Post: #1
Title: حصل شاغلتك بت ؟ احكي قصتك !!
Author: hamid brgo
Date: 01-28-2008, 04:50 AM
Parent: #0
بصراحة العنوان سخيف و كذا المحتوى بس انا مليت الداافوري .. فعليكم الله القوا لي العذر
قبل كم سنة كده ودوني مقطور للاحفاد ( جمهورية الجندر شبه الديمقراطية) عشان في واحدة اختنا حتتخارج من الجامعة... طبعا لاول مرة ادخل الاحفاد بس شماراتها عندي و قابلت خريجاتا. و ده بخلاف المعانا في البيت.
قلتا ليكم مقطور .. يعني بالعربي كده مع المدام.... المدام حد زاتا ما خريجة الاحفاد بس جينات الجندر فيها لا تخفى على العين ( في ذمتكم في سودانية ما جندرية لو ما ضيق البلد و العصاية ال تحت السرج)؟
و كان الوكت حوالي قبل المغرب بحاجة بسيطة. اول ما دخلنا ( و البنات شمال و يمين الممر البودي لمكتب المدير) بس سمعت ليك صفارة تيييت و كلمة يا جكس . التفت شمال و يمين ما شايف ولد ... عرفت انه مصدر الصوت من البنات ... صحيح حصل صفرنا و انجلدنا و تبنا ( اظرف حاجة انك تشاغل واحدة اكبر منك و تجلدك... لا تقدر تاخد حقك و لا تقدر تكلم اهلك)... بس الا يصفروا لينا دي جديدة على الواحد.
و المدام مثبتة لي كاميرات في كل الاتجهات ... يعني الواحد ما يقدر يرد التحية باجمل منها... كاميرات في الشارع و حتى في السيارة.. ( الواحد يمسك الدركسون و يعاين قدامو بالقدر ال يحميو من عربات الوساخة حقت المتعافي).
و واصلوا ليك معاي يا انتا ... يا الما عارف ليك . المهم الحاجات القالوها ما اظن في شئ فيني .. غير - الاسود الطويل - حولوهو لي ( الخضار(الخدار) ده و القامة دي)
طبعا اخوكم لاول و اخر مرة يشاغلو... معنوياتو في السماء .. بس مخليها في نفسو.
وكت انتبهت لقيت كاميرات المراقبة ما خلت لي صورة ... شايفين الورطة؟
كشرت ليك وشي كدا و قلت ياخي في بنات خالص ما مؤدبات
طبعا المسكينة صدقت ..... و اتخارجت
ــــــــــــــــــــــــــــــــــــــــــــــــــــ
*بعد حوالي شهر من تاريخ ذلك اليوم علمت من احدي باحثاث الجامعة
ان الطالبات لم يفعلن لسؤ الادب انما لاختبار الفهم الرجولي الذي في اذهان بعض السودانيين- الفهم الذي يبيح لنفسه و يرفض من الجنس الاخر ... نعم كان هذا هو السبب
* شكرا لجامعة الاحفاد معقل المعرفة
|
Post: #2
Title: Re: حصل شاغلتك بت ؟ احكي قصتك !!
Author: hamid brgo
Date: 01-28-2008, 05:18 AM
Parent: #1
لا اتذكر لمن من الزملاء لكن هنالك بوست يتحدث عن فتاة تم القبض عليها و هي في حالة سكر و تقود سيارة
الخمر لمؤمني الديانة الاسلامية من الكبائر و يجب يعامل هكذا بصرف النظر عن الشارب ... رجل او فتاة
و لكن الفهم الرجولي يحل على نفسه و يحرم على الاخر
|
Post: #3
Title: Re: حصل شاغلتك بت ؟ احكي قصتك !!
Author: Tragie Mustafa
Date: 01-28-2008, 05:32 AM
Parent: #2
يا لذيذ يا رايق
د.حامد برقو...في الاحفاد الجامعيه
وقلت لي المعنويات بقت في السماء كثر خيرهم بنات الاحفاد
برجع لكم لاحقا لما نشوف باقي قصص الرفاق.
|
Post: #7
Title: Re: حصل شاغلتك بت ؟ احكي قصتك !!
Author: hamid brgo
Date: 01-28-2008, 08:22 AM
Parent: #3
تراجي
| Quote: وقلت لي المعنويات بقت في السماء كتر خيرهم بنات الاحفاد |
العزيزة تراجي
حقا كتر خير بنات الاحفاد فهم و معرفة محل ما تلاقيم يعلموك او يفهموك حاجة
_____________________________________________________________
يفهموك حاجة: يهرشوك ,,, دي في حالة ما عايز تتعلم منهن ما يفيدك
|
Post: #4
Title: Re: حصل شاغلتك بت ؟ احكي قصتك !!
Author: خالد الطيب أحمد
Date: 01-28-2008, 05:45 AM
Parent: #1
حامد... سلام وتشكر علي البوست ..
أهديك نكتة 2008
عريس مفلس في شهر العسل في فندق .... بالخرطوم, فاجأه ليك مسؤول الفندق بفاتورة تقيلة جدا لما جاء يغادر هو وعروسه الفندق.. وما عندو ليها أي قدرة ..!
العريس: ال200 جنيه دي بتاعة شنو؟
المسؤول: دي رسوم التلفون
العريس : لكن والله نحنا ما إستخدمنا التلفون ده وللا مرة!!
المسؤول: كان ممكن تستخدموه!
العريس: طيب ال150 جنيه التانية دي بتاعة شنو؟؟
المسؤول: دي رسوم القناة الفضائية والتلفزيون
العريس : وحات الله نحنا تلفزيونكم ده ما حصل فتحناهو!!
المسؤول: كان ممكن تفتحوهو وتتفرجو وتستمتعو بالبرامج !!
......وبالطريقة دي.....
قام العريس سكت مده وقال للمسوؤل:
أخصم 300 جنيه حقت مشاغلتك لي زوجتي كل يوم..
المسوؤل:وحات الله ما شاغلتها..حتي أسألها!!
العريس ببساطة: كان ممكن تشاغلها!
(جميع الحقوق محفوظة)
ـــــــــــــــــــــــــــــــــــــــــــ
Quote: بعد حوالي شهر من تاريخ ذلك اليوم علمت من احدي باحثاث الجامعة
ان الطالبات لم يفعلن لسؤ الادب انما لاختبار الفهم الرجولي الذي في اذهان بعض السودانيين- الفهم الذي يبيح لنفسه و يرفض من الجنس الاخر ... نعم كان هذا هو السبب |
يعني كميرا خفية...!
بحث جميل ..
التحية لأسرة جامعة الأحفاد..
وليك وللأسرة كمان يا حامد..
|
Post: #8
Title: Re: حصل شاغلتك بت ؟ احكي قصتك !!
Author: hamid brgo
Date: 01-28-2008, 08:34 AM
Parent: #4
Quote: قام العريس سكت مده وقال للمسوؤل:
أخصم 300 جنيه حقت مشاغلتك لي زوجتي كل يوم..
المسوؤل:وحات الله ما شاغلتها..حتي أسألها!!
العريس ببساطة: كان ممكن تشاغلها! |
خالد جبيبنا
بجد لذيذة !!
بعدين بركة انك قلتا جميع الحقوق محفوظة عشان ما يجيك واحد زي ابوبكر وزيري و يلطشا منك
شكرا على التحايا
زدنا...!!
|
Post: #5
Title: Re: حصل شاغلتك بت ؟ احكي قصتك !!
Author: عثمان دغيس
Date: 01-28-2008, 06:08 AM
Parent: #1
بوست عجيب لكن ...!
طبعاً نحن من قبيلة الموسيقيين وبتاعين العدادات والحفلات ...
وبعدين وكت الزمن زين وكنا وجيهين كده ..
وزمن الحفلات كانت تقام بفرقة كااااااملة ومحترمة ...
والمسرح بيكون عالي وكاشف اللعب كلو ..
وطبعاً موقع العازفين أكثر موقع إستراتيجي في الحفلة لأنو في السنتر وعالي ...
يعني كاشف أي بت شديده في الحفلة ...
وكان عندي ملاحظة إنو أي واحده الواحد يبدأ يشاغلها بيكون عندي إحساس إنها فاهمة إنها الوحيده الفي الخط ...
وفي الحقيقة الواحد بيكون مدور مع سبعة ثمانية كده حسب نضافة الجكس ...
لكن حكاية يشاغلونا دي ( الزمن داك ) ...كتييييييييييييييرة .. وعادية جداً ..
إستغفرتك يا مالك روحي ..
|
Post: #6
Title: Re: حصل شاغلتك بت ؟ احكي قصتك !!
Author: الزوول
Date: 01-28-2008, 06:48 AM
السلام عليكم
يا حامد
ما تزعل مني
أول انطباع الواحد بيأخدوا من صورة بروفايل العضو
وكوند زولتك دي ليست من المفضلات لدي
ولا كل الصقور الذين اختارهم الرب المكافحة "الأرهاب"
وتابعتك كثير في معظم كتاباتك
وكل يوم اكتشف انك أروع من اليوم القبله
وفي كل الإتجاهات البيتطرق ليها
معزتي
تخريمة :
دي بمثابة حجز لمساحة في بوستك الظريف
لغاية ما أجيك راجع
|
Post: #11
Title: Re: حصل شاغلتك بت ؟ احكي قصتك !!
Author: hamid brgo
Date: 01-28-2008, 09:38 AM
Parent: #6
موافق !! بس ما تسألني من مرتبي كم او تتكلم في صورة بروفايلي
Quote: أول انطباع الواحد بيأخدوا من صورة بروفايل العضو
وكوند زولتك دي ليست من المفضلات لدي
ولا كل الصقور الذين اختارهم الرب المكافحة "الأرهاب" |
خلاص عشان الصقور ال ذكرتم ديل بغير الصورة و بخت بدلا صورة كارلا دا بونتي ( المحققة السابقة لجرائم الصرب في يوغسلافيا السابقة)
الليييييييييييلة
كمان جابت ليها محققين و الجزاء الدولية و عمي اوكامبو واصل على طه ؟
Quote: وتابعتك كثير في معظم كتاباتك
وكل يوم اكتشف انك أروع من اليوم القبله
وفي كل الإتجاهات البيتطرق ليها |
يا وليد والله ده خجلتني خجل السلك الدبلوماسي العربي و الافريقي بانقرة من تصرف السكرتير الصحفي لرئيس الجمهورية
انا بعتز اكتر ... و اكتر
Quote: تخريمة :
دي بمثابة حجز لمساحة في بوستك الظريف
لغاية ما أجيك راجع
|
يمين عشان كلامك الفوق داك ممكن اتنازل ليك من البوست ... زي ما دكتور سيجيمان جرى ( عفوا اتنازل) خلي لي بوستو ( قومو بلا دارفور بلا قرف)
عزيزي الزول
يا مرحبا .. و بكل حب
|
Post: #9
Title: Re: حصل شاغلتك بت ؟ احكي قصتك !!
Author: hamid brgo
Date: 01-28-2008, 08:58 AM
Quote: بوست عجيب لكن ...!
طبعاً نحن من قبيلة الموسيقيين وبتاعين العدادات والحفلات ...
وبعدين وكت الزمن زين وكنا وجيهين كده ..
وزمن الحفلات كانت تقام بفرقة كااااااملة ومحترمة ...
والمسرح بيكون عالي وكاشف اللعب كلو ..
وطبعاً موقع العازفين أكثر موقع إستراتيجي في الحفلة لأنو في السنتر وعالي ...
يعني كاشف أي بت شديده في الحفلة ...
وكان عندي ملاحظة إنو أي واحده الواحد يبدأ يشاغلها بيكون عندي إحساس إنها فاهمة إنها الوحيده الفي الخط ...
وفي الحقيقة الواحد بيكون مدور مع سبعة ثمانية كده حسب نضافة الجكس ...
لكن حكاية يشاغلونا دي ( الزمن داك ) ...كتييييييييييييييرة .. وعادية جداً .. |
العزيز : دغيس
سلامات و احترامات
هو انت تتكلم في غرابة البوست و لا في المصيبة ال سويتها في روحي و دمرت بيها اسهمي في المنبر.
عليك الله يا عثمان زول بكامل قوتو العقلية( و نيابة عن شخصيتو الاعتبارية) يعلن انو هو متزوج وفي منبر نضيييييف زي ده
دي الحركات ال بتخلينا ما نبدأ الحركات الا بعد 50 سنة من الحركة ال ختت الناس البهلوانيين في القصر المتحرك و يسو في حركاتم ديك (بسم الله الرحمن الرحيم انا قاعد اقول في شنو) ؟
|
Post: #10
Title: Re: حصل شاغلتك بت ؟ احكي قصتك !!
Author: hamid brgo
Date: 01-28-2008, 09:00 AM
Quote: بوست عجيب لكن ...!
طبعاً نحن من قبيلة الموسيقيين وبتاعين العدادات والحفلات ...
وبعدين وكت الزمن زين وكنا وجيهين كده ..
وزمن الحفلات كانت تقام بفرقة كااااااملة ومحترمة ...
والمسرح بيكون عالي وكاشف اللعب كلو ..
وطبعاً موقع العازفين أكثر موقع إستراتيجي في الحفلة لأنو في السنتر وعالي ...
يعني كاشف أي بت شديده في الحفلة ...
وكان عندي ملاحظة إنو أي واحده الواحد يبدأ يشاغلها بيكون عندي إحساس إنها فاهمة إنها الوحيده الفي الخط ...
وفي الحقيقة الواحد بيكون مدور مع سبعة ثمانية كده حسب نضافة الجكس ...
لكن حكاية يشاغلونا دي ( الزمن داك ) ...كتييييييييييييييرة .. وعادية جداً .. |
العزيز : دغيس
سلامات و احترامات
هو انت تتكلم في غرابة البوست و لا في المصيبة ال سويتها في روحي و دمرت بيها اسهمي في المنبر.
عليك الله يا عثمان زول بكامل قوتو العقلية( و نيابة عن شخصيتو الاعتبارية) يعلن انو هو متزوج وفي منبر نضيييييف زي ده
دي الحركات ال بتخلينا ما نبدأ الحركات الا بعد 50 سنة من الحركة ال ختت الناس البهلوانيين في القصر المتحرك و يسو في حركاتم ديك (بسم الله الرحمن الرحيم انا قاعد اقول في شنو) ؟
|
Post: #12
Title: Re: حصل شاغلتك بت ؟ احكي قصتك !!
Author: hamid brgo
Date: 01-28-2008, 02:42 PM
| Quote: وطبعاً موقع العازفين أكثر موقع إستراتيجي في الحفلة لأنو في السنتر وعالي ... |
لكن ما لقيتك زميل و بخبرة اجنبية
|
Post: #13
Title: Re: حصل شاغلتك بت ؟ احكي قصتك !!
Author: عصام دهب
Date: 01-28-2008, 02:48 PM
Parent: #12
تحياتي يا دكتور ..
| Quote: واصلوا ليك معاي يا انتا ... يا الما عارف ليك . المهم الحاجات القالوها ما اظن في شئ فيني .. |
طيب ما في واحدة ( كنتكت ) ليك ؟؟
|
Post: #14
Title: Re: حصل شاغلتك بت ؟ احكي قصتك !!
Author: عبده عبدا لحميد جاد الله
Date: 01-28-2008, 05:13 PM
Parent: #13
دكتور حامد
تحية طيبة
شكراً على السرد الرائع
ذكرتنا ايام داخلية بنياتنا بالعرضة
تحياتي
|
Post: #18
Title: Re: حصل شاغلتك بت ؟ احكي قصتك !!
Author: hamid brgo
Date: 01-29-2008, 02:26 AM
Parent: #14
| Quote: ذكرتنا ايام داخلية بنياتنا بال.... |
اعتبرني صدقتك ...!!
قال ذكرتنا...! انتو متين الحاجات دي طلعت من بالكم عشان يذكر ليها حامد ال الانصار سنه
العزيز جاد الله
كل الود
|
Post: #17
Title: Re: حصل شاغلتك بت ؟ احكي قصتك !!
Author: hamid brgo
Date: 01-29-2008, 02:18 AM
Parent: #13
| Quote: طيب ما في واحدة ( كنتكت ) ليك ؟؟ |
عصام عزيزنا
احتمال كنتكوا لي و احتمال نور طويل ... لكن مع كاميرات المراقبة ديك اشوفا كيف ؟
|
Post: #20
Title: Re: حصل شاغلتك بت ؟ احكي قصتك !!
Author: الزوول
Date: 01-29-2008, 02:43 AM
Parent: #17
السلام عليكم
أخونا حامد
يا خوي ما ملاحظ ولا واحد حكى؟؟
يا ربي مافي آلان ديلون سوداني؟
والمصيبة حتى حامد برقو الكنا معتمدين عليهو ، يطلع لينا Test ساي
غايتو أظن لو حولت عنوان البوست ل
حصل شاغلت بت ؟ احكي قصتك !!
حا يجوك الجماعة يفضفضوا
.............................
وما الناس إلا هالك وأبن هالك *** وذو نسب في الهالكين عريق
|
Post: #23
Title: Re: حصل شاغلتك بت ؟ احكي قصتك !!
Author: hamid brgo
Date: 01-29-2008, 03:12 AM
Parent: #20
Quote: غايتو أظن لو حولت عنوان البوست ل
حصل شاغلت بت ؟ احكي قصتك !!
حا يجوك الجماعة يفضفضوا |
ما اظن ......!!
لاني قلت قصة واحدة و في الاتجاه المعاكس لكن في ناس ... الحركة دي جزء من حياتهم اليومية .. يعني انتا عايز الناس يحكوا قصص حياتم في المساحة الضيقةدي
يا الزوول مرحبا( و مكانك شاغر)
|
Post: #15
Title: Re: حصل شاغلتك بت ؟ احكي قصتك !!
Author: الصادق ضرار
Date: 01-28-2008, 06:55 PM
Parent: #1
Quote: هو انت تتكلم في غرابة البوست و لا في المصيبة ال سويتها في روحي و دمرت بيها اسهمي في المنبر.
عليك الله يا عثمان زول بكامل قوتو العقلية( و نيابة عن شخصيتو الاعتبارية) يعلن انو هو متزوج وفي منبر نضيييييف زي ده |
اخي حامد
شكلك ما مواكب يا مان . اسهمك يدوب ارتفعت يوم قلت مشيت مع المدام . عليك الله سمعت عزابه بغنوا ليهم في الزمن دا ؟!! كم اغنية نزلت خلال العام تمجد امثالك و منها راجل مرأة شنو كدا ما عارف .
ارتع ذي ما داير شنو البيساويك بالامفكو و دا كلام النايرات خدودهن ما كلامي .
|
Post: #19
Title: Re: حصل شاغلتك بت ؟ احكي قصتك !!
Author: hamid brgo
Date: 01-29-2008, 02:36 AM
Parent: #15
Quote: شكلك ما مواكب يا مان . اسهمك يدوب ارتفعت يوم قلت مشيت مع المدام . عليك الله سمعت عزابه بغنوا ليهم في الزمن دا ؟!! كم اغنية نزلت خلال العام تمجد امثالك و منها راجل مرأة شنو كدا ما عارف .
ارتع ذي ما داير شنو البيساويك بالامفكو و دا كلام النايرات خدودهن ما كلامي |
.
كدى خليك من اسهمي.. يا زول انا ما خالك ؟ طيب جابك شنو في محل خلانك يشاغلوا و يشاغلوم
لكن ما طمأنتني ... الله يطمئنك بخبر القبض على عبدالرحيم محمد حسين... قول آمين
ضرار ابننا و اخي شكرا على الطلة
|
Post: #16
Title: دموع
Author: العبيد الطيب عبدالقادر
Date: 01-28-2008, 07:32 PM
Parent: #1
مرة كنت راكب حافلة خط داخلي في الخرطوم
وفجاءة جلست بجواري فتاة في عمر طالبات الجامعات
وبعد مدة ودون مقدمات نظرة الي وقدمت لي حلوة
ولكن دون اشعر رفضت ذلك وقلت لها شكرا
والمفاجاة انها اجهشت بالبكاء دون ان تظهر صوتا
ولكن رايت ذلك عبر الدموع التي سالت من عينيها
|
Post: #21
Title: Re: دموع
Author: hamid brgo
Date: 01-29-2008, 03:01 AM
Parent: #16
Quote: مرة كنت راكب حافلة خط داخلي في الخرطوم
وفجاءة جلست بجواري فتاة في عمر طالبات الجامعات |
شكلك شماعتك قوية بقصد لافتتك نضيفة.. يعني بالعربي الفصيح كده بتجيب العصافير (( يا جماعة الواحد فينا بجد ادب بقرش ما عندو)))
Quote: وبعد مدة ودون مقدمات نظرة الي وقدمت لي حلوة
ولكن دون اشعر رفضت ذلك وقلت لها شكرا |
يخخخخخ.... شوفتوا الجلافة و عدم تقدير المشاعر الانسانية المرحلة بالحافلات
Quote: والمفاجاة انها اجهشت بالبكاء دون ان تظهر صوتا
ولكن رايت ذلك عبر الدموع التي سالت من عينيها |
جهاد نصر شهادة
شوف ..! دي واحدة من الحاجات التلاتة الواحد خالص ما بتحملا
اها و انتا سويت شنو لما شوفتا الدرر تتاقطر ؟ كبيت تراب في راسك و صرخت و لا صرخت بدون تراب ؟ اوعك تقول لي ما رميت نفسك من الحافلة؟ ده في حالة ما كنتوا فوق الكبري
الفاضل العبيد الطيب
كل الود
|
Post: #22
Title: Re: دموع
Author: Tragie Mustafa
Date: 01-29-2008, 03:09 AM
Parent: #21
العزيز دحامد برقو
والله حسه كنت بتذكر فيك عارف ليه؟؟؟؟
لاني شفت كونداليزا رايس
وحياتك اليوم (بوش )عند خطاب تاريخي
وكوندي متألقه بتايير بيجي خرافي
فتذكرتك اول ما طلت على راس وزراء حكومة بوش.
يازول بوش الاهبل ده حسه الصفقه مستمرؤة ليها 5 دقائق من دخل القاعة
الجمهوريرين بيغشوا في نفسهم..وهيلاري كان شفتها يا حامد لابسة احمر زي
ست الظاز........واوباما متألق كعادته.
|
Post: #24
Title: حصل شاغلتك بت؟
Author: hamid brgo
Date: 01-29-2008, 04:04 AM
Parent: #22
Quote: العزيز دحامد برقو
والله حسه كنت بتذكر فيك عارف ليه؟؟؟؟
لاني شفت كونداليزا رايس |
في ذمتكم دي ما محاولة جادة و مقصودة ... يعني مع سبق الاصرار و الترصد لنسف استقراري العائلي و السلم و الامن العالميين؟؟
الحبيبة تراجي:
شكرا باستمرار
نعم ليذهب الجمهوريون لانهم غير جادين في ايقاف معاناة السودان . و اتضح لي ذلك بعد الخلاف الذي حدث بين الانقاذ و الحركة الشعبية . الجمهوريون( رغم امتنانا و شكرنا البالغ) يريدون الابقاء على هذا النظام . لماذا لا ندري ..
يظن المغفلون و بالعقلية الغارقة في المحلية ان سقوط اوباما او فوزه سيغير من سياسة الحزب الديمقراطي تجاه نظام الانقاذ ... هذا غير صحيح .
فليأتي ايا من هؤلاء فهو مرحب به.... و مرعب للمجرمين
قلنا بوست مشاغلات مش مشاكل هاهاها
|
Post: #25
Title: Re: حصل شاغلتك بت؟
Author: hamid brgo
Date: 01-29-2008, 04:16 AM
Parent: #24
Quote: وكوندي متألقه بتايير بيجي خرافي
فتذكرتك اول ما طلت على راس وزراء حكومة بوش. |
بس ما تنسي الصور........ بال دي اتش ال
|
Post: #26
Title: Re: حصل شاغلتك بت؟
Author: عبده عبدا لحميد جاد الله
Date: 01-29-2008, 08:42 AM
Parent: #25
Quote: اعتبرني صدقتك ...!!
قال ذكرتنا...! انتو متين الحاجات دي طلعت من بالكم عشان يذكر ليها حامد ال الانصار سنه |
يا دكتور والله كلامك صاح، لو لا حاجات تانية كان الواحد" كسر ركبة"(راجعبوست وليد بتاع لغة قاع المدينة)
تحياتي يا حبيب
|
Post: #32
Title: Re: دموع
Author: العبيد الطيب عبدالقادر
Date: 02-23-2008, 10:57 PM
Parent: #21
يا ود برقو
انا مش ما عندي احساس
انا زول بقيت ابو وليدات
تقوم البنية دي تكون عاملة ليه كجور او كاتبه فيها عندي فكي نجيض
وتسرقني من ام الوليدات يبقي في البحلنا
بنات الزمن اجر منهن ساي
وما تعاين ليهن
بيجيبن خبرك في دقائق
|
Post: #34
Title: Re: دموع
Author: hamid brgo
Date: 02-24-2008, 05:12 AM
Parent: #32
| Quote: انا مش ما عندي احساس |
العبيد عزيزنا انتا عندك احساس و حبتين ... بس قصدي في الموقف الانساني -الاممي- الاقليمي - يعني الوطني المحلي بقصد الشخصي((حيييي من الانسانية و اخواتا المستهلكات))
| Quote: انا زول بقيت ابو وليدات |
صولتك مقبولة... بقصد مكنتك جديدة بس من صنف عايز اقرأ ... بعد ما كان عايزة اقرأ
Quote: تقوم البنية دي تكون عاملة ليه كجور او كاتبه فيها عندي فكي نجيض
وتسرقني من ام الوليدات يبقي في البحلنا |
ما فش مفر من الكجور ... بس المهم نوع الفكي ... يعني لو الفكي من النوع الخاتينو في هلتون عشان يوقف القوات الدولية - حيجيب خبرك لو كنت في الزحل
احي ابوعركي و ناس واشنطن
| Quote: بنات الزمن اجر منهن ساي |
في اي اتجاه ؟ لانو محل ما تمشي تلقاهن قدامك و سمحاااات
Quote: وما تعاين ليهن
بيجيبن خبرك في دقائق |
لا حولااا انتا بجد محتاج لي مراجعة كهرباء - يعني رسبونس(response )بتاعك تعبان : دقيقة كاملة و كمان دقائق؟
اجري للكهربجي
قال عندي احساس قال
العبيد الطيب حبيبنا شكرا على الاضافة الجميلة
|
Post: #27
Title: Re: حصل شاغلتك بت ؟ احكي قصتك !!
Author: singawi
Date: 01-29-2008, 09:40 AM
Parent: #1
سيد البيت سلام
في ذات يوم من أيام المرحلة الثانوية والدينا عصيييير داخلة على مغيرب ، وأنا أمشي الهوينى والدنيا خلا والشارع مافيهو نفاخ النار لا وراي ولا قدامي مخلوق ، كنت سااااارح في سعادة وقلبي رضيان بي نصييييبو ... فجججججججأة أسمع ليييك ..أحيييييي أنا .. الطلبة الجننووووني . اتخلعت جنس خلعة في الدنيا دي .. عاينت وراي مافي زول .. رجعت قدام برضو مافي .. اتلفت يمين لقيتن ليك تلاتة بنات بتاوقن من فوق الحيطة . بدون ما أشعر قلت للخاطبتني وأنا لسة مخلوع ( عرفتها من نظراتها ) الله الجن التعزلي عزل . انفقعن التلاتة بالضحك لامن وقعن بي جوة . وانشرطت أنا بالضحك بي برة . ورجعن تاني اتشعبطن وتم السلام والكلام والوداع .
|
Post: #28
Title: Re: حصل شاغلتك بت ؟ احكي قصتك !!
Author: Abureesh
Date: 01-29-2008, 10:25 AM
Parent: #27
تذكرت نكتـة أمريكيـة بحتـة..
جاء أحدهـم الى مقهى ليلى، وجلس وحيـداً، ولا حظ بعـد فتـرة أن هناك أمرأة تجلس
وحيـدة على الطرف الأخـر، وبعـد شـويـة صراع مع نفسـه تشــجع وأقترب منهـا، وسألها
إن كان يمكن أن يرقصـا سـويـاً.. فهاجت المرأة وبصـوت عالى: تقول لى أذهب معك
الى شقتك؟ أيهـا النذل، أذهب الى الشـارع فإنه ملئ بمثل من تبحث عنهـا.. فخجل
الرجل وعاد الى مقعـده..
وبعـد دقائق جاءتـه المرأة، وبصـوت خافت ومؤدب أعتذرت له، وقالت له أنها باحثة
إجتماعيـة، وأنهـا تدرس أثر الصـد العنيف والغيـر عادل، عند الرجال..
فقام الرجل وقال لهـا بصـوت عالى سمعـه كل من فى النادى: لا! مائة دولار كثيرة جداً.
|
Post: #30
Title: Re: حصل شاغلتك بت ؟ احكي قصتك !!
Author: hamid brgo
Date: 01-31-2008, 05:08 AM
Parent: #28
| Quote: لا! مائة دولار كثيرة جداً. |
فهمنا باقي القصة بس الجزء الاخير ما واضح شديد 
الفاضل ابوريش شكرا على المساهمة اللطيفة
|
Post: #29
Title: Re: حصل شاغلتك بت ؟ احكي قصتك !!
Author: hamid brgo
Date: 01-31-2008, 05:01 AM
Parent: #27
| Quote: اتلفت يمين لقيتن ليك تلاتة بنات بتاوقن من فوق الحيطة |
باخي ده منظر جميل عدييل كده ده ( تقرأ بعربي جوبا)
singawiالعزيز شكرا على المرور
|
Post: #31
Title: Re: حصل شاغلتك بت ؟ احكي قصتك !!
Author: hamid brgo
Date: 01-31-2008, 05:16 AM
Parent: #29
الي الجميع مع الحب
و من غير تضخيم....... سأتغيب عن البوست و ان شئت قل المنبر لبعض الوقت لاسباب متعلقة بخبز اليوم و لا لشئ غيره.
اتمنا ان تكونوا بخير و عافية و حب
|
Post: #33
Title: Re: حصل شاغلتك بت ؟ احكي قصتك !!
Author: Elawad Eltayeb
Date: 02-24-2008, 00:18 AM
Parent: #31
زمان كنا في مدرسة محمد حسين بنطلع مارين جمب مدارس التقدم للبنات بأمدرمان.. كنا شلة ظريفة.. أنا كنت بكون في المقدمة، ولما ما نحصِّل بتاع التسالي بنشحد الطالبات يدونا تسالي.. وطبعاً من الخجل بيكونو آخر كرمً وبيدونا كمية من مهولة من التسالي.. يوم كده الشلة فاتتني وجيت ماشي براي اتدبا واقرا في الآيات يا رب البنات ديل ما يشوفوني.. وعينك ما تشوف إلاّ النور.. كمية من الطالبات زرزروني ليك (الليلة يعني ما عايز تسالي...) لحدي ما لصقت على الحيطة ربك رب الخير بت عمي كانت زميلتهم أدتم ليك فد نهرة وأنقذت ود عمها.
|
Post: #35
Title: Re: حصل شاغلتك بت ؟ احكي قصتك !!
Author: hamid brgo
Date: 02-24-2008, 05:27 AM
Parent: #33
| Quote: زمان كنا في مدرسة محمد حسين بنطلع مارين جمب مدارس التقدم للبنات بأمدرمان.. كنا شلة ظريفة.. أنا كنت بكون في المقدمة، ولما ما نحصِّل بتاع التسالي بنشحد الطالبات يدونا تسالي.. وطبعاً من الخجل بيكونو آخر كرمً وبيدونا كمية من مهولة من التسالي.. يوم كده الشلة فاتتني وجيت ماشي براي اتدبا واقرا في الآيات يا رب البنات ديل ما يشوفوني.. وعينك ما تشوف إلاّ النور.. كمية من الطالبات زرزروني ليك (الليلة يعني ما عايز تسالي...) لحدي ما لصقت على الحيطة ربك رب الخير بت عمي كانت زميلتهم أدتم ليك فد نهرة وأنقذت ود عمها. |
طيب ده ما انا زاااتو؟
بس الاختلاف في اسماء المدارس ... بعدين بصراحة كده ما لاقتني بت عمي لكن كنا بنشحد دندورمة(( يعني آيس كريم في اكياس) بلغة ناس الخرطوم و القرى المجاورة)
شكرا العوض
كتر خير بت العم تستر في كل الاحوال(( ما تجيني واحدة جندرية و تقول دي دعوة صريحة لزواج الاقارب و العقارب))
|
|