مين السبب ؟ ..

مجروح وهمّك ليل طويل ..
ومين السبب ياقلبى مين ؟
أنا والنجوم مستغربين !
بالله كيف نسمة عشق
ترسم مشييك وخطوتك
تتملكك .. تبراك طيف ..
ياما نصحتك وقلت ليك
أختا الدروب أوعك تميل
أنا أصلى كنت بخاف تضيع
بحر العشق غدار غريق
والمنية ماسكة وخلاص
المنية توصل وماتقيف
ياقلبى كنت بخاف عليك
ووقفت أحرس كل خطوة معاك وليك
قستَ المسافة البين مسامك
واى دفقة دم تجيك
ضاريت شموسك من وهج نور المغيب
ورحلت بيك فوق للسحاب
وسدتك أكتاف القمر
وصيت عليك أنجم سماى
تطرد تهاويم العشق
تحرس منافذك كلها
تعد خطاك وتحصنك
ونسيت معاك انو المصير سطوة قدر
وانو القدر سهم العيون الودرك
نغمة تراتيل صوت حرير
بسمة آمل من نبع صاف
طلقة قتيل ..
وآآه ياقدر !!
محزونة أفراح الوتر
ملعونة أشواق السنين
مهزوم كمان حلمى الشقى
وعتبانة يابحر الحزن
تغرق مراكبى وكل آنوار الحلم
تغرق سماى ..
وتموت معاى سيرة قلب
كان لسه بدرى عليه صغير
وتموت معاه قصة هواى
وبالله كيف يرضيك أساى
وانت البتعرف من زمان
خوفى وشقاى ..
ياقلبى خفتً ..وأيه جزاى ؟؟
وأرجع أقول ..
القصة مامنك براك
أقدارنا كانت هى المصير
قدرك غمامة توصلك فوق للسحاب
ترحل تسيبك وتهجرك
وتسقط آمالك سراب ..!!

هند محمد

ياما نصحتك !!
الحمد لله
ما سمع النصيحة.
لو سمع النصيحة ،،
كان شوفنا القصيدة الجميلة دي ؟؟
مش؟؟
دايما جميلة قصايدك وبسيطة
وبتخش القلب زي النسمة
مودتي

صباح كل شئ جميل استاذ السنى ..

الجمال فى احساسك المرهف وروحك الطيبة ..

أشكر لطفك ومرورك وتعليقك الجميل ..

شكراً بحر ..

استاذة هند سلام

لما دخلت كنت دايرة اكتب ليك ديل العيون ولا قلبي هم السبب
ولكنك الجمتيني بهذه العبر

Quote: القصة مامنك براك أقدارنا كانت هى المصير

يا ربي هل هي اقدارنا هل نساهم في وضعها ام هي مرسومة ونحن ممجرد ادوات نؤديها هل نحن مخيرين ام مسيرين سؤال؟

سفية

سلامات استاذة صفية ..أشكر لطفك عزيزتى ومرورك الجميل ..

رداً على تساؤلك اكتفى بماورد قوله عن النبى الكريم فيما مامعناه :

(اذا جاء القدر فاسكتوا عن الكلام )..

هوشأن فيه اختلاف بين اهل الشرع عزيزتى والامان فى اتباع قول النبى الكريم ..

أشكرك على المرور ..

Quote: القصة مامنك براك أقدارنا كانت هى المصير

فإذا أنكر خل خله
وتلاقينا لقاء الغرباء
ومضى كل إلى غايته
لا تقل شئنا فإن الحظ شاء

إلى أين ستأخذنا حظوظنا وأقدارنا؟


أستاذة هند

غاية فى الروعة

ظريفة وخفيفة على الروح

مودتى



سماح

الروعة فى احساسك الجميل سماح ..

من غير استاذة .. أشكر لطفك ومرورك العذب ..

تسلمى كتير ..

طيب

Quote: مين السبب ؟ ..

اقدارنا ياحسام ...

أشكر لطفك ومرورك الجميل ..

لله درك هند
أنغامك سلسة مِطواعة للترنم
رغم الشجن الذي يغلفها

لله درك

سعيدة باعجابك استاذ بله ..

والجمال الذى تراه يتدفق من دواخلك ..لوماكان جواك ماكان حسيتو ..

أشكر لطفك والمرور العذب ..

شكراً جميلاً ..

هند محمد

صبية ياخذ الشعر من جمال حروفها
قوة احساسه
لي قدام يا بت يا نور
شق ضلام الليل
وخلى الكون ينداح في جنون

من لطفك ونبل احساسك بترد مرتين دكتورنا ..

مقدرة جدا دعمك وتشجيعك المتواصل ..

وأسعد دوماً بالحضور العذب الآنيق ..

أشكر لطفك واحساسك بالناس وروحك النقية الطيبة ..

وتسلم كتير ..

روعة

جد

الأخت هند

سلام على روحك الطيبة

نصيحة جدير بنا سماعها ونرد لنقول لشاعرتنا الشفيفة:

تُسافر المَراكبُ
نحْو أبْراج الحَدائق
فتدْنو البِجَعُ
وقد أرهقها الرحيل
منْ محار الشّاطىء
لتُعلن عرْس الطّحلب الجَميل !


مودتي وتحيات أخوية

مليون سلام وتحية شاعرنا ابوبكر ..

أسعد دائما بمرورك العذب واطمئن انك بخير ..

ألبسك الله ثوب العافية وعافاك من كل شر ..

نصيحتك غالية ومقدرة وفى منتهى الروعة ..

يسلم لطفك واحساسك الجميل وتسلم ..

شكراً جميلاً ..

العزيز المر ..

الروعه فى احساسك الجميل وشخصك النقى وقلبك الكبير ..

أشكر لطفك ومرورك والطلة الحلوة ..

تسلم كتير ..

Quote: وبالله كيف يرضيك أساى وانت البتعرف من زمان خوفى وشقاى ..

قدااامنـا شوف كم زول بـكى
قدااامنا شوف كم زول تعب
لا مـــرة ولا يوم اشتكى...
ولا قال خــلاااص صعب الدرب
اهو نحن عااارفين الحصـل...
وبرضو بنقول عاوزين نحب
وبروحنا ماااشيـن للمحـن...
اصلو طبعك يا زمـن...
لا راضي انــت تغيـروا
ولا نحن راااضيـن بالمحن...

تحيااتى هند..و شكرا للالق الشفيف...

مودتى...

العزيز محمد ..مداخلة اكتر من جميلة ومعبرة ..

أشكرك على المرور الاعذب والحضور الانيق ..

تسلم كتير ..

Quote: ونسيت معاك انو المصير سطوة قدر وانو القدر سهم العيون الودرك

هند رائعة في النسيان

Quote: محزونة أفراح الوتر

مدهشة في الأحزان

Quote: وتموت معاى سيرة قلب

......

Quote: وأرجع أقول .. القصة مامنك براك أقدارنا كانت هى المصير قدرك غمامة توصلك فوق للسحاب ترحل تسيبك وتهجرك وتسقط آمالك سراب ..!!

وأرجع أقول ..
القصة مامنك براك
احساسك الهادي النضير
كان سكة للكايس الجمال
الروعة.. والفرح الجميل


** كل الود

الروعة فى احساسك الجميل شاعرنا حسين ..

سعيدة ان صادف النص قبولك واستحسانك ..

أشكر لطفك وعذب المرور ..

تسلم كتير ..

هنـد

يا مرهفـة ,

واصلي الكتابـة عالية القيمـة

لك التحيـة



أحمـد

مليون تحية احمد ..

أشكر لطفك ومرورك وكلماتك الداعمة اللطيفة ..

شكراً جميلاً ..

Quote: ومين السبب ياقلبى مين ؟ أنا والنجوم مستغربين !

دي علاقة مابين أرض وعظيم سماء

Quote: ياما نصحتك وقلت ليك أختا الدروب أوعك تميل أنا أصلى كنت بخاف تضيع بحر العشق غدار غريق والمنية ماسكة وخلاص المنية توصل وماتقيف ياقلبى كنت بخاف عليك ووقفت أحرس كل خطوة معاك وليك قستَ المسافة البين مسامك

دي خارطة طريق يابس وماء ومسااام جسدي حسي
علاقة طردية .

Quote: ضاريت شموسك من وهج نور المغيب ورحلت بيك فوق للسحاب وسدتك أكتاف القمر وصيت عليك أنجم سماى تطرد تهاويم العشق

هنا أنتقلت العلاقة للفضاء وأنه أرحب مكان تسمو فية العشق بين أنوار شموس ووهج وغمائم سحب ونور قمر
ويتم السْكون فية ويجري كوكب من عالم خارجي فضاءات من الهوي.

Quote: أقدارنا كانت هى المصير

فعلا رحلة قدر لابد تصير أمتعتني حد الدهشة هند ماأروعه من نص بدأ في الأرض وغاص في البحر وحلَق بنا في فضاءات من الجمال.

،،،،أبوقصى،،،،

سعيدة باعجابك ابوقصى ..

اشكر لطفك ومروك وتعليقك وعذب الحضور ..

كل الود وشكراً جميلاً ..

هند ..

أراك تزينين القصيده
بمعيار يفيض عن المتاح




فكان نظمك كالعاده متماسكاً بهياً
بما فيه من مسحة الحزن

داش ياداش ياسيد القوافى ..

شهادة اعتز بها من شاعر قامة مثلك ..

أشكر لطفك وعذب الحضور والدعم المعنوى ..

كل الود ..كن بخير ..

بستأذنك وأدخل عليك ...

من باب غناي وسكتك ...

أبداك بي نغم الكلام أتحسسك

لو تاورك إحساسي بيك ولامسك

تلقيني في ومضة هواي ...

واقف عليك وبنـــدهـك ...


الغالية / هند

ما أجملك ...


... فيض مــــــــــــــــودتي ...

ياروعتك وروعة حروفك ومداخلتك شاعرنا ابووجيدة ..

الجمال فى احساسك ونصوصك الآنيقة ..

أشكر لطفك وعذب الحضور ..

شكراً جميلاً ..

Quote: قدرك غمامة توصلك فوق للسحاب ترحل تسيبك وتهجرك وتسقط آمالك سراب ..!

اشعر بالصدق دوما في قصيدتك
فالي الامام دوما

رشيقة الحرف .. هند

شرقانة بيك ... شرقانة فى حلقى الحروف
مأخوذة بيك .. طوفان حنين
شايلك فى دربي الحنين
سايبة وراي حصاد درب
كان مشتهيك!.
ويتمنى فيك
وعداً أمين ..



وصال عالم

كعهدى بك ..أنيقة ..متفردة وعذبة الحضور ..

العزيزة وصال أشكر لطفك وحروفك الجميلة ..

كل الود والتقدير لشخصك ومرورك العذب ..

شكراً بحر ..

استاذى رب الفن القامة الموصلى ..

لى شرف حضورك الآنيق ووجودك هنا بين احرفى ..

مميز هذا الحرف الذى كتبته انا فقد منحنى شرف هذه الاطلالة الكريمة ..

أشكر لطفك والحضور الدهشة ..

شكراً جميلاً ..

الأديبةُ / هندٌ مُحمَّد ..

كتابةٌ تُعَدُّ في اعتقادي أُمثولةً وعِبْرَةً

راقيةً وجميلةً لكلِّ القُلوبْ .

وفي تقديري هيَ أقربُ لتيارِ الشُّعورِ وحديثِ

النَّفْسِ للنَّفْسِ أو " المونولوج " الدَّاخلي ،

ولوْ تَفَحَّصْنا القلبَ بالنَّصِّ لوجدْناهُ حيويَّاً

وملموساً ويقومُ بوظائف فعَّالةٍ بينَ

عِلاقاتِ النَّصِّ الماطرِ بَهَاءً

وروْعة ..

واعْذُريني إنْ لمْ تَقْوَى حُرُوفيَ على

استدراجِ إجابةٍ لسُؤالِ نصِّكِ

كعادةِ الأمَلِ الجريحِ فينا ،

لكنَّا نعيشُ ويَحْدُونا الرَّجاءُ

دَوْمَا ..

فَشُكْرَاً لكِ ولمراعي نصَّكِ

المُمْرِعةِ الخصْبِ

والنَّماءْ ..



احترامٌ شاهِقٌ جدَّا ..






أخوك / محمَّد زين ...

أنيق الحرف محمد زين ..

الشكر لك انت عزيزى على هذا المرور المعبر واللغوى والعذب جدا ..

تقديرى للكلمات الدعم .. بحق مساندة ..

شكراً جميلاً ..