يمّة..

يمّة..


03-05-2008, 02:36 PM


  » http://sudaneseonline.com/cgi-bin/sdb/2bb.cgi?seq=msg&board=150&msg=1204724204&rn=2

Post: #1
Title: يمّة..
Author: تماضر الخنساء حمزه
Date: 03-05-2008, 02:36 PM
Parent: #0

ساعة السفر البناتِل.. قلبي سافر ليهو قلبك
يمة ياست المشاعر ..بالحنان غتّاكي ..ربّك
قلبي بس بيشاغلو طيفك..ديمة في جوّاهو حبّك
ماهاين عليّ ألقاهو بُعدك..ماهان عليّ ألقاهو قربك
يمة لميتي المحنة ..التزيد في براحو حضنك
كلما زغرد فرح.جواي بكون جواهو, منّك
وكلما شاقني الحنين..بسراع إجيبني عليك حنّك
يمة بشكيلك قليبي القلتي ليّ " بيزيدو جنّك "
يمة عاصي عليّ وحالي مابدسّو عليك وعنّك.


الغربة لو بتزيد جراحك ..كاتلني يمة الليلة بُعدك
انت يافرحة سنيني..أفراحي كل أسبابها عندك
خلّي أحزاني التسافر مابعيش بطراها بعدك
أبقي طيبة وأبقي زينة ..ببقى بيك ياأمي زيّك
من لهيب الدنيا يمّة فيني بنزل برضو فيّك
ماضلّت أحلامي المعاكي في النعاس صحّاني ضيّك.



مرَّات إغلبني شوقك..
أفرِد خُطاي..لو توصلك..
ألقى باقي السكة ..حِنّك..الحنين كم بيجمِّلك..
يمة ياست المحنّة..
انتي تسلمي ليّ كلّك.
Post: #2
Title: Re: يمّة..
Author: هاشم أحمد خلف الله
Date: 03-05-2008, 04:01 PM
Parent: #1

QUOTE]لغربة لو بتزيد جراحك ..كاتلني يمة الليلة بُعدك
انت يافرحة سنيني..أفراحي كل أسبابها عندك
خلّي أحزاني التسافر مابعيش بطراها بعدك
أبقي طيبة وأبقي زينة ..ببقى بيك ياأمي زيّك
من لهيب الدنيا يمّة فيني بنزل برضو فيّك
ماضلّت أحلامي المعاكي في النعاس صحّاني ضيّك.


ياسلام عليك يا تماضر تخيلي قبل ساعات قليلة كنت بتكلم مع أمي
وامطرتني بسيل من الدعوات المباركات , ربنا يجمعك مع امك
ويجمعنا كلنا مع امهاتنا , ويديهم الصحة والعافية ويطول في عمرهم
آمين يا رب العالمين .
Post: #3
Title: Re: يمّة..
Author: تماضر الخنساء حمزه
Date: 03-05-2008, 05:53 PM

ربي يسلّم أمهاتنا هاشم

مودتي
Post: #4
Title: Re: يمّة..
Author: عاطف عمر
Date: 03-05-2008, 07:53 PM
Parent: #1

الشعر بحر لم تعرفه - كتابة - مراكبي
لكنه ينساب طائعاً للخنساء
وهذا حسبنا
مادامت كل يوم تعطر به أيامنا وتجمل به أماسينا
Quote: يمّة..

أخشى يا تماضر أن أقول لك عنها
فأقع في محظور تقصيري
فـ ( أعقها )

سلمَ المولى العزيز كل الأمهات
Post: #5
Title: Re: يمّة..
Author: تماضر الخنساء حمزه
Date: 03-05-2008, 08:10 PM
Parent: #4

عاطف يسعد مساك
والنبي قول!

يوم المرأة على الأبواب..
لاأجدر به من (يمّة)



غايتو لو بي إيدي..أسي أدفن راسي في حضنها.
Post: #6
Title: Re: يمّة..
Author: ismeil abbas
Date: 03-05-2008, 08:12 PM
Parent: #1

مرَّات إغلبني شوقك..
أفرِد خُطاي..لو توصلك..
ألقى باقي السكة ..حِنّك..الحنين كم بيجمِّلك..
يمة ياست المحنّة..
انتي تسلمي ليّ كلّك.
.............................................

ربنا يدى الصحة أمك..

ويسعدك وتترمى فى أحضانه كلك

وتزيلى كل أحزانك وهمك..

ويرحم أمهاتنا ويمتع من هو على قيد الحياة بالصحة والعافية..

يمة كلمة حنيينة شديد..الله يرد غربة الجميع..

خالص مودتى..

إسماعيل محمد احمد عباس................
Post: #7
Title: Re: يمّة..
Author: تماضر الخنساء حمزه
Date: 03-05-2008, 08:18 PM
Parent: #6

Quote: ويرحم أمهاتنا ويمتع من هو على قيد الحياة بالصحة والعافية..


يامين سماعين


كل الود
Post: #8
Title: Re: يمّة..
Author: تماضر الخنساء حمزه
Date: 03-05-2008, 08:42 PM
Parent: #1

يجدكِ بسلام.

لو أنّني خبأتُ مافي القلب..عن ادراكي..لوجدته مفضوح الوجود في عينيك..
حكايات..صغيرة..لم أعلم حميميتها الا حين صارت ذكريات..
ومواقف..أحزنتني في حينها..وتساءلت..ماذا لو تركتني أمي ورأيي نفعل مانشاء
فيمَ كان حجرها لاندفاعي..لم أعلم صواب حجرها..إلا بعد حين.
لو أنّ الشوق يطيقه القلب منّي ..بمقياسٍ محدّد..لفاض وأغرق الجسد والمكان.
سبحان الذي منح الحب والأشواق وعواطفك النبيلة التي لاتُقاس بمقدارٍ ندركه..وأسكنها القلب منكِ..
سبحان الذي أوجدك..حضناً نرمي فيه أحزانناوخوفنا وآلامنا..فيرددها في لحظتها..أفراحاً وأمناً..وسلاما.
سلطانةٌ ..مااحتاجت أن تتزين بتاج..كفاها ألق محيّاها كل إضافة.
ربّةٌ مارأيت بيتها أحسن ترتيباً وكل يدور في فلكه حسب جماليته..إلا بها.
لك في القلب أمي..كلّه..ولك فيّ..أكثر منّي.
Post: #10
Title: Re: يمّة..
Author: سمية الحسن طلحة
Date: 03-05-2008, 09:01 PM
Parent: #8

Quote: يمة بشكيلك قليبي القلتي ليّ " بيزيدو جنّك "
يمة عاصي عليّ وحالي مابدسّو عليك وعنّك.


عليييك الله صحيح ؟

أحلفي ...

جيناكم ياحبايبنا
الشوق ليكم جالبنا
سلام ليك ياخنساء ولأمهاتنا
ستات ريدنا وستات روحنا
وبنشكي ليهن بجروحنا
Post: #13
Title: Re: يمّة..
Author: تماضر الخنساء حمزه
Date: 03-07-2008, 11:43 AM
Parent: #10

صحيح..
وحياة حنيتك دي ياسميّة

سلام ومحبة وكل شئ حلو ليكي ولي أمهاتنا
Post: #9
Title: Re: يمّة..
Author: بله محمد الفاضل
Date: 03-05-2008, 08:56 PM
Parent: #1

ضل العشم
"صرخاتٌ لا تنقطع
لغريبٍ امتطت روحه الأشجانُ"



أظِني الليلة كُنت هِناك
سريت بي روحي لي رؤياك
وجيت متشابي زي أول
أدوِرْ في الغمام مسراك
وحِس إحساسي بيك تاور
وجاب من جيب الشعر مغناك
حنانك وأحلى أيامك
سنين كانت في ضُل محياك
مقسم حبي ليك في الروح
موهط وما أظنوا سلاك
عشِق مختوم بضي كلمات
عشِق فائض بيزيدني هلاك
أريتني أجيك جسد محروق
وممحوق خاطري ديمة بلاك
أريتني أجيك وأشم أيدك
وألثم ثغرك الضحاك
وأنوم من تاني في حجرك
أنوم وأشبع كأني ملاك
أريتني أجيك وأضم جسمك
وأشيل في حضني أي هلاك
وأمِش في الروح محل ساكن
وأتحكر وأنالوا رضاك
حنانك وصدرك الدافئ
يدفئ قليبي بي مرآك
وبرضو كمان بقول يُمة
ضُمة أبقى بلاك

جدة – 25/6/2005م



سلام لروحك التي يغمرها الحنان
وسلم الله لك/لنا أمهاتنا

شغبٌ غير مصقول...غناءٌ أشتر]
Post: #11
Title: Re: يمّة..
Author: wd al geran
Date: 03-06-2008, 02:27 PM
Parent: #9

ياخ والله نِحنا ناس صعبين خلاص ..
Post: #12
Title: Re: يمّة..
Author: baha eassa
Date: 03-06-2008, 02:39 PM
Parent: #11

ياايتها الخنساء .. يامدهشة :
الام هي الضفة التي ترسو عليها كل سفن الاخزان والافراح ..
وهي الحزب الجامع لكل الناس ..
وتضمحل الكلمات وتجف حينما نحاول التعبير عنها ..
Quote: يمة لميتي المحنة ..التزيد في براحو حضنك
كلما زغرد فرح.جواي بكون جواهو, منّك
وكلما شاقني الحنين..بسراع إجيبني عليك حنّك
يمة بشكيلك قليبي القلتي ليّ " بيزيدو جنّك "
يمة عاصي عليّ وحالي مابدسّو عليك وعنّك.

شكرا لهذا الحب المتدفق من كلماتك لهذه الكبيرة داخلنا جميعا ..
Post: #14
Title: Re: يمّة..
Author: Alsa7afa_30
Date: 03-07-2008, 06:21 PM
Parent: #1
Post: #15
Title: Re: يمّة..
Author: Elawad
Date: 03-07-2008, 06:51 PM
Parent: #1

Quote: يمة ياست المحنّة..
انتي تسلمي ليّ كلّك.

و الكلام كمل..
إيه ياخناس.