والليل نهار العاشقين...!!

[size=4]
السر الالهى لليل..؟؟
هل الهداه..؟؟
ام السكينة والسكون..؟؟
ام انه ستار ولباس..؟؟
ام انه ذلك الليل الذى غطى الجبال..؟؟؟
ام هو ليل العاشقين..؟؟؟
ام انه ليل التهجد والتعبد والارتقاء...؟؟

وتفاسير شروحات اسرار الليل فى الشعر العربى القديم وفى الشعر الحديث وفى مجريات الغناء.وفى سهر العاشقين..وفى سرحان الحب..وفى ليل الغربه..وفى ملامح الشجن والحنين..وفى ساقية الزمن فى طواف الارتحال..وسفر المصابيح النجوم..وضى القمر
كلها مضارب اقامت سكنها على ارض ذلك المدى البراح...
يا ليل ابقالى شاهد على نار شوقى وجنونى...

هى شكوى بشهود اثبات تكشف تفاصيل تلك الحاله التى اعترت الشاعر..وكسرت ثبات إرتكازه..وسرحت به...
دعونا نكشف ستار الليل..ونفضح مجونه..!!
هذه دعوه مفتوحه..
سيداتى..
وسادنى...
مرحبا بكم...[/size]

الليل
طوية هى مساءاته حين تكون حزينا
لكن الاغنية السودانية حاضرة
بقوتها الصارمة فى ضرب هذا الليل
بسياط من الوجد والوله
الليل الهادى
تعال يا ليل خليك معاى
يا ليل ابقالى شاهد على نار
ليلة السبت
ليالى العودة

ليلى ونهارى لى حيك بهاجر
ليل الشجن والشوق
قضينا ليلة ساهرة
تضمنت محاسن
الليلة ديك
والسمار فيه
السمار النجوم طول الليل ما بنوم
من نار لالا واذلالا
تعال ياليل وفوت يا نهار
دعوة صريحة لليل لذى يحبه

الشاغلين فؤادى
وما فيها من وجد
سامرت الكواكب لما الفجر لاح
منادى الفجر نادى وقال يا اهل الصلاح


والله الله لما الكحلاوى يتسلطن ويقول
ليل ليل ليل انا
تحس ان العالم ليس اجمل منه الا تلك اللحظة والكحلاوى يدير كاس الغناء
ويسقيك من دنان صوته
متعك الله بالصحة والعافية ايها الخال الجميل

عصمت ..

الليل لولاي .. هدهاد ..
العين فيهو ترتاح من التفاصيل المقزية المتندل بيها النهار و علاقات الضو و الضل ..
الأضان فيهو بتروق من زحمة الهوا بالأصوات , و تنضفا الصنة الكبيرة في الكون و خشوعو كأنو بيصلي ..
الحواس بتتمطى فيهو و تتمغى و تبدا في النم الإنساني المتأمل .. و الدوزنة البراااااحة .
الخلوق بتتعري في الليل من طبقات مكياج النهارات التخينة , و تقعد الله و رقبتا ..
الليل رفيق ما بيجيز ليك الكضب على ذاتك أو عليهو , و لا حتى التجمل و إعادة مكابدة كل المحاحاة لحاجاتك و إنت بتتعامل مع أبجدية يومية نهارية ملبكة و مشربكة , وضعها ليك مجتمعك و دمغك بيها زي دمغة الرعاوية مع البهايم ديك .. تششششش : ( مرحباً بك رأساً أخرى محنية من ضمن رؤوس القطيع ) .
يتهيأ لي في الليل بينسل البني آدم خيوط خيوط ..
مفرتقة بالمهلة من بعد ربّيط و عقد زحمة النهار ..
يفكفكك الليل و يفرتقك و يمسّد عضلات روحك , و يقوم يعيد غزلك من تاني ..
و يا ود ابن آدم .. يا إمّا نسج منك قماشة حداد سودا .. أو جدلك حريرة ..
و في الحالتين إنت الكسبان .. لأنو نسيجك إنساني .

الليل كائن صديق يا عصمت ..
و يستحملك زي ما إنت , بشناتك وللا حلاتك ..
بدون ما يديك محاضرة في ( ما يجب ) ..



فيا عصمت ..
يسعد مساك النور .

الرائعه بنت الاخت العزيز سلمى..

ما اروعك وانت تعيدين نسج ظلال الليل ببعض عيون الغناء السودانى التى تغنت وصدحت واستترت بسواد الليل البهيم...والليل فى مساره وكما نطق الحق العلى القدير انه لباسا...والنهار معاشا..حكمة خلق بديعه .... فالليل فى تفاسير سره غامض وملتحف.ومتدثر.وكتوم..ومستوحش..وفيه ومعه وبه اسرار واستار..ورؤى..!!
والليل مثله مثل البحر .وعمق البحر .وغوره سحيق ومدلهم وغامض...والليل فى كساء ظلاله تلك الهداه التى يضجع فيها الانسان ويغشاه النوم ويغطيه الليل بكثافة كل ذلك الظلام..

ومدارك الالهام فى مدارات الليل تلك الرفقه التى فى الفة تواصلها امتداد شجون تسرح بخيالات الفكره فى شتى الضروب...
والليل .ايه..والليل حكمه..والليل خلوة تهجد تسرى بالارواح فى علياء الارتقاء وهى تتجرد من كل مادية الاشياء..
العزيزه سلمى..
طوافك هنا اضفى ألقا على هذا البوست..ليتك تفتحين مغاليق بوابات ليالى العباسيه.فى انس سهرها الجميل فى ذلك الزمن الجميل..وذكريات الخال شيخ الدين
كل المحبه والاعزاز

تحياتي عصمت

الليل فيه مشارب شتي وعوالم متعدده
للعشاق هو انيسهم وحبيبهم ةشاهد علي وجدهم وشوقهم وولعهم
اما اهل الليل من الذاكرين فان السبح والذكر له شان اخر
وفرق الليل من النهار يضرب به المثل
فعندما يقال لك فرق الليل من النهار فقد انتهي الحديث
الليل دنيا لوحده وعالم لا ينتهي الا ليبتدي
وبالليل تطوي المسافات وتقرب بين كل بعيدين


وتحياتي