في حق الصديق ود العمـدة ... الما بعرفك يجهلك يا عمـدة

من القلائل الذين أتيحت لي معرفتهم بصورة شخصية أو"وجهاً لوجه" في هذا المنبر هو الأخ المحترم والصديق العزيز (محمد حسن العمدة) وذلك أبان فترة تواجدي في مكة المكرمة حين أتاني زائراً بمبادرة منه في فترة إجازة أحد الأعياد، كما هي العادة التي عرفتها عنه فيما بعد في استغلال فترات الإجازات ونهاية الأسبوع في التواصل الإنساني مع الكثيرين في أنحاء مختلفة من المنطقة الغربية للمملكة..

ثم أستمر التواصل قائماً بيني وبينه وبشتى الوسائل منذ تلك الزيارة وإلى الآن، والحقيقة إنو لم يتح لي معرفة مسبقة بالأخ العمدة قبل تلك الزيارة إلا عبر هذا المنتدى حين كان يكتب باسم "سونيل" ثم حين تحول للكتابة لاحقاً تحت اسمه الحقيقي الذي يكتب إلى الآن "محمد حسن العمدة "..

* أختلف وأتفق مع الأخ العمدة كثيراً حول بعض الأمور، وربما إنو مساحة الاختلاف بيني وبينه هي أكبر من مساحة التلاقي والاتفاق في بعض الأحيان .. وهو أمر طبيعي يحدث ربما بين كل الناس حتى أولئك الذين تمتد أواصر المعرفة أو الصداقة بينهم لسنوات وسنوات !
وبحكم المعرفة والصداقة التي جمعتني في "الغربـة" بالأخ العمدة ولمدة قد تزيد عن الثلاث سنوات ربما منذ تلك الزيارة فلم أرى منه طوال الفترة التي عرفتها فيه إلا كل طيبة قلب ، ودماثة أخلاق ، وصفاء نية .. وفوق ده وده والله زول بشوش ومرح لا يقابلك أو يحدثك إلا والضحكة تسبق كلامه ..

وبالعربي كده أنا أشهد ليهو بأنو: العمدة زول ضكـران وأخو أخوان ..

وهذه كلمة حق في حق الصديق والأخ العزيز محمد "ود العمدة" بحكم معرفتي به، فأرفعوا أقلامكم المسنونة وكيبورداتكم المسمومة يرحمكم الله ووجهوها لما ينفع الناس فقد أخطأتم الوجهة!!

اخي الهادي

تحية طيبة

شخصي اول من ناصر الحبيب محمد الحسن العمدة رفعت بوست كوزنة ودالعمدة

واتي هنا اناس كتر كتبوا حول شخصية ودالعمدة

لكن عليه وقف اتهام الناس بالباطل
لانو للناس اقلام وحجار وسكاكين وكوش كمان

لماذا يدافع محمد الحسن العمدة عن الكيزان؟]

عفـوا عزيزي الهادي ..

هل يحتاج الرائع ود العمدة لشهادة منا ؟؟
ود العمدة تشهد له جغرافيا جامعة الجزيرة ..
ويشهد له تاريخ رائع بجامعة الجزيرة يجعلنا نفتخر
به كصديق وليس حبيب ينتمي لحزب الأمة فقط ..

الشهادة بحق ود العمدة تنتقص من مكانته ، فهو لا يحتاج
لشهادة بحقه ..

وكما قلت نختلف معه أو نتفق ولكن ذلك لا ينقصه شئ
ولا يزيده إلا احتراما وحبا في قلوبنا ..

Quote: هل يحتاج الرائع ود العمدة لشهادة منا ؟؟ ود العمدة تشهد له جغرافيا جامعة الجزيرة .. ويشهد له تاريخ رائع بجامعة الجزيرة يجعلنا نفتخر به كصديق وليس حبيب ينتمي لحزب الأمة فقط .. الشهادة بحق ود العمدة تنتقص من مكانته ، فهو لا يحتاج لشهادة بحقه .. وكما قلت نختلف معه أو نتفق ولكن ذلك لا ينقصه شئ ولا يزيده إلا احتراما وحبا في قلوبنا ..

مشكور يا حسين على حقانيتك، وصدعك بالحق، ولا أزيد على كلامك ..

فأنت قد عاشرت العمدة أيضاً على أرض الواقع ..

وأنا أيضاً أفتخر به كأخ وصديق عزيز في المقام الأول

دكتور سيف .. تحياتي

Quote: شخصي اول من ناصر الحبيب محمد الحسن العمدة رفعت بوست كوزنة ودالعمدة واتي هنا اناس كتر كتبوا حول شخصية ودالعمدة لكن عليه وقف اتهام الناس بالباطل لانو للناس اقلام وحجار وسكاكين وكوش كمان

والله يا سيف الناس بقت ما تتحمل الاختلاف في وجهات النظر ..

وتهمة الكوزنة دي اتقالت لي ود العمدة يمكن لأنو ما مشى على هوى ..

أو انتقد بعض الأحزاب وقال رأيو ووجهة نظرو في بعض المواضيع..

أما نحن بحكم قربنا منو وبحكم المعرفة الشخصية بي ود العمدة فبنعرف إنو ده كلام فارغ أصلاً

ولا يستحق الأخذ والرد ...

اخي الهادي

محمد الحسن العمدة شخصية قوية داخل حزب الامة مثل هذا الاتهام لايهزها

تحياتي مرة تانية يا دكتور سيف ..

Quote: محمد الحسن العمدة شخصية قوية داخل حزب الامة مثل هذا الاتهام لايهزها

بالتأكيد للعزيز محمد حسن العمدة إسهاماتو ودوره المقدر في حزب الأمة

والذي لا يمكن لأي أحد أن ينكره أو يقلل منو ..

وشاكر لك إسهامك النبيل..

Quote: وبالعربي كده أنا أشهد ليهو بأنو: العمدة زول ضكـران وأخو أخوان ..

الاخ الكريم الهادى
سلامات

يا زول صاحبك ود العمدة دا زول ضكران و ما ضكران دى ما شغلتنا، و الناس زاتها بكتب فى المنبر موش عشان ضكرنه و رجالة و كرم. الناس بتكتب هنا فى قضايا فكرية، سياسية، اجتماعية، دينية، فلسفية، علمية. المحل دا ما محل ضكرنه و شياخه حله عشان المعايير تكون ضكران و بعشى الضيفان و اخو اخوان.

هنا المطلوب العتاد الفكرى و القدره على التحليل و التفكير فى المعقد من القضايا. حتى تأتى المشاركة فى النقاش بسمات ايجابية تجعل الناس تحترم العمدة او غيره. اها فى مجال العتاد الفكرى و القدره على التحليل دى يتفاضل الناس، و ارى فيما يرى المتابع ان هذا العمدة فقير الى ربه من اى عتاد معرفى او فكرى يمكنه من خوض قضايا الجدل السياسى و الفكرى و النظرى التى يعج بها فضاء المنبر و فضاء العمل السياسى الســــودانى. ود العمدة يمارس السياسة "حرارة قلب" ساى مثله مثل اى شيخ هرم يدين بولاء مطلق لـ ال المهدى (بالمناسبة انا من مناطق الانصار و عارف النماذج دى) فاذا وجدنا العزر للشيوخ الذين لم ينالوا حظا من التعليم و لم تتاح لهم السبل للتحصيل المعرفى فكيف نجد العزر لرجل مثله يعيش فى عصر الانفجار المعرفى ينتفع باٍحدث وسائل التكنولوجيا و سائط نقل المعرفه؟

الأخ الكريم أبو بكر ..

Quote: يا زول صاحبك ود العمدة دا زول ضكران و ما ضكران دى ما شغلتنا، و الناس زاتها بكتب فى المنبر موش عشان ضكرنه و رجالة و كرم. الناس بتكتب هنا فى قضايا فكرية، سياسية، اجتماعية، دينية، فلسفية، علمية. المحل دا ما محل ضكرنه و شياخه حله عشان المعايير تكون ضكران و بعشى الضيفان و اخو اخوان

وهل قصر العمدة في كل أو معظم القضايا اللي بتقول عليها دي ؟؟؟

أبداً ... من الناحية دي اتطمن وأرقد قفا، فالمنبر يشهد وأنا شخصياً أشهد وغيري الكثير ممن يشهدوا للعمدة بالمشاركة بفعالية في الكتير من السجالات السياسية والفكرية والدينية وما إلى هنالك من السجالات التي دارت في هذا المنبر .. وسجله حافل جداً على هذا الصعيد ..

لكن دافعي لكتابة ما كتبت في هذا البوست هو أن العمدة يتعرض فيما يشبه "الحملة" للسب والشتم والإساءة والتجريح والملاحقة اللي ما عندها أي صلة أو علاقة بالقضايا الفكرية والسياسية والفلسفية البتقول عليها دي، واللي شارك فيها "الكتيرين"، وعشان كده جاء كلامي ده في حقو لإنصافه، وبرضو ممكن تعتبرا دعوة مضادة لرد حملة البذاءة والإساءات والسفه التي يتعرض لها العمدة!

أما حديثك عن طريقة ممارسة العمدة للسياسة ... فهو رأيك الشخصي وتقييمك ..

وليس بالضرورة إني أشاطرك فيهو ...

أما أصحاب ( العتاد الفكري والقدرة على التحليل والتفكير في المعقد من القضايا )

فخليهم يردوا على أسئلة العمدة وغيرا المطروحة أمامهم في الأول !

بدلاً عن جر الناس إلى مواضيع إنصرافية لمداراة الخيبة

يا اخى الهادى
سلامـــات مره اخرى

يا اخى انا لم اقل ان العمدة لم يشارك فى هذا المنبر، بل يشارك بفعالية كما زكرت.
لكن هذه المشاركة فى تقديرى لم تخرج عن طور التهريج و الطربقه السياسية. و هذه نتيجه
منطقية لفقره المعرفى و ضعف ادواته فى المحاججه المعززه بالاسنايد و القرائن اللازمه
المعرفيه و المنطقيه.

عشان ما تقول انا متحامل على الراجل دا ساى هــاك اقرأ نماذج الفقر المعرفى و ضيق
الافق الثقافى و صعف التحليل فى مشاركه ود العمدة فى هذ المنبر: قرأ فى الربط ادناه:

http://سبحان مغير الأحوال ياود العمدة


____________________________________________
التصحيح لازالة بعض النتواءت فى الكتابه

الأخ أبو بكر ... صباح الخير ..

Quote: يا اخى انا لم اقل ان العمدة لم يشارك فى هذا المنبر، بل يشارك بفعالية كما زكرت

كويس إنك أثبت للعمدة فعالية المشاركة يا أبو بكر ..

والباقي هو " رأيك " و" تقييمك " أنت ، واللي ما بالضرورة إنو الناس بتتفق معاك فيهو !

وإذا إنت شايف إنها لم تخرج عن طور التهريج والطربقة .. فغيرك ممكن يكون شايف غير كده

وبعدين انحنا الآن ما في وارد إنو نمشي نجيب اقتباسات ونكوت .. أو منو قال شنو

لكن على سبيل المثال فقط أضع لك الرابط أدناه، عشان تراجع مداخلاتك فيهو ..

وتشوف كيف إنك انت نفسك ياأخ أبوبكر "مع احترامي لك" طاردت العمدة بعبارات مستفزة جداً ينتفي معاها أي حوار موضوعي

سبحان مغير الأحوال ياود العمدة

فياريت يعني إنو الواحد قبلي ما يرفع نفسو لمقام "الأستاذية" يشوف نفسو هو زاتو بقول في شنو !

ولك خالص الشكر ،،،

ود العمدة ده جناح عبد الله محمد أحمد في حزب الامة. مثله مثل جناح أبوصالح في الاتحادي.

العزيز دينق

والله لوكان و العمدة زيهم لجبت ليك خبروا

ودالعمدة اكبر من ذلك

مشكلة الاخ ود العمدة انه احبانا ينظر للامور بعواطف مندفعة فبقع فى التناقضات

خد مثلا فى ملابسات اخر معركة انتخابيةفى جامعة الجزبرة حدث خلاف بين تنظيمه و الجبهة الديمقراطية: بدا بعدها العمدة (و لا زال) حرب داحس و الغبراء لبس ضد الفصيل المعتى و انما ضد الحزب الشيوعى (فى الوقت الذى ينضوى فيه الامة و الضيوعى فى تحالف واحد)

خد ثانيا معركته ضد الاخ عادل عبد العاطى فبعدما رفعه اعلى عليين عاد بتهمه بدون ادلة بالامنجية

الأخ العزيز عوض محمد أحمد :

Quote: مشكلة الاخ ود العمدة انه احبانا ينظر للامور بعواطف مندفعة فبقع فى التناقضات خد مثلا فى ملابسات اخر معركة انتخابيةفى جامعة الجزبرة حدث خلاف بين تنظيمه و الجبهة الديمقراطية: بدا بعدها العمدة (و لا زال) حرب داحس و الغبراء لبس ضد الفصيل المعتى و انما ضد الحزب الشيوعى (فى الوقت الذى ينضوى فيه الامة و الضيوعى فى تحالف واحد) خد ثانيا معركته ضد الاخ عادل عبد العاطى فبعدما رفعه اعلى عليين عاد بتهمه بدون ادلة بالامنجية

ممكن أي واحد فينا يكون عندو تقييمه الخاص لما يطرحه ود العمدة أو غير ود العمدة في هذا المنبر

ومهما كان تقييمنا لما يطرحه فده ما مبرر إنو تفتح عليهو أبواب التجريح والإساءة من كل اتجاه

أما موضوع معركته مع الأخ عادل عبد العاطي ...

فأنت وصفتها بالمعركة، وعشان نكون منصفين فهي لم تكن معركة من طرف واحد بل من الطرفين ..

وكل لجأ للضرب تحت الحزام للرد على الآخر ...

Quote: ود العمدة ده جناح عبد الله محمد أحمد في حزب الامة

تحياتي يا دينق ..

دي تصنيفات منكم ساي يا دينق ما عندها أي أساس على أرض الواقع ..

وانتو مشهورين بقوالبكم وتصنيفاتكم الجاهزة لأي زول ما يعجبكم أو يخالفكم "الرأي" تصبوهو في واحد من القوالب دي .. زي ما بتعملوا الآن مع ود العمدة ..

والمشكلة إنكم لا تأتوا ببرهان على تصنيفاتكم دي !

وأول مرة أسمع إنو كان لعبد الله محمد أحمد جناح داخل حزب الأمة ..

وعلى حد علمي فالرجل لم يكن يمثل إلا نفسه في حزب الأمة ..

انقلع الوتد واتوتد المقلوع
فقرت بيوت الخير وشبعت بيوت الجوع
ود ناس الاضينه العمرو ما متبوع
نتكلم معاه وكلامنا ما مسموع

الأخ الهادى
السلام عليكم
أولا جيد أن تكتب عن ما تعرفه عن زميل لك في هذا المنبر
وأنا لم ألتقي ودالعمدة وجها لوجه لكن حدثني عنه صديقنا
ناصر علي وبالفعل قال فيه مثل قولك هذا..هذا عن الجانب
الانساني والاجتماعي ..وجميل أن نسمع عن أى سوداني ما يشرح القلب.
ولكن سبق أن كتب عني من قبل صديقي المذيع لقمان حسن همام شيئا
شبيها بكلامك هذا ويشهد الله أنني لحظتها لم أكن التقيته أو هاتفته
أو راسلته لمدة تفوق الثمانية سنوات.... فجاء ود العمدة وكان
وقتها يدخل كل البوستات التي تدخلها دكتورة كانت تكتب هنا وعلي
خلاف معي ليقول أن البوست (عبارة عن تلميع لشخصي) ...وأنا هنا لا
أقول كما قال هو في ذاك البوست ولا أعتقد بأنك تقوم الآن بتلميعه
بل أعتقد أنك أردت أن تبرز ما تكنه له من حب واحترام وهذا جيد
ويجد منا كل تقدير...ولكن أقول لودالعمدة عداءك الشخصي لبعض
التيارات السياسية يجب أن لا يجعل منك تابعا لكل من يعادى تلك
التيارات....لأن دروب السياسة متعرجة وأمامه دليلان أذكر منه واحدا
وهو ذاك الاحتفاء الذى وجده مقال شوقي بدرى من ودالعمدة لا لشئ
الا لأنه صادف هوى في نفسه في تلك اللحظة لدرجة أن أعاد به فتح البوستات
بطريقة هستيرية لا لشئ الا لأنه يريد أن يكيد به ...ولكنه لم يهنأ
كثيرا بذاك الاحتفاء لنجده وبعد فترة قصيرة يشن هجوما ضاريا علي
نفس الشوقي بدرى........وما حدث في الأيام الفائتة بهذا المنبر
شاهد آخر علي اندفاع ودالعمدة الغير محسوب.....أقول هذا والكل
يعلم بأن ودالعمدة ينتمي لحزب كبير له تجاربه الطويلة في الحياة
السياسية السودانية والتي يجب أن يستفيد منها لا أن يكون تابعا
وقولي أعلاه قصدت منه لفت النظر له أن يأخذ به أو أن يعتبرها واحدة
من المداخلات الكثيرة التي امتلأ بها المنبر في الأيام الفائتة.
وتشكر أخي الهادى

الأخ المحترم عاطف مكاوي ..

Quote: أولا جيد أن تكتب عن ما تعرفه عن زميل لك في هذا المنبر وأنا لم ألتقي ودالعمدة وجها لوجه لكن حدثني عنه صديقنا ناصر علي وبالفعل قال فيه مثل قولك هذا..هذا عن الجانب الانساني والاجتماعي ..وجميل أن نسمع عن أى سوداني ما يشرح القلب.

جميل إنو برغم خلافك أو اختلافك مع ود العمدة لم تكتم الحقيقة التي ذكرها لك من يعرف العمدة بشخصه
وده أظنو يعكس أصالة معدنك في المقام الأول ..
فلك كل الاحترام والتقدير ..
أما بخصوص بعض الأمور التي ذكرتها في تعليقك ..
فلا أخفيك إنو واحدة من الأمور التي لم أكن متفقاً فيها مع الصديق العمدة هو إجمالاً ما كان يجري هنا بخصوص التصويب على الحزب الشيوعي أو قيادته أو حتى بعض أفراده وكوادره .. ورأي الشخصي إنها لم تكن سوى معركة في غير معترك ..
وما جرى في النهاية لا أظنه يخرج عن تقدير العمدة ورؤيته الشخصية ليس إلا ..
أما ما يفعله أو يقوله المدعو " شوقي بدري" فلا أرى أنه من الممكن أن يعتد به ولا يخرج عن كونه "مشاطة" إلكترونية لا أكتر ولا أقل ..

يا ود عوج الدرب.

المرة دي أنا يختلقف معاك.

وبيني وبينك الايام.


دينق.

Quote: تحياتي يا دينق .. دي تصنيفات منكم ساي يا دينق ما عندها أي أساس على أرض الواقع .. وانتو مشهورين بقوالبكم وتصنيفاتكم الجاهزة لأي زول ما يعجبكم أو يخالفكم "الرأي" تصبوهو في واحد من القوالب دي .. زي ما بتعملوا الآن مع ود العمدة .. والمشكلة إنكم لا تأتوا ببرهان على تصنيفاتكم دي ! وأول مرة أسمع إنو كان لعبد الله محمد أحمد جناح داخل حزب الأمة .. وعلى حد علمي فالرجل لم يكن يمثل إلا نفسه في حزب الأمة ..

الهادي.

زي ما أنتو كنتو عاملين نايمين من تصرفات عبد الله محمد أحمد في حزب الامة فمن الطبيعي جدا أن تدافع على ود العمدة، أصلوا أنتو حزب لن تستفيدوا من تجاربكم السابقة أبدا. كده وريني متين في حزب طلع بيان ينفي فيه كوزنة عضو غير حزبكم؟ يعني ود العمدة لجاء للحزب لكي ينفي كوزنته. والكوزنة هي كتاباته وليس بطاقة عضوية.

أهلاً بيك مرة تانية يا دينق ..

Quote: زي ما أنتو كنتو عاملين نايمين من تصرفات عبد الله محمد أحمد في حزب الامة فمن الطبيعي جدا أن تدافع على ود العمدة، أصلوا أنتو حزب لن تستفيدوا من تجاربكم السابقة أبدا. كده وريني متين في حزب طلع بيان ينفي فيه كوزنة عضو غير حزبكم؟ يعني ود العمدة لجاء للحزب لكي ينفي كوزنته. والكوزنة هي كتاباته وليس بطاقة عضوية

محمد العمدة كعضو في حزب الأمة وزول عندو اسهامو المقدر في الحزب ..

من حقو إنو الحزب يقيف معاهو ويدافع عنو بالطريقة التي يحددها الحزب يا حبيب.

Quote: وبحكم المعرفة والصداقة التي جمعتني في "الغربـة" بالأخ العمدة ولمدة قد تزيد عن الثلاث سنوات ربما منذ تلك الزيارة فلم أرى منه طوال الفترة التي عرفتها فيه إلا كل طيبة قلب ، ودماثة أخلاق ، وصفاء نية .. وفوق ده وده والله زول بشوش ومرح لا يقابلك أو يحدثك إلا والضحكة تسبق كلامه .. وبالعربي كده أنا أشهد ليهو بأنو: العمدة زول ضكـران وأخو أخوان ..

وانا اشهد معك يالهادي ان كان الموضوع يحتاج لشهادة الا اني اعتقد ان ما كتبه البعض في حق ود العمدة
ماهو الا نوع من تنفيس لانفعالات سببها انه فد خابت مساعيهم في استمالة او استقطاب ود العمدة فتحولوا
180 درجة وهذا هو اسلوب الكيزان وربائبهم.

Quote: وانا اشهد معك يالهادي ان كان الموضوع يحتاج لشهادة الا اني اعتقد ان ما كتبه البعض في حق ود العمدة ماهو الا نوع من تنفيس لانفعالات سببها انه فد خابت مساعيهم في استمالة او استقطاب ود العمدة فتحولوا 180 درجة وهذا هو اسلوب الكيزان وربائبهم.

بالضبط يا نيازي هو ما قلت ..

وشاكر لك مرورك وتعقيبك يا حبيب

بصراحة

ود العمدة ما عارف قيمة نفسو ..
وبى كدا بدخّل نفسو فى محلات .. أصغر منو .. يمكن نسميها ( يحشر نفسو )

وان عرف مقدار نفسو
فهل يعرف مقدار حزبو
ولو عرفهما فهل يقيم ذلك بكتابته ؟؟؟

ياعزيز العارف عزو مستريح ولذلك ود العمده مستريح

على الفاسق محمد الحسن العمدة ان يأتي بملف امنجيتي والا فهو كذاب فاسق
عليه ان يوضح للناس دوري المشبوه في اسمرا في التسعينات والا فانه كذاب فاسق

ولو لم يأت بها وواصل في السقوط فهذا يؤكد صحة التحليل انه حزب امة بمكنة كوز
فهذه هي افعال الكيزان نفسهم ...

وين نص المكنة دا ؟؟؟



.

عادل تحياتي ..

انت والعمدة كلاكما مخطئان يا عادل ...

الاخ الهادي تحياتي

Quote: انت والعمدة كلاكما مخطئان يا عادل ...

يا سيدي هذا العمدة كاذب وفاسق
زعم اننا قلن ان دستور النظام مقسط واننا نرى النضال المشترك معه وفي هذه هو كاذب ولم يأت بأي دليل
انا مخطيئ في قولي انه كوز وقد سحبت الكلمة دون ان يحوجني انسان لذلك؛ لانه ليس كوزا تنظيميا
اما كونه مركب مكنة كيزان فاسقين فجرة لا يتورعون عن الكذب والتلفيق فهذه حقيقة فقد اضحت لكل ذي عينين

على هذا الفاسق اثبات اتهاماته ضدي والاتيان باللمف المزعوم
والا فانه فاسق وكاذب ولن يهنأ براحة في هذا البورد ..

وكمان قال بيهدد باللقاء
والله عشنا وشفنا اشباه الرجال بيهددوا ..

.

عادل تحياتي ..

يا عادل إنت والعمدة الاتنين شتمتوا بعض ..

وإنت البديت الاستفزاز والنبذ والشتيمة .. ودي هي الحقيقة ..

ولو كررت مداخلتك دي هنا مليون مرة حا تلقى مني نفس الكلام ..

العمدة ما جاب كلام الأمن ده إلا بعد ما انت استفزيتو ونبذتو لأكتر من مرة ..

والبجي يقول كلام غير ده يا إما صاحب غرض ..

أو جبان !

الأخ حسن مستور ..

Quote: ياعزيز العارف عزو مستريح ولذلك ود العمده مستريح

ونحن برضو أصدقاء ومعارف محمد العمدة عارفنو هو شنو ...

وعارفين إنو الإساءة والتجريح لا تعكس شخصية العمدة أبداً ..

والواحد كان يتمنى إنو الناس تطور أدواتا أكتر من كده ..

موش الواحد كل ما يفقد المنطق يجري على أسهل حاجة !

عشان يصرف الأنظار !

معتصم .. مساء النور ..

والله لو سألتني عن رأي ...

أنا شايف إنو الحاصل ده كلو عبارة عن معركة مفتعلة

وتشتيت كورة ليس إلا ..

ومحاولة لجر الأنظار وصرفها لمواضيع تانية

وأنا ما بقول إنو العمدة لم يخطئ ...

لكن العمدة تم استفزازه فرد على الاستفزاز

فليه الناس سايبة ده كلو ومركزة على العمدة ؟؟؟

Quote: على الفاسق محمد الحسن العمدة ان يأتي بملف امنجيتي والا فهو كذاب فاسق عليه ان يوضح للناس دوري المشبوه في اسمرا في التسعينات والا فانه كذاب فاسق ولو لم يأت بها وواصل في السقوط فهذا يؤكد صحة التحليل انه حزب امة بمكنة كوز فهذه هي افعال الكيزان نفسهم ...

الأخ الهادي..

السلام عليكم..

لا يهمني إن كان صديقك كوزا أم لا..
ولكن ما يهمني أن صديقك هذا وعلى صفحات المنبر اثبت أنه خبيثا وصاحب نفس سيئة ومرسالا لنساء (نسوان) أردن تصفية حسابات عن طريقه. فوجدن فيه ضالتهن المنشودة..
أتى العمدة صديقك برسالة (وهمية من بنات افكاره) تتهمني في سمعتي الشخصية والمهنية.
ولم يستطع حتى اللحظة إثبات صحة الرسالة التي طالبته كثيرا أن يقوم بإعادة إرسالها إلى بريدي الذي يملكه ويعرفه والذي كان موجودا في بروفايلي لحظة تلك الأحداث.

جميل ان نقف لأصدقائنا وننصرهم. ولكن الأجمل ان نكون عادلين في ذلك. اي بنصرهم عند الحق وتصوبيهم عند الخطأ.

ولا أعتقد أنه ببيان من الحزب او رأي شخصي لأصدقائه سينصلح حال هذا العمدة. ما لم يقم هو نفسه بذلك
حيث لا يمكن ان يكون الشخص محترما مع حزبه وأصدقائه وغير ذلك مع باقي خلق الله في المنبر.
لأنه ليس واجبا علينا تحمل أمراض وإحباطات الغير (لدى أي منا إحباطاته الخاصه).


مع التأكيد بأن هناك كيزانا ليسو بخبثاء او يلعبون ادوارا قذرة لغيرهم.

وشكرا لتحملك مداخلتي..

رجا العباسي

الأخت المحترمة رجاء العباسي ..

العمدة صديقي نعم، و لكنه يُخطئ لو زج نفسه في صراعات ليس طرفاً أصيلاً فيها حتى لو فعل ذلك بحسن نية ...

وهذه الصفحة بالذات أرى أنو من الجميل أن يتم طيها باعتذار صغير ..

وإنتي على العين والرأس يا رجاء ..

الأخ الفاضل الهادي..

سلام وتقدير..

أولا أشكر لك ردك المهذب والمقدر حقيقة.
وبالفعل أنا طويت هذه الحادثة. وتعلمت منها درسا في حياتي.
ولكن ما أتى بي اليوم هو الحديث عن العمدة الذي يخطئ الجميع في فهمه ويبخسونه حقه والذي هو كرم ودماثة أخلاقه!!

ولولا نفر كريم من حزب الأمة وأنت اليوم معهم. لما تجاوزت الإساءة لي.

ويسلم راسك وتكرم عينك



أشكرك مرة اخرى