Post: #1 Title: .. ولا اسيبا مدنى واجى اسكن حداكا !! Author: عامر تيتاوى Date: 03-08-2008, 03:00 PM
ياسلام على التعبير الجميل من ارض المحنة ومن قلب الجزيرة برسل للمسافر اشواقى الكتيرة وشوفوا البساطة والروعة قول لى ياحبيبى شن اعمل وراكا هل احلم وامل فى سرعة لقاكا ولا اسيبا مدنى واجى اسكن حداكا سلام ياارض المحنة ياقلب الجزيرة وليك يامدنى اشواقى الكتيرة وللمبدع محمد مسكين الذى ابدع هذا اللحن الخالد وللمتالق الفنان دوما عصام محمد نور وللفنان القصاص عازف الاورغن الذى عوض الفلوت او الصفارة التى تميز هذا اللحن فى الاذاعة
من اشهر اغنيات محمد مسكين كتبها اخيه غير الشقيق الشاعر والصحفى فضل الله محمد لكن بصراحة تعجبنى هذه الاغنية حين يغنيها محمد مسكين لان فى صوته شجن يمس القلب ولا اعرف لماذا يتمسك عصام محمد نور باغنيات الرائعين ولا يتمسك بغنائه الشخصى ؟ لا احسب اننى من معجبيه وازعم انه اضاع منى تلك الفرصة حين غنى للكاشف و(مسخر اغنيات الكاشف ) اتمنى ان يلتفت لغنائه بعيدا عن اغنيات الاخرين فهو يمتلك خامة صوت جميلة لك الشكر اخى ودمت
Quote: صاحبى الجميل العائد كيكى رايك شنو تبدا من هنا من ارض المحنة من قلب الجزيرة
هلا يا تيتا ومدني جديرة بالبدايات للدهشة... ويكفي فيها مثل العصام وود مسكين وناس الحنية كاتلاهم ولها كل الحب والحنية الطالعة من هذا اللحن تعبير حقيقي لحنية اهل مدني الحنان
Quote: من اشهر اغنيات محمد مسكين كتبها اخيه غير الشقيق الشاعر والصحفى فضل الله محمد
اشكرك على هذه المعلومة المهمة واقدر رايك فى عصام مع اعجابى الشديد به خاصة عندما يغنى اغانى الاخرين رغم ان لعصام الكثير من الاعمال الخاصة التى لا تستهوينى كثيرا هذا مع التاكيد على اهمية العطاء والاسهام الشخصى لكل من يشق طريق الغناء ودى وتقديرى
Quote: والحنية الطالعة من هذا اللحن تعبير حقيقي لحنية اهل مدني الحنان
الفنانون والمبدعون هم اقدر الناس على تصوير الواقع والاستاذ محمد فضل الله ومحمد مسكين لم ياتوا بهذا الكلام الجميل واللحن الحنين من فراغ وانما جاء محاكاة للواقع فمن ارض المحنة
بله محمدالفاضل سلامات من الاكتئاب ويارب عودة تانى الى الجزيرة الحنينة وقلبها الاخضر وسلمت يااخى
Post: #20 Title: Re: .. ولا اسيبا مدنى واجى اسكن حداكا !! Author: محمد سنى دفع الله Date: 03-09-2008, 06:57 AM Parent: #19
كان من سكان الحي النابض بالحياة (( الحلة الجديدة)) محمد مسكين الفنان الأنيق كان يحترم فنه وجماهيره اسمر اللون كامل الوسامة يزهو به المكان حين حضوره القا بهيا, يملك ابتسامة ملاك وقلب طفل حينما يخرج من منزله يجد الترحيب من الكل اطفالا وشبابا وكهولا تقدرة النساء الجميلات ويفتتن به دائما يرتدي البدل الفاتحة الألوان منسجما مع الرمادي والأزرق النيلي والسماوي.. حينما يأتي الى السينما كان ابي يهرع اليه مرحبا به بمحبة عميقة وعندما كبرنا سألت ابي عن حبه لمسكين قال لي: محمد مسكين خلد مدني بهذه الأغنية الناس حتعرف قيمتو بعدين هل يلترى عرفنا قيمة محمد مسكين هذا الفنان الخلوق هل كرمناه التكريم الحقيقي ؟؟ لك المودة تيتاوي ودام صفانا
الفنان بحجم امة شكرا للعملاق محمد السنى دفع الله الذى منحنا صورة اكثر وضوحا واشراقا وصدقا عن الفنان محمد مسكين الذى بالفعل خلد مدنى الخالدة بهذه الاغنية
خضررررررررررراء مثل الجزيرة الخضراء مدنى مدينة ليها سحر خاص برغم اننى زرتها مرتين فقط فى حياتى الا اننى اكن لها مثل الكثير من المدن السودانية الاخرى كثير من الحب والحنين وياكع ناس مدنى ناس طيبين
الاخ الحبيب عامر مشتاقين شايفك ملبس محمد رقم (2) خليفة ولد الجماعة وكده انتا وصاحبك كملتو قعاد المصطبة وجاي تتبكي هنا؟؟
Post: #28 Title: Re: .. ولا اسيبا مدنى واجى اسكن حداكا !! Author: محمد ميرغني حسين Date: 03-09-2008, 08:23 PM Parent: #1
يا سلالالالالالالالالالالالالالالام يا تيتاوي ........ مدني هذه كم هي رااااااااااااااائعة ، فهي منجم إبداع مستمر في كل مجال ، بلا تحيز وبلا أي مساحيق أخرى ... فالشعر عند بني هذه المدينة ينساب كأزرقها الدفاق الجارف ... ثم ما يلبث أن يتخطفه المبدعون فيدوزنونه فيهتز به بنوها طرباً شجياً وإبداعاويرسلونه لبني وطني فيزداد الطرب. وفي الرياضة ، وأخص كرة القدم، فقد أخرجت هذه المدينة فطاحلة ... ولا أريد أن أسترسل ،،، فسيطول بنا الكلام ... سؤال مهم يا عامر : لا أدري هل اصابتك مدني في مقتل وتثير فيك هذه الأغنية أشجانك أم أن الموضوع لا يعدو أن يكون مجرد إعجاب بأغنية ؟؟؟؟؟؟ مرة تانية لك تحياتي
عدنا ودبل كليك تعليماتو بابتة في هذا البوست الذي يحملنا علي جناح طائر السنونو ويحلق بينا في ارض الجزيرة...
قول يا حبيبي شن بعمل وراكا كل احلم وامل في سرعة لقاك ولا اسيبا مدني واجي سكن حداااااك انا حيراااان معاككك يا سلاااااااام يا تيتاوي لك مقدرة اسطورية علي اعتقالي خلف المزيكة
Quote: بلاى شوف الصفارة دى بتلعب كيف والكلام بسيط لكن بليغ ومؤثر
ايام الطفولة الجميلة يا عامر اخوى انا زى ما قلت ليك بمشى البلدات او الزراعة بحبس الطير من العيش اللبنة وكنت لما اكون راكب حماري مع الصباح بصفر طوالى بالاغنية دى يعني بدون صفارة بشفايفي بس ولما اعود من الزراعة بالليل بصفر بنفس الاغنية عامل فيها شيطان يعني زولكم ماشي فائق ورائق .
آآآآآآآآآآآآه يا عامر من يا مسافر حليلك ويا حليل الليالي
ات قائل السفر ده سفر غربة والله تلقاها من مدنى لسنار او من الخرطوم لشندي لكن الناس كانت سرائرها نقية وحنينييييييييييييييين
ياسلام ياعامر نغمة جميلة عادت بنا الى احلام الطفولة المترعة في حي االديوم الشرقية بالخرطوم وهناك هتف الحنين لنا لزيارة مدني لأول مرة نقول ليك بالمراكشية : تبارك الله على عامر تيتاوي وصافي
Quote: مدني هذه كم هي رااااااااااااااائعة ، فهي منجم إبداع مستمر في كل مجال
رغم انك من مدنى وطبعا منحاز ليها شديد لكنك ما قلت الا الحق فالجزيرة المعطاءة ودرتها زى ما يقال فى مقدمة شريط شهير لصديق متولى هى فعلا تظل معينا لا ينضب من الفن والجمال شكرا يااخى العزيز محمد ميرغنى
مازن الجمال تحياتى وانا سعيد ان صادفت هذه الاغنية الخالدة فى نفسك هوى وحركت الشجن القديم شكرا على المرور بشارع مدنى
Post: #41 Title: Re: .. ولا اسيبا مدنى واجى اسكن حداكا !! Author: عامر تيتاوى Date: 03-11-2008, 10:49 AM Parent: #40
الحبيب ضحية
Quote: حضور واعجاب بكل اهل مدنى الفن والجمال ولى ارض المحنه والابداع كل التقدير مدنى اعطت الكثير للسودان فى كل المجالات الا انها تجلت فى الوتر والكفر.
ونحن نبادلك الاعجاب بحضورك المميز هنا وفى ربوع مدنى لك منى الود والتقدير
Post: #52 Title: Re: .. ولا اسيبا مدنى واجى اسكن حداكا !! Author: عامر تيتاوى Date: 03-15-2008, 01:36 AM Parent: #38
Quote: والالة الموسقيه اسمها البكلو مش الصفاره ,,وفي لغة الفنانيين الخاصة
بنسمي الزول الببكي في واحدة (بكلو) يعني بكاي
عماد عويس سلامات تنجسد عبقرية الفنان الذى وضع لحن هذه الاغنية فى جعل البكلو او الة البكايين دى عمود فقرى للاغنية يعنى بمجرد سماع نغمة صغيرة مباشرة تقفز الاغنية الى ذهن المستمع ويتعرف على اللحن بسهولة
عندما الناس تحكي عن الحنين في الغربة حقو الرطانة يصموا خشومهم بس لانو الواحد فيهم اكان ضرب ليهو حلة من حلال السعودية تاني لابدي خبر ولا عايز خبر يلبس مريلتوا ويقدل ودى بطينة ود بعجينة
Quote: عندما الناس تحكي عن الحنين في الغربة حقو الرطانة يصموا خشومهم
ياودشيقوق الرطانة ديل ناس حنينين ياخ بس عرفوا الغربة بدرى عشان كده مشت عليهم حكاية العشرة سنة الاولى
Post: #54 Title: Re: .. ولا اسيبا مدنى واجى اسكن حداكا !! Author: على عمر على Date: 03-15-2008, 02:39 AM Parent: #1
محمد مسكين.. ولا مسكين انا الما سكنتا مدنى؟
Post: #56 Title: Re: .. ولا اسيبا مدنى واجى اسكن حداكا !! Author: مجاهد عبد الرحمن Date: 03-15-2008, 12:52 PM Parent: #54
جميل يا تيتا تعرف مدني دي أجمل حاجة في الدنيا نفح الشاعر والصحفي والقانوني الفنان فضل الله محمد وجدان الإنسان السوداني بالعديد من الأعمال الجميلة الجليلة عندما كان في هذه المدينة الإيحاء فكتب أرض المحنة لمحمد مسكين والجريد والحب والظروف للباشكاتب والعديد من الغنيات التي لا يسع المجال لذكرها ... وفيها كتب المساح أجمل ما كتب في الحب والجمال والغزل حتى شكل به وجدان السودان عامة ... وكتب فيها كباشي حسونة ... وإمتد السيل حتى جمال عبد الرحيم ... ويتصل المسير ... وهنا دعني أن أحي كل ناس مدني في شخص المبدعين منها وأخص بالتحية أستاذي الجليل عصام حسين صاحب إحدى المداخلات أعلاه الذي كنت أتمنى أن اجد عنه خبر وكأنما يحرص أن يترك البروفايل دونما معلومة تصل الناس به هو والأستاذ عصام يوسف لأنني أكن لهم كل الحب ...
