بشراك يا سناء .. تيراباً مشرب بي خدرة النيل ..

عايزة اكتب عنكم بالعامية ..
لانكم اولاد ملوك النيل واحفاد مهيرة ...
وياكم رهان عازه لي يوم بكره..

بعد اتصال مهاد ورغبتها في جمع تبرعات من الشباب والشابات ..
اتصل بي محمد الطيب بعد ما وصل عندهم وصوته مليان دعاش ...
فرحان بيكم شديد وبي حماسكم وهمتكم ..
كنا بنفتكر الجيل القايم مفصول عن هم البلد وعايش زمن خاص بيهو..
الليلة الموازين اتقلبت والمفاهيم اتغيرت ..
جيل مهموم بالبلد وجيل ممكن نراهن بيهو ...
"سوداني" عمره ما اتجاوز 12 سنة اتبرع لي سناء بي مصروفه "خمسه ريالات"
والله ياالحبيب "خمسة ريالاتك" ديل ربنا بإذن الله ح يجعلهم فاتحة خير على سناء ...

حماس ما عادي ورغبة حقيقية في مشاركة الهموم ..
وقالوا لسه عايزين يواصلو ..وموعدهم مع "سناء" الاسبوع الجاي ..

اتصلت بي "خديجة" من نفس الجيل اللازم نراهن بيهو ..
عايزة ترسل قصة سناء لي اذاعة "مانغو" ويذيعوها على مدى شهر تقريبا..
عايزة تشارك وتقاسم سناء الهم وقالت "انا جاهزة لي اي تكليف بس وروني اساهم بي شنو؟"


اتذكرت البيتين ديل..

العارفنو نحنا وجد مأكد صاح
كبجل جنا الكبجل..تمساح يلد تمساح

الاصل والطبع من البيوت والاهل ..
تحية تقدير واجلال واكبار لكل الاسر السودانية القدرت تغرس حب البلد في ابناءها ..
آباء وامهات .. احني هامتي احتراما وتقديرا لكم ...

لكم التحايا والتقدير ...