مالم يقله بيدباء .. من نكات الفنانين والأدباء ..

كثير من الأدباء والفنانين .. قدامى ومحدثين .. إشتهروا بخفة الظل ورشاقة النكتة وحضور البديهة.. حتى أن بعض الناس قد نسبوا إليهم مالم يكن لهم .. ولعل أشهرهم صهري وجد بنتي (هبة) الفنان الراحل عبد العزيز داؤود.. في هذه الإستراحة نروي بعض ما عايشناه من قفشات ومُلح .. بعضها روي لي من أصحابها مباشرة والبعض الآخر سماعي .. والبوست مفتوح لكل من علقت بذهنه بعض من هذه النوادر والتي تتميز بكونها تأتي في صيغة منتهى الذكاء ..(أنا غايتو مجهز محامي كارب في حال إنو واحد إتضرر من النكات دي) ..

* نبدأ بعمنا المرحوم الفنان بحق خضر بشير .. يقال أن الفنان محمود عبدالعزيز زاره وهو في فراش المرض .. يعاني ما يعاني من ويلاته ومن إهمال الدولة ومؤسساتها وتجاهلهم له في محنته .. محمود كان عاوز يشتري منه أغنية (الأوصفوك) لينزلها في شريط .. وأعطاه مبلغ تلتمائة ألف ثمنا لها.. وكان هناك بعض الحضور.. وتوقعوا جميعا من الفنان الكبير أن يزجر الفنان الصغير على الأقل ويرفض الصفقة.. قالوا الفنان خضر بشير قبّل على الحيطة شوية .. ودخل القروش تحت المخدة .. وقال لمحمود (تاني عاوز ياتا..??) ..

* و يقال أيضا أن الفنان الكبير خضر بشير قد سئل عن رأيه الفني في قريبه الفنان المتميز النور الجيلاني .. فقال (مالو .. ما راجل .. مالو..??!!)

صاحبي الشاعر الصادق الرضي .. دخل كافتيريا الجامعة .. جعان لدرجة إنو تقول ليهو أقرا لي قصيدة يقرا ليك menu .. مافي وقت عشان يقيف في الكاشير ويطلب أكل .. لقا ليك جماعة أصحابو قاعدين ياكلو .. طوالي راح داخل ليك يمين .. وقعد يقرا (ويطعمون الطعام على حبه مسكينا ويتيما وأسيرا.. إلى آخر الآية) .. واحدة حنكوشة عاملة مثقفاتية قالت ليه (الــ ـــله .. بالله ده منو الكتب القصيدة دي ?? لكن ماروعة..) قال ليها(دي الأعمال الكاملة لأبو الإل) ..

الصادق الرضي طبعا عضو في المنبر.. وممكن يجي ينكر أو يغالط في بعض التفاصيل ..لكن مافي طريقة ..أنا متذكر القصة كويس بكل تفاصيلها التي تم إختصارها..