والله إتفشينا ليكم في الخواجات جنس تفشي!!!

الإخوة الأعزاء لكم التحية
الليلة جايب ليكم خبر سمح بالحيل عشان تنبسطو ونطلعكم
من الاحباط الجابو لينا فريقنا القومي في غانا.
أخوانكم في اليابان وبالتحديد في العاصمة طوكيو عندهم فريق
كورة اسمو فريق الأسود السوداني { Sudanese Lions} ومشاركين في الدوري الاسمو
Tokyo Metropolis League . والله وقعنا ليكم في الخواجات ديل جنس رصع وجنس غلب.
غايتو نحن هنا في اليابان فشينا مغصتنا في الناس ديل وهسي نحنا منفوخين وقاعدين.
وكمان من شدة فلاحتنا في خواجات قالو دايرين ينضمو للفريق بتاعنا قلنا ليهم والله
مستواكم ده ما بناسب فريقنا يعني انتو ما Talented enough عشان نسجلكم.
عشان ماتقولو كلامي ده كضب الدوري ده فيهو درجة أولى ودرجة تانية ودرجة تالتة.
أها نحن هسع في درجة تانية وكان ربنا حفظنا من المصايب والزلازل السنة دي حنصعد درجة
أولى.نحن هسع متفشخين في الصدارة وواقعين ليك غلب في الخواجات الا تلاتة وأربعة وبقى الفريق البقابلنا بلعبو عشان ماينغلبو كتير.
يااخوانا لحدي هنا عشان ماتقولو كلامي ده قنابل ومكنات كده هاكم خشو على الرابط
ده وشوفو براكم وبعدين نواصل.
http://www.footyjapan.com
بعد ما استمتعنا في الناس ديل, عملنا اجتماع وقلنا ياخوانا الخواجات ديل فيهم واحدين عينم حارة ونحن في الغربة دي أحسن نغطي على أنفسنا ونكف العين, فقمنا سجلنا معانا خواجة من
كولمبيا, حارس مرمى, (غايتو قطع شك أحسن من المعز محجوب وأنا مسئول من الكلام ده) وكمان سجلنا معانا يابانيين كده عشان هم أسياد البلد.
غايتو يااخوانا الدوري مامنقول في التلفزيون لكن ممكن تتابعو أخبارو عبر الرابط أعلاه, واخر
مباراة لينا كانت السبت الماضي 9/2/2008م وممكن تلقو تحليل المباراة هنا:-
http://www.footyjapan.com/tml/archive/stories/season5/0209lions.html
الخواجات العنيتم ليكم ديل ياهم زاتم الخواجات النحنا دايرنهم أمريكان وإنجليز وفرنسيين وألمان وووو يعني تب إتفشينا. وهسع طوكيو الكبيرة ومليانة دي الناس كلها بقت تعرف الفريق السوداني وبتتكلم عنو ( فريق الأسود ما الفريق القومي)
كدي النصلح شنكاري ده وبجيكم راجع

الأخ جعفر

تمام والله. إنتو نسمة في عز الهجير

بس برضو في مشكلة:

الـ Reporter قلب علينا المواجع ... أصلو اسمة Hussein Shehata

الأخ حسن
شكرا على المرور الجميل
زولنا المحلل ده سوداني أصيل وبعدين كتابتو طاعمه خلاص.
بالمناسبه هو الباك اليمين بتاع الفريق

أبو الجعافر
شكرا على إلقاء الضوء للنتائج المشرفة لفريق أسود السودان الذي حقق نتائج طيبة هذا الموسم ففاز بجميع مباريات الدورة الأولى بدون خسارة وفاز حتى الآن بمباريات الدورة الثانية دون خسارة .. وأمامه مباراتين هامتين ضد الفريق الفرنسي وفريق المنظمة اليابانية للتجارة الخارجية (جيترو) .
لمصلحة القراء الكرام يضم فريق الأسود عدد من الشباب الواعدين : محمد بركية وابوبكر بركية وعمر بركية واحمد جعفر وكين بالاضافة إلى لاعبين ذوي خبرة ومهارة: كابتن جعفر سومي ، زهير سولي ، الباقر عبد العزيز يحي ، سمؤال حنفي ، شحاتة ، د. عاطف الأمين والحارس الجسور الواعي اورلاندو ولا ننسى جهود المدرب عبد الرحمن أحمد .. الفريق موعود إن شاء الله بالصعود للدرجة الأولى .. ساعدونا بالدعوات يا جماعة.

.
جعفر سومي ...

مبروك لاسود السودان الفوز

ونتمنى فوزهم في بقية المباريات

في اي خانة تلعب ياكابتن جعفر سومي ؟؟

وهل كنت تلعب في واحد من الاندية السودانية ؟؟؟

طبعاً الاسئلة دي عشان (جعفر سومي) البعرفو انا آخر مرة

قابلتو فيها في المرحة الثانوية ؟

فهل انت هو ؟؟


.

الأخ جمال الصادق
تشكر على المرور
لو انت خريج خورطقت ياهو زاتو جعفر سومي البتعرفو
في الثانوي كان مدافع فريق المدرسة وهسع اترقى وبقى بلعب وسط
تشرفنا كتير بالمرور

.

Quote: الأخ جمال الصادق تشكر على المرور لو انت خريج خورطقت ياهو زاتو جعفر سومي البتعرفو في الثانوي كان مدافع فريق المدرسة وهسع اترقى وبقى بلعب وسط

والله زمان ياجعفر سومي

لك التحية ومشتاقين كثير

نعم هي خورطقت الفيحاء ...زاكي الدين ... عنبر ترس

ولازلت اذكر اول دورة كرة قدم بين الفصول وقد استطعنا في فصل

رشيد ان ننال الكأس بعد هزيمة كل الفصول الاخرى وكنت اجد متعة

كبيرة في إحراز الاهداف وخاصة في شباك صديقي (ابوبره) حارس فصل معري

الى ان حصلت على لقب هداف البطولة ... وقد تزاملنا ياجعفر في المنتخب

الاول ..الا ان الكسر المركب في يدي في إحدى المباريات في (ميدان ون)

حرمني من مواصلة لعب الكرة لسنين ...

عزراً للخروج عن موضوع البوست ...ولكن قد طال الزمان ياسومي ...

وانا سعيد جداً ان نجتمع مرة اخرى في رحاب سودانيزاونلاين

ودمت بالف خير .


.

العـزيز جمال
ســلام
ويا ســلام على هذه الصدفة العجيبة : عمك جعفر إسماعيل أيضا خريج خورطقت دفعة 1959- 1963 وكنت في فصل رشيد وفزنا بكأس الفصول لأنه كان في أولى رشيد 6 من أمهر لاعبي منتخب الداخليات .... الصدفة الثانية رغم بُعد الزمن أنا لعبت في فريق المدرسة الأول منذ السنة الأولى ، كما أن جعفر سومي فيما بعد في زمانكم لعب في الفريق الأول منذ السنة الأولى أيضا..
يا لها من ذكريات جميلة وحبيبة تلك التي عشناها في خورطقت (( الميدان نمرة (ون) .. الصفرة والهاي تيبول .. المسرح ، الداخليات الجميلة النظيفة ، دكان عم بابكر، القهوة ، الفصول النظيفة ومعامل العلوم المكتملة ، نخبة من الأساتذة العلماء السودانيين والخواجات حيث كانت تُدَرس كل العلوم باللغة الإنجليزية، عدا الدين ، حبايبنا ناس حلة الدونكي.. كنت في داخلية (علي دينار ) ذات المنافسة والعداء اللذيذ مع جيراننا داخلية (دوليب).

.

الاستاذ جعفر اسماعيل

لك التحية والاحترام

فعلاً صدفة غريبة جداً ..فصل اولى رشيد دائم الفوز بكاس الفصول

عند حضورنا في السنة الاولى ..الاخوة في فصل ثانية ابن رشد

اخبرونا بانهم قد فازوا بالبطولة السابقة عندما كانوا في فصل رشيد

وقد تسلموا الراية من الدفعة السابقة الذين فازوا ايضاً بالكاس

وطلبوا منا ضرورة الفوز بالكاس وقد كان ...وايضاً الدفعة البعدنا

في رشيد قد فازت بالكأس ..وحقيقة كانت حاجة عجيبة ان يفوز فصل رشيد

بالبطولة لسنوات متكررة حتى في العام 1959

انا والاخ جعفر سومي دفعة واحدة 1988...واظنه لعب لهلال الابيض لفترة قصيرة


تحياتي للجميع


.

الكوتش أبو الجعافر
أولادك ماعندهم عوجة وبنخلص حقنا من الخواجات
بالمناسبة عمنا جعفر هو مدرب الفريق وقائد المجموعة

غايتو ياسومى لو لعبهم زى خطهم داك ولسانهم داك ياكم اللى ما عملتوا أى حاجة ،، أها ما فى ناس هنالك فى اليابان من جنس الناس اللبعونا فى غانا عشان ناخدو لينا التار بس .

ماهر

< font size=4 font color=black>
الأخ ماهر سلامات
في منافسة تانية بتاعة صالة خماسية لعبنا ليك مع فريق غانا
غلبناهم ليك 3/1 أها رايك شنو؟
عينا كانت على الفريق المصري الا ربنا شاف عليهم وبقو في مجموعة تانية
ليك على كان ربنا لمانا فيهم الا نخلي ليك ريحتم طير طير

ما شاء الله
حاجة جدا مشرفة



Back Row: AbdelRahman Ahmad (Player/coach), Gaafar Ismael (Manager), Zuhair Sule, AbuBakr 'Afro' Birkia, Omar Birkia, Mohammed Birkia, Hussein Shehata, Ahmed Gaafar, Ken Hersche, Tarik 'Elmasry'
Front Row: Akira Tomori, Haitham Gassim, Samawaal 'Sima' Hanafi, Elbaghir 'Bala' Yahya, Orlando 'Spider-man' Torres, Terry Tanaka, Gaafar Somi, AbdelFattah Elhabib (Captain), Tatsuya 'Conejo' Ando


عقبال الصعود للدرجة الأولى

تحياتي أخ جعفر سومي
و عمك جعفر اسماعيل (مانجر)

الأخ محمد البشرى
شكرا على هذه المعلومات القيمة
للتوضيح أكتر الأخ عبدالرحمن هو السكرتير الرياضي للجالية
بينما العم جعفر هو المدرب
مزيد من التواصل

ود البشـرى أبو عمو
ســلامات يا رجل يا عسل.
شــكرا جزيلا على المرور والأماني الطيبة .. تسلم يا الحبيب.

تحياتي وصادق مودتي

اخونا جعفر اسماعيل ,, كيفنك يارجل ,,,

مبروك للاسود , انتو الفريق ده ماسميتوه اسود بركيه ليه ,,

الاخ جعفر
مبروك وعقبال الصعود
حاجة مشرفة

الأخ بابكر التوم
شكرا على الكلمات الجميلة
ياخي ما تشرفنا في حفل التتويج

الأخ كمال
تحياتي
أولاد بركية عيني بارده عليهم
ياريت لو كان المدرب مازدا استعان بيهم في غانا
غلى الأقل لياقتهم ومهراتهم أحسن من الشفناهم هناك

الاخ جعفر سومي

طبعا دوريكم دا متابعوا من خلال الاخ الصديق الباقر يحيى عبدالعزيز (اللاعب الفته) وخلال الاسبوع لاخر زيارة نبهني وحسدتكم عديل كدا على المباريات واصبحت كاني اعرفكم فردا فرد جعفر سومي بركيه أخوان وخاصة الصغير الفلته وبقية العقد وشدوا حيلكم وربنا يعينكم وتحياتنا للكابتن الباقر وقولو شد حيلك وكمل باقي كورتك بعد العرس تاني مابتلقى ليك وقت للعب الكوره مع العيال


والتحية لكم ونتمنى ان يتواصل هذا البوست بمدنا بالاخبار مع كل مباراة


ابومصطفى

الكابتن كيقا بذات نفسو معانا؟؟؟
والله ده شرف كبير لينا خلاص
لو طليت علينا من زمان حرم الفريق ده كان دخلنا بيهو البيت الأبيض عديل.
أها جيتك للكلام الجد:-
قلت لي الباقر يحيي ده صديقك؟؟؟ بالله الزول ده كل يوم اقتنع زياده إنو غتيت بالوراثة(فهمتها؟)
تصدق أصلو لامن قريب ولا بعيد يوم جاب سيرتك رغم إنو عارفني
أنا بموت في النجمة وبحب بوستاتك كتير
بعدين صحبك الباقر ده عندنا معاهو حرابة شديدة خلاص في التمرين الاسبوعي
أصلنا ما بنلعب مع بعض ودايما التقسيمة تقول فريق حماس ضد فريق أصحاب أختنا تراجي
لكن أخونا الباقر يومو البكون تعبان بقوم بقسم التمرين بنفسو عشان نلعب مع بعض
بعدين موضوع العرس ده دايرين نأخرو شوية عشان ما نفقدو في الكورة. وأنا كمان عندي رأي تاني
الزول ده هسع تليشتو تحمدالله وكان عرس تكون كيف؟ عشان كده أحسن ندرشو في الكورة لحدي ما التليشة تنزل شوية

حاجة خاصة:

ياخي القلب الجواهو النجمة ده ما حرق قلبنا حرق
بعدين حب النجمة ده في 126 مليون ياباني ما بتجيب لغتهم مالك؟؟؟
ياخي والله حرمتهم ولازم تعتذر. هاك قوليهم الكلام ده:
Mareikhu wa daisuki desu
تحياتي وتمنياتي بالتواصل

حبيبنا كمال علي
ســلامات

ما شاء الله أخونا بركية ثلاثة من أولاده من ألمع نجوم الفريق وبأمكانهم اللعب في أي فريق درجة أولى في السودان بتفوق كبير استنادا للمستوى التعبان الذي نشاهده في منافسات الفرق السودانية المحلية والخارجية .. لولا ارتباطهم بالدراسة الجامعية هنا كان بامكانهم اللعب في السودان.
شــكرا أخي الفاضل على المرور.

تحياتي ومودتي.

أبو سامي

تهانينا لهذا الانجاز الكبير

وتحية للكباتن الكبار والصغار

وأعذرونا لو قصَرنا مع فريقنا البطل ... ولو بالتشجيع

وتهنئة خاصة للكوتش ابو الجعافر

وأرموا لقدام

الأخ حيدر
حمدا لله على السلامة
البركة في البوست الخلاك تطل علينا
ياخي بالغت عديل!! لا لعب لا تشجيع؟
وقت ما شجعتونا قلنا أحسن نلعب ونشكر نفسنا برانا

http://www.footyjapan.com/tml/archive/stories/season5/0902lions.html



http://www.metropolis-league.com/tml/teams/lions.html

العزيز/ جعفر سومي




ماشاء الله عليكم


وعيني باردة





مع تمنياتي لفريق الأسود بالمزيد من الإنتصارات خلال المباريات القادمة.

< font size=4 font color=balck>
الأخ وضاح
سلامي
شنو يازول من التمرين داك وما شفناك تاني؟
بالله ما تنقطع إنت لسه لاندكروزر!!
مبروك عقد القران وان شاء الله بيت مال وعيال
العروس لازم تحضر حفل التتويج عشان نزفكم بالكأس
تهانينا لسعيدة الحظ

الحبيب وضــاح

يا أخوانا باركوا لوضاح .. العقد باكر الجمعة ..ألف مبروك مقدما ...إن شاء الله بيت مال وعيال وعلم .

تخــريمة
كابتن الفاتح ميرغني غاتس وين الأيام دي .. غائب غياب "منقطع النظير" تعال التمرين الجاي وجيبو معاك .. راجل فنان ولكن اللياقة تعبانة

الحنين حيدر

الفريق قسمان: لاندكروزر وهؤلاء هم الشباب .. و كوامر جمع "كومر" ماركة قديمة لنوع من عربات زمــان .. وهؤلاء هم الجماعة الذين يتمرنون لكسب اللياقة البدنية . .. تعــال ودافر مع الكوامر

العزيز جعفر
My hearty congratulation to the lions that roar.

Quote: Forget about the Premiership, Seria A, Champions League...etc....If you want to watch the most flowing football nowadays, you should watch Lions playing

I was deeeply impressed by the coverage of your sport reporter Husssen Shehata
His reporting was no less spectacular than the professionals' coverage of major sport events

Quote: تخــريمة كابتن الفاتح ميرغني غاتس وين الأيام دي .. غائب غياب "منقطع النظير" .. راجل فنان ولكن اللياقة تعبانة

عزيز اليابان عم جعفر يسأل منك الخير.تشوفنا قريب إن شاء الله بعد أحل مشاكلي مع إدارة ريال مدريد( نزل لي وجه ضاحك هنا)
تحياتي للفاضلة أم سيف

الاخ العزيز جعفر سومي

مرحب بك وبأنضمامك لهذا المنبر حتى تزيد معنا قوة المريخ التي تعلو فوق كل شئ وباذن الله تكون خير زاد لنا وخير عون وهكذا محبي المريخ سيد البلد عدونا دائما على الحب


اما بخصوص الباقر (أنا عارفو قتيت نمره واحد) الغريبة بقول لي كلام الهلالاب الحاقدين وهوطبعا رشاشه نمره واحد ومتغاظ من بوستاتي وهذا هو الهدف عشان كدا مابقول لي الكلام السمح ودي اصلا قتاته الشوايقه دائما

وبرجع ليك بمزاج انشاء الله وفرصة سعيدة ياكابتن


ابومصطفى

العزيز كيقا
والله اتشرفنا بصلة القرابة
بعدين أحب أطمنك ناس طوكيو جميعا من أشد المعجبين بكتاباتك
وبنتظرو بوستاتك بفارغ الصبر ومنهم رشاشات كمان.
وصاحبك الغتيت ده خلي على أنا قادر عليهو والليله دي عندنا
تمرين وباقي أنا مشتاق ليهو شديد عشان غاب ليهو اسبوع كامل.
تصدق لمن سافر عليكم كدارتي ذاتا أبت تتلبس لي.
ماتنسى تنزل كلام اليابانيين

الأعزاء جعفر وكل أعضاء فريق أسود السودان..

ألف مبروك.. وبجد حاجة تعيد الأمل بعد خيبة غانا الأخيرة..

بالتوفيق ليكم في باقي المشوار..

وتحية خاصة للفاضل جعفر إسماعيل

تكرموا

العزيزة الفضلى رجــاء

شــكرا جزيلا على التهنئة والتحية والأمنيات الطيبة .... تسلمي ويديك الصحة والعافية.

تحياتي وصادق مودتي .

جعفرنا

Quote: كوامر

امثال د. عاطف وانت طالع

أنا لوجيتكم بخليهو يقعد كنبة

كومر لكن معمَر

الأخت رجاء
شكرا على المرور الجميل
والله بجد اتشرفنا وكمان شكرا على الزعرودة الحلوة
سمعناها وزادتنا حماس وبعد ده ياالخواجات أمانه غضب الله ماوقع.
تعرفي الخواجات بجو الكورة واحدين بزوجاتم وصحباتم وواحدين كمان بصحبانم(حقوق انسان)
الا أخوانك والله جايين رجال بس وناس غلب وان كان لقينا لينا واحده تزغرد لينا في الميدان
حرم الحكم زاتو مانخلي ينهي الكورة الا كان براهم يقولو ما دايرين.
طبعا حكاية فقدان العنصر النسائي دي ماجندرة لكن طبعا انت عارفه غتاتنا السودانيين ما في
واحد داير يطلع سرو. الا كمان ماتمشي تجيب لينا تهمة مع الخواجات ديل ويفتكرونا......؟؟؟
مرة تانية شرفتينا وماتقطعي الزغاريد.

الاخ جعفر سومي

يعطيك العافيه ياخوي

والان نحن في إجازة الكتابات مع بداية الدوري

والمهم بتنفشى في الرشاشات زي ما انتو اتفشيتو في الخواجات

والحمدلله المنبر اصبح الاغلبية العظمى مريخاب وهكذا دائما مريخ الانجازات

وفي الاخير دمنا احمر وما احلى الاحمر
وصاحبك كترت ماعاجبو الاحمر اشترى ليه كداره حمراء (تاكسي مدني) شفت الريده دي كيف

بس هم في الاخير مريخاب زعلانيين وربنا يهديم

وموعودين بمولود وحاليا في استراحه محارب مع التجهيزات


تحياتنا للجميع

اخي سومي لنا لقاء انشاء الله

ابومصطفى

الأخوة الأعزاء
أها كمان نزيد فرحتكم شوية.
أسودكم اليوم الأحد 17/2/2008م إتغدو ليهم بفريق اسمو JETRO FC وغلبناهم 2/1
تصدقو ده الفريق الوحيد القدر يدخل فينا أقوان السنه دي. في الدوره الأولى غلبناهم 2/1 وكان أول قوون يدخل مرمانا
وحسع الدورة التانية وبرضو غلبناهم بنفس النتيجة وده القوون التاني في مرمانا. وهو الفريق التاني في الترتيب وله 18 نقطة
ونحن في صدارة الترتيب ب27 نقطة علما بأن هذا الفريق لعب 12 مباراة بينما لعبنا نحن 9 مباريات. إن شاء الله تكونو اقتنعتو بالانجاز؟؟؟
ولسه الساقية مدورة والأخبار الحلوة متواصلة

خبر زي ده مكانو دايما فوق

السلام عليكم
بانتصارنا اليوم اصبح لاعب الفريق Ken هداف الدوري باحرازه سبع إصابات ويليه كل من أبوكر بركية ، عمر أبوبكر وأحمد جعفر بأربع إصابات لكل منهم . نجوم مباراة اليوم : زهير سولي ، هديكي ، خليل، أحمد ،فهد، Ken وسمؤال.
لم يشارك في مباراة اليوم كابتن جعفر سومي بسبب إصابته بانفلونزا.
دعواتكم لنا بالتوفيق في المباريات القادمة.

مبروك للاسود

بالله أكتبوا لينا جدول المباريات القادمة

الحنين حيدر
شكرا على التهنئة وسيصلك الجدول هذا الاسبوع .. تسلم يا الحبيب

لكم التحيه .

العزيز د. شهاب الفاتح

شــكرا على التحية والتهنئة بباقة أزهار حلوة .. يديك العافية.