مكتب فى إسرائيل؟ ولم لا!!!

عنوان لبوست سابق فى هذا المنبر, بسببه تعرض كمبيوترى الشخصى لهجوم فيروسى جعل دخولى للمنبر مستحيلا, بل حتى مجرد فتحه والاطلاع على محتوياته التى لا علاقة لها بالمنبر, وقبلها حدث نفس الشئ مع بوستات اخرى.
ساستمر فى هذا البوست داعما لوجود مكتب فى اسرائيل يمثل ابناء السودان ودارفور فى اسرائيل, الحضن الدافئ الذى احتواهم من عسف مضطهديهم, مدعى العروبة والمؤلفة قلوبهم من مسلمى الاطراف, بمختلف مسمياتهم الكئيبة, جبهة ميثاق, حزب امة بكل اجنحته , من ام جكو لجناح الصادق, جبهة اسلامية, مؤتمر وطنى وشعبى, ولا استثنى احدا.
بالمناسبة, مصر تقتل يوميا وتعتقل من المتسللين اعدادا مجهولة, لا يعلم احد عنهم شيئا, فى الوقت الذى يصدر فيه الغاز الطبيعى لاسرائيل, وعائدات العمالة المصرية هناك من العملة الصعبة لا يستهان بها, وبرضو تسالو تلج دة ياتو فى عيال سيدى!

سلامات ياابها الجسور محى الدين
هنالك مبررات مقنعة واقعية لكل
من راى الامر بشىء من الموضوعية
العلم الاسرائلى يرفرف فى سماء
قاهرة المعز
وهنالك من الدول العربية لها
علاقات واضحة مع دولة اسرائيل
هذا بشكل عام اما ما يخصنا
فى دارفور هنالك جالية سودانية
لابد من التواصل معها وتسير امورهم
فى الحقيقة هنالك عدة اسباب
سوف اعود لاحقا.

اخى النقرو سلامات
ياخى بعيد من الموضوع دة, حيرتنى اسماء اهلى فى دارفور, هم هرون واسحق وادم, ابراهيم, سليمان ويوسف وزكريا ويحى, وموسى ياخى انحنا يهود اكتر من اليهود زاتو, ومسلمين اكتر من المسلمين, وعرب العرب و...(دى بذيئة شوية).
لا حوجة لتبرير وجود مكتب فى اسرائيل, فإسرائيل دولة مثلها مثل اى دولة فى العالم,فمثلما هناك مكاتب للحركات فى مصر وغيرها, فلا ضير فى ان يكون هناك مكتب فى اسرائيل, والسروالو مقدود ولا بشنقل.

قيل فى حديث صحيح عن تلج حفيد سيدى, أن اهلى من دارفور قدموا إلى جزيرة أبا تسبقهم ثرواتهم من الابل والماعز والضان والبقر, ارهقهم السفر الطويل وحلوا اخيرا فى تكية سيدى, شمال السراية تحديدا, قريب لمكان حداحيد داك, جابو ليهم خدا, شبعوا,عطشو, جاهم متحذلق قال ليهم: حالكم دا الا نجيبو ليكم تلج!
سألت خالة لينا ببرائة: تلج دة ياتو فى إيال سيدى!
هسع مكتب إسرائيل دة وجع إيال سيدى فى خرقهم, وغير عيال سيدى, برضو وجعهم, لانهم إحتكروا كل شئ, الله ورسوله ومهديه ومسيخه الدجال, خلو ليكم عبودية بس, للدنقلاوى والكشميرى وعيالهم, افتحو مكتب فى تل ابيب ولا تل الزعتر, خسرانين حاجة انتو؟ احمو اخوانكم فى اسرائيل بمكتبكم دة, واخوانكم الفى مصر الما معروف ليهم جيهة, كان فى معتقلات ولا قبور برضو افضحو جلادهم التانى, عشان انتو شفتو, ولا جابو ليكم.

مرحبا بعودة ( الأستاذ)..
ضوء البكان..



تحياتى للأسرة.

العزيزة امنة سلامات واشواق
يا اختى (الاستذة) دى كتيرة شوية, لانو بكرة ممكن (اتمهدى) ليكم, ويجو احفاد عادل عبدالعاطى ينسفو سنسفيل جبال تقابو.
شكرا لطلتك البهية.

يامحيو..
ياخى رغم انو بكرى رجع الماسجنر
لكن برضو قت احييييك قدام الناس!!


________________________________
ياربى التحايا دى عندها علاقة بالموضوع؟؟

صديقى العزيز على تروس
مشتاقين (كتيييير)
والقوسين فى عين اللى ما يصلى على النبى
انت اكتر زول واضح عرفتو, مسنجر شنو يا حبيب, طلتك دى ولا الف مسنجر
تحياتى للمعاك.

محي الدين مبروك لمن فتح مكتب في اسرائيل

وانا لا اري اي مشكلة لذلك

وهواب الطير اسرائيل ولي زمنها الناس التمشي قبل اسرائيل تصلح حالها

القضية الفلسطينية
العدو الصهيوني

اصبحت بضاعة بالنسبة لي انا بائرة جدا


لك السلام

صبرى كيفنك
والقصة من حرب ونكسة 67 انكشفت عورتها وبارت سلعتها, وفلسطين بقت زى مشكلة الجنوب, اى عسكرى تلب فى الحكم كان بيانو الاول مبنى على مشكلة الجنوب, هسع فى اوسلو وما ترتب عليها, ونيفاشاوشراكتها, يعنى مافى مبرر لاى طاغوت عشان يتفرعن, ومبروك للاشاوس فى مكتب اسرائيل, وعقبال للباقين.
تحياتى