فى ذكرى وفاته ال ...25...لنوثق للشاعر الكبير اسماعيل حسن ...

تصادف هذه الايام الذكرى 25 لوفاة الشاعر السودانى الكبير اسماعيل حسن ...
واسمعيل غنى عن التعريف الكل يتذكره صباح مساء كلما سمع اغنية جميلة او كلماته الوطنية القوية للوطن والتى صاغها بالسهل الممتنع فحفظها كل سودانى... بلادى انا.. والتى يقول فى اخرها تصور كيف يكون الحال لو ما كنت سودانى واهل الحارة ما اهلى بس تصور ؟
واحياءا لهذه الذكرى وللتوثيق افتح هذا البوست المهم واتمنى مشاركات فاعلة وتوثيقية للشاعر الكبير وسوف اواصل معكم ..هيا

بلادي اهلاً يا بلادي
الف تحية ليكي من الفؤادِ
بلادي اهلاً .. يا بلادي
صدورنا حماية ليكي من الاعادي

بلادي أنا بلاد ناساً في اول شي
موارثيم..كتاب الله
وخيل مشدود ، وسيف مسنون حداه درع
تقاقيبن تسرج الليل مع الحيران
وشيخاً في الخلاوي ورع

وكم نخلات تهبهب فوق جروفا الساب
وبقرة حلوبة تتضرّع وليها ضرع

وساقيةً تصحي الليل مع الفجراوي
يبكي الليل ويدلق في جداولو دمع
يخدر في بلادي سلام ..
خدرةً شاربة موية النيل تزغرد في البوادي زرع


بلادي سهول بلادي حقول
بلادي الجنة للشافوها او للبرة بيها سمع
بلاد ناساً تكرم الضيف
وحتى الطير يجيها جعان ومن اطراف تقيها شبع

بلاي أنا
تشيل الناس ، كل الناس
وساع بي خيرو لينا يسع
وتتدفق مياه النيل على الوديان
بياض الفضة في وهج الهجير بيشع

بلادي بلاد الصفقة والطمبور
وداراتاً تنح بالليل
وبنوتاَ تحاكي الخيل
يشابن زي جدّي الريل
وشبالن مكنتل في طريفو ودع

بلادي بلاد من التاريخ
من ترهاقا لا عند ميسنا ...
عاد ترجاك خيل ودروع

بلادي أمان ، بلدي حنان وناسا حُنان
يكفكفوا دمعة المفجوع
يحبو الدار يموتو عشان حقوق الجار
يخوضو النار شان فد دمعة
وكيف الحالة لو شافوها سايلة دموع ؟!

ديل اهلي .. ديل اهلي ..

يبدّوا الغير على زاتم
يقسموا اللقمة بيناتم
ويدّوا الزاد حتى ان كان مصيرم جوع

ديل اهلي .. ديل اهلي ..

ديل اهلي .. البقيف في الدارة
وسط الدارة واتنبر
وأقول لي الدنيا كل الدنيا
ديل أهلي

عرب ممزوجة بي دم الزنوج الحارة
ديل اهلي
ديل قبيلتي لما ادور افصل للبدور فصلي

اصحاب روحي والاحساس
وسافر في بحار شوقم زمان عقلي

أقول بعضي ...
ألاقيهم تسرّبوا في مسارب الروح
بقوا كُلي .. ديل اهلي

محل قبلت القاهم ..
معايا .. معايا زي ضلي

كان ما جيت من زي ديل وآسفاي وآماساتي وآآآآآآآذلي


تصور كيف يكون الحال لو ما كنت سوداني
واهل الحارة ما اهلي ؟؟

تصور كيف يكون الحال

هذا البوست مهدى للحاجة فتحية زوجة الشاعر الكبير والاخت احلام ومهيرة اسماعيل حسن ولابناء الفقيد والى روح الصديق سامى سالم اواصل ..

بعد ايه
اسماعيل حسن

بعـد ايـه جيـت تصـالحـنى
بعد ما ودرت قلـبى الكنت فيه
جيت تشكى جيـت تحكي
جيـت تحكـي ليه
اعتذارك ما بيفيدك
ودموعك ما بتعيدك
العملتو كان بإيدك
انا مالى ذنب فيه
ليه جيت تبكى ليه جيت تشكى
انا خلدتـك بشعـري فى زمانك
ويامـا غنيـت وكان كلـو عشانك
وكان جزاي منـك صـدودك وهوانك
انا استاهل
انا استاهل وضعتك فى مكان مـا مكانك
روح الٌقـدر بى نفسـو ما بقسـو عليك
جيت تايب يا حليلك والفؤاد ملكوه غيرك
ربى يعدل ليك سبيلك كل
مناى فى الكون عديلك
ونهاية الخير نصيبك
ليه
ضيعوك
ودروك
انت ما بتعرف
صليحك من عدوك
استغلو الطيبة فى قلبك
وبى اسم العواطف خدعوك
حتى من كلمة حنانم وودادم حرموك
الله يا خد ليك حقوقك ويجازي الظلموك

خاف من الله
اسماعيل حسن

خاف من الله على قلبى من غرامك خاف
زرعـت الـشــوك عـلـى دربـو
ويـامـا فى هـواكـم شـــاف قلبي
سنيـن وايـام قضيت عمرى فى لوعة
انـادي الـلـيـل واقـول يـالـيـل
انـا الـمـظـلـوم (عــزاى) دمعة
دمـوعى تـسـيـل ولـيـلـى طويل
وواقـف فى مـهـب الريح براى شمعة
انـادى الـلـيـل واقــول يــا ليل
يامـا فـى هــواكـم شــاف قلبى
خـسـارة قـلـبى فى حبك وآخسارة
عـلـمـتـو يحبك ولما سار فى دربك
رحـت وسـبــت حـبـيـبـك ليه
يا خـسـارة دمعـى ودمعك وآ خسارة
يـاما سهـرتا ليـالى يا حليلك يا غالى
ويـامـا فى هـواكـم شـــاف قلبى
يـا قـلــبـى انـسـي الـفــات
وعـيــش مـن تــــانى وحدانى
ولـو حـنـيــت لـعـهــد الشوق
اجـيـب مـن ويـن عـمـــر تانى
كـفـى يـا قـلـبـى شـفـتـا الويل
ولـيــل الـســهــــــد بكانى
بـعــد مــا تـبـــت مـن النار
حـــــرام تـجـــــدد احزانى
يـضــمـــك لـيـــل ويطويك
لـيـل ونــار الـويــــل مهادك
يـا مـظـلــــــــوم وماظالم
حـلـيـــلك والـعـمــــر فانى
ويـامـا فـى هـواكـم شــاف قلبى




المستحيل
اسماعيل حسن

لو بإيدي كنت طوعت الليالي
لو بإيدي كنت ذللت المحال
والأماني الدايرة في دنياي ماكانت محال
دي الإرادة ونحن ما بنقدر نجابه المستحيل
دي الإرادة والمقدر ما بنجيب ليه بديل
دي الإرادة أجبرتني في هواكم من قبيل

غصبا عني وغصبا عنك
انت حبيتني وهويتك
لو بإيدنا من زمان
كنت خليتني ونسيتك
والنهاية ..
انت عارف وانا عارف
لو بإيدي كان هديتك

أصلو حبي أقوى وأكبر من إرادتي
وانا حاسس في جحيم نارك سعادتي
والهيب البكوي في روحي
في ذاتي
هو إنت
قلبي دايرك
حبي عارفك
في شبابك في صباك
في جمالك في وفاك
في شبابك في وفاك
يا المسير وماك مخير
انت ياصابر عند الله جزاك




ذات الشامة
اسماعيل حسن

وحياة الأحلام القلبي سقاها
وحياة أجمل بسمة عرف معناها
وحياة سمر اللون وحاة محياها
وحياتك
وحياتي عندك
وحياة حبي
النهار صدك
وحياة أول نظرة لمحتك بيها
وحياة أجمل صدفة عرفتك فيها
وحياة الآمال العشت حياتي عليها
وحياتك
وحياتي عندك
وحياة حبي
النهار صدك
وحياة الأيام الجايرة وظالمة
وحياة حبي الكاتمو براك العالمة
أملي وكل منايا هناك يا حالمة
وحياتك
وحياتي عندك
وحياة حبي
النهار صدك
وحياة لونك انتي وحاة السمرة
وحاة حبي اليك من أول نظرة
وحياة طهر غرامي انتي القمرة
وحياتك
وحياتي عندك
وحياة حبي
النهار صدك
وحياة صمتك انتي وحاة الشامة
الشامة الفوق خدك نايمة دليل وعلامة
تزيد حسنك بهجة تزيدو وسامة
وحياة أجمل ريد في الكون يا حمامة.




صدفة
اسماعيل حسن

صدفة وأجمل صدفة انا يوم لاقيتا
أسعد يوم يومي الحييتا
نور عينية ياما حبيتا

النظرات بريئة وممزوجة بخجل
البسمات تضوي زي نور الأمل
وجهك بين مسايرك زي بدر اكتمل
والشامة في خديدك زي طعم القبل
تسكر قلبي وتشعل حبي يشهد ربي انا بهواك

ما قادر اقولك عن حبي الكبير
وصفو علي قاسي وعايش في الضمير
قدر الكون دا كلو حبي واكبر بي كتير
مالكني محيرني شوف قلبي الأسير
اسألي قلبك يمكن يقدر يشرح حبي أنا محتار

صدفة عيوني شافت ليلي الباكي نور
يا أيام ربيعي عمري معاكي أزهر
فيها الطير يغني ومن الحاني يسكر
عمري فراشة حولك وانت شبابك أخضر
ياما بحبك وبعبد حبك علشان حبك روحي فداك





الحنين يا فؤادي
اسماعيل حسن

انا عارفك يا فؤادي
طال عذابك وا سهادي
وا شقاي انا وا عذابي

لم تمر النسمة بالليل
من ديارم تشفي العليل
فيها قصة حبي النبيل
فيها ريدك وريدك جميل

يا نسايم احكي الغرام
ودي ليهم مني السلام
قولي ليهم طال الخصام
قل نومي وعز المنام

وين واشوفك وين يا ضنين
بس فراقك ليه بالسنين
لو عرفت حبيبك أمين
مابتخونو وتهجر حنيني

ياما بعدك شفت الألم
قل نومي وصبري انعدم
شفت دموعي وراك صارو دم
كل ما شدتو معاك انهدم
كلمة وحدة سقتني الألم

حبيناك من قلوبنا
اسماعيل حسن

حبيناك من قلوبنا
واخترناك يا حلو
ماتبادلونا العواطف ليه تدللو
كان الدلال من طبعك
وعاجبنا فيك غرور
ان جرت برضك عادل
ظلم الجميل مغفور
نهواك نفيك في ريدك
شايفين ألمانا سرور
نار الغرام تهاجر
لقلوبنا توقد نور

أصلو الجحيم في غرامك
نرضا عشان يرضيك
حتى المحال ان درت
بنطوعو ونهديك
ارواحنا حولك هايمة
حارساك دوام تحميك
بيك نورت أيامن
والفرحة تمت بيك





واسفاااااى

وا أسفاي ..
وحاتكم انتو وا أسفاي
إرادة المولى
رادتني وبقيت غناي
أسوي شنو مع المكتوب
أسوي شنو؟
براهو الواهب العطاي
منو ..
منو البدور يساهر الليل
ويسافر
فوق جناح الشوق
يكوس نجماً بعيد ضواي
منو ..
إذا وصفولو أرض الحور
تلاقي قوافلو طول الليل
تشق التيه
تجر النم
مع الحردلو في الدوباي
وا أسفاي
ببيع الدنيا
كل الدنيا وا أسفاي
عشان خاطر عيون حلوين
وا أسفاي
منابع الطيبة متجاورين
وا أسفاي
ومتسامحين في السمحين
واسافر فوق صُبي العين
معاك سلامة
يادنياي
بتمدد وبتوسد وسادة شوق
وبنوم مرتاح وخالي البال
واقالب تاني عهد صباي
عشان ما تبكي ببكي أنا
واحاكي الطرفة
في نص الخريف بكاي
حمولي تهد جبال الشيل
وفايت في العتامِ الليل
ومتوكل عليك يا الله
دافر الليل
بِريق البسمة إن لاح لي
بتتفتح مشاكل الريد
واحسك جوا ..
زغرد فيها صوت الناي
وا أسفاي
وحاتكم انتو وا أسفاي
أسفاي
إذا ماشفت ناس سمحين
يتاتو ..
زي قدلة جنا الوزين
يتاتو
تلاقي قليبي يرمح جاي
لما يتاتو
زي قدلة جنا الوزين
يتاتو
حليل الكان بهدي الغير
صبر محتار يكوس هداي
من ناس ديلا وا أسفاي
من زي ديلا وا أسفاي
إرادة المولي رادتني
وبقيت غناي

حبيناك من قلوبنا/اسماعيل حسن

حبيناك من قلوبنا واخترناك يا حلو
ماتبادلونا العواطف ليه تدللو

حبينا فيك العفة والدم الشربات
والله العيون خلتنا في حيرة وآهات
وفي ابتسامتك شفنا جنات وجنات
شوف العلينا واحكم كن داير اثبات

كان الدلال من طبعك وعاجبنا فيك غرور
ان جرت برضك عادل ظلم الجميل مغفور
نهواك نفيك في ريدك شايفين ألمنا سرور
نار الغرام تهاجر لقلوبنا توقد نور

أصلو الجحيم في غرامك نرضا عشان يرضيك
حتى المحال ان درت بنطوعو ونهديك
ارواحنا حولك هايمة حارساك دوام تحميك
بيك نورت أيامن والفرحة تمت بيك

عندما إلتقي وردى 00 بإسماعيل حسن
بدأ رزاز الإبداع يسقي تراب الوطن

بقلم/ صلاح الباشا ..
[email protected]
تظل الحركة الثقافية في بلادنا - هذه الأيام - تعيش فرحة كبري عريضة ومتسعة كإتساع هذا الوطن الكبير .. وذلك بعودة الموسيقار الأستاذ محمد وردي الذي ظل يعطر سماء البلاد لعقود طويلة من الزمان بأجمل وأعذب الألحان التي ترتدي كل مرة أزهي الثياب اللحنية من خلال مفرداتها التي تتباين ما بين العاطفة والوجدان ومابين الغناء العجيب للحبيبة الكبري - الوطن - الذي يسكن داخل أفئدة هذا الشعب الأسمر مهما إبتعد عنه وتعددت مواقع إنتشاره في مهاجره البعيدة والقريبة .. فكان وردي هو القيثارة التي ظلت تغرد وتغرد .. وتأتي بكل جديد بين الفينة والأخري .. وكان شعراؤه العديدين يمطرونه دوماً بأجمل المفردات .. فكان لا يكل ولا يمل في أن يجد لها الألحان المطربة التي تتفجر شلالات من الفرح الأخضر فيرسلها عبر الأثير لتغطي سماء الوطن كله .. ثم تتخاطاه فيعم شذاها كل القارة .. فأصبح أيضاً قيثارة كل القارة وفنانها الأول... ذلك هو الموسيقار المبدع وإبن السودان المتألق والمتماسك دوماً محمد عثمان وردي .
كان عام 1957 موعدا لنقلة مفاجئة وجديدة في ساحة الغناء في السودان وفي ساحة الشعر الغنائي أيضاً وذلك بدخول مطرب جديد وفارس جديد من فرسان الشعر الجميل لتلك الساحة،حيث إنطلق الفنان والشاعر الغنائي ، ألأول أتي من أرض الحضارات ومهدها الأول (النوبه) والثاني من ديار (الشايقية) وكل منهما أتي يحمل معه أريج نسمات الشمال وطعم البرتقال وحلاوة البلح البركاوي والقنديلا والجاو مضمخا بعبير الجروف وأنين السواقي ليخترقا ساحة الغناء والشعر 0و كانت الساحة الفنية آنذاك تعج بالعمالقة في الشعر الغنائي أمثال حسين بازرعة وعبد الرحمن الريح وقرشي محمد حسن وآخرين كثر وتمتليء بكل عمالقة الفن السوداني الحديث. أتي مطربنا محمد عثمان وردي حيث كانت النشأة والميلاد هناك في ( صواردة ) جنوب حلفا ، كانت والدته(بتول بدري) قد وضعته في 19 يوليو 1932م ورحلت عن الدنيا مبكراً وهو لم يكمل عامه الأول ، فكان اليتم قد ظلل حياته منذ البداية ، ثم توفي والده (عثمان حسن وردي) ومحمد وردي لم يتجاوز أيضاً التسعة سنوات من العمر ، فتمكن منه الحزن ، ولكنه أعطاه المسؤولية والجدية والفكرالمتسع والإصرار العنيد ، لذلك كان ولايزال وردي يمثل شموخاً عالياً وشخصية تشعرك بإعتزاز أهل السودان الواضح وقد كان ولايزال وردي يحترم أدواره في الساحة الفنية ، حيث أضاف له ذلك اليتم المبكر إفتخاراً وكبرياءً نوبياً كبيراً لم يتراجع وردي عنه طوال حياته ، بل أضاف له هذا المناخ البيئي القدرة علي التحمل لشتي المصاعب التي عايشها وعاشها فيما بعد في عاصمة البلاد0 لذلك كانت تلك الظروف قد إنعكست علي تنمية هواياته في مجال الفن والموسيقي ، وبعد الدراسة المتوسطة إلتحق وردي بسلك التدريس ،و تنقل في عدة مناطق حتي وصل إلي معهد التربية بشندي في عام 1957م ومنها إقترب من الإعلام فطلب النقل إلي مدارس الخرطوم فكان له ما أراد 0وهاهي مدرسة (الديم شرق) تستقبله معلماً بها ، ومنها تبدأ الرحلة وكان قد إحتضنه المعلم والعازف الراحل (علي ميرغني )عليه الرحمة فإستـقر معه في منزله بالخرطوم (3) لفترة حيث كان اللقاء مع الشاعر والملحن الراحل (خليل أحمد) الذي هيأ له تلك الدرر الأولي :-
ياطير ياطاير00من بعيد فوق الخمائل
وايضــــاً000
الليله ياسمرا 000ياسماري الليله ياسمرا
وأخــــــــري
أول غرام يا اجمل هديه
ثم كان اللقاء الرائع بإسماعيل حسن في عام 1958م في حفل فرح بالسجانه 000ويابخت الإثنين000ويابخت التراث الغنائي في تاريخ الفنون الحديثة في الوطن كله ، فلقد كان التراث الغنائي محظوظاً بهذا اللقاء المصادفة0 فإسماعيل حسن وجد ضالته في هذا الصوت الغنائي الجديد (محمد وردي) ليشكلا ثنائيا فنيا ظل متجددا ومتقداً ووهاجا لفترة طويلة من الزمان وليقدما لجمهور المستمعين أعذب الكلمات ممزوجة مع أجمل الألحان ، بل لازالت تلك الأغاني تحتل أعلي مبيعات الكاسيت السودانية حتي اليوم في السودان والقاهرة وشرق أفريقيا وغربها من تشاد وحتي نيجيريا ، بالرغم من ان عمرها الفني قد تجاوز الأربعين عاما،ونلاحظ أن وردي إذا أحيا حفلا في الوقت الحاضر وتغني فيه بعشرة أغاني مثلا، فإن سبعة منها علي الأقل تكون من كلمات إسماعيل حسن، فكانت بدايته مع إسماعيل كما نراها في:
أوع ياقلبي تنسي .. حملتك ياقلبي000حملتك أمانه
ولعلها كانت اغنية (الوصيه)
ثم أردفها أيضاً بأغنية (سؤال):
كده أسال قلبك عن حالي00أسألو
تنبيك عن سؤالك أشواقي .. أسألو
وبعدها كتب إسماعيل حسن من الأغاني الطويلة :المستحيل وخاف من الله وبعد إيه وكم طرب الجمهور لتلك الكلمات عندما يترنم بها وردي في تلك الخالده التي غطت علي كل الساحة في بداية الستينات من قرننا العشرين ، إنها ( بعد إيه):-
إعتذارك000 مابفيدك
ودموعك000 مابتعيدك
العملتو00 كان بإيدك
وأنا00 مالي ذنب فيه
أنا 000أستاهل وضعتك00
في مكاناً00 مامكانك.00
روح00القدر بنفسو00
ماببكو عليه000
ليه ؟؟ ضيعوك00ودروك
وإنت00 مابتعرف صليحك00
من عدوك 00
وإستـغلوا الطيبه 00
في قلبك000وبإسم العواطف
خدعوك000
الله00 ياخد ليك حقوقك
ويجازي 00الظلموك
و يحكي لنا الشاعر أسباب إتخاذ قرار وضع حد للعلاقة السامية مع مشروعه في أغنية (بعد إيه) حيث يختتمها : (ضيعوك ودروك ) ثم يتواصل الإبداع في مرحلة أخري من تلك المسيرة فيظهر الغناء ذو الإيقاع الخفيف والذي كان ينهمر مدرارا من راديو أم درمان قبل ظهور التلفاز عام 1962 حيث ظهرت: نور العين، والحنين، وذات الشامة،ومابنساك، ولنري الشاعر إسماعيل حسن حين يعتز بطهر العلاقة والوفاء بالعهد ويترجمها غناءً هائلاً ذلك الأسمر الفارع الطول ، الضاحك دائماً (محمد وردي)وهو يترنم في (نور العين):
قلبي الحابيك00 ماخان لياليك
ماناسي الماضي ماتقول ناسيك
ما بدل حبو أبدا ماإتنكر لـيـك
لكن الأشواك والناس حواليـك
وفي اخري ينتقل شاعرنا بمطربنا إلي المفردات المستخدمة كثيرا في لهجة أهلنا (السناجك)التي تناولها اسماعيل حسن في العديد من أشعاره مثل ياحليل ، واشقاي، واعذابي، وهي تعبيرات تمتليء بالوجد ، فقام بتوظيفها توظيفا فنيا راقيا ومتقدما جدا حيث نلاحظ في أغنيته الشهيرة علي نطاق السودان وأثيوبيا وأرتيريا والصومال(القمر بوبا) قد إحتوت علي أوصاف من البيئة الشايقية البحتة واصفا فتاته بكل أنواع ثمار النخيل في مراحل نموه المختلفة ومستخدما ذلك في عدة مواقع من تلك الأغنية النابعة من وحي الطبيعة ولنري ذلك في هذه المقاطع من (القمر بوبا) التي ترجمها وردي في لحن فرائحي كبير:
الصغيري شـجيرة الأراك ياقمر عشره الفي سماك
شايله روحي وقلبي المعاك وين لقيتـك لامن آباك
الدفيفيق الدابو ني البسـيمتو بـتكويني كي
أهلو ضنو عليها وعلي حبها النساني والدي
مابخليك إن بقيت حـي يا قصــيبة السكر الني
نهـدك المارضع جنـي
ووب علي أمـك00و000 ووبـين علي
القمر بوبا عليك تقيل
والقمر بوبا :-هو نوع من الذهب الخفيف جداً -حلق- ويوضع علي الأذن في شكل (فدوه) وهنا قد إستخدمه الشاعر برغم أنه خفيف جداً في وزنه ، إلاّ أنه قد إعتبره ثقيل الوزن علي أُذن تلك الفتاة (من فرط إشفاقه عليها000) وهذا في رأيي نوع من الرقة الشاعرية لايوجد مثيل له00يرحمك الله يا أسماعيل حسن فقد كنت شفيفاً للغاية في تناولك لفن الوصف00ثم تتواصل الأوصاف في تلك الخالدة التي تعبر عن تراث منطقه كبيره وهامة في شمال بلادنا الحبيب بلاد الشايقية الواسعة والغنية جداً بجماليات الطبيعة و النيل الخالد والناس وبشتي أنواع التمور:-
الصـغيري أم الجنا ياكريم ربي تسـلمـا
تبعد الشر من حلتـا جنـه للأم الـولـدتا
الفي جبل عرفات وضعتا تسلم البطن الجابتـا
التميري الفي سـبيطتا الصفار شابك خضرتا
معذوره أمها كان دسّـتا دي ترباية حـبوبـتا
واهـلاكي النار شافتا معذباني أنا ود حـلتا
وهنا يظهر تأثير البيئة تماما في تلك الكلمات مثل التميري وهي تصغير للتمرة وهي لاتزال في السبيطة ولم يتم قطعها بعد) كما أن البنت عندما تتم تربيتها عند (الحبوبة) فإن ذلك في زمان مضي كان يعتبر نوعا خاصاً من أنواع الرعاية الفائقة والحنية والتدليل0 ولقد تمني الشاعر لتلك الأم (الجنة) وأن يبعد الش من المنطقة كلها حيث توجد فـتاته، وتلاحظ كلمة (واهلاكي) وهو تعبير شايقي بحت0 وفي كل ذلك ياتي صوت وردي الممتليء عشقاً لكل شيء جميل ، ونري اهل أثيوبيا وأرتيريا يحفظون هذه الأغنية وبهذا اللحن المتميز ، بل لاتزال تذاع تلك الأغنية بإستمرار في إذاعتهم الرسمية من وقت لآخر0
وننتقل إلي مقطع آخر أكثر تعبيرا في تلك الأغنية الخالدة:
الجزيـري أم بحراً حمي فيها روحي وقلبي الـنما
مابسـيبا إن بقي في السماء مابخلي الناس تظلمــا
روحـي فـي دربك سالما يا غرق ياجـيت حازما
ومنذ ذلك التاريخ أصبح تعبير (يا غرق000 يا جيت حازمها) تعبيرا شائع الإستخدام في مواقف معينة وهو كناية عن المجازفة في فعل شيء أو في محاولة عمل شيء معين فإن أصاب الشخص في المحاولة فهو يأتي (حازمها) وإن أخفق فهو بلا شك قد (غرق) ويتواصل شريط الذكريات 000مع فنان أفريقيا الأول0
______________________________________________________________
المصدر : من كتاب أهل الإبداع في بلادي - الجزء الأول _ القاهرة عام 2000م
الموزعون: مكتبة عزة للنشر والتوزيع – شارع الجامعة - الخرطوم

هذه اغنية رمزية حيث شبه اسماعيل حسن صديقه الصدوق الشريف حسين الهندى بطير الرهو...
وفى القصيدة يشكو اسماعيل حسن حاله لصديقه بعد ان استلم منه خطاب عتاب لتعاونه مع نظام مايو بعد انقلابهم على الديموقراطية عام 1969
..
وكان الشريف وقتها فى اثيوبيا وسمع بتعاون اسماعيل مع اهل النظام فاستغرب ذلك وارسل له رسالة عتاب ..
وكان اسماعيل يعتقد انه بتعاونه مع النظام سوف يساعد فى عودة صديقه فعمل معهم وهو مكره وكان يرمى الى هدفه ولكن رسالة الهندى هيجت فيه ما كان كامنا من حب فخرجت منه هذه الكلمات الصادقات ..
وسوف اشرح بعض المفردات ومعانيها الغامضة على القارىء فى الاسفل ..اقرا طير الرهو


طير الرهو

والله والله يا طير الرهو
قسماً عديل ما فيه لو
دمع الحبايب زي نغيم الساقية
في الوادي البعيد وتسوي جو
والله يا طير الرهو..ء
ما كت مصدق اني بلقاك يارهو
اشكو ليك من جور زماني ..
كيف رماني ..شوف براك ..شوف الزمن
كيفن بسو..
حتى باقي الزاد كمل
والليل ..طويل طولاً غريب مافيه ضو
والريح تنوح فوق الدروب
وآخوفي من صوت الرياح
وكتين تنوح وتسوي او
زيك غريب و الغربة طالت يا مسيكين
متلي يا طير الرهو
التراب ملينا عيشته
اريتني زيك
كل يوم يحضني جو
في بحور الريد نسافر
والمراكب كاسحة..ما دام ريحنا نو
نمشي لي أرض الحبايب يا حلاتن
في المغيرب والدنيا ضو

يا سلام لما نسالم ... طائر مغرد
.يستحيل.......شل العواطف
في قليب عاشق .مغرد...ء
زي تميرا في الشمال لمن يفيض
النيل يفرهد
تنتشي الدنيا وتزغرد
النسيمة الحلوة تطبقنا
وتنقر بابنا كو كو
يا سلام ..يا سلام



النسيمة الحلوة انما يعنى الديموقراطية
ما كنت مصدق انى بلقاك يا رهو اشكو ليك جور زمانى كيف رمانى شوف الزمن كيفن بسو ..
يشكو اسماعيل حاله للشريف الهندى وزمانه الذى رماه مع هؤلاء اى ناس مايو ..
حتى باقى الزاد كمل اى الصبر ..
التراب ملينا عيشته وكل يوم يحضنى جو اى هروب الشاعر من واقعه البائس وفيه يحكى حاله وما يعانيه فى نفسه معهم ..اواصل

انظر لحليفة الشاعر بالطريقة التقليدية وكيف خرجت صادقة ..
والله يا طير الرهو
قسما عديل ما فيه لو دمع الحبايب زى دموع السارية فى الوادى العيد بسوى شو ....
منتهى الصدق
فى بحور الريد نسافر والمراكب كاسحة ما دام ريحنا نو
الريح النو اى التى تساعد المراكب على السرعة بهدوء ودون عواصف وامواج وهو تعبير يظلق فى شمال السودان عندما يكون الهواء معتدل ويساعد المراكب على عبور النهر يقولون لك الهواء نو ..

يا سلام منك أنا آه

اسماعيل حسن

يا سلام منك أنا آه
يا سلام .... يا سلام
العيون فيها سهام
والكلام فيهو كلام
في حديثك
في ابتسامتك
زينة يا أحلى غرام

لديارك جيت يا روحي ليك أزور
ومن كلام الناس والله قد ضاع السرور
في إيديا
ليك هدية
سامحيني
واعذريني
واقبليها يا بدور

العواذل قالوا ليك
قالوا إيه
قالوا بحب
والله إنت وبس
إنت في قلب المحب
هددوني
ألموني
عذبوني
بدلوني الفرحة نار وهيام يوم الغرام

إنت لونك
وإنت طبعك
هادي ما فيهو البشين
تشبهي الفل في الجناين
حتى عطرك ياسمين
ربي يعلم
كم قلبي مغرم
إنت ترحم
بين ضلوعي النار تقيد
ده حرام والله حرام

التحية للشاعر العظيم اسماعيل حسن في ذكرى وفاته
وهو ما زال حيا بيننا باشعاره وكلماته الرائعة التي خلدها
ما اجمل وابدع ما قدمه من فن راقي جميل

الله عليك يا انسان
يالاسمك مكتوب فى الوجدان
اسمعيل حسن
فى زمن كنت اشتغل فيه فى محطة الاذاعة المصرية (وادى النيل ) تسعينات القرن الماضى
التقيت بشاعر مصرى اسمه فؤاد
حكى لى ان اسماعيل حسن كان قد جاء لمصر لدراسة العلوم فى الجامعة المصرية
لكنهم لم يتركوه وشانه
غرروا به وحولوا دراسته من العلوم الى الاداب
وحتى من غرر به كان يدرس الطب
لكنهم وجدوا فيه الاديب
فما كان منهم الا ان ابدلوا الدراسة (العلوم ) الى الادب
وحسنا فعلوا
اسماعيل حسن
شاعر فذ
ينقل الاغنية حيثما اء
الكلمة الى اى مدار يريد
فى خلافه مع وردى كان ان جاء بالفنان احمد فرح
وحاول الى رفده كيما يغدو فنانا كبيرا
كتب له عديد اغنيات
لكن احمد فرح لم يكن مؤهلا لمنافسة وردى
مع ذلك لم يكن بالفنان الهين
واستطاع ان يجد له موقعا فى القلوب
غنى لاسماعيل
يا حليلك يا بلدنا
كاشهر اغنية لاسماعيل حسن حينها
فيك ربونا اتولدنا
يا حليلك يا بلدنا

وسافر فى السبعينات الى ليبيا حتى توفاه الله
لكن بقيت كلمات اسماعيل حسن فى محل التقدير والاستمرار

طوال حياته الشعرية استطاع اسماعيل حسن ان يرفد وجداننا باغنيات لن تمحوها الايام مكونة وجداننا
مترفة بالحب والانسانية
وهذا هو سر ديمومتها
لعل ارتباط اسماعيل حسن بمحمد وردى جعل له ارضية كبيرة حيث لا يختلف اثنان حول شموخ الفنان محمد وردى وعبقريته
واستطاع وردى ان يكون معبرا قويا لاغنيات اسماعيل حسن

الى الاخوان
مايا
اشكرك على المشاركة
الاستاذ سلمى الشيخ سلامة
مشكورة على المداخلة المعتبرة ..وكما ذكرتى اسماعيل له العديد من الاغنيات المشهورة واهمها ازيكم كيفنكم للفنان الكبير سيد خليفة وعذارى الحى للفنان عبد العزيز داود ..
اسماعيل تخرج فى كلية الزراعة بمشتهر بالقرب من طوخ وعمل بالزراعة فى السودان الى ان احترف العمل السياسى فى اواخر عمره ثم اعتزل العمل العام الى ان توفى رحمه الله