Post: #1
Title: تعال نحلم
Author: مازن الجمّال
Date: 02-26-2008, 12:57 PM
تعبان ؟
تعال نحلم
بي كون جميل منعم
يبعدنا من كل غم
أخدر وسيع منجم
وطيوره عاملة نغم
والموية فيه سيول
ممدودة غاسلة الهم
واشجاره في كل ميل
مفرودة عاملة عتم
ندخل عليه عديل
من دون كلام ونضم
من عسكري ومنضم
والكون ده جنة خير
سكانه حور وخدم
تخدم لكل تعبان
هالكاه عيشة الهم
مضغوط هناك ملزم
لي راحته يلقى هنا
كل السبل ينجم
نقعد نريّح فيه
منعول سفرنا سجم
والعيشة فيه وهم
ما لقينا غير الطم
وسنينه خامة تصم
عمر الشباب انخم
زادت مشاكله لطم
وحصاده زيف ومسم
ما علينا فيك يا غربة
نرجع نقيف في الحلم ..
|
Post: #2
Title: Re: تعال نحلم
Author: العوض المسلمي
Date: 02-26-2008, 01:06 PM
Parent: #1
عزيزي مازن تحياتي
Quote: منعول سفرنا سجم
والعيشة فيه وهم
ما لقينا غير الطم
وسنينه خامة تصم
عمر الشباب انخم
زادت مشاكله لطم
وحصاده زيف ومسم
ما علينا فيك يا غربة
نرجع نقيف في الحلم .. |
نحلم بامل كبير
نحلم ببيت كبير
نحلم بتوقير الكبير
نحلم بان نعيش في تقدير
نحلم بوطن كبير
|
Post: #5
Title: Re: تعال نحلم
Author: مازن الجمّال
Date: 02-26-2008, 02:44 PM
Parent: #2
ونحلم يا العوض نعشم
ما دام الحلم مسموح
ودنيتنا الجميلة كمان
بتكمل بالكلام والبوح
وبوح بالجوة كان مكبوت
متقل للقليب والروح
ونسرح بي حلمنا هناك
مكاناً ما بتعرفو جروح
ونحلم يا حلمنا جميل
اريتك تستمر ما تروح
______________________
العوض
شكرا لمرورك الجميل
|
Post: #3
Title: Re: تعال نحلم
Author: مازن الجمّال
Date: 02-26-2008, 01:13 PM
Parent: #1
ونحلم بي سحاب ومطر
بيغسل في ذنوب الخلق
ويروي حقول ملانة شدر
وكل ما الرعدة تضرب فوق
يزيد في قوته ويكتر
سحاب مليان يكون أسود
سواد قلب العلينا حجر
وتنزل صاقعة مرة ومرة
تختف روحه ليها تجر
تنضف كل خوازيقنا
وتسفك لي دماهم صر
دي امطار رحمة للطيبين
تفك أسرم من الغادر
غدر بي شعبه كان ظالم
ودمر لي مشاعره هدر
فضل صابر على الغدار
ده من كتر المعاناة فتر
وفي الآخر ..
تقيف المطرة يصفى الجو
ونتأمل جمال الكون
وأزهار فاردة بي كل لون
وأنغام الطيور بتكون
جميلة وكاسرة لينا سكون
ولسة بنحلم ..
|
Post: #4
Title: Re: تعال نحلم
Author: هاشم أحمد خلف الله
Date: 02-26-2008, 01:18 PM
Parent: #1
مازن الجميل
معاك بحلم بوطن واسع مهيل , فيهو الطيور تغرد بلطافة وضل ظليل
واهلي الغبش فرحانين يغنوا , والمطر هاطل غزير والزرع اخضر نضير
ونيلنا جاري يرؤي ارضنا بالحب والفال والعديل وبحلم بسلام شامل
وعيشة رخية وتعليم مجاني مائة بالمائة وعلاج كامل من كل عِلة قلبية
وبيئة صحية وحكم عادل وتنوم الكديسة مع القمرية ورياضة واعية مقرية
والناس قلوبا تبقي بيضاء نقية وخلاص كده الحلم إنتهي .
شكراً ليك يارائع .
|
Post: #6
Title: Re: تعال نحلم
Author: مازن الجمّال
Date: 02-26-2008, 02:52 PM
Parent: #4
| Quote: والناس قلوبا تبقي بيضاء نقية |
ونحلم بالوداد والحب
ودايما بالفرح نتلم
ونسمة ريد تغازلنا
ويبعد من دربنا ألم
ونصبح ديمة هيمانين
وفرحتنا الجميلة تعم
____________________
صديقي النقي هاشم
ربنا يحقق ليك كل احلامك انشاالله
عميق مودتي
|
|