ساخر سبيل : ذى حلاتنا !!

لأول مرة أعرف أننى زول (خام ساكت) وعلى نياتى (وطيرة ومبارى السيرة) وذلك بعد أن وقعت عيناى على خبر فى أحدى الصحف فى الأيام الماضيات يقول بأن وزارة الصحة الاتحادية قد كشفت على لسان د. تابيتا بطرس وزيرة الصحة الاتحادية عن اتجاه لإجراء عمليات (الولادة الطبيعية) مجاناً خلال الفترة المقبلة فقلت مندهشاً (يا خبر أبيض هيا الولاده كانت بفلوس) ؟ ده أنا كنت (مفتكرا مجانا) وإنتو كنتم (مفتكرنها مجانا) ده إنتم طلعتم أى كلام يا جدعان !!
- معقولة (ولادت ربنا دى) الزول لو ما دفع ما (يلدا؟)
هكذا سالت نفسى (الكيئبة المندهشة البائسة) فلم يدر بخلدى أبدأً ان (الولادة بفلوس) كنت أعلم تماما أن كل شئ بفلوس إبتداء من التخلص من (الأوساخ والنفايات) مروراً بالدواء إنتهاء بالتعليم ودفع رسوم طباعة الإمتحانات وحق (فطور المدرسين) وحق (طباعة الإمتحانات) وحق (المويه والنور) لكن مسالة كونو إنو (الولاده) بى قروش دى لم أكن أتخيل أن دولة (محترمة) يمكن أن يخطر على بالها أن (تفعلها) وذلك لعدة أسباب أولها حديث حديث خير البشر (تكاثروا تناسلوا فإني مباه بكم الأمم يوم القيامة ) بالطبع فإن النبى صلوات الله وسلامه عليه كان يعلم أن هذا (التكاثر) لا يتم عن طريق (الإنشطار) كما يحدث فى (الأميبا) والحيوانات (آحادية الخلايا) إنما عن طريق التلاقح و(الحمل) الذى يفضى إلى (الولادة الطبيعية ) البى قروش دى !! فكيف إذن لدولتنا (السنية البهية) أن تجعل (الولادة) بى (قروش) ورسولنا الكريم يدعوها ويدعونا للتكاثر والتناسل من أجل أن يباهى بنا الامم يوم القيامة يوم لا ينفع مال ولا بنون؟
صدقونى يا جماعت الخير (كما يقول أخونا البونى) بأننى بداية لم أصدق الخبر .. وكيف أصدقه والدولة ما فتئت تقوم بحشد آلاف الشباب فى مهرجانات الزواج الجماعى والذى لا شك أن (مخرجاته) الحتمية همو (أطفال) يولدون بعد حمل يدوم تسعة اشهر وعشرة ايام !! هل يعقل أن تقوم الدولة بتيسير زواج هؤلاء ثم ثم تطالبهم بدفع رسوم (ولاده)؟
حكى لى صديق لي يقيم في إحدى دول (الكفر) ذات مرة أنه وفى تلك البلاد (الفاجرة) التى يقيم فيها توجد مستشفيات متخصصة للولادة (يعنى دايات) للكلاب (أكرمكم الله) تتم فيها متابعه (الكلبة) طبياً أثناء فترة الحمل ثم إذا ما قربت ساعات الولادة يتم إدخالها إلى عنبر (الإنتظار) ثم (العمليات) ثم تخرج (السستر) لتقول لك :
- مبروك جالك كلب !!
ثم يؤخذ (الكلب إبن الكلب) ليوضع تحت الرعاية الطبية الكاملة هو الست والدته فى عنبر حديثى الولاده حتى إذا يقضى الفترة المحدده لذلك ، كل ذلك خدمة مجانية (لا قرش لا تعريفه) تقدمها الدولة (للكلاب) بحسبانها (حيوانات مسكينه) هم مسئولون عنها (أمام الله) ، بل زاد صديقى فقال أن أحدى هذه (الكلبات) قد توفيت اثناء إجراء عملية ولاده (قيصرية) لها بعد أن تعذر ولادتها (الطبيعية الما بى قروش) فبادر الطبيب بإجراء العملية لها إلا أنه وللأسف فإن (الأم) قد توفيت أثناء العملية الجراحية (القيصرية) بسبب خطأ طبي، فخرج صاحب (الكلبه) من تلك (الدايات) فورا وأجرى اتصالاته مع جمعيات (حقوق الحيوان) وما لبثت الشوارع أن إمتلأت بالحشود التى إنطلقت فى مسيرات (مليونية) تطالب بفصل (الطبيب) ودفع تعويضات مالية مجزية لصاحب (الكلبة المتوفاة) و تطالب أيضا بسن قوانين لحماية (الكلاب المسكينة) من أخطاء الأطباء القاتلة !! ولم تتوقف (المسيرات المليونية) إلا بعد أن تم سُحب الترخيص من (الطبيب) واستلم صاحب (الكلبة) تعويضا مجزيا تبرع به بالكامل لإقامة (مستوصف ولاده) متكامل ولكن (للكلاب الضاله) !! يعنى الما عندها راعى مسئول منها (ذى حلاتنا) !!
كسرة :
لو (الولاده الطبيعية) عملتوها مجانا .. يبقى من باب أولى (الما طبيعية تكون مجانا) !! هو اللى مش قادر يدفع (الطبيعية) ح يقدر يدفع (الما طبيعية) إذاااى

كتب كليب الارناؤوطى فى سفر الكنتوش ، أنه و بعد رحلة السفرجل .. أصاب الرمان غردس ، و هدهده العبير عندها تراءى له شبط الشدة الناصع البياض .. و سمع بأم أذنيه زوجه تئن و تصرخ من ألم الطلق الحاد .. حينها تأكد أنها حامل ..... لفيروس الكبد الوبائى من النوع أبو كديس ...

تحياتى بالسنتوسنون (الم الطلق الصناعى )

استااااااااااااذنا الفاتح جبرا ......ابو ناجى




تكتب بطريقة فن الكاركتير ...وهى ممارسه صحفيه عجيبه ....توظف النقد باسلوب

مقنع ....وقابل للنشر ....

جبرا .....دوما ماتقدم لنا رايا استثنائيا ....وسكونا بالايحاءات

والتلميحات ... وتوظف القوالب النمطيه الجاهزه ..والاحكام الارتجاليه عن الاشخاص

والاشياء ...فى سطرين ونص ....الطبق اليومى

حولت سطرينك ونصهم ...الى موضه ثقافيه ...تأسرنى شخصيا ...بلونها الابيض والاسود.

سطرين ونص ....فن كاركتيرى خاص ... وجبه يوميه ......تقدمها ويشترك فيها معك

الشعب السودانى ....انها فن عميق ...يترك اثرا مستمرا ..

سطرين ونص الذى تطالعنا به كل صباح ....هو راصد تاريخى دقيق ومباشر للهموم

السياسيه والاجتماعيه ...غير المعلنه



لك كل التقدير والتجله استاذنا الفاتح جبرا ...مع خالص الود

وبجيييييك راجعه

[
الاخ الفاتح والله انا ذاتي مسطحة زيك كيف الولادة بقروش ..اهااا الكان ماعندها والداية بقت مافي

تلد براها زي الغنماية حتى الغنماية والنعجة اهلا الساعنها بساعدوها امرك غريب يا بلد

شفته الناس الكفر ديل بهتموا بالروح كيف يعني الكلاب معززة ومكرمة اكثر من البني آدم عندنا

نحنا والله عمايلنا البنعملا الكفر بستعجبوا فيها ...اسلامنا بس الله اكبر الله اكبر نقولا ونهز العصاية

في المهرجانات والباقي نتمو رقيص ....يا هو ده الاسلام ...ربنا يهدينا ويكون في عونا نحنا المسطحين

ويسهل الولادة للنساء من الوجعة الاولى ويجي منزلق للدنيا العجيبة دي ( قال ولادة بقروش قال )

ده زي حق العتب البحسبو ناس مجلس الحي .

أهلاً بالقوارير :
ناهد بشير الطيب
منى على الحســن ................ (يا أسعد بجيك راجع) !!

ناهد :
يعنى يا ناهد ما خليتى ليا صفحه (ما) إتقلب عليها !!! أشكرك على كل هذا التقريظ والإطراء .. منتظرك على المسنجر .. تحياتى ليك ولجميع أفراد العائلة الكريمة ونلتقى بإذن الله .

منى :
عليكى الله يا منى ده إسمو كلام ؟ عرفنا أى حاجه كمان (ولادت ربنا دى) تكون بى قروش ؟ مش ياهو ده الفضل .. عالم ما عندهاش (رحمة) !!

Quote: شبط الشدة الناصع البياض ..

الحبيب أسعد

معليش قلنا نرد على (القوارير أول !!) .. تعرف يا أسعد (شبط الشده ) ده كان قاعد يجى بيهو (الجامعه) واحد صاحبنا من (الجماعة) هسع (مسئول) وعندو ذى عشروميت (شركة) وكم مزرة وكم عمارة وكم شقه بره وكم شنو ما بعرف دااااك ... (الشده) مالا عيبا ليا ..!!!
شوف عملت فى الراجل ده شنو هسع !!!

Quote: صدقونى يا جماعت الخير (كما يقول أخونا البونى) بأننى بداية لم أصدق الخبر .. وكيف أصدقه والدولة ما فتئت تقوم بحشد آلاف الشباب فى مهرجانات الزواج الجماعى والذى لا شك أن (مخرجاته) الحتمية همو (أطفال) يولدون بعد حمل يدوم تسعة اشهر وعشرة ايام !! هل يعقل أن تقوم الدولة بتيسير زواج هؤلاء ثم ثم تطالبهم بدفع رسوم (ولاده)؟

والله صحي انت طلعت راجل طيب ياجبرا ذي ما بقولوا اخوانا المصريين
الدولة صحي بتحشد الاف الشباب لسبب بسيط عشان بعد تسعة شهور عشرة يوم تتحصل منهم على رسوم النفايات اسف اقصد الولادة . ووزارة الصحة مشكورة اتنازلت بمحض ارادتا عن ريع هذا المشروع الاستثماري لصالح المتكاثرين...شكرا تابيتاوالعاقبة عنكم في الولادات

أستاذنا الفاتح جبرا ....


غايتو نحن بنسكت ونقرا ..... لكن يوم بتكتل ليك زول

الأستاذ العظيم الفاتح يوسف جبرا
لك التحية والتجلة والإحترام

عندي طلب
يا أستاذ

الدكتور اللي إتكلم أمبارح في قناة الشروق - عاملين معاهو لقاء-

دا كان خيالي في كل كلمة قالها
بعدين المفردات الكان بتكلم بيها أقل فردة كانت PROCESSING
دي نحن ناس ظعيت ومعيط ديل نفهما كيف
هو كان إتكلم بالدارجي وفهمنا حاجة وا كتر خير الله

بعدين شوفو لينا كان قاصد شنو وترجم لينا عشان نفهم


نورالدين

Quote: والعاقبة عنكم في الولادات

دى حلوووووووووه يا ناصر !!

Quote: غايتو نحن بنسكت ونقرا ..... لكن يوم بتكتل ليك زول

العزيز أبوالريش :

ها ها ها ها !!!!!

Quote: ثم يؤخذ (الكلب إبن الكلب) ليوضع تحت الرعاية الطبية الكاملة

ويومك أسود إن كان هناك تقصير في العناية

تحياتي الفاتح جبرا
متابعين
مودتي

Quote: الدكتور اللي إتكلم أمبارح في قناة الشروق - عاملين معاهو لقاء-

معليش يا نورالدين (القنوات السودانية) دى ما قاعد أشوفا لأنو العبدلله عامل ليهو كم (قسطرة) والشريان التاجى بتاعو تعبان وممكن (إى مذيع) يوديهو فى داهية خليك كمان يكون ضيف !!

(القنوات السودانية) دى ما قاعد أشوفا لأنو العبدلله عامل ليهو كم (قسطرة) والشريان التاجى بتاعو تعبان وممكن (إى مذيع) يوديهو فى داهية خليك كمان يكون ضيف !!

أعلاه مقتبس من كلام الأستاذ الفاتح جبره

لكن أقول ليك:
على الحلف لو شفت الحقة دي كان نعوك في جرائد تاني يوم - بعد الشر

تحياتي

الدكتور سألوه ليه مافيش عناية في المستشفيات العامه عشان المواطن
ما يمشي يخسر فلوس ويدفع دم قلبوا خصماً على خمرتمية حاجة للعلاج

ج : الدكتور قال : الناس بتمشي تدفع في المستشفيات الخاصة بغرض الفندقة الجيدة
باللفظ الواحد قال ( ACCOMMODATION )

إحترامي

.

Quote: ج : الدكتور قال : الناس بتمشي تدفع في المستشفيات الخاصة بغرض الفندقة الجيدة باللفظ الواحد قال ( ACCOMMODATION )

(مارى أنطوانيت) ده يا نورالدين قايل الناس كلهازيهم كده مرطبين !

د.الفاتح تحياتي

لم اتصور ان اخاطبك يوما مباشرة وبدون وسيط
ولكن هذه احدي ميزات التكنولوجيا
انا من اشد المعجبات بك كاستاذ وناقد واي حاجة تانية انت بتعملها
انت درستني زمان في الجامعة
ومن الزمن داك الاعجاب حصل
وسيستمر..
مادمت تعطر سماواتنا بهذه الابداعات

شكراممتدة الي مالا نهاية

لك الود دوما..

استاذي الجليل

Quote: انت درستني زمان في الجامعة

العزيزة آمنة :

تعرفى الحاجه العملتيها والقلتيها دى هى أجمل حاجه تخلى أى استاذ فى الدنيا يحس بأروع واجمل إحساس لا يوصف ... شكراً ليكى على كل كلمة قلتيها .. وبتمنى ليك كل شئ جميل يا آمنة ......