Post: #1
Title: الريموت كونترول براكة - التلب و اخرين
Author: خدر
Date: 02-21-2008, 11:02 AM
قيل في الاثر ان الريموت كونترول شأن سيختصم فيه عامة الناس وحتما لن يتفقون
و حذرنا الاسلاف من استئناسه لذا لزم علينا التعامل معه بريبة من يخاف جر الحبل
و بعد ان كان الناس يربضون خلف الشاشه البلورية يطاردون احداث قناة واحده هجم
علينا زمن تعددت فيه المحطات الفضائية فأختصم الناس حول الفي ايدو الريموت
|
Post: #2
Title: Re: الريموت كونترول براكة - التلب و اخرين
Author: خدر
Date: 02-21-2008, 11:03 AM
Parent: #1
عديلي محمد حسن التلب حفيد العارف بالله الشيخ ودام مريوم و صديق عدد كبير من اهل الدوحة
راجل فاضل و اخو اخوان لكن كمان ربنا ابتلاهو بي حب الريموت كونترول و قناة الجزيره الاخبارية.
كان التلب احد الاسباب الرئيسية لزيارتي الاخيرة للدوحة لما سمعته عنه من نوادر تحدث معه لا يتعمدها
لكنها تأتي هكذا عفو الخاطر
منذ ان وطئت اقدامي منزله العامر و الاهل يرحبون بي و انا اتلصص النظر .. اين هو الريموت كونترول
حتي وقعت عيناي اخيرا علية منكمشا و صغيرا بين اصابع التلب القوية.. تحينت الفرص حتي ظفرت به
واعلنت بصوت عال .. يا التلب الموضوع ده خلاص انتهي وتم الاستيلاء علي الريموت .
ضحكنا جميعا ..
بعد مرور يومان بحثت عن الريموت ولم اجده .. التلب في العمل .. منو الشال الريموت طيب ؟
اتصلت عليهو
- التلب شلت الريموت معاهو الشغل ؟
- لا
- وين الريموت طيب .. مالاقيهو ؟
- خليتو في البيت ياخي
- يا التلب الله يهديكـ
- فتشو بتلقاهو بكون هنا ولا هناكـ
- طيب
بعد بحث مضن عثرت علي الريموت كونترول مخفي بعناية جوة الغسالة .
|
Post: #3
Title: Re: الريموت كونترول براكة - التلب و اخرين
Author: خدر
Date: 02-21-2008, 11:04 AM
Parent: #2
وصل الصديق عماد براكة امستردام من السودان حديثا و براكة مدمن افلام امريكية
فخفت انا علي ريموت كونترولي الذي احبه و اصبحت اراقب براكة مراقبة العدو كلما
اقترب من حبيبي ,لذا انتبهت مبكرا الي محاولاته البائسة للاستيلاء عليه فأستمت في
الذود عنه . كنا نسكن في داخلية الطلاب في غرفة واسعه لشخصين بها حمام لكن المطبخ
خارجي و مشتركـ مع حسناوات هولندا و طبعاالفي ايدو الريموت ما بكتب روحو شقي
يوما ما خرجت من الحمام فلم اجد عماد هناكـ فطارت روحي فرحا وطفقت ابحث عن حبيبي
ولم اجده فخرجت اصرخ .. عماد الريموت اتسرق
و في المطبخ وجدت عماد يعد الطعام مبتسما و في جيب بنطالة يربض الريموت كونترول
مطمئنا
|
Post: #4
Title: Re: الريموت كونترول براكة - التلب و اخرين
Author: خدر
Date: 02-21-2008, 11:05 AM
Parent: #3
يلا احكو لينا عن مغامراتكم ريموت كونترولاتكم 
|
Post: #5
Title: Re: الريموت كونترول براكة - التلب و اخرين
Author: خدر
Date: 02-21-2008, 05:18 PM
Parent: #4
|
Post: #6
Title: Re: الريموت كونترول براكة - التلب و اخرين
Author: Mohamed Ahmaed Olyesh
Date: 02-21-2008, 06:07 PM
Parent: #4
والله يا طارق ضحكتني لما بكيت
الرموت دي والله اجمل القصص المرت علي في السنه الجديده دي
ابوي من المولعين بهواة امتلاك الرموت كنترول برضو
جنو وجن يجي من الشغل يلقي زول ماسك الرموت
ودايما ما كان بفتش في حجج عشان يمسك الرموت مثلا
ياخوانا ما تمشو تعملو لينا غداء ظريييييييييييييف
ونحن طبعا عارفين القصه ما الغداء الظريف
ولما كان اخوي الصغير متابع جدا مسلسل الكرتون كابتن ماجد كان في حرب بين الرموت والملاك
(قوم يالفييوز ضرب والمسلسل بداء بدل ما يصلحو الفيووز قوم ياخوي الصغير شيل الرموت كنترول وامشي تابع المسلسل في بيت الجيران....)
بجي تاني
عليش
طارق شوق والله
|
Post: #7
Title: Re: الريموت كونترول براكة - التلب و اخرين
Author: ابو مهند
Date: 02-22-2008, 00:37 AM
Parent: #1
ابو لقاء صباح الخير
واياك تكون جحسن اقصد جعلي وتقول لي انا ابو خالد..
موضوعك شيق كالعاده وفيهو خستكه حلوه,,,
طبعا انت عارف قريبتك ونوادرها,,اها قصصها مع الرموت كتيره, اخرها مشت اشترت ليها تلفزيون صغير وقالت قاطعت الصاله طالما القنوات العربيه شغاله (تقصد الديغتال) لانو اخوك لما يمسك الرموت بيكون شغال في القنوات زي ترجمة الفيلم الاجني.
اها حاول تنوم بدري يافرده
سلام كبير لي اكبر خالد ومامتو
|
Post: #8
Title: Re: الريموت كونترول براكة - التلب و اخرين
Author: yasir Abdelgadir
Date: 02-22-2008, 01:00 AM
Parent: #7
فنان الاحساس الرقيق : خدر
gelukik niew valentine dag
Quote: كنا نسكن في داخلية الطلاب في غرفة واسعه لشخصين بها حمام لكن المطبخ
خارجي و مشتركـ |
بالله هو براكة كان ساكن معاك في داخلية...المعلومة دي جات متأخرة جدا
تعرف بجينا ليك في بروكسل في سكن المستشفي في VUB ziekenhouse, jette ويعمل لينا فيها انو ساكن في راديسون ساس في هولندا...يوم جيت امستردام في مؤتمر طبي وقلت اداهمو ليك بدون مواعيد..اتصلت بيهو بعد ماوصلت امستردام وقلت ليهو انا جاييك يا فردة...قال لي انا في مدينة في الشمال...قلت ليهو الليلة لو في قرين لاند جاييك جايك
تحياتي ليك وليهو ..انت قايل بعد العيال ديل فضل ليهو مخ لي ريموت...والله لو قلت ليهو عطر نسائي يقول ليك دي ريحة جديدة ولاشنو؟
تحياتي ليكم ولاسركم
|
Post: #9
Title: Re: الريموت كونترول براكة - التلب و اخرين
Author: خدر
Date: 02-22-2008, 06:28 PM
Parent: #8
Quote: ولما كان اخوي الصغير متابع جدا مسلسل الكرتون كابتن ماجد كان في حرب بين الرموت والملاك
(قوم يالفييوز ضرب والمسلسل بداء بدل ما يصلحو الفيووز قوم ياخوي الصغير شيل الرموت كنترول وامشي تابع المسلسل في بيت الجيران....) |
ما اخو عليش لازم يعمل كده
مشتاقين بالمناسبة
| Quote: اخرها مشت اشترت ليها تلفزيون صغير وقالت قاطعت الصاله |
يا كارثة
ياخي قريبتكـ دي كاتبة لي رد في بوست مدد ياهارب
لي اسه انا بضحكـ
دكتور ياسر
قبضتكـ جيت لي عماد و ماجيتني يا خاين
انتو إلا يدردقوكم بي قصة
|
Post: #10
Title: Re: الريموت كونترول براكة - التلب و اخرين
Author: abdulhalim altilib
Date: 02-22-2008, 07:25 PM
Parent: #9
العزيز الغالي خدر،
تحياتي ليك ولأم لقاء البارعة ،
طبعاً لمن قريت (التلب وآخرين) ، قلت يا ساتر أستر ،
خدر ده مالو ياربي ، بارعة مزعلاهو بسببي واللا شنو ؟
الحمد لله لمن قريت البوست ، طلعت أنا براءة .
شكراً .
عن الريموت حدث ولاحرج ، أخونا سامي الجيلي ،
إبن خالي ونسيبك في الدوحة هو الآخر أخطر من
نسيبنا المشترك الأخ (التلب) .
عارف سامي ده لمن كان ساكن عزابي مع علي كامل
ابن اخته ورضا صديق (ابن اختي ) ، كان يخبئ منهم
الريموت كنترول ، لأنه يهوى افلام الكرتون وهما
أحدهما يهوى الافلام الأجنبية والآخر الكورة .
ويوماتي كانت (الشكلة) تقوم في أين خبأ سامي
الريموت ، ونسى مكانه !! أحياناً يستعبط !
في احدى المرات ترك جواله في المنزل وأخذ
معه الريموت كنترول باعتباره جواله لأنه
كان يخبئه في جيب بنطلونه ، وذهب للعمل
وهويحمل الريموت في جيب بنطاله ، وعندما
وصل الشركة تحدث معه مديره لماذا لا يرد
على جواله ، فقال له أنه لم يسمع جواله يرن أبداً
وعندها أخرج الريموت من جيبه ليوضح
لمديره أن رقمه لم يظهر في جواله ..وطبعاً كانت
المفاجأة أن أخرج الريموت من جيبه بدلاً عن الجوال ؟!!
ومن يومها اشترى جهازي تلفزيون مستعملين لكل واحد
من زميليه في الغرفة (علي ورضا) ، وصار في
الغرفة 3 تلفزيونات ، وكل واحد موجه تلفزيونه ناحية
سريره .. وارتاحوا من حكاية الريموت أين أختفى . !!
تصدق والله القصة دي حقيقية ،لأني لمن مشيت زرتهم
في الدوحة أيامها ، فوجئت بثلاث تلفزيونات في غرفة
واحدة ! وعندما سألت عن السبب ، حكوا لي حكاية
الجوال الذي تحول إلى ريموت في الشركة !!
وطبعاً رب ضارةٍ نافعة .. كل واحد منهما طلع ليهو
بتلفزيون من سامي .. والبركة في الريموت كونترول .
أما نسيبك التلب ، ففعلاً هو من كبار مدمني الريموت ،
ولا يتخلى عنه بأخوي وأخوك .
مودتي لك ولمن حولك ومعك من الأهل ،
( ليمو)
|
Post: #11
Title: Re: الريموت كونترول براكة - التلب و اخرين
Author: ابراهيم على ابراهيم المحامى
Date: 02-23-2008, 11:09 PM
Parent: #10
العديل خدر
طبعا اخوك من ما وصلت العائلةهنا من سنتين ما شاف ريموت كونترول
زمان لما كنت براي ما كنت بحضر افلام امريكية على اعتبار انو انا في امريكا وقرطت على كدا
ظهر لينا لاعب جديد استلم الريموت والكونترول معا الا وهو حلا
وهاك يا افلام كرتون من ثمانية صباحا حتى ساعة النوم
لما الومها على فعلتها واشرح ليها ضرورة القسمة العادلة لثروة الريموت كونترول
تقول لي خلاص انت تشوف نيوز وماما تشوف مسلسل وانا كرتون
نرضى جميعا بقسمتها الضيزى وقمستنا
....لكنها تظل ممسكة لوحدها بكل الريموت كنترول
عديلة:
في اغنية راب امريكية بقول فيها الراجل للبنت اذاحبيتيني بديك الريموت كنترول
|
Post: #12
Title: Re: الريموت كونترول براكة - التلب و اخرين
Author: خدر
Date: 02-24-2008, 05:17 PM
Parent: #10
Quote: تصدق والله القصة دي حقيقية ،لأني لمن مشيت زرتهم
في الدوحة أيامها ، فوجئت بثلاث تلفزيونات في غرفة
واحدة ! |
والله يا ليمو ضحكت كما لم افعل من قبل
و اتخيلت المنظر 3 تلفزيونات في غرفة واحده
اتاريكـ يا التلب ما براكـ
|
Post: #13
Title: Re: الريموت كونترول براكة - التلب و اخرين
Author: خدر
Date: 02-25-2008, 07:14 PM
Parent: #12
| Quote: ....لكنها تظل ممسكة لوحدها بكل الريموت كنترول |
يا عديل
اخير انت والله
انا هنا ريموتاتي كلها السمحة و جديده ديكـ .. تتزكرها ؟
والله اسه تقول عفصها قندران
كسرتها كلها
|
|