بوستات النعي والعزاء ومشاكل صور البروفايل الضاحكة والتوقيعات الفرحانة.. مفارقات شتراء

نحن ناس مجاملين.. ومواصلين..وطيبين
يعني تفتح بوست بتاع عزاء .. تلقى طوالي 200 نفر انخرطوا في الدعاء للمتوفى لدرجة الكوبي/بيست..
لحدي هنا الموضوع تمام.. ما قلنا حاجة..

لكن تعالوا شوفوا صور البروفايل قاعدة تعمل شنو:
يعني تلقى مثلاً واحد في الصورة ماسك جيتار زي الورد.. وهاك يا عزاء ودعاء..

أو تلقى واحد/ة ميت/ة من الضحك في الصورة.. صورة ضاحكة تجاوزت الابتسامة بكتير...
وبرضو هاك يا عزاء ودعاء..

أو كمان تلقى ليك واحد/ة قاطع ليك توقيع دمو خفيف خالص..أو مضحك عديل..
وهاك يا عزاء ودعاء..

وأرجو أن تعفوني من الأمثلة..

أنا غايتو عشان أريح بالي من الشتارة دي.. طوالي مسحت ليك صورتي من البروفايل..
مداخلاتنا قال ليك ماشة زي الترتيب... أحزان أحزان .. أفراح أفراح..


أيها الناس:
أعملوا صور بروفايل كويسة.. عشان ما بينفع تجي تشيل الفاتحة بيد وتكون شايل في اليد التانية مندلين..موش؟؟


ضريسة:
أفراح أفراح .. فقرة عجيبة في برنامج مساء جديد من كل خميس.. حاجات عجيبة خلاص..
يعني ليه نحن قاعدين نقول الكلمة دبل؟؟ يعني أفراح أفراح.. أو مثلاً خلى خشمو ملح ملح..أو خلاهو يشوف اتنين اتنين..
أغنية ربوع السودان بتاعة أحمد عمر الرباطابي: خيراتك تفيض نوع نوع..

الاخ مصطفى
تحياتى
ملحوظة جديرة بالاهتمام
COPY & paste هينة المشكلة
البعملها وهو بدعى (بكسر الباء)
يكون (......) ماهى كيبورد ساكت
كلام جميل ياراقى

الأخ بابكر التوم..
شكراً لمرورك من هنا أول حاجة

وتاني شكراً للدعم والمساندة
مش كدا بالله؟؟


لك التقدير الشديد

عشان البوست دا ياخد ليل الخميس دا على الصفحة الأولى لمزيد من القراءة وكدا..
الواحد قال يقوم يديهو دفرة شوية..

أها .. كم واحد/ة استجابوا أو حتى تجاوبوا مع موضوع البوست؟؟

كل سنة وأنتم بخير...

والله شوف عيني دي.. في واحد شايل أكورديون كبيييييييير...
إن شاء ربنا ما يجيب عزاء قريب...
كوردات تقيلة..أوكتافات شديدة...

طيب أيه رأيك الواحد يغير البروفايل لمدة محددة حسب الحالة
يعني في العزاء صوره بكرفته سودا أو توب ابيض و كده
و قول بعد يومين تلاته أبو جيتار يرجع لجيتاره و أبو اكورديون
لأكورديونه.
بس بكري في الأرشيف يشيل الصور..

يا زول ده موضوع محّير..زي غلوتية البرسيم و الخروف
و الذئب العايزين يقطعوا البحر و المركب بتشيل
واحد بس كل مرة.

الأخ سيف النصر...
السلام عليكم ...
كتر خيرك..والله برضو فكرة
لكن المحير شنو؟؟؟ يعني خلاص حبكت ؟؟
لازم صورة بآلة موسيقية كبيرة ؟؟

لعلمك ..أنا زاتي زول مزازيك وكدا..
عشان ما تفتكرني متشدد أو متطرف..

شكراً لمرورك..

الأخ محمود هذا كلام فى الصميم ، ويعبر عنى بصوره واضحه ، لا يمكن أن أعزى شخص فى عزيز لديه وأنا ضاحك ، ياخى لا يمكن أن أعزيه وأنا ( متريح بعطر جميل ) ناهيك عن الضحك والجيتار وصور العرض .

البسوا أجمل الأزياء وسرحو آخر التسريحات وتمتعوا بالدنيا زى ما دايرين، لكن لا تنسوا أن الحزن حزن وهو حاله انسانيه كما الفرح، واحترام المشاعر مسأله معروفه لا داعى لتكرار الحديث حولها لأنكم فاهمين .

أشكرك يا محمود على ابداء هذه الملاحظه.

الأخ كمال قسم الله
نرفع القبعات لك وأنت تقول:

Quote: لكن لا تنسوا أن الحزن حزن وهو حاله انسانيه كما الفرح، واحترام المشاعر مسأله معروفه

الله الله .. ما أجمل هذا الكلام.. لا فض فوك..

شاكرين مداخلتك وإثرائك لهذا الحوار..


تقديري واحترامي لك

الأخ محمود ،

تحياتي ،

والله فعلاً كلامك صحيح ، وهناك
مفارقات كثيرة لاحظتها مثلك
في بوستات العزاء والنعي ،
مثل الصور الضاحكة أو الات
الموسيقى وخلافها ، ولكن يبدو
لي أن هذا أمرٌ لا دخل لهم فيه ،
أعني المتداخلين ، فهم الواحد منهم أن
يصل صوت عزائه لصديقه أو قريبه
وقطعاً لن ينتظر حتى يغير صورته
لتتلاءم والحالة التي يمر بها
صديقه (صاحب العزاء) ، خاصةً وأن
البوست ربما يبقى لفترة بسيطة ثم
يختفي . هذا من جانب ، ومن جانب
آخر وكما تعلم فإنه حتى في بيوت
العزاء ، فإنك تجد أغلب الموجودين
إن لم يكن كلهم ، يضحكون ويتناقشون
في شتى مواضيع الحياة من كورة وسياسة
وفن وخلافه ، وكأن الميت الذي جاؤوا
ليعزوا فيه قد رحل عن هذه الفانية
منذ عشرات السنين وليس قبل بضعة ساعات ؟!
فإن كنا نحن في واقع حياتنا نفعل ذلك
فما بالك بحالتنا عبر هذا الاسفير ، والذي
أراه أهون قليلاً من حالنا ساعة الحارة ، حيث
أهل الميت يبكون في صمت ولا يأكلون وفي قمة
الحزن ، ونحن نقرقر بالضحك ونتحدث في
الفارغة والمقدودة وأحياناًننكت ، وكأننا لم
نأت للعزاء والمواساة ، بل لتفريج
الهم والقلق والزهج الذي ينتابنا ؟!!

نعم .. قد نحاول أن نخفف عن أهل الميت ولكن
ليس بالطريقة التي نمارسها حالياً في بيوت العزاء .

و .. فعلا .. كلها مفارقات مشاترة وتدعو للوقوف عندها .
ومحاولة إصلاحها ، بطريقةٍ أو أخرى .


مودتي ،




( ليمو )

Quote: أهل الميت يبكون في صمت ولا يأكلون وفي قمة الحزن ، ونحن نقرقر بالضحك ونتحدث في الفارغة والمقدودة وأحياناًننكت ، وكأننا لم نأت للعزاء والمواساة ، بل لتفريج الهم والقلق والزهج الذي ينتابنا ؟!!

موش كدا بالله يا عبحليم؟؟
شكراً لمرورك من هنا.. وآسفين يا سيدي على التأخير...

الله يصلح الحال يا أخي