الأديب الطيب صالح ثروة قوميه تُعالج علي حساب الغير .. شكري لهم

الكرام متصفحي البورد صبحكم الله بالخير

جاء في الأخبار ليوم الجمعة بأن الأديب الطيب صالح سوف يخضع لعملية زراعة كلي علي يد النطاس أبو سن علي نفقة حاكم إمارة الشارقة في الأيام المقبلة بعد أن تبرع مواطن سوداني بكلية لصالح الأديب الطيب صالح وهنا أود أن أشكر كل من يسهم في وضع بسمة في ثغر سوداني إنساني والحمد لله من قبل ومن بعد . لكن شق عليُّ أن يجتهد الغير في علاج الأديب والقريب لا يهتم لهذا الأمر بل بعزقة قروش في مجالات يلفها الغيم.

بحيراوي

شكرا بحيراوي ... كذلك اعتراني نوع من الغضب وتذكرت الذين دعوه بغرض المتاجرة بإسمه لما ادخلوه بقاعة كبار الزوار , حقيقي هي مبادرة طيبة وكبيرة من الشارقة ومن الشيخ القاسمي ولكنا في مثل هذه المواقف كنا نتمنى لها ان تكوت منا وممن يلهفون بلا رد للجميل
التحية للكبير الطيب صالح والتحية مربعة للعالم الدكتور البارع كمال ابوسن ... تمنياتي له بعاجل الشفاء , وان تكلل بالنجاح التام .
.................................................................................................حجر.

البحيراوي الكلس :

أهلك البقارة عندهم مثل حكيم جدا بقول : الما بتريدو خالف الله فوقو .

هذا فيما يخص ( بعزقة قروش ) ؛ ياخي رغم سلسة ( من أين أتى هؤلاء ) الشهيرة للطيب صالح و هجومه العنيف ضد الجماعة ديل الا انو الراجل بطبعه يفرض احترامه ؛ و رجع البلد ( يقدل ) فما ازوه و لا سألوه بل فتحوا له منابر اعلامية اوصل خلالها الكثير من آرائه الأدبية و السياسية و الاجتماعية كمان ؛ و الشي العارفو عندو عمود ثابت في صحيفة يومية .

و هذا - حتى لا ينط واحد من النشازيين - ليس فضلا و لا هبة من الكيزان ؛ انما الراجل من النوع الما بتهبش ؛ يعنى مجرد استدعاء من أجهزة الأمن للطيب صالح يمكن ان يقلب كامل الطاولة على الجماعة ؛ لذلك تحاشوه رغم قسوته عليهم ؛ عشان كدا قلت ليك الراجل رجع ( يقدل ) زيك كدا و قال رايو .. و وصل الراي ..

أمامن الناحية التانية - مصروف العملية - انت عارف انو الراجل دا ما محتاج لا للحكومة و لا لحاكم الشارقة دا و لا لي و لا ليك ؟

من جيبو ممكن يعمل عمليتو و لعشرين زول محتاج للعملية دي ..

و برضو ممكن يدق باب اي مستشفى محترم و يقول ليهم : هوي يا ناس انا فلان و عايز اعمل العملية دي ؛ هل تعتقد حيرفضوا ليه .. لأنو المستشفى دا زاتو ( فخر ) ليه ان يكون زولنا دا أحد مرضاه .. و ما تتخيل الدكتور اللي حيعمل العملية دا حيكون مبسوط قدر ايه : انا أجريت عملية للطيب صالح .. مفروض بعد دا ( يعتزل ) و يكتفي بآخر عملية ..

ناحية تالتة يا بحيراوي - و جد انت كلس - حاكم الشارقة دا زاتو يكون ( اتجوعل ) و حلف طلاق على (النفقة) دي .. و احساسو كان زي احساس الدكتور اللي حيعمل العملية دي : فيه ( أنأنة ) شديدة .

و انت عارف في 60 ألف ( كحيان ) زيي و زيك محتاجين لحبة صداع ما لاقنها .. يعني بقت على الطيب صالح ؟ وين ( المدد ) هنا .. وين ( الأجر ) هنا و وين ( فعل الخير ) هنا .

دا ما ( فاعل خير ) و لا حكومة الشباب ديل قصرت ؛ انما هو سباق نحو ( القامات ) ..

أما اذا مرضت أنت يا بحيراوي - لا سمح الله - فلن يزورك أحد الا مندوب عن ( البورداب ) ما عندو موضوع و بكون حق الرجعة ما عندو ..


تحياتي ..