لاقيت صديق قدييييييم وناسي إسمو ..... إتصرف !!!

ح تعمل شنو ؟؟؟؟

يزداد الموقف حرجاً لما يصر هو عليك ...

يقول ليك شكلك نسيتني ؟!!

تقول ليهو ( حرجاً ) كيف ياخ ؟؟!

يقول ليك أها منو ؟؟؟

تسوي شنو ؟؟!!!

عثمان كيفنك

طبعا انا اكتر زولة بتحصل ليها الحاجة دي
وبتكبكب جنس كبكبة لامن انسي اسم الزول/ة
وبحاول اخمها بي سلام سريع

لكن طوالي خاشة في الاحراج ده

بجيك صادة احكليك مواقف كتيرة لامن تضحك..

لك الود يا دغيس..

الصالحة كيف بالله..

العزيزة آمنة
تشكري على المرور ...

وعليييييييييييييك الله لمن تقابليني ما تتذكري إسمي ..

عشان أشوف الكبكبة ...

هوي أنا بهظر ساكت ...

البوست ليهو الشرف في مداخلتك المبادرة ...

صالحة تمام بس مويتها مالحة ..!

انا مريت بالموقف دا قبل كدا لاقيت صديق وزميل دراسة
ونسيت اسموا وهو ناداني بأسمي قربت اتحرج معاه لولاء
وجود موبايلي ( سريع فكرت واديتوا موبايلي قلت ليهو
سجل لي فيهو رقمك واحفظه باسمك ) وهكذا تخلصت من
الورطة وعرفت اسمه من خلال تسجيله بموبايلي

شكراُ بقال على المرور

موقفك ده نفسه طبعاً بيمر كل يوم على كل زول ..

أنا مرة قابلت واحد صديق عزيز علي جداً منذ أيام الدراسة بوادمدني ..
المهم إني قابلته بالدوحة وطوالي خش فيني شمال ..
وييييييييييينك يا عثمان الدغيس ؟؟!!!

وأنا في اللحظة دي بس إتخيلوني ..عامل كيف .. ياخي زول أخوي عدييييييييل كده ...
وأنا ما من عاداتي أنسى كتير وخاصة زول زي ده ....

لكن الوكت داك كنت يا دوب جاي الدوحة ولسه ملخوم .. وتاني كان في حفلة بي ود الأمين ويا دوب كنت بسلم على الزملاء من الموسيقيين ...
الزول ظهر لي فجأه !!!

أها خشيت فيهو طوالي ياااااااااااااخينا ..!

يا زول إنت أصلك في البلد دي ؟؟!!

قال لي آي لي فيها ستة سنوات ...

وفكرت في اللحظة ديك إني إتخارج بسرعة قبل ما يتعابط فيني إتذكرتني وما عارف شنو ..

قمت قلت ليهو أديني رقم تلفونك لأني أسي مستعجل شوية ...

قام أداني الرقم وسجلته بإسم ( ما معروف ) !!!

بعد فترة إتصل علي وظهر لي ما معروف ... قمت رديت عليهو منو معاي ؟؟

قال لي إنت ما سجلت رقمي ولا شنو ؟؟

قلت ليهو أنا غيرت الموبايل ويمكن رقمك أتمسح ..

قام قال لي معاك ( فلان ) ياخي .....!

أأ,ووووووووووووووووووو فلان وييييينك ياخي من ديك وعيك !!

عدلنا خطأ طباعي

وين قصصك يا آمنة ؟؟؟؟؟؟؟؟؟؟؟

لو قلتيها أنا عندي قصص أخطر منها ...

الموقف ده بيمر على كل زول ... ومرة بيكون محرج ومرات طريف ...
حسب الزول الناسي والصديق القديم ..

راجنكم ...!

ألأخ/دغيس

لك النحية........
وبوست لطيف وخفيف..
.......................

ما تدغس كتير.......
.....................
كتير ما تمر غلى ألأنسان لحظات ينسى أسماء أسخاص كانوا فى فترة من الفترات علاقتهم فى منتهى الحميمية.ولكن ظروف السفر أو البعاد لآى ظرف آخر ..وتتلاقوا بعد فترة..وتنسى أسم الشخصية

هناك ناس أذكياء بيتداركوا ألأمر بكترة السلام وتذكر ألأمور التى كانت تربطهم مع بعض..ألاحتى يتذكر ألأسم..وأصعب شىء دى لما تحصل مع الجنس اللطيف...يا لطيف..
...
حصل لى قبل كدة مع زميل دراسة..بس شبكتوا ليك كيف فلان وبالله فلان داك وين..وبعد شوية براهو قال إسممو بطريقة ما ..وطق وقع ألأسم ومن خشمو ولى خشمى قلت ليك إسمو ودخلتو ليك فى موضوع..وحمدت الله كثيرآ..
فعلآ مواقف محرجة....وألأحرج تناديهو بأسم غير إسمو..
أحسن شى التريس....
مودتى..
إسماعيل محمد احمد عباس..........

الصديق إسماعيل عباس

لك التحية والموده على التزكية وتذكية روح البوست بالمداخلة اللطيفة ..

أحكيلك قصة طريفة حصلت مع صديقي عازف الأورغن الخطير وليد ابو القاسم ..
قابل أحدهم بعد فترة طويلة من الفراق ..
وإكتشف إنو ناسي الإسم ، وبعدين دخل في الجهجهة ، لكن قال لي كنت مطمئن إنو صاحبي ده ما راح يشك في إني قد أنسى إسمه ..

عشان كده ما كانت في مشكلة كبيرة ...

المشكلة الكبيرة جات بسبب ( شلاقة وليد ..

كيييييييف ؟؟؟!!
الجماعة بعد أن إستعادوا ذكرياتهم مع بعض وسالوا بعضهم عن الأصدقاء المشتركين والذين كانت تجمعهم بهم البرامج المشتركة ,وو ,,,, ووو

قام الزول ده قال لي ولي د ياخي ما تجيني ياخي في البيت ..

وليد ردً عليه : والبيت وين ؟؟

قال ليهو ياخي تمشي الحي الفلاني وتدخل بالشارع التاني من الإشارة وتلاقي ليك فسحة كبيييييرة ,...
وهناك لو سالت أي زول قلت ليهو بيت ناس إبراهيم وينو يجيبك لينا ...

قام وليد و ( إتشالق ) : طيب يا إبراهيم ..

قام الزول جاهو راجع وهمس في ذنه ::
إبراهيم ده أبوي أنا إسمي محمد !!!

اوووووووو

ايا آخينااااا

ده للزول المسكين بتمشي فيهو المكنة دي

لكن الزول اللايوق البيقوليك نسيتني منتهى الاحراج

لك الود ياحبيب

----
شايفك عملته تطبيع وكده

سلامات

مرة لاقيت واحد وحصل لى الحصل
فبقيت اقول اوووووو - فالراجل عرف انى نسيت
طوالى قال لى ( او نقتف؟)








IN THE ABUNDANCE OF WATER THE FOOL IS THIRSTY - BOB MARLEY