Post: #1 Title: غرام في طوكيو....اجمل فيلم في الدويم! Author: هشام هباني Date: 02-12-2008, 08:33 AM
اجمل فيلم هندي استمتعت به في سينما الدويم وكان الشعب بخمسة ساغ وتسالي بتعريفة وشية من سيد اليماني بقرش وفول مظبط في سلارا بتلاتة قروش والحساب كلو تسعة قروش ونص!
Post: #7 Title: Re: غرام في طوكيو....اجمل فيلم في الدويم! Author: هشام هباني Date: 02-12-2008, 07:46 PM Parent: #6
وبعد السينما وبعد الفول تشتري( سرندبل او باسطة) بقرش بس من عمك سالم اليماني لزوم تحلية وانت ماشي للبيت واحيانا بتكون رجع كداري او في احسن الاحوال مؤجر عجلة( دبل او رالي) ليلية بعشرة قروش يعني العجلة بتبيت معااااك للصباح من عمك ابكر العجلاتي او من عمك حسن متنك! اه اه اه اه احب الدويم شات والركوب عجلات!
Post: #8 Title: Re: غرام في طوكيو....اجمل فيلم في الدويم! Author: هشام هباني Date: 02-12-2008, 08:23 PM Parent: #7
لقطة من الفيلم الهندي الشهير( تسري منزل)!
طبعا نحن ناس قرويين كنا بنموت في الافلام الهندية جدا جدا!
Post: #9 Title: Re: غرام في طوكيو....اجمل فيلم في الدويم! Author: Nazar Yousif Date: 02-12-2008, 08:41 PM Parent: #8
العزيز هشام هبانى أن شاء الله عمك ميرغنى ال..ارو ( دى اكتبوها كيف) ما قطع الفلم.
Post: #10 Title: Re: غرام في طوكيو....اجمل فيلم في الدويم! Author: رأفت ميلاد Date: 02-12-2008, 08:50 PM Parent: #9
Quote: اجمل فيلم هندي استمتعت به في سينما الدويم وكان الشعب بخمسة ساغ
ياعمدة مشتاقين
خمسة ساغ دى تبيعا بى كم .. فى الدويم كنتوا عندكم الحكم الزاتى
بنمسى
Post: #16 Title: Re: غرام في طوكيو....اجمل فيلم في الدويم! Author: هشام هباني Date: 02-12-2008, 11:27 PM Parent: #10
حبيبنا رافت
Quote: خمسة ساغ دى تبيعا بى كم .. فى الدويم كنتوا عندكم الحكم الزاتى
والله الدويم دي يا رافت كانت براها امبراطورية يعني حاجة (ابهة) مش من كوكب الارض ده ابدا اه يا الله ما ترجعنا تاني للزمن الجميل دااااك!
Post: #12 Title: Re: غرام في طوكيو....اجمل فيلم في الدويم! Author: هشام هباني Date: 02-12-2008, 09:39 PM Parent: #9
عزيزنا نزوري
سيد السينما اسمو عمنا عبد الحارث عبد المنعم وفني التشغيل الغلبك تكتب اسمو كمحاولة تقريبية بادغام النون والجيم (نجارو)! بعدين ما تنسي في السينما في(لوج نسوان) فوق في الركن في الدور التاني قريب من حجرة التشغيل وفتوات السينما كانوا(اولاد لبيب)!
Post: #11 Title: Re: غرام في طوكيو....اجمل فيلم في الدويم! Author: عزيز عيسى Date: 02-12-2008, 09:20 PM Parent: #1
ومرات يا رأفت تكون شايل معاك ريال تقيف في صف الشعب بتاع السينما الخواجة في مدني لمشاهدة فيلم جانوار بأربعة قروش ونص صاغ وتسالي بتعريفة صاغ.. وبعد إنتهاء الفيلم تمشي على حلواني سنترال تأخذ سندوتش وباسطة وتشرب هيلا هوب بشلن صاغ وبعد داك تمشي وفي جيك ولا تعريفة على محطة (يا عم) بالقرب من البوابة وتأشر للسيارات المتجه على بركات (لاندروبل) أو موريس تركب ويوصلك ببلاش وترجع البيت وأنت مبسوط.
الكلام دا كان سنة كم؟
Post: #14 Title: Re: غرام في طوكيو....اجمل فيلم في الدويم! Author: رأفت ميلاد Date: 02-12-2008, 09:56 PM Parent: #11
Quote: ومرات يا رأفت تكون شايل معاك ريال تقيف في صف الشعب بتاع السينما الخواجة في مدني لمشاهدة فيلم جانوار بأربعة قروش ونص صاغ وتسالي بتعريفة صاغ.. وبعد إنتهاء الفيلم تمشي على حلواني سنترال تأخذ سندوتش وباسطة وتشرب هيلا هوب بشلن صاغ وبعد داك تمشي وفي جيك ولا تعريفة على محطة (يا عم) بالقرب من البوابة وتأشر للسيارات المتجه على بركات (لاندروبل) أو موريس تركب ويوصلك ببلاش وترجع البيت وأنت مبسوط.
وكان الوكت إتأخر شديد تمشى المحطة وتركب قطر بضاعة وتنط منو لما يهدن فى بركات ..
Quote: الكلام دا كان سنة كم؟
زمن النجمة أم ضنب .. الحلاق كان صقر بكسر الراء .. والتانية زاتا ما بعيدة .. والجكس توتو ماتا
زكرتنى بوست قديم يا عزيز أمشى أنكتو وخليك جاهز .. الدويم كان فيها شنو غير بناتم السمحات ديلاك
Post: #17 Title: Re: غرام في طوكيو....اجمل فيلم في الدويم! Author: هشام هباني Date: 02-12-2008, 11:29 PM Parent: #11
Quote: ومرات يا رأفت تكون شايل معاك ريال تقيف في صف الشعب بتاع السينما الخواجة في مدني لمشاهدة فيلم جانوار بأربعة قروش ونص صاغ وتسالي بتعريفة صاغ.. وبعد إنتهاء الفيلم تمشي على حلواني سنترال تأخذ سندوتش وباسطة وتشرب هيلا هوب بشلن صاغ وبعد داك تمشي وفي جيك ولا تعريفة على محطة (يا عم) بالقرب من البوابة وتأشر للسيارات المتجه على بركات (لاندروبل) أو موريس تركب ويوصلك ببلاش وترجع البيت وأنت مبسوط
عزيز سيبنا بالله من حكاية سنة كم دي بطل الفضايح اتفرج وقوم نوم يا حااااج!
Post: #13 Title: Re: غرام في طوكيو....اجمل فيلم في الدويم! Author: اسعد الريفى Date: 02-12-2008, 09:46 PM Parent: #1
هشام هبانى إزيك و كيف احوالك تعرف اتخيلتك حتكتب عن فيلم (جعلونى يتيما) .. طالما المسألة كلها ب 9 قروش و نص .. غرام فى طوكيو هسع ممكن يكلفك 9 مليون !!
Post: #15 Title: Re: غرام في طوكيو....اجمل فيلم في الدويم! Author: malamih Date: 02-12-2008, 10:58 PM Parent: #13
يا سلام يا ودهباني
ذكرتنا الأيام السمحة ديك.. بيتنا كان في الهاشماب فاتح في شارع
الموردة الرئيسي مقابل الدايات و دارالرياضة أمدرمان.. سينما أمدرمان
و الوطنية أمدرمان فركة كعب مننا.. ونتجمع يوم الخميس أنا و الطيب الفاتح الطيب( ود دوليب) ولاعب العباسية الشهير و محمد الله جابو(حمادة) و البدوي النقر و طلال التجاني أولاد شلتي وحلتي ياحليلم.. نطلع من العصر طبعآ بعد الإستئذان من الأهل و أخذ مصروف الخميس ونتحرك ماشين بأرجلنا.. ناخد سنده عند عم حسن قرشي في كشكه جوار حديقة البلدية أمدرمان وبعد شراب الليمون وفي الطريق ألى سينما أمدرمان نتوقف عند دار فلاح للفن الشعبي نقيف نعاين للبروفات .. داك الفنان عوض الجاك.. وبي هنا محمد أحمد عوض و بي هناك بلبل الفكاهي الشهير.. ومحمود فلاح يوزع ضحكاته و تعليقاته بصوته الجهوري .. صدق سينما أمدرمان كانت بتعرض (جانوار) بطولة شامي كابور و الوطنية كانت بتعرض (تسري منزل) برضو لبطولة شامي كابور .. لكن البطلة المعاهو عشه باريخ (آشا باريخ) ذات العيون الواسعة و سود و الشعر الفاحم و الخدود الإيه دي .. كانت مكسرانا بالجد.. و البنات كلهن غايرات منها وكنا بنعاير الطالبات التغيانات ( شوف بالله دي قايلة نفسها عشة باريخ) .. و أعتقد بأن بطل غرام في طوكيو كان شقيق شامي كابور الأصغر شاشي كابور.. وكان دوليب كومار أحد أبطالنا المفضلين و بالذات في فلم من أجل أبنائي,, طبعآ الفلم ده ما حبيتو خالص يا هشام تعرف ليه .. عشان الناس بتبكي فيه.. والله مرة أتذكر راجل كبير بي عمته قعد يجعر جنس جعري التقول أمو ماتت ,, طبعا أخونا الطيب الفاتح( ود دوليب) كان فاكيها فينا إنو دوليب كومار ده قريبهم من الدواليب من بارا للهند,, أها في الإستراحة نمشي البوفيه بتاع سينما أمدرمان نتناول سانويتشات السجق بالجبنة المضفرة والرغيف التوست الفاخر ومعاهو مشروب البزيانوس البارد .. ده كله كان بي سبع قروش التذاكر كنا بنخش لوج بي 55 قرش للخمسة تذاكر .. ( كنا ممنوعين من الشعب بشروط أهلنا) الدرجة الأولى كانت بي 15 قرش و التانية بي 10 قروش و الثالثة( شعب) بي 5 قروش واللوج سعة 5 كراسي 75 قرش و للطلبة الزينا 55 قرش .. شايف يا ودهباني من زمان الشعب دايمآ في الدرجة التالتة.. ليه والله ماعارف .. حتى في دور الرياضة و الإستادات الشعب في الدرجة التالته.. طيب ناس الدرجة الأولى و التانية ديل ما شعب. والله غايتو الجلابة ديل عندهم جنس عمايل..!
Post: #19 Title: Re: غرام في طوكيو....اجمل فيلم في الدويم! Author: هشام هباني Date: 02-12-2008, 11:41 PM Parent: #15
حبيبنا عادل
Quote: ذكرتنا الأيام السمحة ديك.. بيتنا كان في الهاشماب فاتح في شارع
الموردة الرئيسي مقابل الدايات و دارالرياضة أمدرمان.. سينما أمدرمان
و الوطنية أمدرمان فركة كعب مننا.. ونتجمع يوم الخميس أنا و الطيب الفاتح الطيب( ود دوليب) ولاعب العباسية الشهير و محمد الله جابو(حمادة) و البدوي النقر و طلال التجاني أولاد شلتي وحلتي ياحليلم.. نطلع من العصر طبعآ بعد الإستئذان من الأهل و أخذ مصروف الخميس ونتحرك ماشين بأرجلنا.. ناخد سنده عند عم حسن قرشي في كشكه جوار حديقة البلدية أمدرمان وبعد شراب الليمون وفي الطريق ألى سينما أمدرمان نتوقف عند دار فلاح للفن الشعبي نقيف نعاين للبروفات .. داك الفنان عوض الجاك.. وبي هنا محمد أحمد عوض و بي هناك بلبل الفكاهي الشهير.. ومحمود فلاح يوزع ضحكاته و تعليقاته بصوته الجهوري .. صدق سينما أمدرمان كانت بتعرض (جانوار) بطولة شامي كابور و الوطنية كانت بتعرض (تسري منزل) برضو لبطولة شامي كابور .. لكن البطلة المعاهو عشه باريخ (آشا باريخ) ذات العيون الواسعة و سود و الشعر الفاحم و الخدود الإيه دي .. كانت مكسرانا بالجد.. و البنات كلهن غايرات منها وكنا بنعاير الطالبات التغيانات ( شوف بالله دي قايلة نفسها عشة باريخ) .. و أعتقد بأن بطل غرام في طوكيو كان شقيق شامي كابور الأصغر شاشي كابور.. وكان دوليب كومار أحد أبطالنا المفضلين و بالذات في فلم من أجل أبنائي,, طبعآ الفلم ده ما حبيتو خالص يا هشام تعرف ليه .. عشان الناس بتبكي فيه.. والله مرة أتذكر راجل كبير بي عمته قعد يجعر جنس جعري التقول أمو ماتت ,, طبعا أخونا الطيب الفاتح( ود دوليب) كان فاكيها فينا إنو دوليب كومار ده قريبهم من الدواليب من بارا للهند,, أها في الإستراحة نمشي البوفيه بتاع سينما أمدرمان نتناول سانويتشات السجق بالجبنة المضفرة والرغيف التوست الفاخر ومعاهو مشروب البزيانوس البارد .. ده كله كان بي سبع قروش التذاكر كنا بنخش لوج بي 55 قرش للخمسة تذاكر .. ( كنا ممنوعين من الشعب بشروط أهلنا) الدرجة الأولى كانت بي 15 قرش و التانية بي 10 قروش و الثالثة( شعب) بي 5 قروش واللوج سعة 5 كراسي 75 قرش و للطلبة الزينا 55 قرش .. شايف يا ودهباني من زمان الشعب دايمآ في الدرجة التالتة.. ليه والله ماعارف .. حتى في دور الرياضة و الإستادات الشعب في الدرجة التالته.. طيب ناس الدرجة الأولى و التانية ديل ما شعب. والله غايتو الجلابة ديل عندهم جنس عمايل..!
والله ما كنت قايل ولد الاستاذ الصحافي الكاتب حسن نجيلة طلع (قروي) زي حالاتنا كده بحب الافلام الهندية والله خيبت ظنونا فيك يا عدولي! وبعدين كنتوا بتخشوا لوج بشروط اهلكم يعني مش شعب اح اح اح احي يا الري!
Post: #18 Title: Re: غرام في طوكيو....اجمل فيلم في الدويم! Author: هشام هباني Date: 02-12-2008, 11:36 PM Parent: #13
اسعد حبيبنا
Quote: تعرف اتخيلتك حتكتب عن فيلم (جعلونى يتيما) .. طالما المسألة كلها ب 9 قروش و نص .. غرام فى طوكيو هسع ممكن يكلفك 9 مليون !!
فيلمك ده لو جابوهو السودان هسع بجيب ليك بلايين الجنيهات ما البلد مليانة ايتام.. واليوم داااك حتبيع مناديل بالكراتين بدل التسالي وخايف بعد الفيلم تقوم مظاهرات وترمي الحكومة!
Post: #20 Title: Re: غرام في طوكيو....اجمل فيلم في الدويم! Author: حيدر حسن ميرغني Date: 02-13-2008, 02:51 AM Parent: #18
هشَومة العزيز
صدقني ... قلت ياساتر
هشام ده يكون قبَل على ناس طوكيو كمان
ما أجمل الغرام حين يكون على الاستايل الهندي
وهل من عودة لذلك الزمن الجميل؟
حين كانت البلد وسينماتها فضاء احلام وآمال عراض
سقى الله تلك الايام بماء الغمام
Post: #21 Title: Re: غرام في طوكيو....اجمل فيلم في الدويم! Author: هشام هباني Date: 02-13-2008, 06:35 AM Parent: #20
حيدوري
انت عارف زمان كانوا عندنا شماشة اذكياء جدا بطلعوا بعد الفيلم الهندي حافظين كل الاغاني وكل الرقيص وحافظين كلمات هندية كتيرة! وبرضو اتذكر انو حتى الناس تاثرت بالاغاني الهندية وعلي مااذكر في قريتنا كنت اتذكر انه في زواج من زواجات القرية كانت هنالك بنت قريبتنا تغني اغنية هندية (ميري مهبة...من فيلم جانوارالشهير لشامي كابور) وعلي انغامها ترقص علي السباتة عروس سودانية بحركات هندية!
Post: #22 Title: Re: غرام في طوكيو....اجمل فيلم في الدويم! Author: Mannan Date: 02-13-2008, 08:04 AM Parent: #1
حبيبنا وناظرنا ود هبانى
ما اجمل ذكرياتك... عندما نقلت الى العمل فى الهند وعدت منها كان كثيرون من الاصدقاء يسألوننى عن شامى وشاش كابور وزينات امان واشا باريخ وهيما مالينى فاجيب عليهم انو نحن ما شفناهم كلوكلو وما شفنا غير الفقر والبقر والهاريجان (المنبوذين) مالين الشوارع ... ورئيس الوزراء مورارجى ديساى الذى كان يشرب كباية شوب من بوله كل صباح... فيجيب على احدهم: ونان الافلام السمحة بسووها وين والناس السمحين قاعدين وين ؟ ذات مرة فى الخرطوم رأيت صاحب كارو كاتب فى الكارو" " من اجل ابنائى" فقلت فى سرى: ده الوحيد الاستفاد من الافلام الهندية... على الاقل لقى ليهو حكمة وكتبها فى عربة الكارو فسارت وصارت مثلا...
كل الجمال ولك الشكر..
نورالدين منان
Post: #23 Title: Re: غرام في طوكيو....اجمل فيلم في الدويم! Author: هشام هباني Date: 02-13-2008, 02:00 PM Parent: #22
استاذي السفير الثائر نور الدين منان
نورت المنبر
Quote: ورئيس الوزراء مورارجى ديساى الذى كان يشرب كباية شوب من بوله كل صباح
بعبارتك اعلاه خليتني نسيت موضوع البوست وتعجبت جدا من هذا السلوك لرئيس وزراء الهند ديسااااي كدي عليك الله يا منان اشرح لينا الشغلانية دي كيفن..يعني الزول ده بشرب كل يوم كبايتو دي ويرجعها تاني لبطنو ويطلعهاويشربها وعلي كده طوالي زي ساقية جحا!؟
