بها ابو داؤؤد وابدع يقول:
كانت ذراعى لراسك مرقدا عجبا اتنساها وتنسى المشهدا انسيت انك فى شعورى وفى دمى مهما بعدت وزاد منك تالمى ساعيش بعدك راهبا فى ماثمى وتعيش ابدا ذكرياتك فى فمى ما دام حبك يا حياتى ملهمى .......................... هذا ما اوردة الاستاذ الجقر فى هذا الموضوع
بعد تركى لبض الاسطر الاخيرة.
Post: #74 Title: Re: رحلة ***قائد الأسطول** عبر الأزمان مع سيد عبدالعزيز Author: الطيب شيقوق Date: 04-03-2008, 11:23 PM Parent: #73
نها الرطانية كيفك
دعيني اهديك هذا النغم الجميل
Post: #76 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-06-2008, 09:37 PM Parent: #74
أخي الفاضل الطيب شيقوق والله وجودك معانا أضفي نكهة خاصة علي البوست...وياريت ماتحرمنا من طلتك...
شكرا ليك كتير علي رائعة إسحق الحلنقي.. ويديك ألف عافية
Post: #75 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-06-2008, 09:31 PM Parent: #73
أخي الفاضل أستاذ سيف كيفنك آسفة علي الإنقطاع
Quote: فهناك من تشدق واخر من افترى بل ويتهم شعراء اغنية الحقيبة فى عالم الحسيات والشهوانية,وعندما نختار كلمة مناظرة المقصود منها هو ان نترك اغنية الحديثةوعلى اغنية الحقيبةان تثبت برائتها ومضمونها من خلال بعض النماذج والكلمات عرضا,ونترك القارى ليكون الحكم والفيصل,وللاسف الشديدفقد اقيمت الندوات والمحاضرات فى ذلك الافتراء والتهكم المزعوم على مستوى الاجهزة الاعلامية المسموعة والمرئية الامر الذى وجد الكثير من الاذعان والقبول بان اغنية الحقيبة حسية, ولم يلتفتوا الى الاغنية الحديثة وماقالتة,علما ان شعراء الاغنية الحديثة المخضرمين والفحول ينظمون ويالفون الاغانى عن مشاكلهم العاظفية الخاصة وكان رائعا منهم انذاك.
دع من يتشدق يتشدق..ومن يفتري يفتري..فغناء الحقيبة وشعراءه يسمون عن كل تلك الصغائر والآراء الغير موضوعية والتي تنم عن جهل تام بالفن والجمال والتراث...
Quote: على النجيلة الخضراء كنت اجلس ليهو كنت الثم ثغرو وايدى فى خديهو ثم افضل اراقب واشوف سحر عينيهو واقى عينى انبهرت من بروز نهديهو
ثم ماذا؟؟؟؟ ثم الثم جيدو وانسجم فى ريدو واروى منو غليلى يا ليالى الغرام
ياسلااااااااااااااااااام ذاك هو الجمال بعينه.. فلو نظرت إلي المعاني خلف المفردات لوجدت أنها تنم عن تمكن تام بالحسيات وغير الحسيات..وليس الشهوانيات كما يزعمون..ولكن مايدعو للإرتياح أن هناك من يفهم ويقدر معني الجمال والحفاظ علي التراث من أولئك البائسين.
أبوعفان هرم من أهرام السودان الشامخة..فأنا أعشفه وأعشق جميع أغنياته... ولكن أغنياتي المفضلة هي قصتنا وخاطرك الغالي..
انا بى حنانى الغالي خصيتك وحبيتك بكل جوانحى العميقه انا شلت من اجلك هموم الدنيا اهديتنى من جراحها بكل طيبه لسعادتك انت كم ضحيت واتغربت ماخليت طريقه فى مسيرى المضنى من اجل الحقيقه شوف الكلام ده كيف...
سيدي الفاضل.. إشتهر الشيخ محمد الرضي بالتقي والورع والعفاف..وكل قصائده لا تحوي علي أي نوع من الإيحاءات التي ذكروها..ولكنه حب الجمال ذلك الذي جعلهم يتلمسونه حتي ولو في الخيال...إذن حري بنا أن نفخر بهم ونحافظ علي خلفوه لنا من عصارة إبداعاتهم... شوف قصيدة أحرموني ولا وتحرموني لود الرضي..
احرموني ولا تحرموني سنة الاسلام السلام عطفكم يا من الموني كالاشعة الاسهم رموني الشجون بالليل نادموني الانين والنوح علموني لو معنعن قول كلموني حبي طاهر لم تظلموني برضي قابل الظلم احترام
يا النفوني كفى اعرفوني ساهي ساهر ساحات جفوني في هواكم يا من جفوني لا الوم ان لم تنصفوني انعكاس الاحوال كفوني ايضا الايام عرفوني يوم سموما ويوما غمام
كلما النسمات عطروني فاجأوني دموع مطروني رب اغفر للعكروني في وداعة الباري العروني رب وقت يتذكروني او يقول القايل دروني او يحدث عني المنام
الدهاة بالسلو ما دهوني عن تجاهكم ما وجهوني بي تحكو وشمتو النهوني وبرضي هايم وخاضع لهوني لا اقول مستنكف دهوني عن كثير عن قيس نبهوني عن حقيقة الحب غين ولام
ما تنفس صبح او ضحى لي الا غاب هدهد فكري ورحالي قال قربك عين المحال قلبي غير زكراك ما صحى لي يكفي ان السهد اكتحالي يكفي شاهد لي انتحالي المدامع السن لحالى شاكي شاكر شاخص دوام
في التفكر اصبح وامسي ايضا التزكار نجوى همسي وحياتي اشبه برمسي اشكو يومي واسترحم امسي ما عهدتك يا ليل تمسي طلت وامتى اشراق شمسي وانت وين يا بدر التمام
قتلو ليت الايام يندن تبقى لانت وسحابا دندن بلماك النيران يخمدن ليك روحي واجزيك حمدا قال لي كيف تستوجب لي حمدا من تعاطى المكروه عمدا غير شك يتعاطى الحرام
عليك الله في بعد الكلام ده كلام تاني...وأنا شايفة إنو القصيدة دي ممكن يردوا بيها علي الجماعة ديك...
Post: #87 Title: Re: رحلة ***قائد الأسطول** عبر الأزمان مع سيد عبدالعزيز Author: abubakr Date: 04-08-2008, 04:29 AM Parent: #1
Quote: أخي الرائع (القصاص) ودشيقوق
اها ياهو "قصاص اتر " سااااي ....
Post: #88 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-08-2008, 04:32 AM Parent: #87
Quote: اها ياهو "قصاص اتر " سااااي ....
صاح والدليل علي كده إنو قاصي ليك في كل بوست.. الغريبة هو ماظاهر...تفتكر مشي وين
Post: #89 Title: Re: رحلة ***قائد الأسطول** عبر الأزمان مع سيد عبدالعزيز Author: abubakr Date: 04-08-2008, 04:56 AM Parent: #1
Quote: الغريبة هو ماظاهر...تفتكر مشي وين
هو شغال يضرب في جرس الدلالة ويقول انها بورصة وهو مستشارها ...
Post: #90 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-08-2008, 05:02 AM Parent: #89
Quote: هو شغال يضرب في جرس الدلالة ويقول انها بورصة وهو مستشارها ...
لا ..كان كده أنا حاعمل ليه حملة تفتيشية وأقص ليه في أي بوست عشان يجينا بي جاي
Post: #91 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-18-2008, 06:07 PM Parent: #1
*
Post: #92 Title: Re: رحلة ***قائد الأسطول** عبر الأزمان مع سيد عبدالعزيز Author: ALazhary2 Date: 04-18-2008, 07:03 PM Parent: #1
إبداع
Post: #93 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-19-2008, 04:39 AM Parent: #92
أخي الفاضل أزهري
شكرا ليك كتير علي الإطلالة
مودتي
Post: #94 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-20-2008, 06:03 AM Parent: #1
الكروان الراحل بادي محمد الطيب
Post: #95 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-20-2008, 06:04 AM Parent: #1
Post: #96 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-22-2008, 04:29 AM Parent: #1
روابط الحفظ
Post: #97 Title: Re: رحلة ***قائد الأسطول** عبر الأزمان مع سيد عبدالعزيز Author: عبدالكريم الامين احمد Date: 04-22-2008, 04:42 AM Parent: #96
Quote: روابط الحفظ
في انتظارها يا نهي جالسين القرفصاء علي بهو هذه الالحان التي تعطر وتطرب الوجدان
Post: #99 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-22-2008, 05:05 AM Parent: #97
أخي الجميل عبد الكريم وأنا في غاية الفخر لوجود أشخاص رائعين من أمثالكم في البوست.. أجد صعوبة في الشبكة وفي التحميل لكن الروابط ستكون في البوست قريييييبا مودتي
Post: #98 Title: Re: رحلة ***قائد الأسطول** عبر الأزمان مع سيد عبدالعزيز Author: احمد العربي Date: 04-22-2008, 04:43 AM Parent: #96
شي جميل ويرد الروح
نهى محسن يا قائد الاسطول انتي
تعرفي اعتقد انو النص الصحيح (مبطول لك اللمسان) على قول استاذناالباقر موسى وبوست بحجم الوطن لك الود حتى ترضي
Post: #100 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-22-2008, 05:09 AM Parent: #98
أخي الفاضل أحمد العربي نورت البوست والله وسعيدة جدا لوجودك..
النص فعلا كما ذكرت وذكر الأستاذ الفاضل الباقر مين لسماك يطول مابطولك اللمسان معناك شرحو يطول والله ياإنسان
أما تصحيح أستاذ الباقر فكان في: وأنا عقلي مخبول والناس عقول ولسان بدلا عن مشغول ولكنني لم أسطع تعديله نظرا لتوقيف حسابي بإسم نها محسن ونقله إلي نهي محسن...لهذا أخشي إنني لن أستطع الدخول في حساب نها والتعديل... شكرا ليك علي كل شئ... مودتي وتقديري
Post: #101 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-22-2008, 05:14 AM Parent: #1
قائد الأسطول
يا قائد الإسطول تخضع لك الفرسان .. يا ذو الفخار والطول أرحم بني الإنسان مين لي سماك يطول .. مابطولك اللمسان .. معناك شرحو يطول .. والله يا إنسان .. أصدق كفاك مطول .. يا ذو الحسن وحسان .. أنا عقلي بيك مخبول.. والناس عقول ولسان يا علة المعلول كم أومى ليك بنان كم من أسير مغلول مالاقى لحظة حنان يرى وعدك المحلول زى حجة الوسنان والكان سكونه تلول ما ببدلهم بجنان ما بنكر المعقول آمنت بالأيمان يالطلسم المصقول بدل لخوفى أمان بالنور سحرت عقول كانت صميمة زمان يا من تحق القول قتل النفوس حرمان وما الجندى والمكتول و طالب الغفران من أيده راح منتول واتوهد النيران فاقد الصواب مبتول مما رأى حيران أصبح زهر مشتول وفاح ملا الجيران يا حبيبي كون ممهول وليكن ماكان والفى غد مجهول والماضى إسمه الكان نفداك شباب وكهول ونبقى ليك أركان لحيك المأهول ونخدم السكان يالفى سماك مفصول تنشاف عيان وبيان ما عرفنا ليك وصول وما دنيت أحيان إنت الخطاك أصول يعلم بك الديان مثلت فينا فصول ما بيدرسها النسيان
Post: #102 Title: Re: رحلة ***قائد الأسطول** عبر الأزمان مع سيد عبدالعزيز Author: محمد عثمان Date: 04-22-2008, 05:19 AM Parent: #1
Quote: يالفى سماك مفصول تنشاف عيان وبيان ما عرفنا ليك وصول وما دنيت أحيان
نهى..
سلاااااااام
متاااابعين...
Post: #103 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-23-2008, 04:15 AM Parent: #1
أخي المتألق محمد عثمان سعيدة دائمابوجودك وتسعدني متابعتك لينا خالص مودتي
Post: #104 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-23-2008, 05:12 AM Parent: #1
التعديل عشان حذف التكرار
Post: #105 Title: Re: رحلة ***قائد الأسطول** عبر الأزمان مع سيد عبدالعزيز Author: نهي محسن أبوراس Date: 04-23-2008, 06:03 AM Parent: #1
