الناس المفلسين ما عندهم حل غير يستثمروا فى الركشة فقد اثبتت الدراسات الخاصة بأن السودان لن يستغنى عن الركشة ابدا ورغم مضايقات الوالى لانه يريد انزال انواع اخرى من السيارات كشركة خاصة تستولى على عملية النقل فى وسط العاصمة (المثلثة) ولكن تبقى الركشة فى الاطراف فاعلة وعاملة ....
وعلى ذمة اخونا الدكتور سجيمان فسعر الركشة جديدة كرت ثمانية مليون جنيه ....
يلا نحسبها
اديها سواق واستلم منه كل يوم خمسة وعشرين الف جنيه ( طبعا الجمعة بتاعت السواق) يعنى ستة ايام فى الاسبوع يعنى اربعة وعشرين يوم فى الشهر يعنى 288 يوم فى السنة يعنى سبعة مليون ومائتين الف ...
شفتو كيف والركشة قاعدة فى محلها فمكنتها كلها بثلاثمائة الف ....
اها شنو ليكم يا الاحباب ؟؟؟
02-17-2008, 11:31 AM
Frankly Frankly
تاريخ التسجيل: 02-05-2002
مجموع المشاركات: 35211
والله ليك وحشة شديدة جدا ياخى ... الحمد لله كل الامور على ما يرام.. طبعا الركشات اصبحت مضرب المثل فى الكثرة وحتى انه الوالى احتار يعمل فيها شنو. لكن الحق لله انها خففت كثير على الناس مع انه اثرها السلبى الناس بقوا كسلانين والواحد من هنا لى هنا يركب ركشة ....
انتظر جميل مساهمتك وما تأتى به الينا ....
لك مودتى
02-17-2008, 11:38 AM
ابو عثمان ابو عثمان
تاريخ التسجيل: 12-15-2002
مجموع المشاركات: 1389
اي حاجة تضربها بالالة الحاسبة بتطلع معاك (زابطة) ، ولكن تعال شوف ارض الواقع وشغل الكسور وبواقي .
عند زميل لي في الغربة عمل بي فكرتك دي وبعد فترة لاقيتو سألتو اها كيف ، قال لي : بقيت ارسل مصاريف البيت ومصاريف الركشة.
وواحد تاني عندو قريبو من الدرجة الاولى ضربو في حافلة كاملة ، ولما سألتو عن شغل الحافلات في السودان قال لي : شوف هي شغلها كويس جداً جداً لكن يا تسوقها انت يا تسوقها امك تاني ما تضمن زول.
واياك اسمعي يا جارة
02-17-2008, 01:54 PM
قرشـــو قرشـــو
تاريخ التسجيل: 02-05-2002
مجموع المشاركات: 11385
والله ياخى صدقت فى كلامك عن شغل الالة الحاسبة والواقع ... طبعا حاجات كثيرة بالالة الحاسبة والتقديرات تكون عال العال ولكن هنالك ما لا يظهر للعيان ... غايتو الكويس فى الركشة انه السواق محدد ليه مبلغ معين وبعد كده ان شاء الله يدخل مية الف هو حر وبكده ما بقدر ياكلك ... الفكرة دخلها لى واحد عرفته اخيرا وقال لى الركشة دى ريحتنى من مصاريف ناس البيت واحسن حاجة العضم قاعد ما جاتو عوجه ... جزئية الامانة وانحسارها شىء محزن جدا والله لكن الامر ليس بغريب لانه المثل القديم جدا بقول : مالا تودعه وادعه ....
لك مودتى..
02-17-2008, 02:13 PM
mohanad haimoura mohanad haimoura
تاريخ التسجيل: 07-08-2007
مجموع المشاركات: 684
Quote: اديها سواق واستلم منه كل يوم خمسة وعشرين الف جنيه ( طبعا الجمعة بتاعت السواق)
كان زمان طبعا الكلام ده
الان التوريده من 20 الف جنيه بالقديم طبعا الي الركشه الجديده وايصالات المرور علي صاحب الركشه او 15 الف جنية للركشه القديم وايصالات المرور علي السواق اذا كده حساباتك ح تختلف اي 288 * 20 = 5,760,000 من غير اي اعطال في السنه ومعروف انو المكنه بتعمر معاك 3 شهور بتغير بستم وشمبر وبعد ح تغير فيها كل ثلاثه شهور بستم وسلندر من غير ايصالات المرور اقل ايصال بالنسبه للركشه 120 الف (4 ايصالات) وحجز عادي ممكن يكون شهر يعني كان زمان استثمار خرافي اما الان فهي خسرانه خسرانه
كل الود مهند حيمورة
02-18-2008, 01:39 PM
قرشـــو قرشـــو
تاريخ التسجيل: 02-05-2002
مجموع المشاركات: 11385
ياخوى شكلك سبرت اغوار السوق ده وعرفت اموره كلها ... بعدين ليه الايصالات ما يتحملها السواق ياخى ؟؟؟ مش هو القام بالأخطاء ؟؟؟ طيب صاحبها ذنبو شنو ؟؟؟ تعرف احسن حاجة تخليه يشتغل جوه الحارة بس ويشتغل نسوان بس اصلهن حوامات يومهن كله من بيت فلانة لى بيت علانه ولا باس انه يكون بتاع شمارات ينقل كل ما يستجد ليزيد فى حركة نسوان الحلة ...
غايتو اكان اتفقنا على الخمسة دى برضو ما بطال ياخى وخمسة مليون فى السنة من ثمانية هى راس المال تكون نعمة كبيرة
احسن من تكون قروش مجمدة ساكت وما معروف اخرها شنو ؟؟
02-17-2008, 02:18 PM
امير مصطفى احمد امير مصطفى احمد
تاريخ التسجيل: 03-21-2007
مجموع المشاركات: 1514
ما هو علشان يدخل ال 100 الف البتقول عليها دي حتكون الركشة بقت في خبر كانا .
وطبعا حتفرح بيها الشهر الاول على احسن تقدير ، بعدين كل ما تتصل يقول ليك كنت في الورشة وجاي من الورشة والركشة في الورشة والورشة في الركشة والليلة عرس اخلاص بت عمر وامبارح وفاة حاج عوض وكنت مع اختي عندها عملية ما اشتغلت حاجة .
يعني تحتسب الاجر في انك ساعدت شخص في اعالة اسرته.
02-18-2008, 01:44 PM
قرشـــو قرشـــو
تاريخ التسجيل: 02-05-2002
مجموع المشاركات: 11385
يعنى قصدك شنو ؟؟؟؟ الورشة فى الركشة والركشة فى الورشة مش نحن قلنا الكلام ده على السواق ؟؟؟؟ انا شوف من ثانى يوم نقص الخمسة وعشرين بقلعها منو واديها لاى واحد رمتالى مرمى فى الحلة واهو ترفع واحد شوية احسن من مافيش ....
فى رأيك طيب الاستثمار الاحسن للغلابه يكون فى شنو ؟؟؟؟؟
كفتيرية شاى ما معانا .... ولا حلة مديدة ما معانا برضو .....
02-17-2008, 02:20 PM
الصادق ضرار الصادق ضرار
تاريخ التسجيل: 11-05-2007
مجموع المشاركات: 2345
اذن لا يفتأ ومالك فى المدينة وياريت اخونا عبدالله كع ده ياخد شىء من افكارك طبعا انت بحكم التجربة تشبعت بالأفكار الاستثمارية ... بعدين ياخوى انا مصنف نفسى فى خانة الغلابه انت مالك معصور على الغلب ياخى وانت بتاع محافظ استثمارية وهلم جرا ؟؟؟ نحن بنتكلم يا دابك على حاجة كده بتاعت سبعة ثمانية مليون بالكثير ودى امكانات الغلابه ياخوى .. اما حكاية السيارة والاعفاء والله بينى وبينك انا ما بثق فى كلام ناس الحكومة ديل .. كل زول يقول كلام من جهة وانت لامن تتورط وتخت الوراك والقدامك فى عربية وتبقى فى بورتسودان تلقى الامور جدت فيها امور واخرتها يصادروا عربيتك وشقى عمرك وما بعيد يكون مقرك فى التجانى الماحى عشان كده الواحد ما عاوز يتورط مع العالم دى وبينى وبينك انا المهاجر دى شامى فيها ريحة الحكومة كمان عشان كده ثقتى فيها ما كبيرة وديل ناس تماسيح ياخى يبلعونا زى الصير ولا يتذكروا ذاتهم انهم بلعونا ...
اما فكرة المحاصيل دى فهى مجربة وصراحة لحدى هسع افضل منها مافى بس كيف تضمن السوق البتبيع ليه محصولاتك ولكن الباقى كله مقدور عليه لا سيما وان شوارع الاسفلت ملت السودان كله يعنى ممكن تشيل شمار من الشمالية تبيعو فى الفاشر ابوزكريا ... والله الشوارع دى عاجبانى شديد ياخى ...
شكرا حبيبنا ابوالسيد وما تبخل علينا بالله بالمزيد من الافكار لتوسيع الخيارات ...
02-19-2008, 10:05 AM
قرشـــو قرشـــو
تاريخ التسجيل: 02-05-2002
مجموع المشاركات: 11385
ياخوى ما نحن قلنا استثمار الغلابه اما فى حالتك وشكلك دفيان ومليان دولارات فعليك بالمحافظ الاستثمارية واهو سمعت فى التلفزيون دعاية عاملها بتاع العاملين فى الخارج قال انه شركة المهاجر عندها محافظ استثمارية بتكسب 30% وصدق او ما تصدق .... اما لو عاوز ربح 100% فطبعا دى عاوزه ليها تفكير بهدوء لا سيما وانك اشترطت ان يكون بعيد عن الحركة والمرور والجمارك ولكن لو سلمت من ديل كلهم ما بتسلم من الوالي ....
غايتو قناعتى الشخصية اى استثمار لازم تكون انت واقف عليه واوعك من الثقة فى زيد وعبيد لانك بعدين ما بتلقى بنك تصرف فيه ثقتك دى ......
اقول ليك حاجة يا زول امشى الصين واشترك ليك كونتينر بتاع كريمات تجميل طبيعية وتعال السودان فكها فى السوق ويقينا دى ربحها اكثر من 300% .....
02-19-2008, 10:24 AM
عبدالله كع عبدالله كع
تاريخ التسجيل: 02-12-2008
مجموع المشاركات: 4841
عن الكوافير يا سيدى حدث ولا حرج من ناحية استثمار فهى استثمار لا يضاهى لانه اصبح الكوفير يضم الكثير من الملحقات من ضمنها كاميرات تصوير فيديو وأجهزة أورغن وساوندسيستم والبعض اضاف كوش افراح وزينة وكراسى يعنى مسمى الكوفير بقى فضفاض جدا ولتكون بريمو محتاج لراس مال كبير ليكون الشغل متكامل وما تنسى مع كل ذلك تحتاج لعربات لترحيل المعدات اضافة الى فنيات .. نعم فنيات لانه البعض يفضلها نسائية خالصة وما عاوز يشوف خلقة الرجال ذاتهم ..
اكان عندك قدرة على ده فتوكل على الله يا سيدى ... بس شغلى لى ركشتى معاك انقل بيها ستات الحنة ....
02-20-2008, 12:42 PM
اسعد الريفى اسعد الريفى
تاريخ التسجيل: 01-21-2007
مجموع المشاركات: 6925
وحبابك عشرة فى ركن الركشات وهو اضعف الايمان فى دنيا الاستثمار... بس نحن منتظرين مرئياتك ياخى حول هذا الاستثمار ... نحن نسميه استثمار تيمنا بالمستثمرين ولكنها وسيلة لكسب العيش بحرية وبعيد عن هيمنة الاخرين عليك وعلى وقتك وعلى جهدك ...
وبعدين هنالك مقولة سودانية تقول " مالا تودعه وادعه" بمعنى انك ان اودعت مالك لجهة ما او شخصا ما فانه توجب عليك وداع ذلك المال لانك لن تشبع فيه شوف ثانية وسيضيع ادراج الرياح ...
طبعا هموم الغلابة الزينا واحدة ، وموضوع الاستثمارات الصغيرة دي كانت ولا زالت هاجس كبير بالنسبة لي .
المهم انا جيت من اجازة قبل اسبوعين وقضيت في السودان حوالي شهرين ونص ومعظم اجازتي قضيتا حوامة في الاسواق والشوارع بفتش في الحاجات الصغيرة والمابتكلف كتير ( نقاطات ) وطلعت بالتالي :
في نوعين فقط من المشاريع الصغيرة ودي البتدخل ليك يوميا قروش في جيبك وما بتكلف كتير :
1- المواصلات عموما : كان ركشة او امجاد او حافلة: اذا مستخدم سواق الركشةالمرخصة توريدتها 25الف خلاف ايام الجمعة واركشة الما مرخصة توريدتها 20 الف خلاف الجمع وطبعا اي شي عليك ( صيانة - غرامات )
المجاد المرخصة توريدتها 35 الف خلاف الجمع والغير مرخصة 30 الف خلاف الجمعة وبرضو كل شي عليك
الحافلات الصغيرة توريدتها متوسط 50 الف ( تزيد شوية او تنقص شوية حسب حالة العربية ) خلاف الجمع وبرضو كل شي عليك وده في حال ما عندك ترحيل ، وفي حال عندك ترحيل اما انك تدي السواق ربع قيمة الترحيل والتوريدة ثابتة او ما تديهو شي من الترحيل وتنقص التوريدة اليومية حسب الاتفاق .
الحافلات الكبيرة السواق بيشتغل بالربع والتوريدة بتتراوح بين 70 الى 100 الف حسب سعة الحافة( 25 / 30 راكب ) وحالتها.
وطبعا المسالة لا تخلو من مشاكل مع السواقين والمرور وخلافه والكلام ده عن تجربة شخصية( عندي حافة صغيرة وامجاد )، وفي كل الحالات اذا كنت سايق براك بيكون المدخوا اكبر ومحافظ على عربيتك .
2- الشي التاني الاكل والشراب مطعم / كافتريا) ودي برضو بتدخل ليك بصورة يومية بس محتاجة لراس مال اكبر عشان تعملها بصورة كويسة ومحتاجة لمعرفة واشراف يومي مباشر ودقيق والا بترح فيها.
انا عن نفسي افضل العربات لانو في النهاية نسبة كبيرة من راس مالك بتكون محفوظة كاصول ممكن تسيلها تاني وتغير نشاطك
والله اعلم
03-06-2008, 10:54 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
قرشـــو
Frankly
ابو عثمان
امير مصطفى احمد
mohanad haimoura
الصادق ضرار
عبدالله كع
سيد محمد احمد سيدنا
اسعد الريفى
مطعم / كافتريا) ودي برضو بتدخل ليك بصورة يومية بس محتاجة لراس مال اكبر عشان تعملها بصورة كويسة ومحتاجة لمعرفة واشراف يومي مباشر ودقيق والا بترح فيها.
فيس بوك
تويتر
انستقرام
يوتيوب
بنتيريست