Post: #1
Title: منو دفعتي في الوابورات وبحري الوسطى الشعبية!؟
Author: هشام هباني
Date: 03-06-2008, 09:49 PM
لازلت اتذكر مدرسة حي الوابورات الابتدائية بحلة حمد في حي الوابورات جنوب كنيسة الشهيد مار جرجس وشرق ميدان كورة... واتذكر من الاساتذة استاذ الكنزي واستاذ حسن واستاذ حسين من العيلفون.. ومن دفعتي المرحوم (المفقود) الشاعر ابوذر الغفاري وطالب اسمه عبد الرؤوف محمد الحسن يبدو انه شقيق المذيعة يسرية محمد الحسن... وكانت مدرسة الوابورات مدرسة مختلطة... ولا اتذكر اخرين لاني مكثت بها حوالي اربعة اشهر فقط
وبعدها انتقلت لمدرسة بحري الوسطى الشعبية المعانة وهي تقع غرب حديقة ( عبود) واتذكر من الاساتذة( حمدي ابو نضارات وسفة وعبد الحي) ومن الطلاب الذين سبقونا وكانوا في الصف الرابع اتذكر اكثرهم شهرة فيصل خوجلي وهو من الاولاد المشاركين في نشيد ( امة الامجاد) في تلفزيون السودان انذاك.. ومن زملائي محمد جابر من حي كوبر ومصدق محمد علي( ولد حلبي) يبدو انه والده كان طيارا عسكريا وبن خالته ( احمد) وهم علي علاقة قرابة بالفنانة( اماني مراد) وكان دفعتنا من ابناء الشعبية(احمد) افضل من يلحن الاناشيد وايضا كان دفعتنا اللاعب عبدو الشيخ ولا اتذكره ولكن لدي صديق التقيته في جامعة الخرطوم من ابناء مدني اسمه نبيل درس معي بنفس المدرسة وحاول ان يذكرني بعبده الشيخ... وايضا قال لي ان اللاعب عصام ابو الجاز كان دفعتنا بمدرسة حي الوابورات ولم اتذكره... وكان ايضا من ابناء دفعتنا بالوابورات وببحري الشعبية المعانة طالب اسمه محجوب ( طويل) من ابناء حي الدناقلة شمال يسكن بذاك الحي قريبا من( اللالوبة) بالقرب من بيوت ناس ساتي!
هل من دفعة يا جماعة!
اما التاريخ متين( انسونا) بس اوزنوا علي حكاية عبده الشيخ وعصام ابو الجاااز وابوذر دي!
|
Post: #2
Title: Re: منو دفعتي في الوابورات وبحري الوسطى الشعبية!؟
Author: على محمد على بشير
Date: 03-06-2008, 10:45 PM
Parent: #1
| Quote: اما التاريخ متين( انسونا) بس اوزنوا علي حكاية عبده الشيخ |
ههههههههههههههههههههههههه
غايتو يا هشام لو الوزنه على عبدو الشيخ
فأنا بنصحك انو تجينا فى السعوديه تعمل ليك حجه
وتستلم السرير بتاعك وتحتك التبروقه والابريق
وتمارس دورك كرجل كهل 
ياخ دا عبدو الشيخ اعتزل الكوره قبل تلاتين سنه
|
Post: #3
Title: Re: منو دفعتي في الوابورات وبحري الوسطى الشعبية!؟
Author: هشام هباني
Date: 03-06-2008, 11:02 PM
Parent: #2
علي
سلامات
Quote: ياخ دا عبدو الشيخ اعتزل الكوره قبل تلاتين سنه
|
يا راااجل عبده الشيخ اعتزل الكورة قبل ما اكسر سنونو يعني لمن ننو وكان خنفس!
بالمناسبة وين عبده الشيخ اللاعب الفنان الكان بجهجه باكات الهلال بطريقتو المستفزة ديك!
|
|