Post: #1
Title: والله يا مازدا دخلتنا في قزازة ..
Author: ود الباوقة
Date: 01-26-2008, 10:54 PM
Parent: #0
تشكيلة غير موفقه . لاعبون اكل الدهر عليهم وشرب وانت تصر على تواجدهم ضمن تشكيلة المنتخب اولهم هيثم وتانيهم العجب .
التغيير اثناء المبارة لم توفق فيه ..
هزيمتنا من زامبيا لم تؤثر علينا مثل هزيمتنا من الفراعنة التي جاءت بطعم الحنظل ونكهة الزغنبوت
سلمنا امرنا لله ...
ود الباوقة
|
Post: #2
Title: Re: والله يا مازدا دخلتنا في قزازة ..
Author: ود الباوقة
Date: 01-26-2008, 11:02 PM
Parent: #1
عندما كانت النتيجة 1/ صفر تصاعد الامل عندنا باحراز هدف التعادل ومن ثم مباغتة اولاد بمبا بهدف قاتل يشفي غليلنا فيهم ولكن يا فرحة ما تمت ...
ود الباوقة
|
Post: #3
Title: Re: والله يا مازدا دخلتنا في قزازة ..
Author: ود الباوقة
Date: 01-26-2008, 11:04 PM
Parent: #2
تخيلوا معي 27 مليون سوداني لقو نفسهم مدخلم مازدا في قزازة لا ايدم ولا كراعم ...
ود الباوقة
|
Post: #4
Title: Re: والله يا مازدا دخلتنا في قزازة ..
Author: amir jabir
Date: 01-26-2008, 11:05 PM
Parent: #2
Quote: هيثم وتانيهم العجب .
|
نقول شنوا بس يا ودالباوقة الحاجة الوحيد البتجمع كل اهل السودان يلم فيها ماذدا وشداد ويخربوا
الله يخرب بيتم
الفريق مافيهوا اى مشكلة عدى هيثم مصطفى والعجب وطمبل والاهبل رقم 11 ده منوا دا
كرنقوا دة مالوا بس
|
Post: #5
Title: Re: والله يا مازدا دخلتنا في قزازة ..
Author: ود الباوقة
Date: 01-26-2008, 11:08 PM
تعرف المشكلة وين يا امير ..
المشكلة تاني نقعد 32 سنة عشان نشارك وتاني نخرج من دور الاربعة .. دي كيف ؟؟..
ود الباوقة
|
Post: #6
Title: Re: والله يا مازدا دخلتنا في قزازة ..
Author: ود الباوقة
Date: 01-26-2008, 11:13 PM
Parent: #5
وبعدين اللاعبين في الوقت داك يكونوا ..
ود العجب .. وود كرنقو .. ودهيثم.. ولد ود دامر ..وعنتر بني شداد والمدرب يكون ودمازدا ...
ود الباوقة
|
Post: #7
Title: Re: والله يا مازدا دخلتنا في قزازة ..
Author: amir jabir
Date: 01-26-2008, 11:18 PM
Parent: #6
| Quote: المشكلة تاني نقعد 32 سنة عشان نشارك وتاني نخرج من دور الاربعة .. دي كيف |
لازم الناس ديل يطيرو المشكلة مافى اللعيبة المشكلة فى المدرب وفى الاتحاد العام لكرة القدم لازم يكون فى تدخل سريع من الدولة وسمعنا وشاهدنا كتير فى العالم تتدخل الحكومة فى كرة القدم بقرارة جمهورية ..
لازم الكلام دة يحصل فى السودان
وكفايا لعب باعصاب الناس
|
Post: #8
Title: Re: والله يا مازدا دخلتنا في قزازة ..
Author: amir jabir
Date: 01-26-2008, 11:19 PM
Parent: #6
| Quote: المشكلة تاني نقعد 32 سنة عشان نشارك وتاني نخرج من دور الاربعة .. دي كيف |
لازم الناس ديل يطيرو المشكلة مافى اللعيبة المشكلة فى المدرب وفى الاتحاد العام لكرة القدم لازم يكون فى تدخل سريع من الدولة وسمعنا وشاهدنا كتير فى العالم تتدخل الحكومة فى كرة القدم بقرارة جمهورية ..
لازم الكلام دة يحصل فى السودان
وكفايا لعب باعصاب الناس
|
Post: #9
Title: Re: والله يا مازدا دخلتنا في قزازة ..
Author: ود الباوقة
Date: 01-26-2008, 11:25 PM
Parent: #8
لازم الناس ديل يطيرو المشكلة مافى اللعيبة المشكلة فى المدرب وفى الاتحاد العام لكرة القدم لازم يكون فى تدخل سريع من الدولة وسمعنا وشاهدنا كتير فى العالم تتدخل الحكومة فى كرة القدم بقرارة جمهورية ..
اخي امير ..
المشكلة فعلا في التدريب وفي الاتحاد العام يعني مفروض على طول يتم حل الاتحاد العام والجهاز الفني والاداري للمنتخب والعواجيز من اللاعبين .....
يعني الكنكشة دي في المناصب لا متين يا مولاي ...
ود الباوقة
|
Post: #10
Title: Re: والله يا مازدا دخلتنا في قزازة ..
Author: ود الباوقة
Date: 01-26-2008, 11:31 PM
Parent: #9
طيب يا شداد ويا مجدي شمس الدين دايرين تكنكشوا في الاتحاد دا لا متين ..
ود الباوقة
|
Post: #11
Title: Re: والله يا مازدا دخلتنا في قزازة ..
Author: ود الباوقة
Date: 01-26-2008, 11:36 PM
Parent: #10
غايتو شداد دا يفكو من الاتحاد الشديد القوي ....
ود الباوقة
|
Post: #12
Title: Re: والله يا مازدا دخلتنا في قزازة ..
Author: ود الباوقة
Date: 01-26-2008, 11:44 PM
Parent: #11
ضباط الاتحاد التلاتة يا عديلة لي
ادونا من زامبيا التلاتة يا عديلة ..
ومن اولاد بمبا التلاتة يا عد....
وشداد حالف بالتلاتة يخلينا نمشي على البلاطة يا عديلة لي ..
الليلة مازدا سيروه وفرحت امه يا عديلة..
واللاعبين في بيتو اتلمو يا عد..
العجب وهيثم ركبو البابور يا عديلة ...
وكرنقو قال حالف يضبح تور يا عديلة ...
ونمشي لي مصر وزامبيا نزور ...
ود الباوقة
|
Post: #13
Title: Re: والله يا مازدا دخلتنا في قزازة ..
Author: Fadl Karrar
Date: 01-27-2008, 00:13 AM
Parent: #12
ود الباوقة قول بسم الله
لا قزازة ولا يحزنون
وما تدي الموضوع أكبر من حجمه
وتخلي الحزن يسيطر عليك
هي مباراة في الكورة ما أكتر
وأصلا الكورة غالب ومغلوب
وبنفس قدر الفرح بالنصر يجب تقبل الهزيمة
ومراجعة الأداء بدون إنفعال وبواقعية شديدة
مازدا يشكر أولا علي مجهوده
وكل افراد المنتخب
وما التوفيق إلا من عند الله
|
Post: #14
Title: Re: والله يا مازدا دخلتنا في قزازة ..
Author: عادل محجوب المكي
Date: 01-27-2008, 07:45 AM
Parent: #13
سلام محبة ومعزة
عندنا المواهب بالكوم والردوم وممكن نكون احسن ناس بتلعب كورة ولكن في ظل اناس مرضانين زي شداد هذا الكهل المخرف وطابيات الشطرنج (مجدي شمس الدين ومعتصم جعفر واسماعيل عطا المنان) انا لحدي الآن غير مصدق ان هذا الاسماعيل له علاقة بالكورة لاني اعرفه معرفة شخصية ..
يا حليل ايام منافسات الدورة المدرسية ، وجهاز اشبال الفرق ، والغاء المنافسات السنية وبعد كدا عاوزين الكورة تتطور . ولا وزيرنا الذي لا يعرف عن الكورة اي شئ اما عن الثقافة (محو امية) . كان الله في عوننا .
في الخرطوم تلاتة وجن ماشات تلاتة وفريقنا دائما مضروب بالتلاتة .
اصر اتحاد شداد وعصابته على ان يتولى مازدا امر الفريق (اكيد كان في قعدة) صحوبية عشان بكرة تتكتب في سيرة مازدا انه كان المدرب في نهائيات غانا 2008م .
الكورة علم ومدارس وفلوس وامكانيات عقلية والكورة بقت بتتشرح في السبورة قبل الميدان ، كيف عاوزننا نمشى لقدام ونحن بنشحد عشان نعمل معسكر وعشان نقطع تذاكر وعشان وعشان . على كل حال انا شايف 3/0 معقولة جداً .
ود المكي .
|
Post: #22
Title: Re: والله يا مازدا دخلتنا في قزازة ..
Author: ود الباوقة
Date: 01-27-2008, 10:10 AM
Parent: #14
ود اختي ود المحجوب ..
مجدي شمس الدين ومعتصم جعفر واسماعيل عطا المنان
ديل ما اصحاب الاقوان الثلاثة .. اللهم لا شماتة ....
| Quote: الكورة علم ومدارس وفلوس وامكانيات عقلية والكورة بقت بتتشرح في السبورة قبل الميدان ، كيف عاوزننا نمشى لقدام ونحن بنشحد عشان نعمل معسكر وعشان نقطع تذاكر وعشان وعشان . على كل حال انا شايف 3/0 معقولة جداً . |
فعلا تلاتة معقولة جدا عطفا على اداء الجهاز الفني والاشباح .. بس قول ان شاء الله تثبت على كدا
قول يا مثبت الاهداف ...
ود الباوقة
|
Post: #15
Title: Re: والله يا مازدا دخلتنا في قزازة ..
Author: Hisham Ibrahim
Date: 01-27-2008, 07:51 AM
Parent: #13
يا ود الباوقة
مازدا دخلنا في قزازة والإتحاد العام وشداد ووزارة الشباب والرياضة دخلونا ف.......... وزه!!!
ونحنا على طول حا نكون في الحتة دي طالما دا فهمنا للرياضة والمنافسات الدولية ووووووو&&&!
فهم كلو مخستك ومطرقش وما فيهو غير الدمار والفشل الذريع .....
وناس صدى الملاعب خاتين (( دي العربية تري ررري العربية))
هشام
|
Post: #23
Title: Re: والله يا مازدا دخلتنا في قزازة ..
Author: ود الباوقة
Date: 01-27-2008, 10:36 AM
Parent: #15
مازدا دخلنا في قزازة والإتحاد العام وشداد ووزارة الشباب والرياضة دخلونا ف.......... وزه!!!
خلاص نحنا يا هشام دخلنا دخلنا .. بس المطلوب ان يتقدم هؤلاء الثلاثة في الاتحـــاد العام مع التلاتة الفي التدريب باستقالاتهم فورا ..
بعدين اين كمال حامد؟؟
اين الرشيد بدوي عبيد؟؟
اين الرشيد المهدية ؟؟
اين كبشور كوكو ؟؟..
اين المكاشفي ...
اين القلع عبد الحفيظ
اين هؤلاء ....؟؟؟
|
Post: #21
Title: Re: والله يا مازدا دخلتنا في قزازة ..
Author: ود الباوقة
Date: 01-27-2008, 09:51 AM
Parent: #13
لا قزازة ولا يحزنون
وما تدي الموضوع أكبر من حجمه
ود كرار فعلا يجب الا نعطي الموضوع اكثر مما يستحق بعد الهزائم النكراء ..
وأصلا الكورة غالب ومغلوب
وبنفس قدر الفرح بالنصر يجب تقبل الهزيمة
ومراجعة الأداء بدون إنفعال وبواقعية شديدة
يا اخوي نحن مغلوبين على طول الخط . وباهداف كثيرة وبتخبطات فنية وادارية ..
وما التوفيق إلا من عند الله
ونعم بالله ... قضي الامر...
ود الباوقة
|
Post: #16
Title: Re: والله يا مازدا دخلتنا في قزازة ..
Author: طلحة عبدالله
Date: 01-27-2008, 08:18 AM
Parent: #1
اخونا ود الباوقة
سلام ليك
ياخوي براكم مدخلين نفسكم في قزازة لانكم بتفرطوا في الأحلام بدون ما تعملوا لتحقيقها كما انكم لا تنفعلون وتتفاعلون إلا مع النصف الفارغ من كوب الأحداث يدفعكم إلى ذلك عقلية تشجيعية وعصبية وإنتماءات ضيقة ..
لماذا لم تتحدثوا عن الطفرة التى شهدتها الكرة السودانية مؤخرا بتأهل المنتخب لاول مرة منذ 32 عاما لنهائيات الامم رغم عثرات الخطي وضيق ذات اليد ومحدودية الإمكانات ..؟ ولماذا لم تثنوا علي المدرب الذي تحدي كل هذه الصعاب وقاد المنتخب لتحقيق حلم أشبه بالمعجزة .. ؟
لماذا أصابكم الخرس والمنتخب السوداني يفرض نفسه ووجوده إفريقيا وعربيا وهو يتنقل من نصر إلى نصر ومن إنجاز إلى إنجاز ..؟
أليس هو مازدا نفسه من قاد المنتخب للفوز ببطولة سيكافا بعد غياب طويل .. ؟؟
أليس هو من تأهل مع المنتخب لنهائيات العرب ببيروت ...؟
اليس هو من حقق المعجزة بالتأهل إلى النهائيات الحلم بغانا ..؟
ان مدرب المنتخب الوطني الذي تزعمون أنه السبب لاغيره في إخفاق غانا هو نفسه السبب فقط لاغيره في تحقيق المنتخب لكل الإنتصارات السابقة والتى جعلت السودان موضع إهتمام النقاد والخبراء والفضائيات ووسائل الإعلام العالمية قاطبة ..
أكرر مازدا وشداد وحدهما هما من حقق كل الإنجازات السابقة ولهما كل الشكر والتقدير والإعجاب ..
|
Post: #17
Title: Re: والله يا مازدا دخلتنا في قزازة ..
Author: مجاهد عبد الرحمن
Date: 01-27-2008, 08:26 AM
Parent: #16
أخي ود الباوقة التحيات النواضر
والله ضجونا بالمنتخب والوطني
الأمر لله
لكن بيني وبينك القزازة أخير من الوزة
|
Post: #28
Title: Re: والله يا مازدا دخلتنا في قزازة ..
Author: ود الباوقة
Date: 01-27-2008, 11:12 PM
Parent: #17
والله ضجونا بالمنتخب والوطني
الأمر لله
ضبحونا ضبح غير اسلامي ... يعني حرجمونا وكدا .. ان شاء الله يحرجمم ربي ...
شكرا اخي مجاهد ..
ود الباوقة
|
Post: #25
Title: Re: والله يا مازدا دخلتنا في قزازة ..
Author: ود الباوقة
Date: 01-27-2008, 11:17 AM
Parent: #16
ان مدرب المنتخب الوطني الذي تزعمون أنه السبب لاغيره في إخفاق غانا هو نفسه السبب فقط لاغيره في تحقيق المنتخب لكل الإنتصارات السابقة والتى جعلت السودان موضع إهتمام النقاد والخبراء والفضائيات ووسائل الإعلام العالمية قاطبة ..
والله ياطلحة كلامك دا كلو ما دخل لي في راسي لي سبب واحد فقط ..
انتظرنا 32 سنة وبعدها شاركنا وتاهلنا لكن ما تقول لي الفايدة شنو .. يعني انجازاتــــــك الحسبتها دي كلها راحت شمار في مرقة ..
الامم تسير الى الامام يا اخي طلحة ..
ود الباوقة
|
Post: #18
Title: Re: والله يا مازدا دخلتنا في قزازة ..
Author: ديامي
Date: 01-27-2008, 08:43 AM
Parent: #1
تعرف يا ود الباوقة
حايجوك ناس شداد ومن لف لفو ويقولوا ليك نحنا ما شاركنا عشان نشيل الكاس
ومصر غلبتنا تلاتة بس ، وغلبت الكميرون أربعة يعني نحنا أحسن من الكميرون
وبكرة الكميرون تلصق لينا تلاتة
|
Post: #19
Title: Re: والله يا مازدا دخلتنا في قزازة ..
Author: ود الباوقة
Date: 01-27-2008, 09:40 AM
Parent: #18
كمان دا المعز ..
ثلاثة اهداف زامبية
وثلاثة اقوان مصراوية
وسته اهداف كمرونية
والمعز قال ديل شوية . حالف ما يدخلن على ....
الليلة العجب سيروووووووووووووووه
ود الباوقة
|
Post: #20
Title: Re: والله يا مازدا دخلتنا في قزازة ..
Author: ود الباوقة
Date: 01-27-2008, 09:44 AM
Parent: #19
وقلق حالف بي بت اعمو المنتخب الا يدعك ليهو خشمو ....
ود الباوقة
|
Post: #24
Title: Re: والله يا مازدا دخلتنا في قزازة ..
Author: ود الباوقة
Date: 01-27-2008, 11:05 AM
Parent: #20
أكد المحلل ولاعب الأهلي المصري السابق طاهر أبوزيد أن فارق الخبرة لعب دورا هاما في المباراة، واعترف أن مصر لم تقدم نصف مستواها في مباراتهاالسابقةأمام الكاميرون، وكان بإمكان المنتخب السوداني الخروج بنتيجة أفضل لولا تواضع مدربه، معلالا أن اللاعبين السودانيين لا ينقصهم أي شيء فقط مدرب متمكن يعرف يتعامل جيدا مع مثل هذه المباريات
|
Post: #29
Title: Re: والله يا مازدا دخلتنا في قزازة ..
Author: ود الباوقة
Date: 01-27-2008, 11:34 PM
Parent: #18
حايجوك ناس شداد ومن لف لفو ويقولوا ليك نحنا ما شاركنا عشان نشيل الكاس
ديامي
ديل شاركوا عشان يمرضو الـ 27 مليون مواطن ديل كاس شنو كمان ..
وبكرة الكميرون تلصق لينا تلاتة
ماهو الحمد لله الشغل كلو ثلاثة ..
ضباط الاتحاد العام تلاتة
الجهاز الفني تلاتة
الجهاز الاداري تلاتة
هزمتنا زامبيا تلاتة
مصر تلاتة
الكاميرون تلاتة + تلاتة
كرنقو .. قلق .. العجب ديل تلاتة ..
يعني من دقنو وتلتلو ..
ود الباوقة
|
Post: #26
Title: Re: والله يا مازدا دخلتنا في قزازة ..
Author: العوض المسلمي
Date: 01-27-2008, 11:24 AM
Parent: #1
مشكلة البلد دي انه الفول عند غير خبازه
بلا شداد
بلا مجدي
الكوره بالطريقه دي ما حتتطور ابدا
غيروا ادارة الكوره وشوفوا الحاصل بعد ده شنو
تحياتي
|
Post: #32
Title: Re: والله يا مازدا دخلتنا في قزازة ..
Author: ود الباوقة
Date: 01-28-2008, 11:22 AM
Parent: #26
مشكلة البلد دي انه الفول عند غير خبازه
بلا شداد
بلا مجدي
الكوره بالطريقه دي ما حتتطور ابدا
غيروا ادارة الكوره وشوفوا الحاصل بعد ده شنو
اخي المسلمي ..
صدقني الكورة لن تتقدم قيد انملة ما لم يستقيل شداد ومجموعته او يقال في اسرع وقت . بعد داك نشوف ناس مازدا واسماعيل عطا المنان وبقية الكورجة...
ود الباوقة
|
Post: #27
Title: Re: والله يا مازدا دخلتنا في قزازة ..
Author: ismeil abbas
Date: 01-27-2008, 06:51 PM
Parent: #1
أخونا/ ود الباوقة
والله خففت علينا ببوستك الخفيف وظريف ده...
ومازدا دخلنا فى كستبانة مش قزازة...
ولكن ليس وحده ....والمسؤلية مشتركة..
جاك مدافع المريخ..:
لماذا أصابكم الخرس والمنتخب السوداني يفرض نفسه ووجوده إفريقيا وعربيا وهو يتنقل من نصر إلى نصر ومن إنجاز إلى إنجاز ..؟
أليس هو مازدا نفسه من قاد المنتخب للفوز ببطولة سيكافا بعد غياب طويل .. ؟؟
أليس هو من تأهل مع المنتخب لنهائيات العرب ببيروت ...؟
اليس هو من حقق المعجزة بالتأهل إلى النهائيات الحلم بغانا ..؟
....
تعليقى:
لم يصيبنا الخرس لآن ليس هناك بديل وشداد حالف ما يجيب غير مازدا..
مازدا حاصل على منتخب جاهز أغلبيته من الهلال والمريخ المدربين تدريب جيد ومعسكرات خارجية إستعدادآ لفرقهم..ما كان عليه إلا وضع الخطط......وحتى الخطط لم يفلح فيها كما قال الطاهر أبوزيد أللاعب المصرى السابق والمعلق الرياضى حاليآ..
وهذا حالنا نسأل الله أن يرفعه..
مودتى...إسماعيل محمد احمد عباس.......
|
Post: #30
Title: Re: والله يا مازدا دخلتنا في قزازة ..
Author: ABDELMAGID ABDELMAGID
Date: 01-28-2008, 05:40 AM
Parent: #27
ود الباوقة ...
يعنى كان بقت هزيمه فهى لمازدا ....
و كان بقى نصر فهو ل ( الإنقاذ ! ) ...
الموضوع يا عزيزى ليس فى مازدا او اللاعبين او
حتى شداد و اتحاد الكرة ... و انما هو فى فساد جهاز الدولة و
النظام برمته و بتلك الآيديلوجية الإنقلابية الدكتاتورية ، العقائدية ،
الدينية ، الإقصائية العنصرية المتحجرة و المتخلفة و منطق الوصاية
و الحق الإلهى فى الحكم ... هذه هى مصيبة السودان و الشعب السودانى
و منشط الكرة جزء من كل ...
فلا يمكن ان تكون فلسفة الحكم قائمة على خزعبلات و غيبيات القرن الخامس الميلادى
و فى نفس الوقت يريد ( ذلك النظام ) أن يطل على العالم بوجه و منطق و حضارة
القرن الحادى و العشرين عن طريق منتخب الكرة القومى ... و الدليل اين اختفى ذلك الوزير الهمام المرافق للبعثة ( محمد يوسف ) ! و لا سعادتو بظهر فقط وقت الإنتصارات ! لزوم الوجاهة والعمة ( البيضا و مكوية ! ) نازلا من سلم الطائرة ( طازا ! ) بسبابته الى أعلى على طريقة جماعة ما يسمى ( بالمؤتمر الوطنى ! ) على سبيل ماحصل ف كاس سيكافا و المثل القائل .. الخيل تجقلب ( مازدا ) و الشكر لحماد ( الإنقاذ ! ) ... فنظام الإنقاذ عبارة عن غريق يبحث عن أى عشبة ليتسلق بها !!!!
المهم ... و الأهم ... ما زال لمنتخبنا مباراة أخرى و ان كانت شرفية فيجب أن نكون خلفهم و التحية لهم أبطالنا الذين وفروا لنا كل هذا حتى يكونوا أندادا لأسود الكاميرون ... و القحة احسن من صة الخشم ... فما زال نشيدنا الوطنى يتردد فى سماء غانا و مونديال أفريقيا ...
و التحية كذلك للفارس الشجاع كابتن محمد عبد الله مازدا ...
كسرة :
قلت لى ( طيارة ! ) ال ( اسمها ايه ! ) النزلت فى مطار مروى ! ديك ؟؟؟
عبدالماجد
|
Post: #31
Title: Re: والله يا مازدا دخلتنا في قزازة ..
Author: مزاحم الضوي
Date: 01-28-2008, 07:12 AM
Parent: #30
خط دفاع من ريتشارد ودامر وسفارى وطرفى دفاع من الزومه يسار وقلق يمين
قدامهم محورين جبريل وعلاء يوسف وراس المثلث البرنس فى الهجوم طمبل وطيارة
اولا : من ابجديات التدريب الخروج من الفتره التدريبة بتشكيلة اساسية من حداشر لاعب
وتادية عدد من المباريات بهذه التشكيلة من اجل التجانس واستيعاب فكرة المرب وخطتة
ثانيا :هذه التوليفة لم نشهدها فى اى مباراة تجريبيةعلى الأطلاق لا داخليا ولا خارجيا
وأكاد اجزم ان هؤلا الحداشر لم يشتركو مع بعض فى اى تقسيمة تمرين
ثالثا :لاعبو المنتخب يتكونو من الهلال والمريخ الهلال بيلعب ب 4/4/2 والمريخ برضو 4/4/2
ومدربو مازدا طيب 5/3/2 لزومه شنو ونحن المفروض نلعب مهاجمين كخيار وحيد
رابعا:اشراك اربعه لاعبين جددالزومة /دامر /علا يوسف / علاء طيارة فى البدايه مقارنة
بوضعهم احتياط فى الكورة الأولى اضافة لتحويل الطرف اليسار جبريل للعب كمحور لاول مره
فى حياتو وابعاد العجب من التشكيلة واشراكة مرة اخرى يوضح عشوائية التدريب وعبثية
المعسكر وعدم وجود خطة او اى فكر كروى
خامسا :مازدا فى المريخ بيلعب طيارة طرف يسار وفى المنتخب مهاجم
سادسا:من العجائب ان يكون كرنقو احتياطى لجبريل والزومة
سابعا: احتياطى المريخ وجدو الفرصة فى منتخب مازدا ونتوقع اشراك مسجلين المريخ
الجداد فى التشكيلة القادمة ومافيش داعى لمعسكر اعدادى للمريخ البركة فى مازدا وغانا
اخبرا العجب عاجب مازدا ومازدا عاجب شداد وشداد عاجب البشير والماعاجبو يشرب من
البحر
|
Post: #33
Title: Re: والله يا مازدا دخلتنا في قزازة ..
Author: موسى الحسين سيد أحمد
Date: 01-28-2008, 01:09 PM
Parent: #31
الأخ ود الباوقة
شكراً ضحكتني القصيدة العصماء التي جادت بها قريحكتم (ياعديلة) .
ياريتهم مادام الحكاية قدام في قدام كان استنجدوا بي جكسا وحوة الطقطاقة .
وبعدين هو دخلنا في قزازة ولا في وزة.
جعلك الله دوماص من المسرورين .
|
Post: #40
Title: Re: والله يا مازدا دخلتنا في قزازة ..
Author: ود الباوقة
Date: 01-29-2008, 11:40 AM
Parent: #33
وبعدين هو دخلنا في قزازة ولا في وزة.
اخي موسي الحسين ..
يا زول القزازة والوزة هينة الله يمرقنا من الكستبانة دي لو دخلنا فيها الا تاني يمرقنا منها شداد ....
لك الود..
ود الباوقة
|
Post: #38
Title: Re: والله يا مازدا دخلتنا في قزازة ..
Author: ود الباوقة
Date: 01-29-2008, 05:45 AM
Parent: #31
Quote: لاعبو المنتخب يتكونو من الهلال والمريخ الهلال بيلعب ب 4/4/2 والمريخ برضو 4/4/2
ومدربو مازدا طيب 5/3/2 لزومه شنو ونحن المفروض نلعب مهاجمين كخيار وحيد |
باشمهندس مزاحم ..
الخطة دي توضح بجلاء تام عدم ثقة مازدا في نفسه وفي لاعبيه وبها اراد الخروج باقل هزيمة ممكنة
اخبرا العجب عاجب مازدا ومازدا عاجب شداد وشداد عاجب البشير والماعاجبو يشرب من
البحر
وناس كرنقو راحو في حق الله .. والله حكاية ..
نسال الله ان يخفف هزيمتنا في المبارة القادمة . وبعد داك نشوف الحاصل شنو..
ود الباوقة
|
Post: #37
Title: Re: والله يا مازدا دخلتنا في قزازة ..
Author: ود الباوقة
Date: 01-29-2008, 05:17 AM
Parent: #30
ود الباوقة ...
يعنى كان بقت هزيمه فهى لمازدا ....
و كان بقى نصر فهو ل ( الإنقاذ ! ) ...
ماجد ..0
الحكومة لم تقصر اطلاقة مع المنتخب . قامت بدعمه ماديا ومعنويا ووفرت له معسكر في ملقـــا ما يحلمو بيهو في الحلمة السابعة .. قامت باعطائهم كل واحد قطعة ارض درجـــــــة اولي . دا غير الاكراميات الشخصية والمصاريف اصلها ما وقفت منهم . يعني عايز الانجاز بعد دا نقول لي منو.
قلت لى ( طيارة ! ) ال ( اسمها ايه ! ) النزلت فى مطار مروى ! ديك
هس طيارة واحدة يا اخوي انت يظهر عليك مش متابع وكدا .. خليك قريب ...
بعدين البوست دا رياضي فقط بوستات السياسة بي هناك عليك الله ...
ود الباوقة
|
Post: #35
Title: Re: والله يا مازدا دخلتنا في قزازة ..
Author: ود الباوقة
Date: 01-28-2008, 02:26 PM
Parent: #27
ومازدا دخلنا فى كستبانة مش قزازة...
اخي الوفي اسماعيل ..
اسالك سؤال هي الكستبانة قبل الوزة ولا بعدها .. غاتيو بــــــعد مبارة الكاميرون مية بالمية داخلين في واحدة فيهم لكن ان شاء الله تكون الكستبانة مش اخير من الوزة يا سمعة
عموما ارجو الا تستعجل الاتنين داخلنهم داخلنهم ..
ود الباوقة
|
Post: #34
Title: Re: والله يا مازدا دخلتنا في قزازة ..
Author: عبد اللطيف بكري أحمد
Date: 01-28-2008, 02:05 PM
Parent: #1
Quote: سادسا:من العجائب ان يكون كرنقو احتياطى لجبريل والزومة
|
هذه هي علامة الأستفهام الكبرى في تشكيلة المنتخب،،
ويجب أن يساءل عنها مازدا ،،
كرنقوهو اللاعبالوحيد بمواصفات أفريقية وعالمية في السودان،،
الفرق واضح جدا بين أحمد بابكر ومازدا فالأول لا يجامل والثاني
يوزان في الترضيات بحسابات بإسم الوطن،،
ماذا فعل مازدا طيلة فترة الإعداد ومعسكر ملقا الأسبانية؟؟
عمر بخيت إحتياطي لعلاء الدين جبيريل؟؟ والله هذه أعجوبة التدريب!!
لاعبي المحور بخيت وحمودة خارج التشكيلة توضح ضعف الفكر التدريبي
لمازدا الذي بدأ خائفا من الفراعنة وأتى بمدافعين لايجيدون صناعة الألعاب
والدفاع معاً فجاء الأداء في منتصف الملعب : يشتتو الكورة فما تلبث
أن تعود لهم من دفاع الخصم المرتاح،،
=
دا والله كلو كوم ، وكرنقو دا يامازدا كوم تاني لأنه ممكن يؤدي
دور تهديفي غائب حتى عن مهاجمي الفريق،،
وبعدين ياخ موسى الزومة دا حفظنا أسمو من كترة كواريكك معاه
في الخط طيلة فترة الدوري الممتاز وأن تعدل طريقة لعبه
(ياموسى ، ياموسى) ،، أرجع لأرشيف المباريات!! حرام عليك،،
موسى الزومة؟؟
|
Post: #36
Title: Re: والله يا مازدا دخلتنا في قزازة ..
Author: عادل محجوب المكي
Date: 01-28-2008, 03:56 PM
Parent: #34
سلام محبة ومعزة ود الباوقة
مشكلاتنا ما عندها حد وما بتنعد .. خليك من شداد والضباط التلاتة .. اتخيل معي السيد الوزير في مرة وهو رئيس لبعثة المنتخب الوطني الظافرة بكاس من الكاسات (غير المصنفة) اظن سيكافا طالع من الطيارة وهو يحمل علم السودان بين اصابعه من ورق 11سم × 20 سم .. حاجة تخجل .. لو ديل المصريين تلقاهم لابسين العلم المصري جلابية .. بعثة فيها الوزير ما يكون معاهم علم البلد .
اللاعب السوداني يعتبر لاعب جاهل ولا يهتم بالامور الاكاديمية مما يسبب له محدودية التفكير والفهم الخططي للعبة فمهما كانت موهبة اللاعب فيحتاج ان يكون متفتح العقل والذهن .
انظر للعيبة مصر القدامي ماشاالله جميعهم نقاد رياضيين وموظفين في الاتحاد الافريقي شوف محمود الخطيب وطاهر ابو زيد ومصطفى عبده وقرن شطة (مرفوت جامعة الخرطوم) تلقاه الواحد فيهم خريج زراعة ولا اعلام ولا طب ولا علوم المهم تمرحل في التعليم .
وعندما هاجر الرشيد المهدية واهتم بالتعليم سطع نجمه كمعلق في استديوهات الـ ART .. غاية لاعبنا يركب عربية وبنطلون جينز ويقعد يلف في الخرطوم من غير هدف .
نحن محتاجين نهتم بالمدارس السنية وبالبنية التحتية للرياضة عامة وان نستجلب خبراء لتطوير اللعبة مما يعنى فلوس فلوس فلوس فلوس . ومع شداد والوزير اياه والظباط التلاتة ربك يرحم .
ود المكي
|
Post: #39
Title: Re: والله يا مازدا دخلتنا في قزازة ..
Author: ود الباوقة
Date: 01-29-2008, 11:28 AM
Parent: #34
الفرق واضح جدا بين أحمد بابكر ومازدا فالأول لا يجامل والثاني
يوزان في الترضيات بحسابات بإسم الوطن،،
نعم اخي عبد اللطيف .. احمد بابكر رجــــــل دقيق وصارم في المواعيد وضبطها وكل من يتأخر من اللاعبين عن التمرين يتم استبعاده مهما كان حجمه
ماذا فعل مازدا طيلة فترة الإعداد ومعسكر ملقا الأسبانية؟؟
وما>ا فعل قبل >لك ...
وبعدين ياخ موسى الزومة دا حفظنا أسمو من كترة كواريكك معاه
في الخط طيلة فترة الدوري الممتاز وأن تعدل طريقة لعبه
شوف يا عبد اللطيف يا اخوي المدرب من تلقاهو يكورك ويكروك اقنع منو ..
ود الباوقة
|
|